Fakahoko ʻe he Siasí ha Tokoni mo ha Fakafiemālie

ʻOku kau mālohi ʻa e Kāingalotu ʻo e Siasí ʻi he funga ʻo e māmaní ʻi he ngaahi ngāue tokoni maʻá e kau kumi hūfangá. ʻI ʻIulopé, ʻoku nau tokoni ai ke ʻoatu ha meʻakai, vala, ʻū meʻa maʻá e pēpeé, nofoʻanga, mo ha ngaahi meʻa lahi ange ke tokoni ki he niʻihi ʻoku tukuhausiá. Naʻe toki foaki ʻe he Siasí ha paʻanga ʻAmelika ʻe 2 miliona ki he Komisiona Māʻolunga ʻo e Ngaahi Puleʻanga Fakatahataha maʻá e Kau Kumi Hūfangá pea mo ha paʻanga ʻAmelika ʻe 2 miliona ki he Polokalama Fakameʻatokoni ʻa e Māmaní. ʻE tokoni e ngaahi foakí ki he Polokalama Fakameʻatokoni ʻa Māmaní ke maʻu ha meʻakai maʻá ha kakai ʻe toko 11,000 ʻi ha māhina ʻe fā.

Naʻe pehē ʻe Sisitā Seiloni ʻIupengi, ko e Tokoni ʻUluaki ʻi he Kau Palesitenisī Lahi ʻo e Fineʻofá mo e palesiteni ʻo e Ngaahi Kautaha Tokoni ʻOfa ʻa e Siasí, “ʻOku ʻi ai hotau kāingalotu ʻoku uesia ʻi he ngaahi fonua kotoa pē.” Naʻá ne pehē, koeʻuhí ʻoku tauhi ʻe he Siasí ha paʻanga talifaki, naʻe malava ai ke tomuʻa teuteuʻi ha meʻakai mo ha vai kimuʻa ʻi he palopalema ʻi ʻIukuleiní, he ko e tukupā ia ʻa e Siasí ke tokangaʻi ʻa e ngaahi fiemaʻu taimi lōloa ʻa e ngaahi fonua ʻoku uesiá.

ʻI Palakuai mo Peluú, naʻe tokoni ʻa e paʻanga ʻa e Siasí ke ʻoatu ha ngaahi meʻangāue fakafaitoʻo ki he ngaahi falemahakí, pea naʻe tufaki ʻe he Siasí ʻi Pelū ha ʻū ī fakamokomoko, maama, naunau fale, ʻū sea, meʻangāue, mo ha komipiuta toʻotoʻo ʻe fitu ki he ngaahi kautaha ʻoku nau tokoniʻi ʻa e fānaú mo e kau toulekeleká, ko ha fakataha alēlea fakafekauʻakí, mo ha nofoʻanga maʻá e fānau fefiné. ʻI Kolomupiá, naʻe fakaʻaongaʻi ʻa e paʻanga ʻaukaí ke ʻoatu ʻaki ha puha meʻakai mo e naunau ʻe 1,200 kiate kinautolu naʻe faingataʻaʻiá. ʻI Panamaá, naʻe foaki ai ʻe he Siasí ha meʻangāue ke tokoni ʻi hono fakatolonga ʻo e ngaahi huhu maluʻi COVID-19.

Naʻe ʻaʻahi ha kakai ʻi ha ngaahi kolo ʻe 10 ʻi he ʻIunaiteti Siteití ki ha Mīsini Foaki ki hono Fakamaama ʻo e Māmaní lolotonga ʻa e faʻahitaʻu Kilisimasi ʻo e 2021, ʻo fakahoko ha foaki naʻe feʻunga hono fakakātoá mo ha paʻanga ʻAmelika ʻe 5.8 miliona. ʻOku fakaʻatā ʻe he ngaahi mīsiní ha taha ke ne fakatau ha ngaahi meʻa (hangē ko e valá, meʻatokoní, vai maʻa, mo ha fanga monumanu) ʻa ia ʻe toki tufaki kimui ange ʻi ha ngaahi kautaha tokoni ʻofa ʻe 44 ʻi he ʻIunaiteti Siteití pea pehē ki ha ngaahi kautaha fakaemāmani lahi ʻe nima.

Naʻe tokoniʻi foki ʻe he Siasí ʻa kinautolu ne uesia ʻe ha ngaahi ʻahiohio ʻi he fakahihifo ʻo e ʻIunaiteti Siteití, ko ha matangi mālohi ʻi Filipaini, pea mo e mapuna ʻa ha moʻunga afi mo e hake ʻa e peau kulá ʻi Tongá.