“ວັນທີ 5–11 ເດືອນກຸມພາ: ‘ເປັນອິດສະລະທີ່ຈະເລືອກເສລີພາບ ແລະ ຊີວິດນິລັນດອນ, ໂດຍທາງພຣະຜູ້ເປັນກາງ.’ 2 ນີໄຟ 1–2,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 5–11 ເດືອນກຸມພາ. 2 ນີໄຟ 1–2,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ຮູບພາບ

ອາດາມ ແລະ ເອວາ ກຳລັງໜີຈາກສວນເອເດນ

Adam and Eve [ອາດາມ ແລະ ເອວາ], ໂດຍ ດັກລັສ ຟຣາຍເອີ

ວັນທີ 5–11 ເດືອນກຸມພາ: “ເປັນອິດສະລະທີ່ຈະເລືອກເສລີພາບ ແລະ ຊີວິດນິລັນດອນ, ໂດຍທາງພຣະຜູ້ເປັນກາງ”

2 ນີໄຟ 1–2

ຖ້າຫາກທ່ານຮູ້ວ່າ ທ່ານຈະຕາຍເມື່ອໃດ, ແມ່ນຫຍັງຄືຂ່າວສານອັນສຸດທ້າຍ ທີ່ທ່ານຢາກບອກກ່າວ ແກ່ຄົນທີ່ທ່ານຮັກຫລາຍທີ່ສຸດ? ເມື່ອສາດສະດາລີໄຮຮູ້ສຶກວ່າ ເພິ່ນຈະມີຊີວິດຢູ່ບໍ່ໄດ້ດົນ, ເພິ່ນຈຶ່ງໄດ້ເຕົ້າໂຮມຄອບຄົວຂອງເພິ່ນເປັນເທື່ອສຸດທ້າຍ. ເພິ່ນໄດ້ແບ່ງປັນສິ່ງທີ່ພຣະບິດາເທິງສະຫວັນໄດ້ເປີດເຜີຍແກ່ເພິ່ນກັບພວກເຂົາ. ເພິ່ນໄດ້ສະແດງປະຈັກພະຍານຂອງເພິ່ນເຖິງພຣະເມຊີອາ. ເພິ່ນໄດ້ສິດສອນຄວາມຈິງຂອງພຣະກິດຕິຄຸນທີ່ເພິ່ນທະນຸຖະໜອມໃຫ້ກັບຜູ້ຄົນທີ່ເພິ່ນທະນຸຖະໜອມ. ເພິ່ນໄດ້ກ່າວເຖິງເສລີພາບ, ການເຊື່ອຟັງ, ການຕົກຂອງອາດາມ ແລະ ເອວາ, ການໄຖ່ຜ່ານທາງພຣະເຢຊູຄຣິດ, ແລະ ຄວາມຊື່ນຊົມ. ບໍ່ແມ່ນລູກທຸກຄົນຂອງເພິ່ນທີ່ເລືອກດຳລົງຊີວິດຕາມສິ່ງທີ່ເພິ່ນໄດ້ສິດສອນ—ບໍ່ມີໃຜໃນພວກເຮົາທີ່ສາມາດເລືອກເຮັດເຊັ່ນນັ້ນໄດ້ແທນຄົນທີ່ເຮົາຮັກ. ແຕ່ເຮົາສາມາດສິດສອນ ແລະ ເປັນພະຍານເຖິງພຣະຜູ້ໄຖ່, ຜູ້ເຮັດໃຫ້ເຮົາ “ເປັນອິດສະລະທີ່ຈະເລືອກເສລີພາບ ແລະ ຊີວິດນິລັນດອນ” (ເບິ່ງ 2 ນີໄຟ 2:26–27).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ນີໄຟ 1:13–29

ເຮົາສາມາດ “ຈົ່ງຕື່ນເຖີດ! ແລະ ຈົ່ງລຸກຂຶ້ນຈາກພື້ນດິນ.”

