Ammōn

Pija

Ammōn im ļeo jatin rej kotak peir im iak-iakwe

Ammōn im ļeo jatin rekar kōņaan katakin riLeman ro kōn Irooj. Rekar etal n̄an āne eo ijo riLeman ro rekar jokwe ie. Ilo iaļ eo aer, rekar jitlo̧k im jar n̄an kajjitōk ippān Irooj n̄an jipan̄. Irooj eaar kaenōm̧m̧an er. Ekar jiroñ er bwe ren kijenmej im bwe ren erom̧ waanjon̄ak ko rem̧m̧an. Er kajjojo rekar etal n̄an jikin ko roktak n̄an katakin.

Mosaia 28:1–2; Alma 17:6–13

Pija

Ammōn ej bukwelōlō im̧aan irooj im lerooj eo.

Ammōn ekar etal n̄an āneo ņaetan Ismael. Armej ro ijo rekar likwōje im bōkļo̧k e n̄an Kiin̄ Lamonai. Ammōn ekar jiron̄ Kiin̄ Lamonai bwe ekōņaan jokwe ippān riLeman ro. Lamonai ekar kōņaan Ammōn im kōrōļo̧ke. Ekar kōņaan bwe Ammōn en m̧areiki juon iaan leddik ro nejin, ijjelo̧kin Ammōn ekar kālet bwe en juon rijerbal n̄an Lamonai.

Alma 17:20–25

Pija

Ammōn ekar reilo̧k ioon aeran n̄an jiip ko.

Lamonai eaar jiron̄ ļo̧k Ammōn n̄an kōjparoki mennin mour ko nejin. Juon raan, Ammōn im jet iaan rijerbal ro rekar bōk mennin mour bwe ren idaak. Tōre eo mennin mour ko rekar idaak, riko̧o̧t ro rekar itok im kako er. Rijerbal ro jet rekar mijak bwe renaaj maron̄ bōk kauwe n̄e renej luuji mennin mour ko an Lamonai.

Alma 17:25–28; Alma 18:7

Pija

Ammōn

Ammōn ekar jeļā bwe iien eo ekar jejjet n̄an an kwaļo̧k kajoor eo an Irooj. Ekar ba n̄an rijerbal ro jet bwe ren jab inepata im kar jipan̄ er pukot mennin mour ko rekar luuji.

Alma 17:29–32

Pija

Ammōn ekar jibwe buwat eo im jitōn̄ļo̧k riko̧o̧t ro

Riko̧o̧t ro rekar bar itok im kako mennin mour ko. Ak iien in, Ammōn ekar ba n̄an rijerbal ro jet bwe ren pād wōt im kōjparok mennin mour ko jān aer ko.

Alma 17:33

Pija

Ammōn ekar jutak im̧aan mejān riko̧o̧t ro

Ammōn ekar etal im kabōjrak riko̧o̧t ro jān aer kako jiip ko. Riko̧o̧t ro rekar jab mijake Ammōn. Rekar ļōmņak rekar kajoor jān e. Ak rekar jab jeļā bwe Irooj ekar jipan̄ Ammōn.

Alma 17:34–35

Pija

Ammōn ej buwate riko̧o̧t ro kōn dōkā.

Ammōn ekar kad riko̧o̧t ro kōn buwat eo an. Jet iaer rekar mej. Men eo ekar kalluiki riko̧o̧t ro jet, im rekar kōņaan m̧ane Ammōn. Rekar ilbōk kōnke rekar jab maron̄ kalel Ammōn kōn dōkā ko aer. Rekar jab kōtmāne ke en kar lukkuun kajoor.

Alma 17:36

Pija

Ammōn ekar jōbjōb tok n̄an jāje eo an ke riko̧o̧t ro jino den̄den̄ tok n̄an e.

Riko̧o̧t ro rekar kajjieon̄ den̄ōte Ammōn kōn kein den̄den̄ ko aer. Ak aolep iien rej kajjieon̄, Ammōn ej jōk peier kōn jāje eo an innām rekar jab maron̄ ire. Ejjab etto, rekar lukkuun mijak in waanmaanļo̧k wōt n̄an ire im kar ko.

Alma 17:37–39

Pija

Ruo rijerbal rej kōmeļeļeik Kiin̄ Lamonai kōn ta eo ekar waļo̧k

Rijerbal ro rekar ba n̄an Lamonai wāween an kar Ammōn lo̧mo̧o̧ren mennin mour ko. Lamonai ekar bwilōn̄. Ekar ļōmņak Ammōn ekar juon Jetōb Eļap, eo ewōr an kajoor eļap im ejeļā men otemjej.

Alma 18:1–5, 18

Pija

Kiin̄ Lamonai ekar āinwōt einepata.

Lamonai ekar kōņaan kōnono ippān Ammōn, ak ekar barāinwōt inepata.

Alma 18:8–11

Pija

Ammōn ekar bukwelōlō im̧aan mejān Kiin̄ Lamonai

Ammōn ekar etal n̄an Lamonai, ak Lamonai ekar jab jeļā ta eo en ba. Irooj ekar jipan̄ Ammōn jeļā ta ļōmņak ko an Lamonai. Ammōn ekar ba bwe ekar juon Jetōb Eļap. Ekar ba n̄an Lamonai bwe Jetōb eo Eļap ej Anij. Lamonai ekar kōņaan ekkatak eļapļo̧k kōn Anij.

Alma 18:12–28

Pija

Ammōn ej kōnono n̄an Kiin̄ Lamonai

Ammōn ekar ba bwe Anij ekar kōm̧m̧ane laļ in im aolep ro rej jokwe ie. Innām Ammōn ekar ba n̄an Lamonai bwe Anij ewōr juon an karōk in lo̧mo̧o̧r. Āinwōt m̧ōttan wōt karōk in, Jisōs Kraist enaaj itok. Lamonai ekar tōmak ta eo Ammōn ekar ba. Lamonai ekar jar im kajjitōk ippān Anij bwe en tūriam̧o̧ kōn e im armej ro an.

Alma 18:24–36, 39–42