“Vëllezërit Nefi dhe Lehi”, Tregime nga Libri i Mormonit (2023)
Vëllezërit Nefi dhe Lehi
Një zë që dëgjohet nga qielli
Nefi dhe Lehi ishin vëllezër të cilët donin që çdokush të dinte rreth ungjillit të Jezu Krishtit. Nefitët dhe lamanitët ishin në luftë, por dy vëllezërit sidoqoftë u jepnin mësim njerëzve nga të dyja grupet. Një ditë, teksa udhëtonin për t’u dhënë mësim njerëzve, një ushtri lamanitësh i futi ata në burg.
Helamani 3:20–21, 37; 4:4–5, 14; 5:4–21
Shumë ditë më vonë, ushtria erdhi në burg për t’i vrarë Nefin dhe Lehin.
Përpara se ndonjëri ta lëndonte Nefin dhe Lehin, një rreth zjarri u shfaq përreth tyre. Zjarri nuk i dogji ata. Përkundrazi, Perëndia i mbrojti ata. Pastaj toka u drodh. U duk sikur muret e burgut do të binin përdhe. Shpejt, një re errësire mbuloi çdonjërin që ishte në burg. Njerëzit ishin shumë të frikësuar.
Një zë erdhi nga lart resë së errësirës. Ishte i qetë, si një pëshpërimë, por njerëzit e ndien atë në zemrën e tyre. Ishte zëri i Perëndisë. Perëndia u tha atyre të pendoheshin.
Toka dhe burgu u drodhën edhe më shumë. Zëri erdhi sërish dhe u tha njerëzve të pendoheshin. Njerëzit nuk mund të lëviznin për shkak të resë dhe frikës së tyre.
Një burrë mes turmës quhej Aminadab. Ai i përkiste dikur Kishës së Perëndisë. Ai pa se fytyrat e Nefit dhe të Lehit filluan të shkëlqenin fort. Ata dukeshin si engjëj. Dukej sikur ata po flisnin me dikë në qiell. Aminadabi i tha kujtdo që të shihnin Nefin dhe Lehin.
Njerëzit e pyetën Aminadabin se çfarë mund të bënin për ta larguar renë e errësirës. Aminadabi iu tregoi atë që dinte rreth Perëndisë dhe Jezusit. Ai u tha njerëzve të pendoheshin, të kishin besim te Jezusi dhe t’i luteshin Perëndisë. Njerëzit e dëgjuan Aminadabin. Ata u lutën derisa errësira u zhduk.
Zjarri nga Perëndia i rrethoi të gjithë njerëzit dhe nuk i dogji ata. Njerëzit u mbushën me Frymën e Shenjtë dhe ishin shumë të lumtur. Ata thanë gjëra të mrekullueshme. Zëri erdhi sërish. Ai u tha atyre që të kishin paqe për shkak të besimit të tyre te Jezusi. Engjëjt erdhën dhe i vizituan njerëzit.
Nefi, Lehi dhe të gjithë njerëzit u larguan nga burgu. Ata u thanë shumë njerëzve anembanë vendit atë që kishin parë dhe dëgjuar atë ditë. Shumica e lamanitëve besuan dhe zgjodhën ta ndiqnin Jezusin. Ata ndaluan së bëri luftë. Përkundrazi, ata i ndihmuan njerëzit të kishin besim te Jezusi dhe të pendoheshin.