“Sa Unsang Paagi Kita Magpakabuhi ‘Subay sa Matang sa Pagkamalipayon’?,” Liahona, Peb. 2024.
Dali, Sunod Kanako
Sa Unsang Paagi Kita Magpakabuhi “Subay sa Matang sa Pagkamalipayon”?
Kasagaran sa kinabuhi kita makahimo og sayop sa pagtuo nga ang kalipay naglangkob lang sa pagbaton og kalingawan o dili makabaton og bisan unsang mga problema. Apan, sumala sa Basahon ni Mormon, ang malungtaron nga kalipay isip usa ka sumusunod ni Jesukristo naglangkob og daghan pa.
Si Nephi miingon, “Kami mipuyo subay sa matang sa pagkamalipayon” (2 Nephi 5:27). Apan kana nagpasabot ba nga sila malipayon tungod kay sila adunay sayon nga mga kinabuhi? Siyempre dili! Sa 2 Nephi 4, gihulagway ni Nephi ang mga problema nga mipahigawad kaniya. Sa kapitulo 5 atong makat-onan kon unsa ang gilangkoban sa tinuod nga kalipay.
Mga Tinubdan sa Kalipay
Sa unsang paagi ang matag usa sa mosunod magdala kanato og kalipay?
-
Pamilya ug suod nga mga relasyon (tan-awa sa 2 Nephi 5:6)
-
Pagkamasulundon sa mga sugo (tan-awa sa 2 Nephi 5:10)
-
Trabaho ug pagbarog sa kinaugalingong paningkamot (tan-awa sa 2 Nephi 5:11, 14, 15, 17)
-
Pagsimba diha sa templo (tan-awa sa 2 Nephi 5:16)
-
Pagpangalagad (tan-awa sa 2 Nephi 5:26)
Unsa Ang Tinuod nga Kalipay?
“Daghang mga tawo ang misulay sa pagpangita og kalipay ug katumanan diha sa mga kalihokan nga supak sa mga sugo sa Ginoo. …
“Ang uban nagtinguha lang sa pagbaton og kalingawan diha sa kinabuhi. Uban niini isip ilang nag-unang tumong, ilang gitugotan ang temporaryo nga kalipay sa pagbalda kanila gikan sa malungtaron nga kalipay. Gihikawan nila ang ilang kaugalingon sa malahutayon nga hingpit nga kalipay sa espirituhanong pagtubo, pagserbisyo, ug pagkugi.
“Samtang magtinguha kita nga magmalipayon, kita kinahanglan nga mohinumdom nga ang bugtong dalan ngadto sa tinuod nga kalipay mao ang pagsunod sa ebanghelyo. Makakaplag kita og kalinaw, mahangturon nga kalipay samtang kita maningkamot sa pagtuman sa mga sugo, mag-ampo alang sa kalig-on, maghinulsol sa atong mga sala, moapil diha sa maayo nga mga kalihokan, ug mohatag og makahuluganon nga serbisyo.”1