“ວັນທີ 19–25 ເດືອນກຸມພາ: ‘ໂອ້ ແຜນຂອງພຣະເຈົ້າຂອງພວກເຮົາຍິ່ງໃຫຍ່ພຽງໃດ.’ 2 ນີໄຟ 6–10,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 19–25 ເດືອນກຸມພາ. 2 ນີໄຟ 6–10,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ຮູບພາບ

ພຣະເຢຊູກຳລັງອະທິຖານຢູ່ໃນສວນເຄັດເຊມາເນ

Not My Will, but Thine, Be Done [ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ], ໂດຍ ແຮຣີ ແອນເດີສັນ

ວັນທີ 19–25 ເດືອນກຸມພາ: “ໂອ້ ແຜນຂອງພຣະເຈົ້າຂອງພວກເຮົາຍິ່ງໃຫຍ່ພຽງໃດ”

2 ນີໄຟ 6–10

ຄົງເປັນຢ່າງໜ້ອຍ 40 ປີ ນັບຕັ້ງແຕ່ຄອບຄົວຂອງລີໄຮໄດ້ໜີຈາກເຢຣູຊາເລັມມາ. ເຂົາເຈົ້າໄດ້ຢູ່ໃນແຜ່ນດິນໃໝ່, ຢູ່ຊີກໂລກອີກເບື້ອງໜຶ່ງ ຈາກເມືອງເຢຣູຊາເລັມ. ລີໄຮໄດ້ເສຍຊີວິດໄປ, ແລະ ຄອບຄົວຂອງເພິ່ນກໍເລີ່ມຕົ້ນສິ່ງທີ່ກາຍເປັນການຂັດແຍ້ງກັນລະຫວ່າງຊາວນີໄຟ ເປັນເວລາໜຶ່ງສັດຕະວັດ—“ຜູ້ທີ່ເຊື່ອໃນການເຕືອນ ແລະ ການເປີດເຜີຍຂອງພຣະເຈົ້າ”—ກັບຊາວເລມັນ, ຜູ້ທີ່ບໍ່ເຊື່ອ (2 ນີໄຟ 5:6). ຢາໂຄບ, ຜູ້ເປັນນ້ອງຊາຍຂອງນີໄຟ ແລະ ບັດນີ້ໄດ້ຖືກແຕ່ງຕັ້ງໃຫ້ເປັນຄູສອນຂອງຊາວນີໄຟ, ຢາກໃຫ້ຜູ້ຄົນແຫ່ງພັນທະສັນຍາຮູ້ວ່າ ພຣະເຈົ້າຈະບໍ່ເຄີຍລືມໄລພວກເຂົາ, ສະນັ້ນພວກເຂົາຈຶ່ງບໍ່ຄວນລືມໄລພຣະອົງ. ນີ້ຄືຂ່າວສານທີ່ເຮົາຕ້ອງການຫລາຍທີ່ສຸດໃນທຸກວັນນີ້ (ເບິ່ງ ຄຳສອນ ແລະ ພັນທະສັນຍາ 1:15–16). “ຂໍໃຫ້ພວກເຮົາລະນຶກເຖິງພຣະອົງ … ເພາະວ່າພວກເຮົາບໍ່ໄດ້ຖືກປະຖິ້ມ. … ຄຳສັນຍາຂອງພຣະຜູ້ເປັນເຈົ້ານັ້ນຍິ່ງໃຫຍ່,” ຢາໂຄບໄດ້ປະກາດ (2 ນີໄຟ 10:20–21). ໃນບັນດາຄຳສັນຍາເຫລົ່ານັ້ນ, ບໍ່ມີຢ່າງໃດທີ່ຍິ່ງໃຫຍ່ໄປກວ່າຄຳສັນຍາທີ່ວ່າ “ການຊົດໃຊ້ອັນບໍ່ມີຂອບເຂດ” ຈະເອົາຊະນະຄວາມຕາຍ ແລະ ນະລົກ (2 ນີໄຟ 9:7). “ສະນັ້ນ,” ຢາໂຄບໄດ້ສະຫລຸບ, “ຈົ່ງເຮັດໃຫ້ໃຈຂອງທ່ານຊື່ນບານ”! (2 ນີໄຟ 10:23).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ນີໄຟ 6–8

