“Shërbimi në Thirrjet në Kishë”, Liahona, Mars/Prill 2022.
Bazat e Ungjillit
Shërbimi në Thirrjet e Kishës
Udhëheqësit e Kishës u kërkojnë anëtarëve të shërbejnë në caktime specifike që njihen si “thirrje”. Thirrjet u japin anëtarëve mundësi që t’u shërbejnë të tjerëve dhe të afrohen më shumë me Perëndinë.
Fotografia nga David Bowen Newton
Kur shërbejmë në thirrjet tona, ne ndihmojmë që të përmbushet vepra e Perëndisë. Ne u mësojmë të tjerëve për Atin Qiellor dhe Jezu Krishtin dhe i ndihmojmë ata që t’u afrohen më shumë Atyre. Ne gjithashtu marrim bekime ndërsa shërbejmë me besnikëri.
Marrja e Thirrjeve
Ata që shërbejnë në Kishë, thirren nga Perëndia. Udhëheqësit e Kishës luten për frymëzim që të dinë se kujt t’i kërkojnë që të shërbejnë në çdo thirrje. Më pas, një udhëheqës i kërkon një anëtari/eje që të shërbejë dhe i shpjegon detyrat e thirrjes. Për shumicën e thirrjeve, anëtarët mbështeten në një mbledhje të Kishës. Anëtarët e lagjes ose të degës japin votën mbështetëse. Kjo do të thotë se ata janë të gatshëm ta përkrahin personin që thirret. Më pas anëtarit/es do t’i jepet një bekim nga një udhëheqës priftërie. Ky quhet veçim. Anëtarit/es do t’i jepet autoritet për të vepruar në atë thirrje dhe bekime të tjera për ta ndihmuar atë që të shërbejë.
Peshkopët
Peshkopi është udhëheqësi i një lagjeje. (Në një degë, një president dege është njësoj si një peshkop.) Presidenti i kunjit rekomandon një udhëheqës të denjë priftërie që të thirret si peshkop. Presidenca e Parë e miraton thirrjen. Peshkopi më pas mbështetet dhe veçohet që të shërbejë. Ai gjithashtu merr çelësat e priftërisë, që do të thotë se ai ka autoritetin për ta drejtuar lagjen. Si peshkop, ai iu shërben dhe i udhëheq të gjithë anëtarët e lagjes.
Presidencat
Kuorumet e priftërisë dhe organizatat e Shoqatës së Ndihmës, Të Rejave, Fillores dhe Shkollës të së Dielës udhëhiqen nga presidencat, zakonisht një president/e dhe dy këshilltarë/e. Presidencat e kuorumeve të pleqve thirren dhe veçohen nga presidenca e kunjit. Peshkopata u kërkon anëtarëve të shërbejnë në presidenca të tjera në lagje dhe i veçon ata. Të gjithë udhëheqësit u shërbejnë anëtarëve në kuorumet ose organizatat e tyre. Ata u japin shërbesë nevojave të anëtarëve dhe i ndihmojnë ata të ndiejnë dashurinë e Perëndisë.
Thirrje të Tjera
Thirrjet e tjera në Kishë përfshijnë mësimdhënien, ndihmën për muzikën, mbajtjen e dokumenteve, planifikimin e aktiviteteve për rininë ose fëmijët dhe shërbimin në mënyra të tjera. Çdo thirrje në Kishë është e rëndësishme dhe u jep anëtarëve mundësinë t’u shërbejnë të tjerëve dhe t’i shërbejnë Perëndisë. Ndërsa punojmë të gjithë së bashku për t’i përmbushur thirrjet tona, ne i forcojmë të tjerët dhe ndihmojmë që Kisha të rritet.