“Susan H. Porter,” Liahona, Mē 2022.
Susan H. Porter
Palesiteni Lahi ʻo e Palaimelí
Naʻe pehē ʻe Sisitā Sūsana H. Pota, “Ko e meʻa ʻeni ʻe taha kuó ne ueʻi fakalaumālie ʻemau fakakaukaú ʻi he taʻu kuohilí, te tau fakamālohia fakalaumālie fēfē nai ʻa e fānaú? ʻI he taimi ʻoku tau talanoa ai fekauʻaki mo hono fakamālohia ʻo e tui ʻa e toʻu tangata kei tupu haké, kuo pau ke kamata ia ʻi he Palaimelí.”
ʻOku mamata ʻa Sisitā Pota ki he ngaahi tāpuaki ʻoku maʻu ʻe he fānau kuo papitaisó ʻi heʻenau hoko ko ha kāingalotu fuakava ʻo e Siasí.
Naʻá ne fakamatala ʻo pehē, “ʻOku faʻa tupulaki ʻetau fakamoʻoní ʻi heʻetau ngāué mo e tokoní. ʻE lava ke ako ʻa e fānaú ke nau fekumi ki ha ueʻi fakalaumālie mei he langí.”
Kimuʻa pea uiuiʻi ʻa Palesiteni Pota ko e Palesiteni Lahi ʻo e Palaimelí, naʻá ne hoko ko e Tokoni ʻUluaki ʻi he Kau Palesitenisī Lahi ʻo e Palaimelí ʻi ha taʻu ʻe taha.
Naʻá ne pehē ʻoku tokolahi ha fānau ne ʻikai ke nau lava ʻo ʻalu ki he Palaimelí lolotonga ʻa e mahaki fakaʻauha KŌVITI-19. Naʻá ne mamata foki, mo ʻiloʻi, ʻa e ngaahi faingataʻa naʻe fehangahangai mo e ngaahi faʻē tāutahá. Naʻe pekia hono husepāniti ko ʻEletā Pulusi D. Pota ʻo e Kau Fitungofulú ʻi he 2016.
Naʻá ne pehē, “Naʻe lahi ha ngaahi Sāpate naʻe ʻikai ke u maʻu ai ʻa e sākalamēnití.”
ʻI heʻene vahevahe ʻa e ngaahi meʻa naʻá ne aʻusiá, kuo talaange ʻe ha kau fafine kehe kiate ia, “ʻOku ʻomi ʻe he foʻi moʻoni ko ia ʻokú ke fua fatongia ʻi he Siasí ha vīsone lelei ange ʻoku fie maʻu mo au ʻe he Siasí.”
Naʻe fāʻeleʻi ʻa Sūsana ʻIlisapeti Hōlani Pota ʻi he ʻaho 31 ʻo Siulai 1955, ʻi Ponaka Siti, ʻOlokahoma, USA, kia Hanisi J. pea mo Sālini Kolemani Hōlani pea naʻe ohi hake ia ʻi Niu ʻIoke, USA.
Naʻá ne mali mo ʻEletā Pota ʻi he ʻaho 2 ʻo Fēpueli 1977, ʻi he Temipale Washington D.C. Naʻá na ohi hake ʻena fānau ʻe toko faá ʻi he fakahahake ʻo e ʻIunaiteti Siteití, Siamane, mo ʻIutā peá na fakahoko ha ngaahi fatongia faka-Siasi ʻi he ʻĒlia ʻIulope Hahaké.
Naʻe fakaʻosi ako ʻa Sisitā Pota mo ha B.A. ʻi he ngaahi meʻa fakakemikalé mei he ʻUnivēsiti Pilikihami ʻIongí. Kuó ne ngāue ko ha tokoni ngāue fakakemikale ki he ʻInisititiuti Fakatekinolosia ʻo Masasūsetí pea mo ha faiako fika. Kuó ne ngāue tokoni foki ʻi ha ngaahi kautaha fakakolo mo e fakapuleʻanga kehekehe.
Kuo ngāue ʻa Sisitā Pota ʻi he fakataha alēlea faleʻi lahi ʻa e Fineʻofá, pea ʻoku kau ʻi hono ngaahi uiuiʻi kehe kimuʻá ʻene hoko ko ha tokoni ʻi he kau palesitenisī ʻo e Fineʻofa ʻi he siteikí, palesiteni ʻi he Fineʻofá mo e Kau Finemuí ʻi he uōtí, faiako Tokāteline ʻo e Ongoongoleleí, mo ha faihiva ʻi he Palaimelí.