Ongoongo Fakatemipalé
Naʻe fanongonongo ʻe Palesiteni Lāsolo M. Nalesoni ha ngaahi palani ke langa ha ngaahi temipale kehe ʻe 17, ʻa ia ko ha temipale fakakātoa ia ʻe 100 kuo fanongonongo talu mei heʻene hoko ko e Palesiteni ʻo e Siasí.
ʻE langa ʻa e ngaahi temipalé ʻi loto pe ofi ki Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió mo Santos, Brazil; San Luis Potosí mo Mexico City Benemérito, Mexico; pea ʻi ʻAmeliká ʻi Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; pea mo Modesto, California.
Ngaahi Liliu Makehé
Talu mei he konifelenisi lahi kuo ʻosí, kuo fakataimi-tēpileʻi ai hano fakatapui pe toe fakatapui ha ngaahi temipale, fanongonongo ha ngaahi ʻoupeni hausi, mo ha ngaahi tanupou ʻi he funga ʻo e māmaní.
Naʻe fakatapui ʻa e Temipale Winnipeg Manitoba (Canada) mo e Temipale Pocatello Idaho (USA) pea toe fakatapui ʻa e Temipale Mesa Arizona (USA). Naʻe fanongonongo ha ngaahi ʻaho fakatapui pe toe fakatapui mo e ngaahi ʻoupeni hausi ki he ngaahi temipale ʻi Yigo, Guam; Praia Cape Verde; Rio de Janeiro, Brazil; Washington, D.C., USA; mo Tokyo, Japan.
Naʻe tanupou ʻa e kelekele ki he Temipale Casper Wyoming (USA), Temipale Pago Pago American Samoa, Temipale Bacolod Philippines mo e Temipale Freetown Sierra Leone. ʻOku fakataimi-tēpileʻi ha tanupou ki he ngaahi temipale ʻi he ngaahi feituʻu ko ʻeni ʻi he ʻAmelika: Grand Junction, Colorado; Lindon, Utah; Farmington, New Mexico; Elko, Nevada; Burley, Idaho; Yorba Linda, California; pea mo Smithfield, Utah.
Naʻe fanongonongo ha ngaahi feituʻu, pea ʻoatu mo ha ngaahi teuteu fakamanatu ki he Temipale Cape Town South Africa, ko e Temipale Querétaro Mexico pea mo e Temipale Ephraim Utah.
Ngaahi Temipale Naʻe Fakaleleiʻí
ʻOku kei hokohoko atu pē hono langa mo fakaleleiʻi ʻo e ngaahi temipale ʻi he funga ʻo e māmaní, kau ai hono fakaleleiʻi ʻo e Temipale Salt Lake mo hono ngaahi ʻātakaí, fakataha mo e feituʻu ʻoku tuʻu ai ʻa e Ngaahi ʻŌfisi ʻo e Siasí. ʻE toe fakalahi, fakafoʻou, mo fakamatamataleleiʻi ʻe he ngāué ʻa e temipalé mo hono ngaahi feituʻu takatakaí, fetongi ʻa e ngaahi meʻa ʻoku ʻikai toe fakaʻaongaʻí, pea tokangaʻi mo e tafaʻaki ki he malu mo e mateuteu ʻa e ngaahi falé ki ha mofuiké.
ʻOku fakamālohia ʻa e temipalé ke ne matuʻuaki ha mofuike ʻe aʻu hono mālohí ki he 7.2; ʻoku fakamālohia mo fakafefeka ʻa e fakavaʻé; ʻoku fakaleleiʻi e ngaahi meʻa fakaʻuhila mo fakapalamá; ʻoku langa ha ngaahi feituʻu hūʻanga foʻou; ʻoku fetongi ʻa e sima kuo maumau ʻi he ʻēliá pea toe fakafoʻou hono fokotuʻutuʻú ke fakasiʻisiʻi ʻa e mamafa ʻo e kelekele ʻi ʻolunga ʻi he ngaahi fakavaʻe ʻi lalo fonuá; pea ʻe toe fokotuʻutuʻu foʻou ʻa e ʻēlia ʻo e temipalé mo e ngaahi ʻōfisí ke faʻu ha ʻātakai ʻe tauʻatāina mo ongoʻi ʻe he kakaí ʻoku talitali lelei ange ai kinautolu. Ko hono fakaleleiʻí, ʻa ia naʻe kamata ʻi he 2020, ʻoku fakataimi-tēpileʻi ia ke ʻosi ʻi he 2025.
ʻOku hoko atu foki hono fakaleleiʻi ʻo e ngaahi temipale ʻi Hamilton, New Zealand; Hong Kong, China; mo Columbus, Ohio, pea mo St. George mo Manti, Utah, USA. Ki he tuʻunga ʻoku ʻi ai ʻa e langa ʻo e ngaahi temipale kehé, vakai ki he fehokotakiʻanga ʻi laló.
Foki ki he Angamahení
ʻI ha tohi ki he kau taki ʻo e Siasí ʻi he ʻaho 15 ʻo Māʻasi 2022, naʻe fanongonongo ai ʻe he Kau Palesitenisī ʻUluakí ʻe foki māmālie ʻa e ngaahi temipale ʻi he funga ʻo e māmaní ki ha ngaahi ngāue angamaheni lahi ange. ʻE kau heni ʻa hono fakangata ʻo e tui meʻa maluʻi ki he fofongá mo e ngaahi fakangatangata ki he tokolahí, ʻo makatuʻunga ʻi he ngaahi tūkunga fakalotofonuá. ʻE makatuʻunga ʻa e liliu ki he temipale takitaha mei he kau palesiteni temipalé mo e Kau Palesitenisī Fakaʻēliá, ʻi haʻanau alēlea mo e Potungāue Temipalé.