ໃນ 2 ນີໄຟ 1:13–29, ໃຫ້ສັງເກດເບິ່ງຖ້ອຍຄຳທີ່ລີໄຮໄດ້ໃຊ້ເພື່ອບັນຍາຍສະພາວະທາງວິນຍານຂອງເລມັນ ແລະ ເລມູເອນ. ແມ່ນຫຍັງຊ່ວຍທ່ານໃຫ້ຕື່ນຈາກ “ການນອນຫລັບຢ່າງແຈບຈົມ”? ແມ່ນຫຍັງຊ່ວຍໃຫ້ທ່ານສັ່ນ “ສາຍໂສ້ ” ທາງວິນຍານໃນຊີວິດຂອງທ່ານໃຫ້ຫລຸດອອກ? ໃຫ້ຄິດກ່ຽວກັບປະຈັກພະຍານຂອງລີໄຮຢູ່ໃນ ຂໍ້ທີ 15 ແລະ ຄຳເຊື້ອເຊີນຂອງເພິ່ນຢູ່ໃນ ຂໍ້ທີ 23. ພຣະບິດາເທິງສະຫວັນມີຂ່າວສານໃດແດ່ສຳລັບທ່ານຢູ່ໃນຂໍ້ເຫລົ່ານີ້?

ໃຊ້ຮູບພາບ. ການໃຊ້ຮູບພາບຈະຊ່ວຍຜູ້ຮຽນໃຫ້ເຂົ້າໃຈຄວາມຈິງຂອງພຣະກິດຕິຄຸນ ແລະ ຈື່ຈຳມັນໄດ້ດົນນານ. ຂະນະທີ່ທ່ານກະກຽມຈະສິດສອນຈາກໂຄງຮ່າງນີ້, ໃຫ້ພິຈາລະນາວ່າທ່ານຈະສາມາດໃຊ້ຮູບພາບໃດແດ່. ຍົກຕົວຢ່າງ, ບາງທີສາຍໂສ້ເຈ້ຍອາດຊ່ວຍຜູ້ຮຽນໃຫ້ເຂົ້າໃຈຖ້ອຍຄຳຂອງລີໄຮຢູ່ໃນ 2 ນີໄຟ 1:13 ຫລື 2 ນີໄຟ 2:27.

2 ນີໄຟ 2

ຮູບພາບ
ໄອຄອນຫ້ອງຮຽນສາດສະໜາ
ຍ້ອນພຣະເຢຊູຄຣິດ, ເຮົາຈຶ່ງ “ເປັນອິດສະລະທີ່ຈະເລືອກເສລີພາບ ແລະ ຊີວິດນິລັນດອນ.”

ບັດນີ້ ຄອບຄົວຂອງລີໄຮໄດ້ຢູ່ໃນແຜ່ນດິນໃໝ່, ທີ່ເຕັມໄປດ້ວຍຄວາມເປັນໄປໄດ້ໃໝ່ໆ. ທາງເລືອກທີ່ເຂົາເຈົ້າໄດ້ເລືອກເຮັດຢູ່ໃນສະຖານທີ່ໃໝ່ນີ້ຈະສຳຄັນຕໍ່ຄວາມສຳເລັດ ແລະ ຄວາມສຸກຂອງເຂົາເຈົ້າ. ບາງທີນີ້ຈຶ່ງເປັນເຫດຜົນທີ່ລີໄຮໄດ້ສິດສອນຢາໂຄບ ລູກຊາຍຂອງເພິ່ນກ່ຽວກັບອຳເພີໃຈ ຫລື ຄວາມສາມາດທີ່ຈະເລືອກເຮັດ, ຢູ່ໃນ 2 ນີໄຟ 2. ຂະນະທີ່ທ່ານສຶກສາ ຂໍ້ທີ 11–30, ໃຫ້ຂຽນຄຳຕອບທີ່ເປັນໄປໄດ້ຕໍ່ຄຳຖາມເຫລົ່ານີ້:

