“ວັນທີ 4–10 ເດືອນມີນາ: ‘ພວກເຮົາປິຕິຍິນດີໃນພຣະຄຣິດ.’ 2 ນີໄຟ 20–25,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 4–10 ເດືອນມີນາ. 2 ນີໄຟ 20–25,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ຮູບພາບ

ຄອບຄົວກຳລັງສຶກສາ

ວັນທີ 4–10 ເດືອນມີນາ: “ພວກເຮົາປິຕິຍິນດີໃນພຣະຄຣິດ”

2 ນີໄຟ 20–25

ການຂຽນຂອງເອຊາຢາລວມທັງຄຳເຕືອນທີ່ຮຸນແຮງ, ແຕ່ມັນກໍຍັງໃຫ້ຄວາມຫວັງ ແລະ ຄວາມຊື່ນຊົມໄດ້. ນີ້ຄືເຫດຜົນຢ່າງໜຶ່ງທີ່ນີໄຟໄດ້ລວມມັນຢູ່ໃນບັນທຶກຂອງເພິ່ນ: “ຂ້າພະເຈົ້າຂຽນຄຳເວົ້າຂອງເອຊາຢາບາງຄຳ,” ເພິ່ນໄດ້ເວົ້າ, “ສຳລັບຜູ້ໃດຜູ້ໜຶ່ງ … ຈະເຫັນຄຳເວົ້າເຫລົ່ານີ້ ແລະ ຈະໄດ້ມີກຳລັງໃຈ ແລະ ປິຕິຍິນດີ” (2 ນີໄຟ 11:8). ໃນວິທີໜຶ່ງ, ຄຳເຊື້ອເຊີນໃຫ້ອ່ານການຂຽນຂອງເອຊາຢາ ເປັນຄຳເຊື້ອເຊີນໃຫ້ປິຕິຍິນດີ. ທ່ານສາມາດເບີກບານ, ດັ່ງທີ່ນີໄຟໄດ້ເບີກບານ, ໃນຄຳທຳນາຍຂອງເອຊາຢາກ່ຽວກັບການເຕົ້າໂຮມອິດສະຣາເອນ, ການສະເດັດມາຂອງພຣະເມຊີອາ, ແລະ ສັນຕິສຸກທີ່ສັນຍາໄວ້ກັບຄົນຊອບທຳ. ທ່ານສາມາດປິຕິຍິນດີທີ່ໄດ້ມີຊີວິດໃນວັນເວລາທີ່ມີຄຳທຳນາຍ ເມື່ອພຣະຜູ້ເປັນເຈົ້າໄດ້ “ຕັ້ງຫລັກສັນຍານຂຶ້ນໃຫ້ແກ່ປະຊາຊາດ, ແລະ ຈະຊຸມນຸມອິດສະຣາເອນທີ່ຖືກຂັບໄລ່ອອກໄປ” (2 ນີໄຟ 21:12). ເມື່ອທ່ານກະຫາຍຄວາມຊອບທຳ, ທ່ານສາມາດ “ດ້ວຍຄວາມສຸກ … ຕັກນ້ຳຈາກບໍ່ແຫ່ງຄວາມລອດ” ໄດ້ (2 ນີໄຟ 22:3). ໃນອີກຄຳໜຶ່ງ, ທ່ານສາມາດ “ປິຕິຍິນດີໃນພຣະຄຣິດ” (2 ນີໄຟ 25:26).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ນີໄຟ 21–22

ເຮົາສາມາດພົບສັນຕິສຸກໄດ້ໃນພຣະເຢຊູຄຣິດ.

ລູກຫລານຂອງລີໄຮໄດ້ມີບັນຫາກັບການຂັດແຍ້ງ. ບັນຫານັ້ນໄດ້ຮ້າຍແຮງຂຶ້ນໃນຄົນລຸ້ນຫລັງ, ຊຶ່ງນຳໄປສູ່ການແຕກແຍກ, ການເປັນຊະເລີຍ, ຄວາມເສົ້າສະຫລົດໃຈ, ແລະ ຄວາມພິນາດ. ແລະ ການຂັດແຍ້ງກໍຍັງສືບຕໍ່ເປັນບັນຫາໃນທຸກວັນນີ້.

