“Gobak long Jerusalem,” Ol Stori blong Buk blong Momon (2023)
“Gobak long Jerusalem,” Ol Stori blong Buk blong Momon
Gobak long Jerusalem
Wokbaot from ol buk we oli wokem long bras
Famli blong Lihae mo Saraea oli bin travel i go long waelples. Long wan drim, Lod i bin talem long Lihae abaot ol skripja we oli raetem long ol buk we oli wokem long bras. Wan man we nem blong hem Leban, i holem olgeta long Jerusalem. Lod i talem se famli blong Lihae i nidim blong tekem ol buk we oli wokem long bras, wetem olgeta long wokbaot blong olgeta.
Lod i bin talem long Lihae blong sendem ol boe blong hem oli gobak long Jerusalem blong tekem ol buk we oli wokem long bras. Ol brata blong Nifae oli bin komplen. Oli talem long Lihae se hem i wan had samting blong mekem. Oli no bin wantem blong go.
Hem bin wan had samting tumas blong mekem, be Nifae i wantem blong obei. Hem i save se Lod bae i helpem hem mo ol brata blong hem. Nifae i talem long Lihae se bae hem i gobak long Jerusalem mo karem ol buk we oli wokem long bras.
Leman, Lemyul, Sam, mo Nifae oli gobak long Jerusalem. Taem oli kasem long we, oli jusum se bae Leman i go long haos blong Leban blong askem ol buk we oli wokem long bras.
Taem Leman i askem ol buk we oli wokem long bras, Leban i singaotem hem wan stilman. Leban i talem se bae hem i kilim Leman.
Leman i ronwe mo talem wanem we i bin hapen long ol brata blong hem.
Ol fofala brata oli bin harem nogud. Leman, Lemyul, mo Sam oli bin wantem blong gobak long papa mo mama blong olgeta long waelples, be Nifae i bin gat wan aedia. Hem i talem se oli save mekem wan agrimen wetem Leban blong karem ol buk we oli wokem long bras. Oli bin gobak long hom blong olgeta long siti mo karem evri gol mo silva blong olgeta blong mekem agrimen ia.
Taem oli bin soem ol gol mo silva long Leban, hem wantem evriwan. Hem i no agri yet blong givim ol buk we oli wokem long bras. Be, hem i talem long ol wokman blong hem blong kilimded ol brata ia mekem se bae hem i save karem gol mo silva blong olgeta.
Ol fo brata oli ron from laef blong olgeta mo oli lego gol mo silva blong olgeta i stap. Ol wokman blong Leban oli no save kasem olgeta. Ol brata ol haed long wan bigfala hol blong ston.
Afta long evri had samting ia, Leman mo Lemyul tufala i kros long Nifae. Oli wipim Nifae mo Sam wetem wan stik.
Kwiktaem, wan enjel i kam mo askem from wanem oli stap wipim Nifae. Enjel i talem se oli bin jusum Nifae blong i lidim olgeta. Afta enjel ia i talem long olgeta blong gobak long Jerusalem. Bae Lod i rere long wan wei blong olgeta blong oli karem ol buk we oli wokem long bras.