ເປັນຫຍັງອຳເພີໃຈຈຶ່ງສຳຄັນຕໍ່ພຣະບິດາເທິງສະຫວັນ, ເຖິງແມ່ນວ່າບາງຄົນໃຊ້ມັນໃນທາງທີ່ເຮັດໃຫ້ເຈັບປວດ?
ຜູ້ປໍລະປັກພະຍາຍາມເຮັດໃຫ້ອຳເພີໃຈຂອງທ່ານອ່ອນແອລົງ ຫລື ທຳລາຍມັນແນວໃດ?
ພຣະຜູ້ຊ່ວຍໃຫ້ລອດຊ່ວຍທ່ານໃຫ້ “ເປັນອິດສະລະທີ່ຈະເລືອກເສລີພາບ ແລະ ຊີວິດນິລັນດອນ” (ຂໍ້ທີ 27) ແນວໃດ?

ນີ້ຄືອີກທາງໜຶ່ງທີ່ຈະຮຽນຮູ້ກ່ຽວກັບອຳເພີໃຈຢູ່ໃນ 2 ນີໄຟ 2: ໃຫ້ຊອກຫາສິ່ງທີ່ຈຳເປັນສຳລັບເຮົາ ເພື່ອຈະມີອຳເພີໃຈ ແລະ ເອື້ອມເຖິງສັກກະຍະພາບທີ່ສູງສົ່ງຂອງເຮົາ. ຍົກຕົວຢ່າງ:

2 ນີໄຟ 2:5: ຄວາມຮູ້ກ່ຽວກັບຄວາມດີ ແລະ ຄວາມຊົ່ວ; ກົດ
2 ນີໄຟ 2:11, 16:
2 ນີໄຟ 2:16:
2 ນີໄຟ 2:21:
2 ນີໄຟ 2:6–9, 26–28:

ຈະມີຫຍັງເກີດຂຶ້ນກັບອຳເພີໃຈຂອງເຮົາ ຖ້າຫາກສິ່ງເຫລົ່ານີ້ຂາດໄປ?

ແຕ່ລະພາກໃນຈຳນວນຫົກພາກຂອງປຶ້ມ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ ບັນຈຸ “ຄຳເຊື້ອເຊີນ” ແລະ “ພອນທີ່ສັນຍາໄວ້.” ໃຫ້ເບິ່ງໜຶ່ງພາກ ຫລື ຫລາຍກວ່ານັ້ນຂອງພາກເຫລົ່ານີ້, ແລະ ໃຫ້ເລືອກພອນທີ່ສັນຍາໄວ້ທີ່ທ່ານຫວັງຈະໄດ້ຮັບໃນຊີວິດຂອງທ່ານ. ທ່ານຕ້ອງການຄຳເຊື້ອເຊີນຫຍັງແດ່ທີ່ຈະລົງມືກະທຳເພື່ອຈະໄດ້ຮັບພອນນີ້? ໃຫ້ພິຈາລະນາທີ່ຈະແບ່ງປັນພອນກັບຄົນອື່ນ ທີ່ທ່ານໄດ້ຮັບຈາກການເຮັດຕາມຄຳເຊື້ອເຊີນເຫລົ່ານີ້.

ເບິ່ງ Gospel Topics, “Agency and Accountability,” ຫ້ອງສະໝຸດພຣະກິດຕິຄຸນ; “ເຮັດແຕ່ຄວາມດີ,” ເພງສວດ ແລະ ເພງຂອງເດັກນ້ອຍ, 38 ນຳອີກ.

2 ນີໄຟ 2:1–4, 6–25

ພຣະເຈົ້າສາມາດປ່ຽນຄວາມຍາກລຳບາກຂອງເຮົາໃຫ້ເປັນພອນໄດ້.

