Dzi Wiadze do Konyim na Nya Ahomgye

Mo nuambanyin na nkyerɛbaa adɔfo, ɔyɛ me enyisɔ dɛ mikyia hom enyimnyam Ahomgyeda anapa yi. Hom da m’adwen do daa daa. Mbrɛ hom si soɛr ntsɛm kedzi dwuma ber biara a hom hu binom hɔn ehiadze no yɛ me nwanwa. Migyina ahobow mu wɔ hom gyedzi na dasegye a hom kyerɛ no bio na bio. Musũ wɔ hom akomayaw, abagura, na haw horow ho. Modɔ hom. Mema hom awerɛhyɛmu dɛ hɛn Ɔsor Egya na Ne Ba Jesus Christ, dɔ hom. Wonyim hom gyinabew, hom papayɛ, hom ehiadze, na hom mpaabɔ a hom dze hwehwɛ mboa nyinara. Bio na bio no, mobɔ mpaa ma hom dɛ hom benya Hɔn dɔ ma hom ho atsenkã.

Erenya Hɔn dɔ ho sũahu no hia papaapa, ber a ɔyɛ dɛ daa daa kwan do nsɛm yaayaw hyɛ hɛn do no. Bia hom enya nda binom a hom yamu annkyɛ wɔahyɛ hom pajamas, abobɔw woho, na akã akyerɛ obi dɛ sɛ begyabegyayɛ no gyae a onyan wo.

Naaso, nuambanyin na nkyerɛbaa adɔfo, ndzɛmba nwanwa pii wɔ kan. Nda a ɔreba mu no, yebohu Agyenkwa no tum a ɔreda edzi kɛse akyɛn dza wiadze ehu no pɛn. Fi sesei kesi ber a Ɔbɛsan aba a “Ɔdze tum na enyimnyam kɛse,”¹ Ɔdze ndzinoa, nhyira, na anwanwadze a wonntum akan bogu anokwafo do.

Naaso, yɛtse ase wɔ wiadze abakɔsɛm ber a ɔyɛ dzen koraa mu. Dza ɔkyer adwen mu na ɔhaw horow hyɛ nkorɔfo do mbordo ma wɔberɛ. Mbom, hom nsusu ndaansa yi mu sũahu a ɔbɛhyerɛn kan wɔ mbrɛ emi na ɔwo besi botum benya ahomgye do.

Ndaansa yi Washington D. C. Temple ofi mbuei no, asɔrba a ɔkã abaguafo a wɔhwɛ ofi mbuei do no hun nkitsahodzi bi a obuei n’adwen mu ber a ɔnye nsɛnkyerɛwfo na etsitsir binom rodua temple no mu. Kwan bi do no, ebusua kumabaa bi bɛkãa mediafo aprɔwbɔ no ho. Akɛtseabɛkãfo no baako kɔr do bisaa temple ayɛdzegyefo no “akwantu” ho asɛm ber a orudua temple mu no. Nna ɔpɛ dɛ ohu sɛ temple akwantu no yɛ ngyinahɔmadze ma nyimpa n’akwantu mu ɔhaw wɔ abrabɔ yi mu a.

Banyimba kakraba a ɔwɔ ebusua no mu no gyee nkɔmbɔdzi no do. Ber a kuw no hɛɛn endowment dan mu no, banyimba no tseen ne nsa wɔ afɔrmbukyia a wobu nkotodwe nye Nyame dze dzi ahyɛmu, na ɔkãa dɛ, “O, ɔyɛ fɛw ae. Ha nye bea a nkorɔfo begye ahom wɔ hɔn temple akwantu no mu.”

Minngye nndzi dɛ banyimba no nyim mbrɛ ne nyiano no si yɛ nokwar mapã no. Ɔbɛyɛ dɛ onnyim nkitsahodzi akwantsen a ɔda enye Nyankopɔn redzi ahyɛmu wɔ temple mu na Agyenkwa n’anohoba mapã no dɛ:

“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye.

“Hom mfa mo kɔndua no nto hom do, na hom nsũa me; … na hom benya ahomgye ama hom akra.

“Na mo kɔndua yɛ mberɛw, na m’adzesoa yɛ har.”²

Nuambanyin na nkyerɛbaa adɔfo, medzi yaw ma hɔn a wogyaa Asɔr no osiandɛ wonya atsenkã dɛ asɔrbayɛ gye ahwehwɛdze a ɔbordo ma hɔn. Wonnyaa nnhun dɛ eridzi na irisie ahyɛmu do no mbom ma abrabɔ yɛ mberɛw. Nyimpa kor biara a odzi ahyɛmu wɔ enuma nsubura mu na wɔ temple mu no—nya Jesus Christ no tum ho kwan ntowdo. Meserɛ hom ndwendwen dɛm nokwar nwanwa no ho.

