“ວັນທີ 29 ເດືອນມັງກອນ–ວັນທີ 4 ເດືອນກຸມພາ: ‘ເຮົາຈະຕຽມທາງໄວ້ກ່ອນເຈົ້າ.’ 1 ນີໄຟ 16–22,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)
“ວັນທີ 29 ເດືອນມັງກອນ–ວັນທີ 4 ເດືອນກຸມພາ. 1 ນີໄຟ 16–22,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)
ວັນທີ 29 ເດືອນມັງກອນ–ວັນທີ 4 ເດືອນກຸມພາ: “ເຮົາຈະຕຽມທາງໄວ້ກ່ອນເຈົ້າ”
1 ນີໄຟ 16–22
ຂະນະທີ່ຄອບຄົວຂອງລີໄຮເດີນທາງມຸ້ງໜ້າໄປຫາແຜ່ນດິນແຫ່ງຄຳສັນຍາ, ພຣະຜູ້ເປັນເຈົ້າໄດ້ສັນຍາກັບເຂົາເຈົ້າວ່າ: “ເຮົາຈະຕຽມທາງໄວ້ກ່ອນເຈົ້າ, ຖ້າຫາກເຈົ້າຈະຮັກສາພຣະບັນຍັດຂອງເຮົາ” (1 ນີໄຟ 17:13). ເຫັນໄດ້ຢ່າງແຈ້ງຊັດ, ວ່າຄຳສັນຍານັ້ນບໍ່ໄດ້ໝາຍຄວາມວ່າ ການເດີນທາງຈະງ່າຍ—ສະມາຊິກໃນຄອບຄົວຍັງບໍ່ເຫັນພ້ອມນຳກັນ, ຄັນທະນູກໍຫັກ, ຜູ້ຄົນໄດ້ດີ້ນລົນ ແລະ ຕາຍກໍມີ, ແລະ ເຂົາເຈົ້າຍັງໄດ້ສ້າງເຮືອຈາກວັດຖຸດິບນຳອີກ. ເຖິງຢ່າງໃດກໍຕາມ, ເມື່ອຄອບຄົວໄດ້ປະເຊີນກັບຄວາມຍາກລຳບາກ ຫລື ວຽກງານທີ່ເບິ່ງຄືວ່າເປັນໄປບໍ່ໄດ້, ນີໄຟໄດ້ຮັບຮູ້ວ່າ ພຣະຜູ້ເປັນເຈົ້າບໍ່ເຄີຍຢູ່ຫ່າງໄກ. ເພິ່ນໄດ້ຮູ້ວ່າ ພຣະເຈົ້າ “ບຳລຸງລ້ຽງດູ [ຄົນຊື່ສັດ], ແລະ ເຮັດໃຫ້ພວກເຂົາເຂັ້ມແຂງຂຶ້ນ, ແລະ ຈັດຫາທາງຊຶ່ງໂດຍທາງນັ້ນພວກເຂົາຈະສຳເລັດໄດ້ໃນສິ່ງທີ່ພຣະອົງບັນຊາພວກເຂົາ” (1 ນີໄຟ 17:3). ຖ້າຫາກທ່ານເຄີຍສົງໄສວ່າເປັນຫຍັງສິ່ງທີ່ບໍ່ດີຈຶ່ງເກີດກັບຄົນດີ ເຊັ່ນ ນີໄຟ ແລະ ຄອບຄົວຂອງເພິ່ນ, ແລ້ວທ່ານຈະພົບເຫັນຄວາມຮູ້ຢູ່ໃນບົດເຫລົ່ານີ້. ແຕ່ບາງທີສິ່ງທີ່ສຳຄັນຫລາຍໄປກວ່ານັ້ນ, ທ່ານຈະພົບເຫັນສິ່ງທີ່ຄົນດີເຮັດ ເມື່ອສິ່ງທີ່ບໍ່ດີເກີດຂຶ້ນ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
![]()
ຮູບພາບໄອຄອນຫ້ອງຮຽນສາດສະໜາ
ຄອບຄົວຂອງນີໄຟໄດ້ປະເຊີນກັບການທ້າທາຍໜັກຫລາຍຢ່າງ—ຄືກັນກັບເຮົາທຸກຄົນ. ທ່ານຮຽນຮູ້ຫຍັງແດ່ຈາກນີໄຟກ່ຽວກັບການປະເຊີນໜ້າກັບຄວາມຍາກລຳບາກດ້ວຍສັດທາໃນພຣະເຢຊູຄຣິດ? ອ່ານກ່ຽວກັບປະສົບການຂອງເພິ່ນໃນ 1 ນີໄຟ 16:17–32; 16:34–39; 17:7–16; 18:1–4; ແລະ 18:9–22. ໃຫ້ຄິດທີ່ຈະບັນທຶກສິ່ງທີ່ທ່ານພົບເຫັນໄວ້ກ້ອງຫົວຂໍ້ດັ່ງເຊັ່ນ: “ການທ້າທາຍ,” “ວິທີທີ່ນີໄຟຕອບຮັບ,” ແລະ “ວິທີທີ່ພຣະຜູ້ເປັນເຈົ້າໄດ້ຊ່ວຍເຫລືອ.” ທ່ານຮຽນຮູ້ຫຍັງແດ່ທີ່ທ່ານສາມາດນຳໃຊ້ກັບການທ້າທາຍທີ່ທ່ານໄດ້ປະເຊີນ?
