“8–14 Jenuware: ‘Bae Mi Go mo Mekem.’ 1 Nifae 1–5,” Kam Folem Mi—Blong Hom mo Jos: Buk blong Momon 2024 (2024)
“8–14 Jenuware. 1 Nifae 1–5,” Kam Folem Mi—Blong Hom mo Jos: 2024 (2024)
Lihae I Stap Wokbaot Kolosap long Red Si, i kam long Gary Smith
8–14 Jenuware: “Bae Mi Go mo Mekem”
1 Nifae 1–5
Buk blong Momon i stat wetem stori blong wan ril famli we i stap gotru long ol ril hadtaem. Hem i hapen long 600 B.K.B, be i gat ol samting insaed long stori ia, we maet ol famli oli luk se i semmak long olgeta tedei. Famli ia, i bin stap laef long wan wol we fasin nogud i bin stap kam antap plante, be Lod i bin promes long olgeta se, sapos oli folem Hem, bambae Hem i lidim olgeta i go long sef ples. Folem rod ia, oli bin gat ol gud taem, mo ol nogud taem; oli bin kasem ol bigfala blesing mo ol merikel, be tu, oli bin gat plante samting we oli no bin agri long hem mo oli gat ol raorao. I nogat tumas long skripja wan stori we oli talemaot gud olsem abaot wan famli we i traehad blong laef folem gospel: papa mo mama i traehad blong bildim fet wetem insperesen long famli blong olgeta mo stap wari abaot sefti blong olgeta, ol pikinini oli stap disaed sapos bae oli bilivim papa mo mama blong olgeta, mo ol brata oli stap fesem fasin blong jalus mo raorao—mo samtaem stap fogivim olgeta wanwan. Afta evri samting, i gat paoa insaed long famli ia we i no stret evriwan from eksampol blong fet blong olgeta.
Ol Tingting blong Stap Lan long Hom mo long Jos
Toktok blong God i gat “bigfala yus” long mi.
Wan bigfala mesej insaed long Buk blong Momon, hem i toktok blong God we i gat “bigfala yus” (1 Nifae 5:21). Taem yu ridim 1 Nifae 1–5, lukaotem ol wei we toktok blong God i blesem o no blesem stret famli blong Lihae (eksampol, luk long 1:11–15; 3:19–20; 5:10–22). ?Wanem nao ol japta ia oli tijim abaot toktok blong God? ?Wanem nao yu faenem we i givim insperesen long yu blong stadi olgeta skripja?
Luk tu long: “As I Search the Holy Scriptures,” Hymns, no. 277; “Scriptures Legacy” (vidio), Gospel Library.
Mi save kasem mo mekem testemoni blong mi i kam strong moa taem mi lukluk i go long Lod.
Nifae, oli savegud hem from strong fet blong hem long Lod, be hem i mas wok blong kasem testemoni blong hem—semmak olsem yumi evriwan. ?Wanem nao yu ridim long 1 Nifae 2 we i soem from wanem Nifae i bin save kasem wan witnes se ol toktok blong papa blong hem i tru? ?From wanem Leman mo Lemyul i no bin kasem witnes ia? (Luk tu long 1 Nifae 15:2–11). ?Wetaem nao yu bin filim se Lod i bin mekem hat blong yu i sopsop?
Luk tu long “The Lord Commands Lehi’s Family to Leave Jerusalem” (video), Gospel Library.
God bambae i mekem wan rod i rere blong mi save mekem tingting blong Hem.
Taem we Lod i bin givim oda long Lihae mo ol boe blong hem blong go karem ol buk we oli wokem long bras, Hem i no givim stret instraksen long hao blong mekem komanmen ia. Hemia tu i wan tru samting abaot ol revelesen we yumi kasem long God, mo hemia i save lidim yumi blong filim se, Hem i wantem givim, “wan had samting” blong mekem (1 Nifae 3:5). ?Wanem nao i givim insperesen long yu long wei we Nifae i ansarem oda we Lod i bin givim, we i stap long 1 Nifae 3:7, 15–16?
Taem yu ridim 1 Nifae 3–4, lukaotem ol defdefren hadtaem we Nifae i bin fesem. Hao nao Lod i “mekem rere wan rod” blong Nifae i “save mekem samting ia we Hem i [komandem] hem blong mekem”? ?From wanem hem i impoten, long yu, blong yu save wanem nao Lod i bin mekem blong Nifae?
Wan wei we God i bin mekem rere yumi from wetem paoa, blong kipim ol komanmen blong Hem, i taem we Hem i bin givim Jisas Kraes i kam, blong i Sevya blong yumi. Gat tingting ia blong stap ridim mesej blong Presiden Dallin H. Oaks “?Wanem Nao Sevya I Bin Mekem blong Yumi?” (Liahona, Mei 2021, 75–77). ?Hao nao Jisas Kraes i bin mekem rere wan rod blong wanwan long yumi? Blong save se Hem i winim evri samting blong yu, wanem filing blong yu we i pusum yu blong “go mo mekem”?
Luk tu long “Nephi Is Led by the Spirit to Obtain the Plates of Brass” (vidio), Gospel Library; Gospel Topics, “Obedience,” Gospel Library.
Yusum ol stori mo ol eksampol blong tijim ol prinsipol blong gospel. Taem yu mekem rere blong tij, tingting long ol eksperiens blong yuwan we i save kam nambatu witnes long ol stori insaed long olgeta skripja. Eksampol, ?wetaem nao Lod i mekem rere wan rod blong yu blong mekem tingting blong Hem?
