“Pagtabang sa Kabatan-onan nga Makaandam sa Pagdawat og Patriyarkal nga Panalangin,” Liahona, Peb. 2024.
Pagtabang sa Kabatan-onan nga Makaandam sa Pagdawat og Patriyarkal nga Panalangin
Ang patriyarkal nga mga panalangin makatabang sa kabatan-onan nga makasabot sa ilang mahangtoron nga kailhanan ug magpabilin sa dalan sa pakigsaad.
Duha ka sakop sa Seventy—si Elder Randall K. Bennett ug si Elder Kazuhiko Yamashita—mibati nga nadasig sa pagpamulong mahitungod sa patriyarkal nga mga panalangin diha sa Abril 2023 nga kinatibuk-ang komperensiya. Si Elder Bennett nakadawat og patriyarkal nga panalangin sa edad nga 12, nag-ingon nga kini “hilabihan ka importante” kaniya sa dihang siya batan-on pa. Kini nakatabang kaniya nga makasabot sa iyang mahangtoron nga kailhanan ug masayod nga siya “gimahal sa akong Langitnong Amahan ug sa akong Manluluwas ug nga Sila personal nga nalambigit sa akong kinabuhi.”
Samtang gitun-an niya kini, kini nakatabang kaniya nga mobati sa Espiritu Santo ug midasig kaniya sa pagtuon sa mga kasulatan, pag-ampo kada adlaw, ug pagsunod sa mga pagtulon-an sa mga propeta. “Kini mahinungdanon alang kanako sa pagdawat sa akong patriyarkal nga panalangin samtang ako batan-on pa ug samtang ang akong pagpamatuod nagtubo pa.”1
Si Elder Yamashita nakadawat sa iyang patriyarkal nga panalangin sa edad nga 19, duha ka tuig human nga siya nabunyagan. Si Elder Yamashita mitudlo nga ang patriyarkal nga mga panalangin nagpadayag sa atong kaliwat diha sa balay ni Israel, nagpahinumdom kanato nga “mga anak kita sa pakigsaad. Madawat nato ang mga panalangin sa pakigsaad sama kang Abraham kon kita motuman sa mga balaod ug mga ordinansa sa ebanghelyo.” Siya usab mitudlo nga ang pag-andam sa pagdawat og patriyarkal nga panalangin motabang sa kabatan-onan nga madugangan ang ilang hugot nga pagtuo sa Langitnong Amahan ug ni Jesukristo.2
Tungod kay ang patriyarkal nga mga panalangin mahimong ingon nga kalig-on sa mga kinabuhi sa mas batan-on nga mga miyembro sa Simbahan, ang mga ginikanan ug mga lider makahisgot sa pipila niini nga mga pangutana uban sa kabatan-onan samtang sila mangandam sa pagdawat og patriyarkal nga panalangin.
Mga Pangutana ug mga Tubag
Unsa ang patriyarkal nga panalangin?
Ang patriyarkal nga panalangin usa ka espesyal nga panalangin nga ihatag ngadto sa usa ka takos nga miyembro sa Simbahan pinaagi sa usa ka giorden nga patriyarka. Kini naglakip og tambag gikan sa Langitnong Amahan aron sa paggiya sa tawo sa tibuok niyang kinabuhi. Kini mopahibalo sa miyembro kon unsa siya nga tribo sa Israel nahisakop. “Ang inyong tribo dili kinahanglan nga may kalabotan sa kaliwat o nasyonalidad. Hinuon, kini may kalabotan ngadto sa usa ka hugpong sa espirituwal nga mga responsibilidad ug gisaad nga mga panalangin.”3 Kini nagpahinumdom sa miyembro nga, sama sa gitudlo sa Manluluwas, “kamo ang mga anak sa pakigsaad” (3 Nephi 20:26).
“Ang usa ka patriyarkal nga panalangin gikan sa giorden nga patriyarka makahatag kanato og usa ka giya nga bituon nga pagasundon, nga mao ang personal nga pagpadayag gikan sa Dios ngadto sa matag indibidwal. Kon sundon nato kini nga bituon, mas dili kita masayop ug mahisalaag. …
“… Ang atong patriyarkal nga mga panalangin mopasabot sa unsay gilaoman sa [Dios] kanato ug sa unsay atong potensiyal.”4
Ang mga miyembro ba kinahanglan nga maanaa sa usa ka piho nga edad aron makadawat og patriyarkal nga panalangin?
Ang tawo nga nagdawat sa panalangin kinahanglan nga “igo na ang kahingkod aron masabtan ang kahulogan ug sagradong matang sa panalangin. Mas nindot nga ang miyembro kinahanglang igo ang kabatan-on nga daghan pang importante nga mga desisyon sa kinabuhi ang umaabot pa.”5
Walay labing menos nga edad nga gikinahanglan kay sa pagseguro nga ang kabatan-onan nakasabot sa sagrado nga kinaiya sa panalangin, ug ang bag-o nga mga miyembro “kinahanglang makasabot sa sukaranang doktrina sa ebanghelyo.”6 Ang pagdawat og panalangin sa medyo batan-on nga edad makatabang kanila sa paghimo og importante nga mga desisyon sa kinabuhi diha sa ilang tin-edyer ug young adult nga mga tuig.
Unsa nga tambag ang ihatag diha sa patriyarkal nga panalangin?
