Ena Kaukauwa ni Kalou ena Lagilagi Cecere

Ni oti toka e tolu na yabaki na iMatai ni Raivotu, ena bogi ni ika 21 ni Sepiteba, 1823, a masu o Josefa Simici me bokoci na nona ivalavala ca ka me kila na kena ituvaki ena mata ni Kalou.¹ A rairai mai e dua na tamata ena nona idavodavo, kaciva na yacai Josefa, ka kaya “ni sa italai mai na iserau ni Kalou … ka yacana o Moronai.” A kaya “ni sa digitaki [Josefa] na Kalou me qarava e dua na cakacaka”² ka a qai vakasalataki koya baleta na kena tadu mai na iVola i Momani. E vakabibitaki, ni iVola i Momani e isevu ni ulutaga ena itukutuku i Moronai.

Na iVola i Momani sa dua tale na ivakadinadina kei Jisu Karisito ka iyaragi levu ni saumaki ena iotioti ni siga. Na inaki ni wasei na kosipeli meda sureti kecega meda lako vei Jisu Karisito,³ ciqoma na veivakakalougatataki ni kosipeli vakalesui mai, ka vosota ki na ivakataotioti ena vakabauta na iVakabula.⁴ Vukea na tamata yadua me sotava na veisau cecere ni yalodra⁵ ka umanaki ira vua na Turaga ena veiyalayalati tabu kei na cakacaka vakalotu o ya na inaki bibi ni kena wasei na kosipeli.

Na nona vakatakila o Moronai na iVola i Momani vei Josefa Simici sa isevu ni cakacaka ni veivakabulai kei na bula vakacerei ni tamata yadua ena yasa oqo ni ilati ena taucoko ni tabagauna.

Tomana nona vakasala vei Josefa, a cavuta o Moronai mai na ivola i Malakai ena Veiyalayalati Makawa, ka duidui vakalailai ena vosa mai na ivakadewa ni King James:

“Raica, au na vakatakila vei iko na Matabete, ena ligai Ilaija na parofita, ni se bera ni qai yaco mai na siga levu ka rerevaki ni Turaga.

“… Ka na tea ko koya e lomadra na gone na yalayala a caka vei ira na qase, ka na gole na lomadra na gone vei ira na nodra qase. Kevaka e sega ni vakakina, sa na vakarusai sara na vuravura taucoko ena nona lako mai.”⁶

Sa noda inaki me tara na valetabu me vakarautaki na veivanua tabu me yaco na veiyalayalati tabu kei na cakacaka vakalotu ni veivakabulai kei na bula vakacerei ni vuvale ni kawa tamata sa qaravi kina, na bula kei na mate. Na ivakasala i Moronai vei Josefa Simici baleta na itavi bibi nei Ilaija kei na lewa ni matabete sa vakatetea na cakacaka ni veivakabulai kei na bula vakacerei ena yasa ni ilaiti oqo sa tekivu ena noda itabagauna na nodra cakacaka na mate ena yasa ni ilati kadua.

Me ivakalekaleka, na veivakavulici nei Moronai ena Sepiteba ni 1823 baleta na iVola i Momani kei na itavi nei Ilaija me tauyavutaka na yavu ni vunau ni cakacaka ni veivakabulai kei na bula vakacerei ena yasa ruarua ni ilati.

Na lesoni a vulica o Josefa Simici mai vei Moronai a vakauqeta na ituvaki yadua ni nona kaulotu. Me vakataka, ena dua na soqoni dokai ena Valetabu e Kirtland ena ika 6 ni Epereli, 1837, a vakamacalataka na Parofita, “Ni sa oti kece na ka me tukuni, na itavi levu ka bibi duadua o ya na vunautaki ni Kosipeli.”⁷

Voleka ni oti toka e vitu na yabaki, ena ika 7 ni Epereli, 1844, a vunau kina o Josefa Simici e kilai tu nikua me King Follett Discourse. A kaya ena nona vosa, “Na itavi cecere duadua ena vuravura oqo o ya ni Kalou sa lesi keda meda vakasaqara na wekada sa mate.”⁸

Ia na vunautaki ni kosipeli ka vakasaqarai ira noda mate rau sa itavi cecere ka ilesilesi sa solia vei keda na Kalou meda cakava? Au vakabauta ni Parofita Josefa Simici a vakabibitaka tiko ena itukutuku e rua na dina bibi ni veiyalayalati o ya, sa yaco ena lewa ni cakacaka vakalotu ni matabete, e rawa ni vauci keda vua na Turaga o Jisu Karisito ka sa usutu ni cakacaka ni veivakabulai kei na bula vakacerei ena yasa ruarua ni ilati.