ຫລັງຈາກທີ່ຮຽນຮູ້ຈາກນີໄຟ ແລະ ຄອບຄົວຂອງເພິ່ນ, ທ່ານອາດຢາກບັນທຶກຄວາມຄິດເພີ່ມເຕີມໄວ້ຢູ່ກ້ອງຫົວຂໍ້ດັ່ງເຊັ່ນ: “ການທ້າທາຍຂອງເຮົາ,” “ວິທີທີ່ເຮົາຕອບຮັບ,” ແລະ “ວິທີທີ່ພຣະຜູ້ເປັນເຈົ້າສາມາດຊ່ວຍເຫລືອເຮົາ.” ຂະນະທີ່ທ່ານເຮັດ, ທ່ານສາມາດອ້າງເຖິງຂໍ້ພຣະຄຳພີດັ່ງເຊັ່ນ: ມັດທາຍ 11:28–30; ໂຢຮັນ 14:26–27; ໂມໄຊຢາ 24:13–15. ເພງສວດເຊັ່ນ “ຂໍເພິ່ງພຣະທຸກຊົ່ວໂມງ” (ເພງສວດ ແລະ ເພງຂອງເດັກນ້ອຍ, 12), ສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະຜູ້ຊ່ວຍໃຫ້ລອດ ແລະ ໃນຄວາມຊ່ວຍເຫລືອທີ່ພຣະອົງສະເໜີມອບໃຫ້ໃນຊ່ວງເວລາຂອງການທົດລອງໄດ້.
ເບິ່ງ Anthony D. Perkins, “Remember Thy Suffering Saints, O Our God,” Liahona, Nov. 2021, 103–5; “He Will Give You Help,” “The Lord Guides Lehi’s Journey,” “The Lord Commands Nephi to Build a Ship,” ແລະ “Lehi’s Family Sails to the Promised Land” (ວິດີໂອ), ຫ້ອງສະໝຸດພຣະກິດຕິຄຸນ; “Life Help,” ຫ້ອງສະໝຸດພຣະກິດຕິຄຸນ ນຳອີກ.
1 ນີໄຟ 16:10–16, 23–31; 18:11–22
ພຣະເຈົ້ານຳພາເຮົາຜ່ານທາງວິທີນ້ອຍໆ ແລະ ງ່າຍໆ.
ເມື່ອພຣະເຈົ້ານຳພາຄອບຄົວຂອງລີໄຮເຂົ້າໄປໃນຖິ່ນແຫ້ງແລ້ງກັນດານ, ພຣະອົງບໍ່ໄດ້ມອບແຜນທີ່ ທີ່ສະແດງລາຍລະອຽດທັງໝົດຂອງການເດີນທາງໃຫ້ເຂົາເຈົ້າ. ກົງກັນຂ້າມ, ພຣະອົງໄດ້ມອບເລຍໂຮນາໃຫ້ ເພື່ອນຳພາເຂົາເຈົ້າໃນແຕ່ລະວັນ. ຂະນະທີ່ທ່ານອ່ານ 1 ນີໄຟ 16:10–16, 23–31, ແລະ 18:11–22, ໃຫ້ຄິດທີ່ຈະຂຽນຫລັກທຳທີ່ສະແດງເຖິງວິທີທີ່ພຣະເຈົ້ານຳພາລູກໆຂອງພຣະອົງລົງໄວ້ (ຍົກຕົວຢ່າງ, 1 ນີໄຟ 16:10 ສາມາດສິດສອນວ່າ ບາງເທື່ອພຣະເຈົ້ານຳພາເຮົາໃນວິທີທີ່ບໍ່ຄາດຄິດ). ແມ່ນຫຍັງທີ່ຄ້າຍຄືກັນທີ່ທ່ານເຫັນລະຫວ່າງເລຍໂຮນາ ແລະ ພຣະວິນຍານບໍລິສຸດ? “ວິທີນ້ອຍໆ” ຢ່າງໃດແດ່ ຊຶ່ງພຣະອົງໄດ້ນຳ “ເລື່ອງອັນຍິ່ງໃຫຍ່ມາ” ໃນຊີວິດຂອງທ່ານ?