“[Ang patriyarkal nga panalangin] usa ka sagrado nga sumbanan sa tambag, mga saad, ug impormasyon gikan sa Ginoo; apan, ang usa ka tawo kinahanglang dili magdahom nga idetalye sa panalangin ang tanang mahitabo kaniya o motubag sa tanang pangutana.”7
Kini mahimong motubag sa uban apan dili sa tanang importante nga mga aspeto sa kinabuhi sa miyembro. Kon kini dili maghisgot sa usa ka butang (sama sa kaminyoon o usa ka full-time nga misyon, sama pananglit), kana wala magpasabot nga ang tawo dili makabuhat niadto nga butang, siyempre.
Apan ang usa ka patriyarkal nga panalangin usa ka piho nga giya alang sa tawo direkta gikan sa Langitnong Amahan. Si Presidente Thomas S. Monson (1927–2018) miingon nga ang usa ka patriyarkal nga panalangin “naglakip og mga kapitulo gikan sa imong basahon sa mahangtorong mga posibilidad” ug nga kini usa ka “personal nga Liahona aron maplano ang inyong padulngan ug mogiya sa inyong agianan.”8
Ang tanan ba nga mga panalangin diha sa patriyarkal nga panalangin matuman niini nga kinabuhi?
Si Presidente James E. Faust (1920–2007) misaad: “Ang atong patriyarkal nga panalangin mahimo nga angkla sa atong mga kalag, ug kon kita takos, ang kamatayon o ang panulay dili makahikaw kanato sa mga panalangin nga gipamulong. Kini mao ang mga panalangin nga atong matagamtam karon ug sa kahangtoran.”9
Ang pagdawat sa gisaad nga mga panalangin nagdepende sa atong paningkamot ug pagkamatarong. Kon kita maningkamot sa pagpili sa husto, ang tanan nga gisaad nga mga panalangin maatoa. Apan ang pipila ka panalangin mahimong moabot diha sa kahangtoran.
Unsaon man sa kabatan-onan pagdawat og patriyarkal nga panalangin?
Sila una magtakda og appointment nga makigtagbo sa bishop o presidente sa branch. Siya mopahigayon og interbiyo ug mohatag og Rekomend para sa Patriyarkal nga Panalangin. Sila dayon makig-appointment sa patriyarka. Ang suod nga mga sakop sa pamilya mahimong motambong sa panalangin.
Sa umaabot nga petsa human sa panalangin, ang midawat hatagan og kopya sa panalangin. Kini ma-access usab sa ChurchofJesusChrist.org ubos sa “Mga Himan.”
Alang niadtong anaa sa piho nga mga sitwasyon, sama sa nagserbisyo sa militar o anaa sa usa ka misyon, ang Kinatibuk-ang Tamdanan nga Basahon naghatag og dugang nga mga detalye mahitungod kon unsaon sa pagdawat og panalangin.10
Ang mga ginikanan ba mahimong mopaambit og mga bahin sa ilang kaugalingon nga patriyarkal nga mga panalangin ngadto sa ilang mga anak?
Ang Kinatibuk-ang Tamdanan nga Basahon nag-ingon: “Ang mga miyembro sa simbahan … kinahanglan dili kini ipakigbahin gawas lang sa mga suod nga sakop sa pamilya. Ang patriyarkal nga mga panalangin kinahanglan nga dili basahon sa mga miting sa Simbahan o sa ubang publikong panagpundok.”11
Ang mga ginikanan o mga apohan makatabang sa ilang mga anak ug mga apo sa pag-andam sa pagdawat og patriyarkal nga panalangin pinaagi sa pagpakigbahin kon sa unsang paagi ang ilang kaugalingon nga patriyarkal nga mga panalangin nakadasig ug nakagiya kanila.
Ang mga Panalangin sa usa ka Patriyarkal nga Panalangin
Ang usa ka patriyarkal nga panalangin mahimong usa ka maanindot nga kapanguhaan diha sa mga kinabuhi sa atong kabatan-onan. Makatabang kini kanila sa pagsagubang sa mga hagit sa kinabuhi. Sa mga panahon sa pagsulay, kini makahatag kanila og paglaom ug makatabang kanila sa pagkaplag og kalig-on diha sa Manluluwas. Ug kini makatabang kanila sa tibuok nilang kinabuhi nga makasabot sa kamatuoran mahitungod kon kinsa sila ug kinsa sila mamahimo.
Si Elder Bennett mitudlo: “Ang kanunay nga pagtuon sa akong patriyarkal nga panalangin nakapalambo sa akong tinguha sa pagsugakod sa tintasyon. Kini mitabang kanako sa pagbaton og tinguha ug kaisog sa paghinulsol, ug ang paghinulsol nagkadako nga nahimong usa ka malipayon nga proseso.”12
Si Presidente Monson mitambag: “Ang imong panalangin dili angay nga pil-on og maayo ug itago. Kini dili ikwadro o imantala. Hinoon, kini kinahanglan nga basahon. Kini kinahanglan nga higugmaon. Kini kinahanglan nga sundon.”13
Samtang ang inyong mga anak magsugod sa paghunahuna mahitungod sa pagdawat sa ilang patriyarkal nga mga panalangin, tabangi sila nga makasabot sa sagrado nga kinaiya ug katuyoan sa panalangin. Awhaga sila nga mainampoon nga modesisyon sa ilang kaugalingon kon kanus-a modawat og usa ka patriyarkal nga panalangin. Ayaw ipakaubos ang ilang kapasidad nga makat-on ug molambo gikan sa ilang patriyarkal nga panalangin bisan sa usa ka batan-on nga edad, ilabi na uban sa inyong tabang.