ພຣະຜູ້ເປັນເຈົ້າມີຄວາມເມດຕາຕໍ່ຜູ້ຄົນຂອງພຣະອົງ ແລະ ຈະເຮັດໃຫ້ພັນທະສັນຍາຂອງພຣະອົງສຳເລັດຄົບຖ້ວນ.

ເພື່ອຊ່ວຍຜູ້ຄົນຂອງພຣະອົງໃຫ້ເຂົ້າໃຈວ່າ ພວກເຂົາເປັນພາກສ່ວນໃນເຊື້ອສາຍອິດສະຣາເອນ ແລະ ສາມາດໄວ້ວາງໃຈໃນພຣະເຈົ້າ ແລະ ຄຳສັນຍາຂອງພຣະອົງ, ຢາໂຄບຈຶ່ງໄດ້ອ້າງເຖິງຄຳທຳນາຍຂອງເອຊາຢາ, ຊຶ່ງມີບັນທຶກຢູ່ໃນ 2 ນີໄຟ 6–8. ຂ່າວສານນັ້ນແມ່ນສຳລັບທ່ານຄືກັນ, ເພາະວ່າໄພ່ພົນຍຸກສຸດທ້າຍກໍເປັນພາກສ່ວນໃນຜູ້ຄົນແຫ່ງພັນທະສັນຍາຂອງພຣະເຈົ້າເຊັ່ນກັນ. ຂະນະທີ່ທ່ານອ່ານບົດເຫລົ່ານີ້, ໃຫ້ຄິດກ່ຽວກັບຄຳຖາມຄືກັນກັບດັ່ງຕໍ່ໄປນີ້:

ເຮົາຮຽນຮູ້ຫຍັງແດ່ກ່ຽວກັບຄວາມຮັກທີ່ໄຖ່ຂອງພຣະຜູ້ຊ່ວຍໃຫ້ລອດເພື່ອເຮົາ? ຄຳໃດ ຫລື ວະລີໃດທີ່ສະແດງຄວາມຮັກນີ້ໄດ້ດີໂດຍສະເພາະ?
ພຣະຜູ້ຊ່ວຍໃຫ້ລອດສະເໜີມອບສິ່ງໃດໃຫ້ແກ່ຜູ້ທີ່ສະແຫວງຫາພຣະອົງ?
ເຮົາສາມາດເຮັດຫຍັງແດ່ ເພື່ອຈະໄດ້ “ລໍຖ້າ” ພຣະຜູ້ຊ່ວຍໃຫ້ລອດ ແລະ ພອນແຫ່ງຄຳສັນຍາຂອງພຣະອົງຢ່າງຊື່ສັດ?

2 ນີໄຟ 9:1–26

ຮູບພາບ
ໄອຄອນຫ້ອງຮຽນສາດສະໜາ
ພຣະເຢຊູຄຣິດຊ່ວຍເຮົາຈາກບາບ ແລະ ຄວາມຕາຍ.