ດ້ວຍມີສິ່ງທັງໝົດຢູ່ໃນໃຈ, ໃຫ້ຄິດກ່ຽວກັບຄຳທຳນາຍຢູ່ໃນ 2 ນີໄຟ 21–22. ໃຫ້ພິຈາລະນາວິທີທີ່ພຣະຜູ້ຊ່ວຍໃຫ້ລອດກຳລັງເຮັດໃຫ້ຄຳທຳນາຍເຫລົ່ານີ້ເກີດເປັນຈິງແນວໃດ. ຄຳທຳນາຍທີ່ວ່າ ໝາປ່າຈະ “ຢູ່ກັບລູກແກະ” ໝາຍຄວາມວ່າແນວໃດຕໍ່ທ່ານ? (2 ນີໄຟ 21:6). ໄຕ່ຕອງສິ່ງທີ່ທ່ານສາມາດເຮັດໄດ້ເພື່ອເປັນຜູ້ສ້າງຄວາມສະຫງົບສຸກ.

ເບິ່ງ Dale G. Renlund, “The Peace of Christ Abolishes Enmity,” Liahona, Nov. 2021, 83–85.

2 ນີໄຟ 21:9–12

ພຣະຜູ້ເປັນເຈົ້າກຳລັງເຕົ້າໂຮມຜູ້ຄົນຂອງພຣະອົງ.

ນີໄຟ ແລະ ຄອບຄົວຂອງເພິ່ນໄດ້ເປັນພະຍານເຖິງການກະຈັດກະຈາຍຂອງຊາວອິດສະຣາເອນ (ເບິ່ງ 2 ນີໄຟ 25:10). ບັດນີ້ທ່ານກໍສາມາດມີສ່ວນຮ່ວມໃນການເຕົ້າໂຮມອິດສະຣາເອນ (ເບິ່ງ 2 ນີໄຟ 21:12). ຂະນະທີ່ທ່ານອ່ານ 2 ນີໄຟ 21:9–12, ໃຫ້ຄິດກ່ຽວກັບວິທີທີ່ທ່ານສາມາດຊ່ວຍເຮັດໃຫ້ຄຳທຳນາຍທີ່ຂໍ້ເຫລົ່ານີ້ບັນຍາຍເກີດເປັນຈິງແນວໃດ.

ຍົກຕົວຢ່າງ, ຂະນະທີ່ທ່ານອ່ານກ່ຽວກັບ “ຫລັກສັນຍານ” (ທຸງ ຫລື ປ້າຍ) ທີ່ຈະຖືກຍົກຂຶ້ນເພື່ອເຕົ້າໂຮມຜູ້ຄົນຂອງພຣະເຈົ້າ, ໃຫ້ຄິດກ່ຽວກັບວ່າ ທ່ານໄດ້ເຫັນພຣະເຈົ້າເຕົ້າໂຮມຜູ້ຄົນຂອງພຣະອົງແນວໃດ, ທັງທາງຝ່າຍໂລກ ແລະ ຝ່າຍວິນຍານ. ແມ່ນຫຍັງເປັນສິ່ງທີ່ດຶງດູດຜູ້ຄົນໃຫ້ມາຫາພຣະຜູ້ເປັນເຈົ້າ ແລະ ສາດສະໜາຈັກຂອງພຣະອົງ?

ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງແດ່ ເພື່ອຊ່ວຍເຕົ້າໂຮມຜູ້ຄົນຂອງພຣະເຈົ້າ?

2 ນີໄຟ 23–24

ທາງໂລກຂອງບາບີໂລນຈະພັງທະລາຍ.

