“Usa ka Kapasilongan gikan sa Unos,” Liahona, Mar. 2023.
Welcome Niini nga Isyu
Usa ka Kapasilongan gikan sa Unos
Litrato pinaagi sa Getty Images
Nakalingkod na ba kamo diha sa sulod sa usa ka kapasilongan atol sa usa ka unos? Samtang nangatagak ang tubig, naglagubo kini sa atop ug tungod sa kakusog dili na madungog ang ubang mga tingog. Sa unsa nga paagi kamo magpabilin nga uga atol sa unos? Ang gahom ug presensya sa atong Manluluwas sama niana nga kapasilongan.
Kini nga isyu sa Liahona nagtutok kon sa unsa nga paagi si Jesukristo nagdala og kalinaw sa mga unos sa kinabuhi. Dili kita makalikay sa mga pagsulay ug mga hagit. Apan sama sa usa ka kapasilongan nga mopabilin nato nga uga diha sa ulan, samtang kita modapit ni Jesukristo nga mouban nato sa atong panaw, Siya motabang nato nga makakaplag og kalinaw diha sa unos. Dapiton ko kamo sa pagbasa sa artiulo ni Elder Dieter F. Uchtdorf “Ang Kalinaw Ibilin Ko Kaninyo” (pahina 4). Siya nagtudlo, “Si Jesukristo, kinsa nagkontrol sa mga elemento, makapagaan usab sa atong mga palas-anon” ug “Ang kalinaw dili kinahanglan nga kuhaon gikan sa atong mga kasingkasing, bisan kon kita mag-antos, maguol, ug maghulat sa Ginoo.”
Nakasinati usab ako og “mga unos” diha sa akong kinabuhi. Kini nga mga pagsulay mitudlo nako nga si Jesukristo sa tinuod mao lamang ang malungtarong tinubdan sa tabang ug kalinaw. Samtang akong ipaambit diha sa akong artikulo “Ang Gahom sa Pagpabuhi” (pahina 40), ang atong Manluluwas makauban ug mouban nato sa atong panaw sa pagpauli. Siya magauban nato samtang kita maghulat sa gisaad nga mga panalangin. Ug dili pa gayod ulahi alang Kaniya sa pagtabang kanato. Siya nahigugma kaninyo. Ako nag-ampo nga kamo motugot Kaniya nga mahimo ninyong kapasilongan ug luwas nga lugar bisan unsa pa ang inyong giatubang.
Inubanan sa gugma,
Bonnie H. Cordon
Kinatibuk-ang Presidente sa Young Women