Irisie ahyɛmudzi a enye Nyame dzi n’akatua nye ɔsorsor tum—tum a ɔhyɛ hɛn dzen ma yetum gyina hɛn haw, nsɔhwɛ, na akomayaw ano yie. Tum yi ma hɛn kwan do yɛ mberɛw. Hɔn a wɔdze Jesus Christ ne mbrasɛm a ɔkrɔn no bɔ bra no nya kwan wɔ No tum a ɔkrɔn no ho. Dɛm ntsi, ahyɛmu siefo wɔ ahomgye soronko ho kwan a ofi hɔn ahyɛmu nkitahodzi a wɔnye Nyankopɔn dzi no ba.

Ansaana Agyenkwa no regyaa Noho ama Gethsemane na Calvary ewurkadze no, Ɔpaa mu kãa kyerɛ N’Asomafo no dɛ, “Wiadze mu dze, hom wɔ ahohia: naaso hom nhyɛ dzen; medzi wiadze do konyim.”³ Dɛm ntsi, Jesus totɔe serɛɛ hɛn mu kor biara dɛ ɔbɛyɛ dɛm ara, ber a Ɔkãa dɛ, Mepɛ dɛ hom dzi wiadze do konyim.”⁴

Nuambanyin na nkyerɛbaa adɔfo, m’asɛm ma hom ndɛ nye dɛ osiandɛ Jesus Christ dzii wiadze yi a ɔahwe ase do konyim, na osiandɛ Ɔbɔɔ werdam maa hɛn mu kor biara no, wo so botum edzi wiadze yi a bɔn ahyɛ mã, pɛsankonya, na ɔtaa yɛ ɔbrɛ no, do konyim.

Osiandɛ Agyenkwa no, Oduaa No Werdambɔ a ɔmmbɔadze da do, poon hɛn mu kor biara fii hɛn mberɛwyɛ, mfom, na bɔn, na osiandɛ Ɔtsee yaw, ɔhaw, na adzesoa biara a yeenya da no,⁵ nkyii sɛ inu woho ampara na ihwehwɛ No mboa a, ibotum asoɛr atra wiadze huhuuhu yi.

Ibotum edzi sunsum mu na nkã-tse mu nsan yarba a ɔhaw wiadze no konyim, a ntsɛn, ahopɔw, ebufuw, ndwamandze, ɔtan, tumfurdze, nyinkum, na suro ka ho. Ntõtõ ananmu na ndandanee a okyin twa hɛn ho hyia nyina ekyir no, hom botum enya nokwar ahomgye—a asekyerɛ nye mboa na asomdwee—wɔ hom ahokyer ɔhaw kɛse mpo mu.

Nokwar a ohia yi kenyan fapem nsɛmbisa ebiasa:

Odzi kan, yeridzi wiadze do konyim no n’asekyerɛ nye dɛn?

Otsia ebien, yesi dɛn yɛ?

Na otsia ebiasa, osi dɛn na yeridzi wiadze do konyim no hyira hɛn abrabɔ?

Yeridzi wiadze do konyim no n’asekyerɛ nye dɛn? Ɔkyerɛ yebedzi nsɔhwɛ no dɛ yɛbɔdwen wiadze ndzɛmba ho akyɛn Nyame ndzɛmba ho no do konyim. Ɔkyerɛ yɛrotwer Christ ne nkyerɛkyerɛ akyɛn nyimpa adwenkyerɛ. Ɔkyerɛ hɛn enyi regye wɔ nokwar mu, yegyina tsia ndaadaa, na yɛrebɛyɛ “Christ n’akadofo ahobrɛadzefo.”⁶ Ɔkyerɛ dɛ yɛbɛsan mu eyi dɛ yɛnnkɛyɛ biribi a obepia Sunsum no efi hɔ akɔ. Ɔkyerɛ dɛ yebenya pɛ dɛ yɛdze hɛn bɔn a yɛpɛ mpo “bɛma.”⁷

Afei, iridzi wiadze do konyim nnkyerɛ dɛ ebedzi mu wɔ abrabɔ yi mu, nna ɔnnkyerɛ so dɛ wo nsɛnhia beyew amonmu ara—osiandɛ wɔnnyew. Na ɔnnkyerɛ so dɛ eronnkɔ do mfom. Mbom iridzi wiadze do konyim kyerɛ dɛ wo tum a edze tsia bɔn no bɔkɔ sor. W’akoma bobɔ ber a wo gyedzi wɔ Jesus Christ mu rokɔ sor no.⁸ Iridzi wiadze do konyim kyerɛ dɛ erodɔ Nyankopɔn na No Dɔba akyɛn wo dɔ ma obiara anaa adze biara bio.