ອານາຈັກບາບີໂລນໄດ້ເປັນໄພຄຸກຄາມທາງການເມືອງ ແລະ ການທະຫານທີ່ຮ້າຍແຮງຕໍ່ອິດສະຣາເອນໃນສະໄໝບູຮານ. ແຕ່ຕໍ່ຜູ້ຄົນຂອງນີໄຟ—ແລະ ຕໍ່ພວກເຮົາໃນທຸກວັນນີ້—ໄພຄຸກຄາມທີ່ຮ້າຍແຮງກວ່າແມ່ນສິ່ງທີ່ບາບີໂລນເປັນຕົວແທນໃຫ້: ທາງໂລກ ແລະ ບາບ. ໃຫ້ພິຈາລະນາຄຳເຕືອນຢູ່ໃນ 2 ນີໄຟ 23–24 ວ່າອາດມີຜົນກະທົບຕໍ່ຜູ້ທີ່ຢ້ານກົວ ຫລື ຊົມເຊີຍ ຫລື ໄວ້ວາງໃຈກັບຄວາມຮັ່ງມີ ແລະ ອຳນາດຂອງບາບີໂລນແນວໃດ (ເບິ່ງ, ຍົກຕົວຢ່າງ 23:6–9, 11, 19–22; 24:10–19). ແມ່ນຫຍັງທີ່ຄ້າຍຄືສິ່ງທີ່ເຮົາອາດຢ້ານກົວ ຫລື ຊົມເຊີຍ ຫລື ໄວ້ວາງໃຈໃນທຸກວັນນີ້? ທ່ານຮູ້ສຶກວ່າຂ່າວສານຂອງພຣະຜູ້ຊ່ວຍໃຫ້ລອດຕໍ່ທ່ານອາດມີຫຍັງແດ່ຢູ່ໃນບົດເຫລົ່ານີ້? ໃຫ້ຄິດກ່ຽວກັບວິທີທີ່ທ່ານສາມາດສະແດງວ່າ ທ່ານ “ປິຕິຍິນດີໃນຄວາມສູງສົ່ງ [ຂອງພຣະຜູ້ເປັນເຈົ້າ]” ແນວໃດ (2 ນີໄຟ 23:3).

2 ນີໄຟ 25:19–29

ຮູບພາບ
ໄອຄອນຫ້ອງຮຽນສາດສະໜາ
“ພວກເຮົາ ເວົ້າເຖິງພຣະຄຣິດ … ພວກເຮົາປິຕິຍິນດີໃນພຣະຄຣິດ.”

ນີໄຟໄດ້ເປີດເຜີຍກ່ຽວກັບການແບ່ງປັນຄວາມເຊື່ອຂອງເພິ່ນ—ໂດຍສະເພາະປະຈັກພະຍານຂອງເພິ່ນເຖິງພຣະເຢຊູຄຣິດ. ຕະຫລອດທົ່ວການສຶກສາຂອງທ່ານຈາກ 2 ນີໄຟ 25, ໃຫ້ຄິດກ່ຽວກັບຄວາມປາດຖະໜາຂອງນີໄຟ ທີ່ຈະ “ຊັກຊວນລູກຫລານ [ຂອງເພິ່ນ] … ໃຫ້ເຊື່ອໃນພຣະຄຣິດ, ແລະ ໃຫ້ທຳຕົນປອງດອງກັບພຣະເຈົ້າ” (ຂໍ້ທີ 23). ນີໄຟຢາກໃຫ້ຜູ້ຄົນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ? (ເບິ່ງ ຂໍ້ທີ 12–13, 16). ນີໄຟໄດ້ພະຍາຍາມທີ່ຈະຊັກຊວນຜູ້ຄົນໃຫ້ເຊື່ອໃນພຣະອົງແນວໃດ? (ເບິ່ງ ຂໍ້ທີ 19–29). ໃຫ້ສັງເກດເບິ່ງຂໍ້ຄວາມໃນບົດນີ້ທີ່ຊັກຊວນ ທ່ານໃຫ້ເຊື່ອ ແລະ ຕິດຕາມພຣະເຢຊູຄຣິດ.