ວິທີໜຶ່ງທີ່ເຮັດໃຫ້ເຮົາກະຕັນຍູຢ່າງເລິກເຊິ່ງສຳລັບພຣະເຢຊູຄຣິດຄືການຄິດກ່ຽວກັບສິ່ງທີ່ອາດໄດ້ເກີດຂຶ້ນກັບເຮົາຖ້າບໍ່ມີພຣະອົງ. ຂະນະທີ່ທ່ານອ່ານ 2 ນີໄຟ 9:1–26, ໃຫ້ຄິດທີ່ຈະຂຽນລາຍການ ຫລື ໝາຍດ້ວຍສີດຽວ ກ່ຽວກັບສິ່ງທີ່ອາດຈະເກີດກັບເຮົາຖ້າບໍ່ມີການຊົດໃຊ້ຂອງພຣະເຢຊູຄຣິດ. ແລ້ວ, ອີກລາຍການໜຶ່ງ ຫລື ສີໜຶ່ງ, ໃຫ້ທ່ານລະບຸສິ່ງທີ່ເຮົາສາມາດໄດ້ຮັບ ຜ່ານທາງການຊົດໃຊ້ຂອງພຣະຜູ້ຊ່ວຍໃຫ້ລອດ. ອີງຕາມສິ່ງທີ່ທ່ານໄດ້ອ່ານ, ທ່ານຈະອະທິບາຍແນວໃດວ່າ ເປັນຫຍັງເຮົາຈຶ່ງຕ້ອງການການຊົດໃຊ້ຂອງພຣະເຢຊູຄຣິດ? ທ່ານພົບເຫັນຫຍັງແດ່ທີ່ດົນໃຈທ່ານໃຫ້ສັນລະເສີນ “ຄວາມສະຫລຽວສະຫລາດຂອງພຣະເຈົ້າ, ພຣະເມດຕາ ແລະ ພຣະຄຸນຂອງພຣະອົງ”? (2 ນີໄຟ 9:8).

ນອກເໜືອຈາກການສິດສອນສິ່ງທີ່ພຣະເຢຊູຄຣິດໂຜດເຮົາໃຫ້ລອດຈາກແລ້ວ, ຢາໂຄບຍັງໄດ້ໃຫ້ຄວາມຮູ້ອີກວ່າພຣະອົງໄດ້ເຮັດແນວໃດ. ໃຫ້ຄິດທີ່ຈະບັນທຶກສິ່ງທີ່ທ່ານພົບເຫັນໃນ 2 ນີໄຟ 9:11–15, 20–24.

ຢາໂຄບໄດ້ປະຫລາດໃຈກັບແຜນແຫ່ງການໄຖ່ຂອງພຣະເຈົ້າ ຈົນເພິ່ນໄດ້ອຸທານວ່າ, “ໂອ້ ແຜນຂອງພຣະເຈົ້າຂອງພວກເຮົາຍິ່ງໃຫຍ່ພຽງໃດ.” ໃຫ້ຊອກຫາຄຳອຸທານຂອງເພິ່ນໃນ 2 ນີໄຟ 9 (ເກືອບທັງໝົດມີຢູ່ໃນ ຂໍ້ທີ 8–20). ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ກ່ຽວກັບແຜນຂອງພຣະເຈົ້າ? ປະສົບການໃດແດ່ທີ່ໄດ້ຊ່ວຍໃຫ້ທ່ານຮູ້ສຶກເຖິງບາງສິ່ງທີ່ຢາໂຄບໄດ້ຮູ້ສຶກ? ພາກສ່ວນໜຶ່ງໃນການນະມັດສະການ ແລະ ການສຶກສາຂອງທ່ານ, ໃຫ້ຄິດທີ່ຈະຊອກຫາເພງສວດທີ່ອາດສະແດງເຖິງຄວາມຮູ້ສຶກຂອງທ່ານກ່ຽວກັບພຣະອົງ, ດັ່ງເຊັ່ນ “ຂ້າເຝົ້າພິສະຫວົງ” (ເພງສວດ ແລະ ເພງຂອງເດັກນ້ອຍ, 24).

ເບິ່ງ “Where Justice, Love, and Mercy Meet,” “Jacob Teaches of the Resurrection” (ວິດີໂອ), ຫ້ອງສະໝຸດພຣະກິດຕິຄຸນ; Gospel Topics, “Atonement of Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

2 ນີໄຟ 9:7

ການຊົດໃຊ້ຂອງພຣະຜູ້ຊ່ວຍໃຫ້ລອດບໍ່ມີຂອບເຂດ.