ເບິ່ງ ແອວມາ 37:7, 38–47; ຄຳສອນ ແລະ ພັນທະສັນຍາ 64:33–34 ນຳອີກ.
If Ye Are Prepared Ye Shall Not Fear [ຖ້າຫາກພວກເຈົ້າຕຽມພ້ອມ ພວກເຈົ້າຈະບໍ່ຢ້ານກົວ], ໂດຍ ຄະລາກ ແຄວລີ ພຣາຍສ໌
ການທົດລອງຂອງເຮົາສາມາດເປັນພອນ.
ເຖິງແມ່ນນີໄຟ ແລະ ພວກອ້າຍຂອງເພິ່ນປະສົບກັບການທ້າທາຍຢ່າງດຽວກັນຢູ່ໃນຖິ່ນແຫ້ງແລ້ງກັນດານ, ແຕ່ປະສົບການຂອງເຂົາເຈົ້າແມ່ນແຕກຕ່າງກັນຫລາຍ. ບາງທີທ່ານສາມາດປຽບທຽບຄວາມແຕກຕ່າງລະຫວ່າງເລື່ອງລາວການເດີນທາງຂອງນີໄຟ ຢູ່ໃນຖິ່ນແຫ້ງແລ້ງກັນດານ (ເບິ່ງ 1 ນີໄຟ 17:1–6) ກັບເລື່ອງລາວຂອງພວກອ້າຍຂອງເພິ່ນ (ເບິ່ງ 1 ນີໄຟ 17:17–22). ນີໄຟໄດ້ຮູ້ ຫລື ເຮັດຫຍັງທີ່ຊ່ວຍໃຫ້ເພິ່ນມີທັດສະນະທີ່ຊື່ສັດ? ໃຫ້ຄິດທີ່ຈະຂຽນກ່ຽວກັບການທົດລອງເມື່ອບໍ່ດົນມານີ້ ຫລື ໃນປະຈຸບັນ ຈາກທັດສະນະແຫ່ງສັດທາ ແລະ ຄວາມກະຕັນຍູ. ທ່ານຮູ້ສຶກ ຫລື ຮຽນຮູ້ຫຍັງແດ່ຈາກສິ່ງນີ້?
ເບິ່ງ Amy A. Wright, “Christ Heals That Which Is Broken,” Liahona, May 2022, 81–84; “No Strength without Struggle” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ຊ່ວງເວລາສະທ້ອນຢ່າງງຽບໆ. ການໃຊ້ເວລາເພື່ອຄິດ, ໄຕ່ຕອງ, ສະທ້ອນ, ຫລື ຂຽນ ສາມາດນຳໄປສູ່ການດົນໃຈໄດ້. ມັນສາມາດຊ່ວຍໃຫ້ເຮົາເຫັນວິທີທີ່ຄຳສອນ ຫລື ຫລັກທຳພຣະກິດຕິຄຸນກ່ຽວຂ້ອງກັບຊີວິດຂອງເຮົາແນວໃດ. ເມື່ອທ່ານສິດສອນຄົນອື່ນ, ຈົ່ງໃຫ້ເວລາເຂົາເຈົ້າສະທ້ອນ ແລະ ຂຽນສິ່ງທີ່ເຂົາເຈົ້າໄດ້ຮັບຄວາມປະທັບໃຈລົງໄວ້. ສິ່ງນີ້ກໍສາມາດຊ່ວຍໃຫ້ເຂົາເຈົ້າເຕັມໃຈຫລາຍຂຶ້ນທີ່ຈະແບ່ງປັນຄວາມຄິດ ແລະ ຄວາມຮູ້ສຶກຂອງເຂົາເຈົ້າກັບຄົນອື່ນ.
ເຮົາສາມາດ “ປຽບທຽບພຣະຄຳພີທັງໝົດ” ໃສ່ກັບຕົວເຮົາເອງ.