ເຮົາບາງຄົນອາດບໍ່ຮູ້ສຶກວ່າກ້າຫານເທົ່າກັບນີໄຟກ່ຽວກັບການກ່າວເຖິງພຣະຄຣິດ. ແຕ່ບາງທີທ່ານຈະສາມາດພົບເຫັນບາງສິ່ງໃນຄຳສອນຂອງນີໄຟຢູ່ໃນ 2 ນີໄຟ 25:23–26 ທີ່ດົນໃຈທ່ານໃຫ້ເວົ້າລົມເຖິງພຣະອົງກັບຄົນອື່ນຢ່າງເປີດເຜີຍຫລາຍຂຶ້ນ. ຍົກຕົວຢ່າງ, ຄຳປະກາດຂອງນີໄຟທີ່ວ່າ “ພວກເຮົາປິຕິຍິນດີໃນພຣະຄຣິດ” ອາດກະຕຸ້ນທ່ານໃຫ້ຄິດກ່ຽວກັບວ່າ ພຣະຜູ້ຊ່ວຍໃຫ້ລອດນຳຄວາມຊື່ນຊົມມາໃຫ້ທ່ານແນວໃດ—ແລະ ວ່າທ່ານຈະສາມາດແບ່ງປັນຄວາມຊື່ນຊົມນັ້ນກັບຄົນອື່ນໄດ້ແນວໃດ.

ໃນຂ່າວສານຂອງເພິ່ນ “We Talk of Christ” (Liahona, Nov. 2020, 88–91), ແອວເດີ ນຽວ ແອວ ແອນເດີເຊັນ ແນະນຳວິທີທີ່ເຮົາສາມາດກ່າວຢ່າງເປີດເຜີຍຫລາຍຂຶ້ນເຖິງພຣະຄຣິດໃນສະພາບແວດລ້ອມຕ່າງໆ. ມີຄຳແນະນຳໃດແດ່ຂອງເພິ່ນທີ່ປະທັບໃຈທ່ານ? ທ່ານມີໂອກາດໃດແດ່ທີ່ຈະເວົ້າເຖິງພຣະຄຣິດ ກັບຄົນອື່ນ?

ທ່ານຮູ້ສຶກຖືກດົນໃຈໃຫ້ບອກເລົ່າສິ່ງໃດ ແດ່ກັບຄົນອື່ນກ່ຽວກັບພຣະເຢຊູຄຣິດ? ຖ້າວ່າທ່ານຕ້ອງການແນວຄິດບາງຢ່າງ, ທ່ານສາມາດຄົ້ນຄວ້າ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ” (ຫ້ອງສະໝຸດພຣະກິດຕິຄຸນ). ເພງສວດດັ່ງເຊັ່ນ “ພຣະຜູ້ໄຖ່ແຫ່ງອິດສະຣາເອນ” (ເພງສວດ ແລະ ເພງຂອງເດັກນ້ອຍ, 5) ສາມາດໃຫ້ແນວຄິດເພີ່ມເຕີມແກ່ທ່ານ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ນີໄຟ 21:1–5

ພຣະເຢຊູຄຣິດຈະຕັດສີນໃນຄວາມຊອບທຳ.

ເພື່ອຊ່ວຍລູກໆຂອງທ່ານໃຫ້ວາດພາບເຫັນຂໍ້ເຫລົ່ານີ້, ໃຫ້ເບິ່ງວ່າພວກທ່ານສາມາດຊອກຫາຕົ້ນໄມ້ທີ່ຖືກຕັດ ຫລື ຮຸ່ນໄມ້ທີ່ເກີດອອກມາຈາກຕົ້ນໄມ້ (ຫລື ໃຊ້ຮູບພາບຢູ່ຂ້າງລຸ່ມ). ຖ້າຫາກວ່າ “ກິ່ງງ່າ” ຢູ່ໃນ 2 ນີໄຟ 21:1 ເປັນຕົວແທນໃຫ້ແກ່ພຣະເຢຊູຄຣິດ, ແລ້ວ ຂໍ້ທີ່ 2–5 ສິດສອນເຮົາຫຍັງແດ່ກ່ຽວກັບພຣະອົງ?

ຮູບພາບ

ຕົ້ນໄມ້ນ້ອຍເກີດອອກມາຈາກເຫງົ້າໄມ້

2 ນີໄຟ 21:6–9

ພຣະເຢຊູຄຣິດນຳສັນຕິສຸກ ແລະ ຄວາມຊື່ນຊົມມາໃຫ້.

