“Kwelo̧k Eo Eļap: Juon Kweilo̧k an Kabun̄ in Ipeļaakin Laļ in,” Liaona, Jeptōm̧ba/Oktoba 2021
Pedped ko Im̧aan Tata an Gospel eo
Kweilo̧k Eo Eļap: Juon Kweilo̧k an Kabun̄ in Ipeļaakin Laļ in
Jej ron̄jake rikanaan ro im ritōl ro jet an Kabun̄ in ilo kweilo̧k eo eļap. Rej katakin kōj ta eo Anij ekōņaan bwe jen ron̄.
Kajjojo Eprōļ im Oktoba, Kabun̄ in ej kōm̧m̧ane juon kweilo̧k ņa etan kweilo̧k eo eļap. Ritōl ro rej kwaļo̧k im kam̧ool kōn Jisōs Kraist im gospel eo An. Kweilo̧k eo eļap ej kōm̧m̧an ilo Salt Lake City, Utah, USA, im ej diwōjļo̧k n̄an aolepān laļ in elōn̄ļo̧k jān 90 kajin ko. Aolep membōr ro im jabdewōt armej ro rej itok limoier rej ruwainene n̄an ron̄jake kōnono kein.
Kweilo̧k eo Eļap Jinointata
Kabun̄ in ekar ejaak ilo kar juon kweilo̧k ilo Eprōļ 6, 1830 (lale Katak im Bujen Ko 20). Kweilo̧k eo eļap jinointata ekar kōm̧m̧an ilo Juun 9, 1830. Jān tōre eo, kweilo̧k eo eļap ekar tōl ium̧win tōl eo an Būreejtōn eo an Kabun̄ in ijoko membōr ro remaron̄ kuk ippān doon ie. Ilo 1840 eo, ritōl ro rekar jino kōm̧m̧ane kweilo̧k eo ruo alen ilo juon iiō.
Elmen an Kweilo̧k ko Ejaak Rainin
Būreejtōnji eo Kein Kajuon, Doulul eo an Jon̄oulruo Rijilōk ro, im ritōl ro jet an Kabun̄ in rej kōnono ilo kweilo̧k eo eļap. Tabernacle Choir eo ilo Temple Square im choir ko jet an Kabun̄ rej kōpooji al ko. Kajjojo kweilo̧k ewōr ļalem m̧wen̄an ko: jilu ilo Jādede im ruo ilo Jabōt.
Katak ko an Ritōl ro
Ilo allōn̄ ko m̧okta jān kweilo̧k eo, ritōl ro an Kabun̄ in rej jar kōn ta eo n̄an katakin. Irooj ej im̧we er n̄an jeļā ta eo rej aikuj ba. Rej kwaļo̧k m̧ool ko ilo gospel in im kajjitōk ippād bwe jen kōjparok kien ko an Anij. Rej kam̧ool kōn Jisōs Kraist im rōjan̄ kōj n̄an ļoor E.
Katak jān Kweilo̧k eo Eļap
Mokta jān kweilo̧k eo eļap, jemaron̄ jar bwe jen jeļā ta eo Irooj ekōņaan bwe jen ekkatak. Ilo ad ron̄jake katak ko, Jetōb enaaj katakin kōj ta eo jej aikuj in jeļā. Ālkin kwelo̧k eo, katak ko rej waļo̧k ilo ChurchofJesusChrist.org, ilo gospel Library app eo, im ilo Liaona. Jemaron̄ lukkuun ekkatak kōn katak ko n̄an jeļā eļapļo̧k kōn Jisōs Kraist im gospel eo An.
Jān Jeje ko Rekwojarjar
Jisōs Kraist ekar kwaļo̧k bwe jej aikuj kweilo̧k emakijkij ippān doon (lale 3 Nipai 18:22).
N̄e membōr ro an Kabun̄ in rej kabun̄jar ippān doon, Irooj enaaj pād ippāer (lale Matu 18:20).
Irooj ekar kakien ro uwaan Kabun̄ in n̄an ”katakin im kotak doon” (Katak im Bujen Ko 43:8).
Ilo an membōr ro an Kabun̄ in tiljek im kōjerbal tōmak ilo Kraist, An Jetōb enaaj pād ippāer ilo aer kweilo̧k (lale Katak im Bujen Ko 44:2).