Itok, Ļoor Eō
Wanjon̄ak eo kōn Irooj eo: Juon Katak kōn Pokake
Katak im Bujen Ko 101:43–62 ej kwaļo̧k juon wanjon̄ak me kar letok n̄an kōmeļeļeik etke ro Rekwojarjar rekar kaddiwōjļo̧k er jān Missouri.
Ilo wanjon̄ak in, ro rikarejeran rekar jino kalōk juon tawōr ak kar ļōmņak bwe “ejjeļo̧k unin aikuji” juon (Katak im Bujen Ko 101:49). Kōnke rekar jab kalōk tawōr eo, ekkar ejjeļo̧k kakkōl n̄e rikōjdāt eo ej deļo̧n̄e im kakkure jikin kallib eo.
Ak irooj eo ekar jiron̄ ro rikarejeran n̄an katōk ilo jikin kallib eo im kalōke iturin wōjke ko im juon tawōr bwe riwaj eo en lale āneo.
Ro rikarejar rekar katōk jikin kallib eo im kalōke ak rekar kālet n̄an jab kalōk tawōr eo.
Juon rikōjdāt eo ekar kakkure jikin kallib eo.
Kōmeļeļe ko jān Ben Simonsen
Ikar ke kajjitōk kōn kien ko an Anij?
Kwaar ke, āinwōt ro rikarejeran, kar ļōmņak eļan̄n̄e juon kien ekar lukkuun menin aikuj? Wanjon̄ak in ej katakin kōj bwe kien ko an Irooj rej kōjparok kōj im jipan̄ kōj mour lem̧ōņōņō ilo mour ko ad (bar lale Mosaia 2:41; Katak im Bujen Ko 82:8–10).
Ta eo jemaron̄ kōm̧m̧ane n̄e jejjab loe aorōk in juon kien?
-
Ekkatak juon unin ekkatak im jar bwe Irooj en jipan̄ kōj “en̄jake eļan̄n̄e ejim̧we” (Katak im Bujen Ko 9:8).
-
Keememej iien ko remootļo̧k ke pokake ekar bōktok kōjeraam̧m̧an ko.1
-
Jerbal kōn tōmak, lōke bwe jenaaj meļeļe “ālkin mālejjon̄ in [ad] tōmak” (Ether 12:6).