Ol Fas Pej blong Buk blong Momon

Taetol pej blong Buk blong Momon i givim moa bitim wan taetol. Wetem sam samting moa, hem i givim wan lis blong ol defren stamba tingting blong tabu histri ia. Lukaotem ol stamba tingting ia long insaed long taetol pej. Ol kwestin olsem hemia i save helpem yu taem yu tingting hevi: ?From wanem yumi gat Buk blong Momon? ?Olsem Wanem nao Buk blong Momon i defren long ol nara buk?

Naoia Maet bae i wan gud taem blong mekem wan plan blong yuwan o blong famli blong stap ridim Buk blong Momon long yia ia. ?Wetaem mo wea nao bae yu rid? ?Olsem wanem nao bae yu invaetem Spirit long stadi blong yu? ?I gat eni samting spesel we bae yu lukaotem taem yu stadi? Eksampol, Maet yu lukaotem ol ves we i fulfilim ol stamba tingting we yu bin faenem long taetol pej. Maet bae yu kipim wan lis blong ol ves we i bildim fet blong yu long Jisas Kraes.

Luk tu long 2 Nifae 25:26; Mosaea 3:5–8; Alma 5:48; 7:10–13; Hileman 5:12; 3 Nifae 9:13–18; 11:6–14; Moronae 10:32–33.

Pikja

Seminari pikja bokis

Ol Fas Toktok long Buk blong Momon.; “Testemoni blong Olgeta Tri Witnes”; “Testemoni blong Olgeta Eit Witnes”

Mi save kam wan witnes blong Buk blong Momon.

Tabu Spirit i save testifae long yu se Buk blong Momon i tru, iven sapos yu no bin luk ol buk we oli wokem long gol olsem we Olgeta Tri Witnes mo Olgeta Eit Witnes oli luk. Taem yu stap ridim ol toktok blong olgeta, tingbaot hao ol testemoni blong olgeta i mekem testemoni blong yu i kam strong moa.

? Wanem nao i givim insperesen long yu long wei we ol witnes ia i bin serem testemoni blong olgeta abaot Buk blong Momon? Tingting hevi long hao nao bae yu serem testemoni blong yu abaot Buk blong Momon—speseli witnes blong hem abaot Jisas Kraes. Eksampol, tingbaot se yu stap toktok long wan fren we i neva harem abaot Buk blong Momon bifo. ?Wanem nao bae yu talem long hem abaot Buk blong Momon? ?Olsem wanem yu save givim insperesen long fren blong yu blong ridim? Tingting blong luklukbak long Fas Toktok long Buk blong Momon. Maet bae yu save faenem moa infomesen we yu save yusum blong serem wetem fren blong yu. Maet ol vidio ia, i save givim yu tu sam tingting:

Tingting blong mekem wan lis blong ol samting, we yu wantem serem wetem wan fren abaot Buk blong Momon. Traem serem Buk blong Momon taem yu stap yusum Buk blong Momon app.

Luk tu long Ronald A. Rasband, “Long Dei Ia,” Liahona, Nov. 2022, 25–28; Gospel Topics, “Buk blong Momon,” Gospel Library; “An Angel from on High,” Hymns, no. 13.

Pikja

Josef Smit mo Olgeta Tri Witnes oli stap prea tugeta.

?Sapos wan i askem yu se Buk blong Momon i kam wea, wanem nao bae yu talem? ?Olsem wanem yu save tokbaot hao God i tekpat blong givim yumi Buk blong Momon? Taem yu ridim testemoni blong Josef Smit’, luklukgud long hao hem i tokbaot hemia. Folem wanem we yu bin ridim, ?yu ting se God i filim olsem wanem abaot Buk blong Momon we i impoten?

Luk tu long Ulisses Soares, “Taem we Buk blong Momon I Kamaot,” Liahona, Mei 2020, 32–35; Saints, vol. 1, The Standard of Truth, 21–30; Gospel Topics Essays, “Book of Mormon Translation,” Gospel Library.

• Letem ol pikinini blong yu oli lukluk long mo holem wan kopi blong Buk blong Momon Helpem olgeta i poen i go long sabtaetol, Wan Narafala Testeman blong Jisas Kraes. Maet yu save helpem olgeta tu blong faenem, long taetol pej, toktok ia “Jisas hem i Kraes, God we I No Save Finis, we i soemaot hemwan long evri kantri.” Helpem olgeta blong andastanem se hemia i minim se Buk blong Momon i tijim yumi abaot Jisas Kraes. Tokbaot smol long olgeta olsem wanem nao Buk blong Momon i bin mekem fet blong yu long Jisas Kraes i kam strong moa. Yu save askem olgeta tu abaot ol stori we oli laekem tumas insaed long Buk blong Momon. Singsing “Book of Mormon Stories” (Children’s Songbook, 118–19) i save rimaenem olgeta long sam long ol stori ia.

• Aktiviti pej blong wik ia mo pikja andanit ia, i save helpem ol pikinini blong yu blong andastanem ol toktok ia blong Josef Smit insaed long Fas Toktok long Buk blong Momon.: “Buk blong Momon [i] ki ston blong relijin blong yumi.” Maet i fan tu blong bildim o dro wan hip blong ston we oli bildim go raon olsem wan doa wetem ki ston long top blong hem. ?Wanem i hapen sapos oli karemaot ki ston ia? ?Wanem bae i hapen sapos yumi no gat Buk blong Momon? Maet yufala i save rid tugeta long las paragraf blong ol fas toktok blong faenemaot wanem moa yumi lanem taem yumi akseptem trutok abaot Buk blong Momon. ?Olsem wanem yumi save mekem se Buk blong Momon i ki ston blong bilif blong yumi long Jisas Kraes?

Pikja

Hip blong ston we oli bildim go raon olsem wan doa wetem wan ki ston we i stap holem ol ston ia i stanap, mo i no foldaon.

• Blong helpem ol pikinini blong yu i andastanem wanem i minim blong stap wan witnes, yu save tokbaot long olgeta wan samting we yu bin luk be olgeta oli no luk. Mo letem oli mekem semmak long yu. Hemia i save lid i go long wan stori blong 11 pipol we oli bin luk ol buk ia we oli wokem long gol, we aot long hem, oli bin transletem Buk blong Momon. Taem yufala i ridim ol testemoni tugeta, yu save tokbaot from wanem ol witnes ia oli wantem blong ol nara pipol i save abaot ol testemoni blong olgeta. ?Huia nao yumi wantem blong tokbaot Buk blong Momon long hem?

• Blong helpem ol pikinini blong yu blong lanem hao God i bin givim long yumi Buk blong Momon, yu save ridim ol pat blong “Testemoni blong Profet Josef Smit” long olgeta. Maet yu yusum tu “Japta 1: Olsem Wanem Yumi Kasem Buk blong Momon” (insaed long Ol Stori long Buk blong Momon, 2–4). Maet ol pikinini blong yu bae oli laekem blong aktem stori ia bakegen, mo bakegen.