Ang Tore sa Kampana nga Akong Tigpahinumdom

Imahe

tore sa kampana

Usa ka pagpangandam nga adlaw, ang akong misyonaryo nga kompanyon ug ako nagbisita og usa ka katedral sa Parma, Italy. Samtang nahingangha sa maanindot nga mga painting didto, ako nakamatikod sa usa ka monghe nga nagbasa diha sa duol. Ako nakadawat og pag-aghat nga makigsulti kaniya mahitungod sa Basahon ni Mormon, apan ako nahadlok.

Unsa kaha ang reaksyon sa usa ka Katoliko nga monghe ngadto sa misyonaryo nga nagtudlo sulod sa usa ka katedral? Ang pag-aghat mibalik pag-usab, apan gisalikway nako pag-usab.

Paglabay sa pipila ka semana, ang laing duha ka elder sa among apartment misulti namo nga sila nakig-istorya sa usa ka monghe nga ginganlan og Giuseppe samtang nangontak diha sa dalan. Human sila makatudlo kaniya og leksiyon, midawat siya og kopya sa Basahon ni Mormon.

Sa dihang ang mga misyonaryo nakigkita ni Giuseppe paglabay sa usa ka semana, siya nakabasa na og daghan sa libro. Siya nalipay kaayo kabahin niana.

Sa wala pa ang mga misyonaryo makigkita ni Giuseppe pag-usab, ang akong kompanyon nabalhin, mao nga ako miuban sa ilang pagkakompanyon. Sa dihang miadto kami aron sa pagtudlo ni Giuseppe diha sa katedral, ako wala masurprisa nga nakakita nga siya mao ang samang monghe nga ako naaghat nga istoryahan sa una.

Si Giuseppe misulti namo nga siya nagbasa sa basahon ni Alma, nga iyang gitandi ngadto ni Apostol Pablo. Kami nakahukom sa pagtudlo kaniya sa ikaduhang leksiyon, nga natapos uban sa usa ka imbitasyon nga magpabunyag. Sa kataposan sa among leksiyon, sa wala pa kami makadapit ni Giuseppe sa pagsunod sa ehemplo ni Jesukristo nga magpabunyag, ang mga kampana sa Katedral mibagting, nga nakapakugang namo.

Si Giuseppe nakalimot sa oras ug miingon nga kinahanglan siya nga moapil sa ubang monghe alang sa mga pag-ampo sa tunga-tunga sa adlaw. Dayon siya nangayog pasaylo, nag-ingon nga siya wala nay panahon sa umaabot tungod kay siya moadto sa layo alang sa mga kalihokan sa mga monghe. Ang iyang ordinasyon isip usa ka pari mosunod.

Kami nasurprisa kon sa unsang paagi kanang importante nga gutlo nawala sa kalit. Kon misunod pa ko sa unang pag-aghat, kami unta adunay mas dugang panahon sa pagtudlo ni Giuseppe ug siya aduna untay panahon sa paghuman sa pagbasa sa Basahon ni Mormon. Sa akong nahibaloan, ang mga misyonaryo wala na gayod makatudlo kaniya pag-usab.

Human niana nga kasinatian, ang tingog sa orasan nga mga kampana sa tore nakapahinumdom nako kon unsa ka bililhon ug unsa ka mubo ang panahon. Sa nahibiling mga adlaw sa akong misyon, matag higayon nga ako makadungog nga mobagting ang kampana sa tore, ako madasig sa pagpakigsulti ngadto ni bisan kinsa mahitungod sa ebanghelyo. Karon, maningkamot gihapon ko sa pagsunod sa mga pag-aghat gikan sa Espiritu.