ເພາະພຣະຄຳພີໄດ້ຖືກຂຽນດົນນານມາແລ້ວ, ມັນອາດເບິ່ງຄືວ່າ ມັນບໍ່ກ່ຽວຂ້ອງກັບເຮົາໃນທຸກວັນນີ້. ແຕ່ນີໄຟຮູ້ດີກວ່ານັ້ນ. “ຂ້າພະເຈົ້າປຽບທຽບພຣະຄຳພີທັງໝົດກັບຕົວຂອງພວກເຮົາ,” ເພິ່ນກ່າວ, “ເພື່ອມັນຈະໄດ້ເປັນຜົນປະໂຫຍດ ແລະ ເປັນການຮຽນຮູ້ຂອງພວກເຮົາ” (1 ນີໄຟ 19:23). ນີ້ຄືເຫດຜົນໜຶ່ງທີ່ນີໄຟພົບເຫັນພະລັງທາງວິນຍານຫລາຍທີ່ສຸດໃນພຣະຄຳພີ.
ໃຫ້ພິຈາລະນາຄຳຖາມເຊັ່ນດັ່ງຕໍ່ໄປນີ້ ຂະນະທີ່ທ່ານອ່ານ 1 ນີໄຟ 20–22:
-
1 ນີໄຟ 20:1–9.ຂໍ້ເຫລົ່ານີ້ສິດສອນຫຍັງແດ່ກ່ຽວກັບຜູ້ຄົນໃນສະໄໝຂອງເອຊາຢາ? ທ່ານພົບເຫັນຫຍັງແດ່ທີ່ກ່ຽວຂ້ອງກັບທ່ານ?
-
1 ນີໄຟ 20:17–22.ຂໍ້ເຫລົ່ານີ້ສິດສອນກ່ຽວກັບວິທີທີ່ພຣະບິດາເທິງສະຫວັນໄດ້ນຳພາຜູ້ຄົນໃນສະໄໝຂອງເອຊາຢາແນວໃດ? ພຣະອົງເຊື້ອເຊີນທ່ານໃຫ້ຕິດຕາມພຣະອົງແນວໃດ?
ທ່ານພົບເຫັນສິ່ງໃດອີກແດ່ໃນ 1 ນີໄຟ 20–22 ທີ່ທ່ານສາມາດ “ປຽບທຽບ” ໃສ່ກັບຕົວທ່ານເອງ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
1 ນີໄຟ 16:10, 28–29; 18:8–13, 20–22
ເມື່ອເຮົາຮັກສາພຣະບັນຍັດ, ພຣະຜູ້ເປັນເຈົ້າຈະນຳພາເຮົາ.
-
ຖ້າຫາກທ່ານມີເຂັມທິດ, ແຜນທີ່, ຫລື ບາງສິ່ງອື່ນອີກທີ່ຊ່ວຍເຮົາພົບເຫັນເສັ້ນທາງ, ທ່ານສາມາດສະແດງມັນໃຫ້ລູກໆຂອງທ່ານເບິ່ງ. ສິ່ງນີ້ອາດເປັນວິທີທີ່ດີ ໃນການເລີ່ມຕົ້ນສົນທະນາກ່ຽວກັບເລຍໂຮນາ, ຊຶ່ງທ່ານສາມາດອ່ານກ່ຽວກັບໃນ 1 ນີໄຟ 16:10, 28–29. ມີເຫດຜົນບາງຢ່າງໃດແດ່ທີ່ເຂັມທິດ ຫລື ແຜນທີ່ອາດບໍ່ທຳງານ? ເປັນຫຍັງບາງຄັ້ງເລຍໂຮນາຈຶ່ງບໍ່ທຳງານສຳລັບຄອບຄົວຂອງລີໄຮ? (ເບິ່ງ 1 ນີໄຟ 18:9–12, 20–22). ພຣະບິດາເທິງສະຫວັນໄດ້ມອບຫຍັງແດ່ໃຫ້ເຮົາໃນທຸກວັນນີ້ເພື່ອນຳພາເຮົາກັບຄືນໄປຫາພຣະອົງ?
-
ເພື່ອຊ່ວຍລູກໆຂອງທ່ານໃຫ້ນຳໃຊ້ສິ່ງທີ່ພວກເຂົາຮຽນຮູ້ກ່ຽວກັບເລຍໂຮນາໃນ 1 ນີໄຟ 16:10, 26–31; 18:8–22, ທ່ານສາມາດເຊື້ອເຊີນໃຫ້ພວກເຂົາຄິດກ່ຽວກັບການຕັດສິນໃຈທີ່ສຳຄັນ ຫລື ຍາກໆ. ພຣະເຈົ້າໄດ້ມອບຫຍັງແດ່ໃຫ້ເຮົາເພື່ອນຳພາເຮົາໃນທຸກວັນນີ້ ທີ່ທຳງານຄືກັນກັບເລຍໂຮນາ? (ເບິ່ງ, ຍົກຕົວຢ່າງ, ແອວມາ 37:38–44.) ໃຫ້ຄິດທີ່ຈະແບ່ງປັນປະສົບການສ່ວນຕົວ ຊຶ່ງໃນນັ້ນພຣະບິດາເທິງສະຫວັນໄດ້ນຳພາເຮົາ.
