“Amy A. Wright,” Liahona, Mē 2022.
Amy A. Wright
Tokoni ʻUluaki ʻi he Kau Palesitenisī Lahi ʻo e Palaimelí
ʻOku manatu ʻa Sisitā ʻEimi A. Laiti ki ha pō ʻe taha he ngaahi taʻu kuohilí ʻi he taimi naʻe faitoʻo ai ia ʻi he kanisā lēvolo 4 ʻo e taungafanaú. Naʻá ne ongoʻi mamahi ʻaupito ʻo mole ai ʻene ongoʻi fehokotaki ki he ʻOtuá. Neongo ʻene fakamoʻoní mo ʻene tui ki he Tamai Hēvaní, Fakamoʻuí, pea mo e palani ʻo e fakamoʻuí, ka naʻá ne faingataʻaʻia ʻaupito.
ʻI he kei siʻi ʻa Sisitā Laití, naʻe akoʻi ia ʻe heʻene faʻeé mo e kau taki ʻo e Palaimelí ko e taimi ʻokú ne ongoʻi manavahē, taʻelata, pe fie maʻu ai ʻa e Laumālié, ʻoku totonu ke ne hivaʻi ha foʻi hiva Palaimeli.
Naʻá ne fakakaukau ʻo pehē, “Ka ko e meʻa ia maʻá e fānaú. ʻOku kau nai mo au ai?”
Naʻe hoko mai leva ʻa e talí—mo e foʻi hivá.
Naʻe manatuʻi ʻe Sisitā Laiti, “Ko e fānau foki au ʻa e ʻOtuá. Naʻá ku kamata hiva ʻi heʻeku fakakaukaú, ʻTamai Hēvani, ʻokú ke ʻi ai?’1
Naʻe ngata ai pē ai ʻeku hivá. Naʻe ʻōʻōfaki ʻe he ʻofa ʻa e ʻOtuá ʻa ʻeku moʻuí kakato. Naʻe ongongofua ia, ʻa ia naʻe ngali kehe koeʻuhí he naʻe ʻikai ke u toe ongoʻi ha meʻa kehe. Naʻá ku ʻiloʻi naʻá Ne ʻi ai, naʻá Ne ʻafioʻi moʻoni ʻa e meʻa ne u fouá, pea ko ha ʻOtua ʻofa Ia.”
Naʻe fāʻeleʻi ʻa ʻEimi ʻAiline ʻEnitasoni Laiti ʻi he ʻaho 6 ʻo Sānuali, 1972, ʻi Sōleki Siti, ʻIutā, USA, kia Soi Peili mo Lōpeti ʻEnitasoni. Naʻá ne mali mo Sēmisi Makongikī Laiti ʻi he ʻaho 24 ʻo Sune, 1994, ʻi he Temipale Salt Lake. ʻOkú na maʻu ha ngaahi foha ʻe toko tolu.
Naʻá ne ʻosi mei he ʻUnivēsiti ʻo ʻIutaá ʻi he 1998 mo hano mataʻitohi BA ʻi he fakalakalaka e moʻui ʻa e tangatá mo e ako ki he fāmilí. Naʻá ne ngāue ʻi he potungāue mītia maʻá e fānau akó ʻi he Kolisi Fetuʻutaki ʻa e ʻUnivēsiti Mākuetí kae ako hono husepānití ʻi he ʻapiako toketā nifó.
Naʻe hoko ʻa Sisitā Laiti ko e Tokoni Ua ʻi he Kau Palesitenisī Lahi ʻo e Palaimelí ʻi he taʻu kuo ʻosí pea ʻi he fakataha alēlea faleʻi lahi ʻa e Kau Finemuí ʻi he taʻu ʻe tolu kimuʻa aí. ʻI he kuohilí naʻá ne hoko ko ha palesiteni ʻo e Palaimelí ʻi he siteikí mo e uōtí, tokoni ʻi he kau palesitenisī ʻo e Fineʻofá mo e Palaimeli ʻi he uōtí, faiako Fineʻofa, faiako Tokāteline ʻo e Ongoongoleleí, mo ha taki Sikauti ʻi he Uōtí.