Na cakacaka ni kaulotu na valetabu na tuvakawa sa ituvaki cokonaki ka isema ni cakacaka levu oqo e vakanamata kina veiyalayalati tabu kei na cakacaka vakalotu me rawa ni da ciqoma na kaukauwa vakalou ena noda bula, ka yaco, meda lesu kina iserau nei Tamada Vakalomalagi. Io, na itukutuku taumada e rua ni Parofita a rairai duatani toka, e dina, e vakatakilakilataka nai usutu bibi ni cakacaka cecere oqo ni gauna oqo.

E kaya na iVakabula:

“Vakataqara vei kemudou na noqu ivua, ka vuli vei au; ni’u sa yalomalua ka yalomalumalumu: dou na kunea kina na vakacegu ni yalomudou.

“Ni sa rawarawa na noqu ivua, ka mamada na noqu icolacola.”⁹

Eda sa taqara na ivua ni iVakabula vei keda ni da vulica, ciqoma ena bula kilikili kaya, ka doka na veiyalayalati kei na cakacaka tabu vakalotu. Eda vauci vinaka tu vua vata kei na iVakabula ni da nanuma ena yalodina ka cakava noda vinaka ka bulataka noda itavi eda sa ciqoma. Na vauci vata kei Koya sa ivurevure ni kaukauwa vakayalo ena veidraki yadua ni noda bula.

Au veisureti mo ni nanuma na kalougata sa yalataki vei ira na tisaipeli sa maroroya na veiyalayalati i Jisu Karisito. Me vakataki, Nifai a “raica na lotu ni Lami ni Kalou [edaidai], ka ra sa lewe lailai ga na lewena, … na nona yalododonu na Kalou, ni ra sa tu talega e dela ni vuravura; ka sa lailai na nodra … kaukauwa.”¹⁰

Sa “raica na kaukauwa ni Lami ni Kalou, ni sa sobuti ira na yalododonu ni lotu ni Lami, kei ira na nona tamata ni veiyalayalati na Turaga, … ka ra sa vakaiyaragi tu ena ivalavala dodonu kei na kaukauwa ni Kalou ena lagilagi cecere.”¹¹

Na malanivosa “vakairagi tu ena ivalavala dodonu kei na kaukauwa ni Kalou ena lagilagi cecere” e sega walega ni vakasama totoka se ivakaraitaki ni vosa totoka vaka ivolatabu. Ia, na kalougata oqo sa vakarautaki vakaidina tu ena nodra bula na tisaipeli ni Turaga sega ni wili rawa.

Na noqu ilesilesi vaka-lewe ni Le Tinikarua e kauti au ki vuravura raraba. Au kalougata n’iu sotava ka vulica na veilesoni guilecavi dredre mai vei kemuni na lewe vuqa. Au vakadinadinataka ni ira na tamata veiyalayalati ni Turaga nikua sa vakaiyaragi vakaidina tu ena ivalavala dodonu ena kaukauwa ni Kalou ena lagilagi cecere. Au sa vakadinadinataka na vakabauta, yaloqaqa, nanuma, gumatua, kei na reki e uasivia na kaukauwa ni tamata—ni Kalou duadua ga ena solia.

Au vakadinadinataka na dodonu kei na kaukauwa lagilagi cecere ni Kalou ciqomi ena yalodina ki na veiyalayalati kei na cakacaka vakalotu, ena bula ni dua na itabagone lewe ni Lotu a paralase veimama tu mai na dua na coqa ni lori vakarerevaki. Ni oti na nona veivula dredre ni vakabulabula kei na veisau vou ni bula yalani tu na veitosoyaki, au sotava ka veivosaki kei na tamata yalodina oqo. Ni keirau sa veivosaki au a taroga, “Na cava o sa vulica ena nomu sotava na ka oqo?” A sauma totolo mai vakaoqo, “Au sega ni rarawa. Au sega ni cudru. Sa na DAUMAKA na ka kece.”