Nkyii, yesi dɛn dzi wiadze no do konyim? Ɔhen Benjamin kyerɛkyerɛɛ hɛn mbrɛ yebesi bɛyɛ. Ɔkãa dɛ “honammunyi no yɛ ɔtamfo ma Nyankopɔn” na ɔbɔkɔ do ayɛ dɛm afebɔɔ kesi afebɔɔ “gyedɛ ogyaa noho ma Sunsum Krɔnkrɔn no ne nkenyan, na ɔpɔr nyimpasu no gu nkyɛn na ɔnam Ewuradze Christ no werdambɔ no no do bɛyɛ ɔhotseweenyi.”⁹ Ber biara a ehwehwɛ na edzi Sunsum ne nkenyan do no, ber biara a iyɛ adze papa biara no—ndzɛmba a “honammunyi” no rennyɛ no—nna iridzi wiadze no do konyim.

Iridzi wiadze do konyim no nnyɛ dza osi dakor anaa nda ebien mu. Ɔba wɔ abrabɔ ber mu ber a yesi do fua Christ ne nkyerɛkyerɛ no. Yɛnyɛn gyedzi wɔ Jesus Christ mu ber a yerunu hɛn ho daa daa na yerisie ahyɛmudzi a ɔdze tum hyira hɛn. Yetsim wɔ ahyɛmu anamɔn kwan do na wohyira hɛn sunsum mu ahoɔdzen, ankorankor ankorankor nyikyerɛ, gyedzi ntumu, na abɔfo hɔn som. Yɛdze Christ ne nkyerɛkyerɛ bɔ bra no botum ama ahotsew kɔntɔnkrɔn a ɔyɛ ndam, a ɔbɛma sunsum mu ahoɔhar aba hɛn abrabɔ mu.¹⁰

Ber a yɛbɔ mbɔdzen dɛ yɛdze Jesus Christ ne mbra a ɔkrɔn no bɔbɔ bra no, hɛn akoma na hɛn su ankasa hyɛ ase sesã. Agyenkwa no pegya hɛn fi wiadze yi a ɔahwe ase no mu na ɔdze ayamuyie kɛse, ahobrɛadze, adɔyɛ, ayamuyie, nhyɛdo-ankasa, asomdwee, na ahomgye hyira hɛn.

Sesei, bia erodwen dɛ iyi yɛ sunsum mu edwumadzen sen ahomgye. Naaso nokwar kɛse no nye yi: ber a wiadze si do dzendzen dɛ tum, ahonya, ehurahura, na honandua mu ahoɔdɛw na wɔdze enyigye ba no, ɔnntse dɛm! Wonnkotum! Dza wɔdze ba ara nnyɛ hwee mbom nhyɛananmu pan ma “ nhyira nye ahomka tsebew” a [hɔn] a “wodzi Nyankopɔn ne mbrasɛm do” no wɔ mu.¹¹

Nokwar no nye dɛ ɔyɛ berɛ koraa dɛ ibɔhwehwɛ enyigye wɔ bea a nnkotum ehu no dabiarada! Naaso, sɛ enye Jesus Christ to kɔndua na eyɛ sunsum mu edwuma a wohia dze edzi wiadze do konyim a, Ɔno, na Ɔno nko, wɔ tum a ɔdze bɛpegya wo efi wiadze yi a ɔtwe wo no.

Afei, osi dɛn na iridzi wiadze do konyim no behyira hɛn abrabɔ? Nyiano no yɛ pefee: enye Nyankopɔn rehɛn ahyɛmu nkitahodzi mu no kyekyer hɛn fam No ho wɔ kwan a ɔma biribiara a ɔfa abrabɔ yi ho yɛ mberɛw ara yie. Meserɛ mma hom nntse me ase: Mannkã dɛ yeridzi ahyɛmu no ma abrabɔ yɛ mberɛw. Nokwar, nya enyidakwan ma dza otsia, osiandɛ abɔnsam mmpɛ dɛ ikohu Jesus Christ no tum no. Mbom enye Agyenkwa no ato kondua no kyerɛ dɛ iwɔ kwan wɔ N’ahoɔdzen na ɔpon tum no.