ເຮົາສາມາດເປັນຕົວຢ່າງທີ່ດີໃຫ້ແກ່ຄອບຄົວຂອງເຮົາ.
-
ຂະນະທີ່ພວກທ່ານອ່ານ 1 ນີໄຟ 16:21–32 ນຳກັນ, ໃຫ້ຊ່ວຍລູກໆຂອງທ່ານຊອກຫາວິທີທີ່ຕົວຢ່າງຂອງນີໄຟເປັນພອນໃຫ້ແກ່ຄອບຄົວຂອງເພິ່ນແນວໃດ (ເບິ່ງ ວິດີໂອ “The Lord Guides Lehi’s Journey” [ຫ້ອງສະໝຸດພຣະກິດຕິຄຸນ]) ນຳອີກ. ສິ່ງນີ້ອາດນຳໄປສູ່ການສົນທະນາກ່ຽວກັບວິທີທີ່ເຮົາສາມາດເປັນເໝືອນດັ່ງນີໄຟໄດ້. ເຊື້ອເຊີນລູກໆຂອງທ່ານໃຫ້ວາງແຜນສິ່ງໜຶ່ງທີ່ພວກເຂົາສາມາດເຮັດ ເພື່ອຈະໄດ້ເປັນອິດທິພົນທີ່ດີໃຫ້ກັບສະມາຊິກຄົນອື່ນໆໃນຄອບຄົວ.
ພຣະບິດາເທິງສະຫວັນສາມາດຊ່ວຍເຮົາເຮັດສິ່ງທີ່ຍາກໆໄດ້.
-
ເດັກນ້ອຍມັກເລົ່າເລື່ອງ. ທ່ານສາມາດເຊື້ອເຊີນໃຫ້ພວກເຂົາຊ່ວຍທ່ານເລົ່າເລື່ອງນີໄຟຖືກບັນຊາໃຫ້ສ້າງເຮືອ (ເບິ່ງ 1 ນີໄຟ 17:7–19; 18:1–4; ເບິ່ງ “ບົດທີ 7: ການສ້າງເຮືອໃຫຍ່,” ໃນ ເລື່ອງພຣະຄຳພີມໍມອນ, 21–22; ຫລື ວິດີໂອ “The Lord Instructs Nephi to Build a Ship” [ຫ້ອງສະໝຸດພຣະກິດຕິຄຸນ]) ນຳອີກ. ພວກເຂົາສາມາດຮ້ອງບາດທີສອງຂອງເພງ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70) ນຳກັນ. ແມ່ນຫຍັງທີ່ຊ່ວຍໃຫ້ນີໄຟມີຄວາມກ້າຫານ ເມື່ອພວກອ້າຍຂອງເພິ່ນເວົ້າເຍາະເຍີ້ຍເພິ່ນ ໃນຄວາມພະຍາຍາມທີ່ຈະສ້າງເຮືອ?
-
ນີໄຟບໍ່ຮູ້ຈັກວິທີສ້າງເຮືອ, ສະນັ້ນເພິ່ນຈຶ່ງໄດ້ເພິ່ງອາໄສຄຳແນະນຳຈາກພຣະຜູ້ເປັນເຈົ້າ. ຫລັງຈາກການອ່ານ 1 ນີໄຟ 18:1 ກັບທ່ານ, ລູກໆຂອງທ່ານສາມາດເຮັດ ໜ້າກິດຈະກຳຂອງອາທິດນີ້. ຂະນະທີ່ພວກເຂົາເຮັດ, ໃຫ້ເວົ້າລົມກັບພວກເຂົາກ່ຽວກັບວິທີທີ່ພຣະບິດາເທິງສະຫວັນສາມາດຊ່ວຍເຮົາເຮັດສິ່ງທີ່ຍາກໆໄດ້, ຄືກັນກັບທີ່ພຣະອົງໄດ້ຊ່ວຍນີໄຟ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
They Did Treat Me with Much Harshness [ພວກເຂົາໄດ້ເຮັດຮຸນແຮງຕໍ່ຂ້າພະເຈົ້າຫລາຍຢ່າງ], ໂດຍ ວາວເຕີ ເຣນ