ລີໄຮໄດ້ຮູ້ວ່າ ຢາໂຄບ ລູກຊາຍນ້ອຍຂອງເພິ່ນໄດ້ຮັບ “ຄວາມທຸກຍາກລຳບາກ” ແລະ “ຄວາມເສົ້າສະຫລົດໃຈຫລາຍ” ໃນໄວເດັກຂອງລາວ (2 ນີໄຟ 2:1). ທ່ານຄິດວ່າເປັນຫຍັງປະຈັກພະຍານຂອງລີໄຮໃນ 2 ນີໄຟ 2:1–3, 6–25 ຈຶ່ງມີຄ່າຫລາຍຕໍ່ຢາໂຄບ? ເປັນຫຍັງມັນຈຶ່ງມີຄ່າຫລາຍຕໍ່ທ່ານ? ໃຫ້ຊອກຫາຖ້ອຍຄຳ ແລະ ວະລີທີ່ທ່ານພົບເຫັນວ່າມີພະລັງເປັນພິເສດ. ພຣະເຈົ້າໄດ້ອຸທິດຄວາມທຸກຍາກລຳບາກຂອງທ່ານໄວ້ເພື່ອຜົນປະໂຫຍດຂອງທ່ານແນວໃດ? ເບິ່ງ 2 ນີໄຟ 2:2.

ເບິ່ງ ໂຣມ 8:28; Dale G. Renlund, “Infuriating Unfairness,” Liahona, May 2021, 41–45 ນຳອີກ.

2 ນີໄຟ 2:15–29

ການຕົກ ແລະ ການຊົດໃຊ້ຂອງພຣະເຢຊູຄຣິດ ເປັນພາກສ່ວນທີ່ຈຳເປັນໃນແຜນຂອງພຣະບິດາເທິງສະຫວັນ.

ຫລາຍຄົນເຊື່ອວ່າການຕົກໄດ້ເປັນພຽງແຕ່ຄວາມໂສກເສົ້າ ແລະ ວ່າເອວາ ແລະ ອາດາມໄດ້ເຮັດຄວາມຜິດພາດອັນຖາວອນເມື່ອເຂົາເຈົ້າໄດ້ເລືອກທີ່ຈະກິນໝາກໄມ້ນັ້ນ. ຢູ່ໃນ 2 ນີໄຟ 2:15–28, ລີໄຮສິດສອນຄວາມຈິງເພີ່ມເຕີມກ່ຽວກັບການຕົກ—ແລະ ກ່ຽວກັບການໄຖ່ຜ່ານທາງພຣະຄຣິດ. ຂະນະທີ່ທ່ານຄົ້ນຄວ້າຂໍ້ເຫລົ່ານີ້, ໃຫ້ຂຽນລາຍຊື່ຂອງຄວາມຈິງກ່ຽວກັບສິ່ງທີ່ໄດ້ເກີດຂຶ້ນຢູ່ໃນສວນເອເດນ. ຄຳຖາມເຊັ່ນດັ່ງຕໍ່ໄປນີ້ອາດຊ່ວຍໄດ້:

ເປັນຫຍັງການຕົກຈຶ່ງຈຳເປັນ?
ພຣະເຢຊູຄຣິດມີບົດບາດໃດແດ່ໃນການເອົາຊະນະຜົນກະທົບຂອງການຕົກ?
ການເຂົ້າໃຈການຕົກຢ່າງຖືກຕ້ອງຊ່ວຍເຮົາໃຫ້ເຂົ້າໃຈຄວາມຕ້ອງການຂອງເຮົາທີ່ຕ້ອງມີພຣະເຢຊູຄຣິດຫລາຍຂຶ້ນແນວໃດ?

ເບິ່ງ Dallin H. Oaks, “The Great Plan of Happiness,” Ensign, Nov. 1993, 72–75 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

Let Not Your Heart Be Troubled [ຢ່າໃຫ້ໃຈຂອງເຈົ້າທັງຫລາຍວຸ້ນວາຍໄປ], ໂດຍ ຮາວເວີດ ລີອອນ

ແນວຄິດສຳລັບການສິດສອນເດັກນ້ອຍ

2 ນີໄຟ 1:13, 15, 23

ພຣະເຢຊູຄຣິດຊ່ວຍໃຫ້ເຮົາເອົາຊະນະຜົນກະທົບຂອງບາບ.

