E Dua na Veivakayarayarataki ni Vinaka e Vuravura Raraba

Ni ra tomana tiko na parofita kei na apositolo na nodra veiqaravi, na nodra veivakayarayarataki ni vinaka e vakalougatataka e vuqa na bula ka tara cake e dua na yalo ni veiqaravi, veituberi, kei na inuinui e vuravura raraba. Oqo eso na vei ka talei ni veiqaravi oya ena ono na vula sa oti.

Ni vakayacori tiko na Olimipiki ni Vulaikatakata mai Tokio, a vakabira o Peresitedi Russell M. Nelson ena tabana vakaitukutuku raraba me baleta na kena gadrevi me kau laivi na veileti kei na kena yaga na veitokani, veidokai, kei na duavata.

A vakaitavi o Elder Jeffrey R. Holland ena Kuoramu ni iApositolo Le Tinikarua ena dua na vidio koniferedi ni vuravura raraba ka a qaravi mai Windsor, Igiladi. Era a veitalanoataka o ira na vosa ena koniferedi oya na nodra ituvaki ni vakasama kei na yalo o ira na milioni na tamata era tiko ena keba ni isenivalu. A kerea Elder Holland na veitokoni me ra vakatarai o ira na isenivalu me ra vakaraitaka “na nodra vakabauta vakalotu sara ga ka kedra ivakatakilakila.” A vakaitavi talega o Sisita Sharon Eubank, na iMatai ni Daunivakasala ena Mataveiliutaki Raraba ni iSoqosoqo ni Veivukei ka peresitedi ni Loloma ni Yalododonu Edaidai.

A vosa o Elder Quentin L. Cook ena Kuoramu ni iApositolo Le Tinikarua ena dua na matabose ni ilawalawa ni veimatalotu ka a vakayacori ena Notre Dame University e Indiana, Amerika. A bolei ira na tiko ena soqoni o Elder Cook me ra “tu me vaka e dua na bikeni ni vakabauta kei na duavata ena vuravura ka dau vakawaleni rau ruarua vakawasoma.”

A vosa o Elder Ronald A. Rasband ena Kuoramu ni iApositolo Le Tinikarua ena G20 Soqo ni Vakabauta Veicurumaki ka a vakayacori e Bologna, Itali. (Na veimatanitu ni G20 era lewena na 20 na veimatanitu vakailavo levu duadua e vuravura.) “Ni soli na galala ki na lotu me tubu ka kadre vinaka, era dau vakayacora na vakabauta ena veivanua kecega na cakacaka vinaka ka so na gauna na veiqaravi yaloqaqa,” a kaya o Elder Rasband. Ena soqo vata ga oya, a vosa kina o Sisita Eubank ena revurevu ni viakana kei na kana vakaca ena nodra bula vaka dravudravua na gone. “Na veisau e rawa walega … ni rawati mai na veiwekani vakatamata yadua ni veivakabauti,” e kaya o koya.

Ni oti e dua na uneune ka a vakaleqai Haiti, a vosa o Elder Ulisses Soares ena Kuoramu ni iApositolo Le Tinikarua ena dua na kakaburaki ni lotu ki vei ira na lewenilotu vosa vaka-Varanise ena Caribbean, ka vakananuma vei ira ni “vakabauta e dolava na kaukauwa ni Kalou ena noda bula.” O Sisita Reyna I. Aburto, na iKarua ni Daunivakasala ena Mataveiliutaki Raraba ni iSoqosoqo ni Veivukei, e a vakaitavi talega ena lotu oya ka a vakayagataka na initaneti me vosa kina vei ira na lewenilotu ena soqoni ni veiliutaki kei na koniferedi ni iteki. “Eda rawa ni tudei,” e a kaya o koya, “kevaka sara mada ga e basika mai na cagi ka yavavala na vuravura wavoliti keda.” A vosa talega o Elder Soares ena dua na kakaburaki ena lotu me baleti ira na itabagone mai na Caribbean, ka vakananuma vei ira ni “eda gadreva na veivakauqeti ni Yalo Tabu ena noda bula.”