Mfonyin

President Ezra Taft Benson

Misi President Ezra Taft Benson ne nkyerɛkyerɛ nwanwa no do bio: “Mbanyin na mbaa a wɔdan hɔn abrabɔ ma Nyame no ba bohu dɛ Obotum ayɛ ndzepa pii efi hɔn abrabɔ mu akyɛn dza nkyɛ hɔnara wobotum ayɛ. Ɔbɔtow hɔn enyigye mu, woebue hɔn enyido-adzehu, woekenyan hɔn adwen, … woepegya hɔn akra, ama hɔn nhyira ayɛ mbɔho, woenya akwan pii, ama hɔn akra awerɛkyekye, ama anyɛnkofo, na woehue asomdwee.”¹²

Ndzinoa yinom a ɔnnye bi nnsɛ yi bedzi hɔn a wɔhwehwɛ ɔsor abamba dze boa hɔn ma wodzi wiadze yi do konyim. Iyi ho ntsi, me tserɛw ma Asɔr tɔw no mu asɔrmba no ahyɛdze kor noara a medze maa mbasirmba ndaansa Esusow Aketseaba no. Mutuu hɔn fo dɛm ber—na mototɔ serɛ hom sesei—dɛ hom nhwɛ homankasa hom dasegye wɔ Jesus Christ na N’asɛmpa do. Yɛ ho edwuma. Nyɛn no ama oeenyin. Fa nokwar nyɛn no. Mma mmfa mbanyin na mbaa hɔn ator adwenkyerɛ nngu ho fĩ. Ber a ikɔ do yɛ wo dasegye wɔ Jesus Christ ho w’ahwehwɛdze kɛse no, hwɛ anwanwadze a ɔbɛba w’abrabɔ mu kwan.¹³

Mo ntotɔserɛ ma hom anapa yi nye hom benya ahomgye efi wiadze yerɛwyerɛw, dza onnsi pi, na awerɛhow a wodua wɔnye Nyankopɔn ahyɛmudzi do dzi wiadze do konyim. Ma Ondua wo mpaabɔ na wo ndzeyɛɛ do nhu dɛ w’enyi aber dɛ ibedzi wiadze do konyim. Bisa No ma Ɔntsew w’adwen mu na Ɔnsoma mboa no a ihia no. Da biara, kyerɛw adwen a ɔba wo do ber a ibɔ mpaa no, nkyii dzi do pɛpɛɛpɛr. Hwer mber pii wɔ temple, na hwehwɛ dɛ ibɛtse ase mbrɛ temple no si kyerɛkyerɛ wo ma asoɛr atra wiadze yi a ɔahwe ase no do.¹⁴

Dɛ mbrɛ makã no dadaw no, Israel mboano no nye edwuma tsitsir a ɔrokɔ do wɔ asaase do ndɛ. Mboano yi n’adze tsitsir kor nye wɔreyɛ nkorɔfo ahosiesie ma woetum, ayɛ krado, na wɔfata dɛ wobehyia Ewuradze kwan sɛ Ɔsan ba bio a, nkorɔfo a wɔasan mu eyi Jesus Christ dada wɔ wiadze a ɔahwe ase no, nkorɔfo a wodzi ehurusi dɛ wɔdze hɔn pɛ asan mu eyi dɛ wɔdze Jesus Christ ne mbra krɔnkrɔn no a ɔkrɔn no bɔbɔ bra.

Mefrɛ hom, mo nuambanyin na nkyerɛbaa adɔfo, dɛ hom mbɛyɛ nkorɔfo atseneneefo yinom. Hom ahyɛmudzi nsom hom bo na wondzi no nyi nkyɛn hom pisi biara. Ber a hom ma Nyankopɔn dzi nyim wɔ hom abrabɔ mu no, mobɔ hom asomdwee kɛse, awerɛhyɛmu, enyigye, na nyew, ahomgye ho anohoba.

Medze ɔsomafo tum krɔnkrɔn a wɔdze ama me no, mihyira hom wɔ hom ahwehwɛdze mu dɛ wobedzi wiadze yi do konyim. Mihyira hom dɛ hom gyedzi ndɔɔ sõ wɔ Jesus Christ mu na hom nsũa mbrɛ hom besi bɔtwe No tum yie. Mihyira wo ama eetum eehu nokwar fi mfom ho. Mihyira wo dɛ ibɔdwen Nyankopɔn ndzɛmba ho akyɛn wiadze ndzɛmba ho. Mihyira wo dɛ ibohu hɔn a woetwa woho ehyia hɔn ehiadze na ahyɛ hɔn a idɔ hɔn no dzen. Osiandɛ Jesus Christ dzii wiadze yi do konyim no, wo so botum ayɛ. Megye ho dase wɔ Jesus Christ ne dzin krɔnkrɔn no mu, amen.