ເພື່ອຊ່ວຍໃຫ້ລູກໆຂອງທ່ານເຂົ້າໃຈຄຳເຊື້ອເຊີນຂອງລີໄຮທີ່ຈະໃຫ້ “ສັ່ນສາຍໂສ້” ຂອງບາບໃຫ້ຫລຸດອອກ, ບາງທີພວກທ່ານສາມາດຊ່ວຍກັນເຮັດສາຍໂສ້ຈາກເສັ້ນເຈ້ຍ. ຢູ່ໃນເສັ້ນເຈ້ຍນັ້ນ, ລູກໆຂອງທ່ານສາມາດຊ່ວຍທ່ານຂຽນບາງສິ່ງທີ່ຊາຕານລໍ້ລວງໃຫ້ເຮົາເຮັດ. ແລ້ວພວກທ່ານສາມາດອ່ານ 2 ນີໄຟ 1:13, 15, 23 ນຳກັນ ຂະນະທີ່ພວກເຂົາສະແດງອອກບາງທ່າຂອງວະລີທີ່ຢູ່ໃນຂໍ້ເຫລົ່ານີ້—ລວມທັງການສັ່ນໃຫ້ສາຍໂສ້ເຈ້ຍຫລຸດອອກ. ບາບເປັນຄືກັນກັບສາຍໂສ້ແນວໃດ? ພຣະເຢຊູຊ່ວຍໃຫ້ເຮົາ “ສັ່ນສາຍໂສ້” ຂອງບາບໃຫ້ຫລຸດອອກແນວໃດ?

2 ນີໄຟ 1:20

ເຮົາໄດ້ຮັບພອນເມື່ອເຮົາຮັກສາພຣະບັນຍັດຂອງພຣະເຈົ້າ.

ມັນຈະຊ່ວຍລູກໆຂອງທ່ານບໍທີ່ຈະປຽບທຽບພຣະບັນຍັດຂອງພຣະເຈົ້າໃສ່ກັບເກີບ, ໝວກ, ຖົງມື, ຫລື ສິ່ງຂອງຢ່າງອື່ນທີ່ປົກປ້ອງເຮົາ? ບາງທີທ່ານກໍສາມາດປ່ອຍໃຫ້ພວກເຂົາລອງສວມໃສ່ບາງສິ່ງຂະນະທີ່ພວກທ່ານເວົ້າລົມກັນກ່ຽວກັບວ່າ ພຣະບັນຍັດປົກປ້ອງເຮົາແນວໃດ. ແລ້ວທ່ານສາມາດອ່ານ 2 ນີໄຟ 1:20, ເນັ້ນວ່າເຮົາຈະ “ຮຸ່ງເຮືອງ” (ໄດ້ຮັບພອນ ຫລື ຖືກປົກປ້ອງ) ເມື່ອເຮົາຮັກສາພຣະບັນຍັດ. ແບ່ງປັນປະສົບການຢ່າງໜຶ່ງຕອນທ່ານໄດ້ຮັບພອນ ຫລື ຖືກປົກປ້ອງໂດຍການເຮັດຕາມພຣະບັນຍັດ.
ເພື່ອສາທິດໃຫ້ເຫັນຄວາມແຕກຕ່າງລະຫວ່າງຄວາມຈະເລີນຮຸ່ງເຮືອງ ແລະ ການຖືກຕັດອອກຈາກພຣະເຈົ້າ (ເບິ່ງ 2 ນີໄຟ 1:20), ທ່ານ ແລະ ລູກໆຂອງທ່ານສາມາດພາກັນເບິ່ງຕົ້ນໄມ້ ແລະ ໃບໄມ້ທີ່ສົມບູນ ຫລື ງ່າໄມ້ທີ່ຖືກຕັດອອກຈາກຕົ້ນ. ແລ້ວລູກໆຂອງທ່ານສາມາດທົບທວນທາງເລືອກທີ່ນີໄຟ ແລະ ພວກອ້າຍຂອງເພິ່ນໄດ້ເລືອກເຮັດ (ເບິ່ງ 1 ນີໄຟ 2:11–16; 3:5–7; 18:9–11). ແມ່ນຫຍັງຄືຜົນຮັບຂອງທາງເລືອກເຫລົ່ານີ້? ທາງເລືອກໃດແດ່ທີ່ຊ່ວຍໃຫ້ເຮົາເຊື່ອມຕໍ່ເຂົ້າກັບພຣະເຈົ້າ?