ທ່ານສາມາດເຮັດສິ່ງໃດເພື່ອຈະເຂົ້າໃຈ “ການຊົດໃຊ້ອັນບໍ່ມີຂອບເຂດ” ຂອງພຣະເຢຊູຄຣິດ? (2 ນີໄຟ 9:7). ບາງທີທ່ານສາມາດເບິ່ງ ຫລື ຄິດກ່ຽວກັບສິ່ງທີ່ເບິ່ງຄືວ່າ ບໍ່ມີຂອບເຂດ ໃນຈຳນວນເລກ—ໃບຫຍ້າຢູ່ໃນທົ່ງ, ເມັດດິນຊາຍຢູ່ໃນຫາດ, ຫລື ດວງດາວຢູ່ໃນທ້ອງຟ້າ. ການຊົດໃຊ້ຂອງພຣະຜູ້ຊ່ວຍໃຫ້ລອດບໍ່ມີຂອບເຂດແນວໃດ? ມັນກໍຍັງເປັນສ່ວນຕົວແນວໃດ? ວະລີໃດແດ່ໃນ 2 ນີໄຟ 9 ຊ່ວຍໃຫ້ທ່ານຮູ້ສຶກກະຕັນຍູຕໍ່ສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອທ່ານ?

2 ນີໄຟ 9:27–54

ເຮົາສາມາດມາຫາພຣະຄຣິດ ແລະ ເຮັດຕາມແຜນຂອງພຣະເຈົ້າ.

ໃນ 2 ນີໄຟ 9, ຢາໂຄບໄດ້ໃຊ້ສອງວະລີທີ່ມີພະລັງ ແລະ ກົງກັນຂ້າມກັນ ທີ່ວ່າ: “ຄວາມເມດຕາຂອງພຣະຜູ້ສ້າງຜູ້ຍິ່ງໃຫຍ່” ແລະ “ແຜນທີ່ມີເລ່ຫລ່ຽມຂອງມານຮ້າຍນັ້ນ” (2 ນີໄຟ 9:6, 28). ບາງທີທ່ານສາມາດແຕ້ມເສັ້ນທາງ ແລະ ຕິດປ້າຍໃສ່ວ່າ ແຜນຂອງພຣະບິດາເທິງສະຫວັນ. ແລ້ວຄົ້ນຄວ້າ 2 ນີໄຟ 9:27–52. ຊອກຫາຄຳເຕືອນ ແລະ ຄຳເຊື້ອເຊີນທີ່ຢາໂຄບໄດ້ມອບໃຫ້ເພື່ອຊ່ວຍໃຫ້ເຮົາຕິດຕາມແຜນນີ້. ຂຽນສິ່ງທີ່ທ່ານພົບເຫັນໄວ້ຕາມຂ້າງທາງ. ຊາຕານພະຍາຍາມນຳພາເຮົາໃຫ້ໜີຈາກແຜນຂອງພຣະເຈົ້າແນວໃດ? ທ່ານຮູ້ສຶກໄດ້ຮັບການກະຕຸ້ນເພື່ອໃຫ້ເຮັດຫຍັງໃນການຕອບຮັບຕໍ່ຄຳເຕືອນ ແລະ ຄຳເຊື້ອເຊີນຂອງຢາໂຄບ?

2 ນີໄຟ 10:20, 23–25

ການເສຍສະລະຂອງພຣະເຢຊູຄຣິດສາມາດນຳຄວາມຊື່ນຊົມມາໃຫ້ເຮົາ.

ຂ່າວສານຂອງຢາໂຄບເປັນໜ້າປິຕິຍິນດີແທ້ໆ. “ຂ້າພະເຈົ້າເວົ້າເລື່ອງເຫລົ່ານີ້ກັບທ່ານ,” ເພິ່ນໄດ້ກ່າວ, “ເພື່ອທ່ານຈະໄດ້ປິຕິຍິນດີ, ແລະ ເງີຍຫົວຂອງທ່ານຂຶ້ນຕະຫລອດການ” (2 ນີໄຟ 9:3). ຂະນະທີ່ທ່ານອ່ານ 2 ນີໄຟ 10:20, 23–25, ທ່ານພົບເຫັນຫຍັງແດ່ທີ່ໃຫ້ໃຈຂອງທ່ານເບີກບານ? ທ່ານຈະເຮັດຫຍັງແດ່ເພື່ອຈະໄດ້ຈື່ຈຳສິ່ງເຫລົ່ານີ້ ເວລາທ່ານຮູ້ສຶກທໍ້ຖອຍໃຈ?