Au vakadinadinataka na dodonu kei na kaukauwa lagilagi cecere ni Kalou, ciqomi ena yalodina ki na veiyalayalati kei na cakacaka vakalotu, ena nodra bula na lewe ni Lotu vou era sa papitaiso ka vakadeitaki. O ira na saumaki oqo era guta mera vuli ka veiqaravi, gagadre ia era sega ni vakadeitaka na sala mera biuta na itovo makawa kei na ivakarau ni bula, ia era rekitaka mera “koro vata ga kei ira sa lotu, ka sa lewe ni vale ni Kalou.”¹²

Au vakadinadinataka na dodonu kei na kaukauwa lagilagi cecere ni Kalou, ciqomi ena yalodina ki na veiyalayalati kei na cakacaka vakalotu, ena bula ni dua na vuvale a qaravi vinaka e dua na tamata vakawati ka itubutubu tauvimate bibi. O ira na tisaipeli qaqa oqo era tukuna nodra gauna galili vakavuvale—vakakina na nodra kila na liga ni Turaga ni laveta ka vaqaqacotaki ira. Na vuvale oqo a vakavinavinakataka dina na dredre ni bula e sotavi e vakavuna noda tubu ka yaco meda vakataka cake na Tamada Vakalomalagi kei na noda Dauveivueti, o Jisu Karisito. Na Kalou a vukea ka vakalougatataka na vuvale oqo vata kei na itokani ni Yalo Tabu ka cakava nodratou itikotiko me vanua tabu ni veitaqomaki me valetabu.

Au vakadinadinataka na dodonu kei na kaukauwa lagilagi cecere ni Kalou, ciqomi ena yalodina ki na veiyalayalati kei na cakacaka vakalotu, ena nona bula e dua na lewe ni Lotu a sotava na rarawa bibi ni sa sere. Na rarawa vakayalo kei na vakasama a kaukauwa sara ena ituvaki ni veicavilaki e semati kina voroki ni veiyalayalati mai vei watina kei na kavoro ni nodrau vakamau. A gadreva na lewa dodonu ka mo nuitaki.

Nona sasaga na marama yalodina oqo ena ka kece a sotava, a vulica ka tugana na Veisorovaki ni iVakabula ena yalodina kei na qaqa mai na kena se qai bau yaco ena nona bula. Sa yaco sara, me kila vinaka vakatitobu na ilesilesi veivueti i Karisito sa savata na yalona—Nona vakararawataki baleta noda ivalavala ca, kei na noda mosi, malumalumu, lomaleqa, kei na yaluma. A sa vakauqeti sara me tarogi koya ga ena taro titobu: Ni sa mai saumi na isau ni ivalavala ca oqori, ena rawa beka mo kerea me saumi tale vakarua? A qai kila ni ilavaki vakaoqo ena sega ni rawa me dodonu se loloma.

A vulica ni vauci koya vua na iVakabula ena veiyalayalati kei na cakacaka vakalotu ena vueta nona mavoa a cakava e dua a vakayagataka cala na bula galala ka rawa vei marama me kunea na yalo me veivosoti ka ciqoma na vakacegu, veivueti , kei na loloma.

Na veiyalayalati yalataki kei na kalougata ena rawati ga baleta na noda iVakabula, o Jisu Karisito. Sa sureti keda meda rai yani Vua,¹³ lako mai Vua,¹⁴ vuli mai Vua,¹⁵ ka vauci keda ki Vua¹⁶ ena veiyalayalati kei na cakacaka vakalotu ni Nona kosipeli vakalesuimai. Au vakadinata ka yalataka na dokai ni veiyalayalati ena yaragitaki keda ena ivalavala dodonu ena kaukauwa ni Kalou ena lagilagi cecere. Kau sa vakadinata ni Turaga o Jisu Karisito sa bula tiko sa noda iVakabula. Ena dina oqo au sa vakadinadinataka ena reki ena yaca tabu i Jisu Karisito, emeni.