2 ນີໄຟ 2:11, 16, 27

ພຣະເຈົ້າໄດ້ມອບອິດສະລະທີ່ຈະເລືອກໃຫ້ແກ່ເຮົາ.

ເພື່ອຊ່ວຍໃຫ້ລູກໆຂອງທ່ານເຂົ້າໃຈສິ່ງທີ່ລີໄຮໄດ້ສິດສອນກ່ຽວກັບການກົງກັນຂ້າມ ແລະ ການເລືອກເຮັດ, ທ່ານສາມາດຫລິ້ນເກມ ຊຶ່ງທ່ານຈະເວົ້າຄຳໜຶ່ງ (ດັ່ງເຊັ່ນ ຄວາມສະຫວ່າງ) ແລະ ລູກໆຂອງທ່ານບອກຄຳທີ່ກົງກັນຂ້າມ (ຄວາມມືດ). ຊ່ວຍໃຫ້ພວກເຂົາຮຽນຮູ້ວ່າ ເປັນຫຍັງການກົງກັນຂ້າມຈຶ່ງເປັນພາກສ່ວນຂອງແຜນຂອງພຣະເຈົ້າຂະນະທີ່ພວກທ່ານອ່ານ 2 ນີໄຟ 2:11, 16 ນຳກັນ. ແລ້ວທ່ານສາມາດແບ່ງປັນເລື່ອງລາວກ່ຽວກັບເດັກນ້ອຍຄົນໜຶ່ງ ຜູ້ທີ່ຖືກລໍ້ລວງໃຫ້ເລືອກທາງຜິດ. ລູກໆຂອງທ່ານສາມາດແບ່ງປັນການກົງກັນຂ້າມຂອງການເລືອກທາງຜິດນັ້ນຄືຫຍັງ ແລະ ສະແດງທ່ານັ້ນອອກມາ.
ເພື່ອຮຽນຮູ້ກ່ຽວກັບຄວາມແຕກຕ່າງລະຫວ່າງ “ເສລີພາບ” ແລະ “ການເປັນຊະເລີຍ” (2 ນີໄຟ 2:27), ລູກໆຂອງທ່ານສາມາດແຕ້ມຮູບສັດທີ່ຢູ່ໃນກົງ ແລະ ສັດທີ່ຢູ່ໃນສະພາບແວດລ້ອມທຳມະຊາດຂອງມັນ. ສັດໂຕໃດທີ່ເປັນອິດສະລະ? ເຊື້ອເຊີນລູກໆໃຫ້ຊີ້ໄປຫາຮູບພາບທີ່ຖືກຕ້ອງເມື່ອທ່ານອ່ານຄຳທີ່ວ່າ “ອິດສະລະ” ຢູ່ໃນ 2 ນີໄຟ 2:27. ເປັນພະຍານວ່າພຣະເຢຊູຄຣິດເຮັດໃຫ້ເຮົາເປັນອິດສະລະແນວໃດ.
ຮ້ອງເພງດັ່ງເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70). ເຮົາຮຽນຮູ້ຫຍັງແດ່ຈາກເພງທີ່ກ່ຽວກັບການເລືອກ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Lehi and His People Arrive in the New World [ລີໄຮ ແລະ ຜູ້ຄົນຂອງເພິ່ນ ມາເຖິງໂລກໃໝ່], ໂດຍ ຄະລາກ ແຄວລີ ພຣາຍສ໌

ຮູບພາບ

ໜ້າກິດຈະກຳ: ຄືກັນກັບອາດາມ ແລະ ເອວາ, ເຮົາມີອຳເພີໃຈ