ເບິ່ງ ໂຢຮັນ 16:33; D. Todd Christofferson, “The Joy of the Saints,” Liahona, Nov. 2019, 15–18; “Jacob Encourages the Nephites to Be Reconciled with God” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ນີໄຟ 9:6–10, 19–24

ພຣະເຢຊູຄຣິດຄືພຣະຜູ້ຊ່ວຍໃຫ້ລອດຂອງເຮົາ.

ທ່ານຈະຊ່ວຍໃຫ້ລູກໆຂອງທ່ານເຂົ້າໃຈ ແລະ ຮູ້ສຶກວ່າ ພວກເຂົາຕ້ອງການພຣະຜູ້ຊ່ວຍໃຫ້ລອດ ພຣະເຢຊູຄຣິດໄດ້ແນວໃດ? ກິດຈະກຳຂອງອາທິດນີ້ສາມາດຊ່ວຍໄດ້. ມັນໃຊ້ການປຽບທຽບງ່າຍໆຂອງຂຸມ ແລະ ຂັ້ນໄດ. ໃຫ້ຄິດທີ່ຈະໃຊ້ 2 ນີໄຟ 9:21–22 ເພື່ອເວົ້າລົມກັບລູກໆຂອງທ່ານກ່ຽວກັບວ່າ ເປັນຫຍັງທ່ານຈຶ່ງກະຕັນຍູສຳລັບພຣະເຢຊູຄຣິດ.
ວິທີໜຶ່ງທີ່ຈະຊ່ວຍໃຫ້ລູກໆຂອງທ່ານເຂົ້າໃຈວ່າ ເປັນຫຍັງເຮົາຈຶ່ງຕ້ອງການພຣະຜູ້ຊ່ວຍໃຫ້ລອດຄືການສິດສອນພວກເຂົາກ່ຽວກັບການຕົກ. ທ່ານສາມາດສະແດງຮູບອາດາມ ແລະ ເອວາ, ດັ່ງເຊັ່ນ ການໜີຈາກສວນເອເດນ (ຫ້ອງສະໝຸດພຣະກິດຕິຄຸນ), ແລະ ຮູບພຣະເຢຊູຄຣິດຢູ່ເທິງໄມ້ກາງແຂນ. ໃຫ້ຄິດທີ່ຈະຂໍໃຫ້ພວກເຂົາບັນຍາຍສິ່ງທີ່ກຳລັງເກີດຂຶ້ນຢູ່ໃນຮູບແຕ່ລະແຜ່ນ. ເຮົາເປັນຄືກັນກັບອາດາມ ແລະ ເອວາແນວໃດ? ບາງທີ 2 ນີໄຟ 9:6–10 ສາມາດຊ່ວຍໃຫ້ພວກເຂົາເຫັນສິ່ງທີ່ພຣະເຢຊູຄຣິດກະທຳເພື່ອເຮົາ. ໃຫ້ຄິດທີ່ຈະເຊື້ອເຊີນລູກໆໃຫ້ແບ່ງປັນຄວາມຮູ້ສຶກຂອງພວກເຂົາກ່ຽວກັບພຣະເຢຊູຄຣິດ. ເພງເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດຊ່ວຍໄດ້.

