Ainikien ko an Armej ro Rekwojarjar ilo Raan Ko Āliktata
Kajtōm̧ar eo Aō ak Kūr eo Aō?
Ke iaar kajjieon̄ in kakūrm̧ool eddo ko aō ilo priesthood, Irooj eaar kwaļo̧k n̄an eō ke E ejeļā kōn jekjek eo ipād ie kōn jāān.
Pija ko jān Getty
Ke iaar kūr āinwōt juon būreejtōn n̄an doulul eo an elder ro ilo 2000, ekar wōr wōt jiljilimjuon̄ elder ro rej pād ilo kweilo̧k eo an priesthood. Barāinwōt, ekar jab em̧m̧an ammim kōm̧m̧ane jerbal in katakin ko ilo m̧oko—kiiō jerbal in karejar—loļo̧k ko.
Iaar jeļā kōm kar ioon juon apan̄ eļap n̄an im̧we elder ro n̄an ruj. Kōn menin, n̄an ijjino, kōm kar kālet n̄an kōkāāl ijjitōn̄ ko im kōļapļo̧k jerbal in tōl.
Kōnke ij juon attorney eo ej jerbal ippān make, emakijkij aō ito itak. Ikar lukkuun in boub, ak ikar kōņaan kakūrm̧ool eddo ko aō ilo priesthood.
Juon raan, ikar aikuj in iuwe ilo baj eo n̄an bar juon jikin n̄an bar laleļo̧k juon kōjtōm̧ar. Kōn an jabwe jāān ippa, ikar kōtmene ke kajtōm̧ar eo aō en kar errā n̄an kōļļāik eō kadede.
Ilo iaļ eo ļo̧k n̄an jikin baj eo, ikar pepe in etal in loļo̧k jet iaan ro uwaan doulul eo im rōjan̄ er n̄an loļo̧k baam̧le ko aer. Jet rekar meļo̧kļo̧k ak kar kallim̧ur n̄an kōm̧m̧ane. Jet rekar kallim̧ur n̄an kadedeļo̧k loļo̧k ko aer ilo wiik eo wōt.
Ikar lukkuun m̧ōņōņō kōn wujlepļo̧k ko aer kōn menin ikar pepe in loļo̧k im rōjan̄ ro jet uwaan doulul eo. Mokta jen aō kar jeļā, ekar eļļāļo̧k jān rālep. Kōn menin, ijjelo̧kin etal jen taun, iaar pepe in etal n̄an opiij eo aō n̄an etale keij ko an kajtōm̧ar ro.
Iaar bwilōn̄, ke iaar tōparļo̧k opiij eo aō, kajtōm̧ar eo aō ekar jutak inam̧ōj ippān bar juon armej. Iaar kōmeļeļeik kajtōm̧ar eo aō ke iar maron̄ in etale keij eo an im naaj kōm̧m̧ane juon riboot n̄an e raan eo tok juon. Ekar ba ekar itok n̄an kwaļo̧k kadkadin n̄a n̄an juon kajtōm̧ar ekāāl. Ālkin amjel kar kōnono, kōmjel kar errā kōn juon wōnāān n̄an aō jipan̄ e mijaļ abōņōņō eo an. Innām, ālkin, kajtōm̧ar eo ekar kōļļāik eō kadede.
N̄an n̄a, ekar juon kabwilōn̄lōn̄. Jemedwōj Ilan̄ ejeļā ikar kajjieon̄ in tiljek n̄an E. E ebar jeļā aikuj ko aō. E ekar kōjeraam̧m̧an eō ilo elōn̄ wāween ko ilo iiō ko, ak tōre in Ej kōjeraam̧m̧an eō kōn jāān. Eaar kakūrm̧ool naan eo An ilo jeje ko rekwojarjar n̄an ro rej jerbal n̄an E: “A kom̧win pukot m̧okta aelōn̄ in Anij, im kwōjarjar eo An; im naaj koorļo̧k men kein otemjej n̄an kom̧” (Matu 6:33).
Im doulul eo am̧ ilo elder? Irooj ej kōjeraam̧m̧an kōj ilo ad dipuk im̧aan kōn juon jetōb in ippān doon. Katakin ilo m̧oko tokālik ekar ļapļo̧k n̄an 100 bōjāān, im oran priesthood elder ro retiljek ekar ļapļo̧k n̄an 35.
Ij kam̧ool bwe jemaron̄ aolep kein jerbal ilo pein Irooj n̄an lo m̧ōņōņō im kōjeraam̧m̧an ko n̄an jerbal n̄an E im jerbal n̄an ro jet.