Glad blong Olgeta i Fulwan, i kam long Walter Rane
Blong stap tingbaot ol wok blong God, i save givim mi fet ia blong stap obei long ol komanmen blong Hem.
Taem we Leman mo Lemyul, tufala i filim blong stap komplen, plante taem, Nifae mo Lihae i stap kolosap blong givim insperesen mo sapotem tufala. Taem yu filim blong stap komplen, blong helpem yu, yu save ridim ol toktok blong Nifae mo Lihae. ?Olsem wanem nao Nifae mo Lihae i traem blong helpem ol memba blong famli blong bildimap fet long God? (luk long 1 Nifae 4:1–3; 5:1–8; luk tu long 1 Nifae 7:6–21). ?Wanem nao yu lanem we i save helpem yu taem we yu gat temtesen ia blong komplen?
“Spirit i bin lidim mi.”
Insaed long 1 Nifae 4:5–18, ?wanem nao filing blong yu abaot wanem we Nifae i save mekem blong luksave mo folem Spirit? Maet yu save stadi long mesej blong Presiden Russell M. Nelson “Revelesen blong Jos, Revelesen blong Ol Laef blong Yumi” (Liahona, Mei 2018, 93–96) blong lanem moa abaot fasin ia blong kasem revelesen we i kam long Lod.
Blong kasem moa tingting, luk long namba blong manis blong Liahona mo Blong Ol Yut Oli Kam Strong Moa ol magasin.
Ol Tingting blong Tijim Ol Pikinini
Mi save gat wan testemoni blong miwan.
-
?Hao nao Nifae i bin save se wanem we papa blong hem i bin tijim i bin tru? Helpem ol pikinini blong yu blong faenem ol ansa long kwestin ia long 1 Nifae 2:16, 19. Maet bae oli glad blong raetem ol aksen blong Nifae long ol blok o ol nara tul mo afta bildim wan samting wetem ol tul ia. Hemia i save lidim yufala blong toktok raon long hao ol aksen ia i helpem yumi bildim wan testemoni.
-
Yu save soem long ol pikinini blong yu ol pikja o ol tul we i ripresentem ol samting we oli save gat wan testemoni long hem, olsem wan kopi blong buk blong Momon o wan pikja blong Jisas Kraes, wan tempol, o wan profet we i stap laef. Invaetem olgeta blong pikmap wan long ol pikja o tul ia mo serem testemoni blong olgeta abaot samting ia. Yu save talem long ol pikinini blong yu tu hao yu bin kasem testemoni blong yu. ?From wanem yumi nidim blong gat testemoni blong yumiwan?
God bae i helpem mi blong folem ol komanmen blong Hem.
-
Gat tingting ia blong yusum wan o moa long ol risos ia blong helpem ol pikinini blong yu blong save tokbaot hao God i i bin helpem Nifae blong karembak bras we oli mekem long plet: 1 Nifae 3–4; aktiviti pej blong wik ia; “Nephi’s Courage” (Children’s Songbook, 120–21); mo “Japta 4: Ol Buk we Oli Wokem long Bras” (insaed long Ol Stori insaed long Buk blong Momon, 8–12).
-
Maet yu mo ol pikinini blong yu i laekem rol plei 1 Nifae 3:2–7. Ating yu save priten se yu yu Lihae mo askem ol pikinini blong yu blong gobak long Jerusalem blong karembak ol buk we oli mekem wetem plet. Invaetem olgeta blong ansa be wetem toktok blong olgeta nomo, olsem se oli Leman mo Lemyul o Nifae. Wanem sam long ol samting we God i komandem yumi blong mekem? (luk long ol pikja 103–15 insaed long Gospel Art Buk o Mosaea 18:8–10 blong sam tingting). ?Olsem wanem nao yumi save kam olsem Nifae?
Ol skripja oli wan gudfala rij samting.
-
Olgeta skripja oli bin impoten tumas long famli blong Lihae. Blong soem hemia, yu save invaetem ol pikinini blong yu blong helpem yu talem o aktemaot wanem we Nifae mo ol brata blong hem oli bin mekem blong karembak ol buk we oli mekem long bras: olgeta i travel long wan longfala rod, oli givimaot ol gol mo silva blong olgeta, mo oli bin haed insaed long wan hol blong ston blong sevem laef blong olgeta. Afta yu save ridim 1 Nifae 5:21 mo tokbaot from wanem ol skripja oli gat mining long famli blong Lihae. ?From wanem oli gat mining long yumi? ?Olsem wanem nao yumi save tritim ol skripja olsem wan gudfala rij samting?
Nifae mo famli blong hem insaed long sip
Tabu Spirit bae i lidim mi taem mi stap lukaotem wanem nao Lod i wantem mi blong mekem.
-
Afta luklukbak long 1 Nifae 3 hao Nifae mo ol brata blong hem i bin traehad blong karembak ol buk we oli mekem long bras, rid wetem ol pikinini blong yu 1 Nifae 4:6 blong faenemaot wanem we Nifae i bin mekem we i mekem se hem i save kasem wanem hem i go from. Afta, ol pikinini blong yu oli save mekem wan lis blong ol samting we God i wantem olgeta blong mekem. ?Olsem wanem nao Tabu Spirit i save helpem yumi long ol situesen ia?
Blong kasem moa tingting, luk long namba blong manis ia blong Fren magasin.
Mi bin Obei long Voes blong Spirit, i kam long Walter Rane