ສິດສອນຄວາມຈິງດ້ວຍເລື່ອງລາວ ແລະ ຕົວຢ່າງ. ໃຫ້ແນ່ໃຈວ່າ ເລື່ອງລາວ ແລະ ຕົວຢ່າງທີ່ທ່ານໃຊ້ນັ້ນສິດສອນຄວາມຈິງ. ຍົກຕົວຢ່າງ, ເມື່ອໃຊ້ໜ້າກິດຈະກຳຂອງອາທິດນີ້, ໃຫ້ສິດສອນວ່າ ພຣະເຢຊູຄຣິດໄດ້ລົງມາໃນ “ຂຸມ” ເພື່ອຊ່ວຍເຮົາໃນແຕ່ລະຂັ້ນຕອນ ຂະນະທີ່ເຮົາປີນອອກຈາກຂຸມ.

2 ນີໄຟ 9:20, 28–29, 42–43, 49

“ໃຈຂອງຂ້າພະເຈົ້າເບີກບານໃນຄວາມຊອບທຳ.”

ເພື່ອຊຸກຍູ້ລູກໆຂອງທ່ານໃຫ້ “[ເບີກບານ] ໃນຄວາມຊອບທຳ” ຫລື ເຊື່ອຟັງພຣະຜູ້ເປັນເຈົ້າດ້ວຍຄວາມຊື່ນຊົມ (2 ນີໄຟ 9:49), ບາງທີທ່ານສາມາດແບ່ງປັນຕົວຢ່າງ ຊຶ່ງໃນນັ້ນເດັກນ້ອຍຄົນໜຶ່ງໄດ້ເລືອກເຮັດສິ່ງທີ່ດີ ຫລື ເລືອກເຮັດສິ່ງທີ່ບໍ່ດີ. ເຊື້ອເຊີນລູກໆໃຫ້ຢືນຂຶ້ນເມື່ອການເລືອກນຳຄວາມສຸກມາໃຫ້ ແລະ ນັ່ງລົງເມື່ອການເລືອກນຳຄວາມໂສກເສົ້າມາໃຫ້. ເຮົາເຄີຍຮູ້ສຶກມີຄວາມສຸກເພາະເຮົາໄດ້ເລືອກຕິດຕາມພຣະເຢຊູຄຣິດເມື່ອໃດ?
ລູກໆຂອງທ່ານອາດມີແນວໂນ້ມທີ່ຈະປະຕິສຳພັນກັບຜູ້ຄົນ (ຖ້າເຂົາຍັງບໍ່ໄດ້ເຮັດເທື່ອ) ຜູ້ທີ່ຄິດວ່າພຣະບັນຍັດຂອງພຣະຜູ້ເປັນເຈົ້າເປັນເລື່ອງໂງ່ຈ້າ ຫລື ລ້າສະໄໝແລ້ວ. ບາງທີທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບວິທີທີ່ຈະອະທິບາຍວ່າ ເປັນຫຍັງເຮົາຈຶ່ງຍິນດີທີ່ຈະຮັກສາພຣະບັນຍັດ. ເປັນຫຍັງມັນຈຶ່ງສຳຄັນທີ່ຈະໄວ້ວາງໃຈໃນຄຳແນະນຳຂອງພຣະເຈົ້າ ເຖິງແມ່ນວ່າເຮົາບໍ່ເຂົ້າໃຈທັງໝົດກໍຕາມ? ທ່ານສາມາດຊຸກຍູ້ພວກເຂົາໃຫ້ເບິ່ງໃນ 2 ນີໄຟ 9:20, 28–29, 42–43 ເພື່ອຄວາມຊ່ວຍເຫລືອກັບການຄິດ ແລະ ການສົນທະນາກ່ຽວກັບຄຳຖາມເຫລົ່ານີ້.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

He Healed Many of Diverse Diseases [ພຣະອົງໄດ້ປິ່ນປົວພະຍາດຕ່າງໆ], ໂດຍ ເຈ ເຄີກ ຣິເຈີດສ໌

ຮູບພາບ

ໜ້າກິດຈະກຳ: ພຣະເຢຊູຄຣິດຊ່ວຍເຮົາຈາກບາບ ແລະ ຄວາມຕາຍ