2 ນີໄຟ 21:6–9 ສິດສອນຫຍັງແດ່ກ່ຽວກັບສິ່ງທີ່ສາມາດເກີດຂຶ້ນ ເມື່ອທຸກຄົນຕິດຕາມພຣະຜູ້ຊ່ວຍໃຫ້ລອດ? (ເບິ່ງ 4 ນີໄຟ 1:15–18 ນຳອີກ). ເຮົາຈະເຮັດໃຫ້ບ້ານເຮືອນຂອງເຮົາເປັນແບບນີ້ຫລາຍຂຶ້ນໄດ້ແນວໃດ? ລູກໆຂອງທ່ານອາດມັກເບິ່ງຮູບຂອງສັດຕ່າງໆທີ່ຖືກກ່າວເຖິງຢູ່ໃນ ຂໍ້ທີ 6–7—ສັດທີ່ເປັນສັດຕູກັນຕາມປົກກະຕິ ແຕ່ຈະບໍ່ທຳຮ້າຍກັນເມື່ອພຣະເຢຊູສະເດັດມາອີກ (ເບິ່ງໜ້າກິດຈະກຳຂອງອາທິດນີ້). ລູກໆຂອງທ່ານສາມາດແຕ້ມຮູບຂອງຕົວພວກເຂົາເອງ ແລະ ສັດເຫລົ່ານີ້ ອາໄສຢູ່ນຳກັນຢ່າງສະຫງົບສຸກກັບພຣະເຢຊູ.

2 ນີໄຟ 21:11–12; 22

ພຣະຜູ້ເປັນເຈົ້າກຳລັງເຕົ້າໂຮມຜູ້ຄົນຂອງພຣະອົງ.

ເອຊາຢາໄດ້ກ່າວວ່າພຣະຜູ້ເປັນເຈົ້າຈະຈັດ “ຫລັກສັນຍານຂຶ້ນໃຫ້ແກ່ປະຊາຊາດ” ເພື່ອຊ່ວຍຜູ້ຄົນໃຫ້ມາເຕົ້າໂຮມກັນກັບພຣະອົງ (ເບິ່ງ 2 ນີໄຟ 21:11–12). ຊ່ວຍລູກໆຂອງທ່ານໃຫ້ເຂົ້າໃຈວ່າ ຫລັກສັນຍານນັ້ນແມ່ນຄ້າຍຄືກັນກັບທຸງ. ບາງທີ ພວກເຂົາຈະມັກແຕ້ມຮູບທຸງຂອງພວກເຂົາເອງ. ພວກເຂົາສາມາດລວມທັງຮູບ ຫລື ຖ້ອຍຄຳທີ່ເປັນຕົວແທນໃຫ້ແກ່ເຫດຜົນທີ່ພວກເຂົາມາຫາພຣະເຢຊູຄຣິດ ແລະ ສາດສະໜາຈັກຂອງພຣະອົງ. ປ່ອຍໃຫ້ພວກເຂົາເວົ້າລົມກັນກ່ຽວກັບທຸງຂອງພວກເຂົາ, ແລະ ຊ່ວຍພວກເຂົາໃຫ້ຄິດເຖິງວິທີທີ່ພວກເຂົາສາມາດຊ່ວຍຄົນອື່ນໃຫ້ມາ “ເຕົ້າໂຮມ” ກັນກັບພຣະເຢຊູຄຣິດ.
ຫລັງຈາກໄດ້ອ່ານ 2 ນີໄຟ 22:4–5 ນຳກັນແລ້ວ, ທ່ານອາດເວົ້າລົມກັບລູກໆຂອງທ່ານກ່ຽວກັບ “ສິ່ງທີ່ດີເລີດ” ບາງຢ່າງທີ່ພຣະຜູ້ເປັນເຈົ້າໄດ້ກະທຳ. ມີ “ການກະທຳ [ຂອງພຣະຜູ້ເປັນເຈົ້າບາງຢ່າງໃດແດ່ກັບພວກເຮົາ]” ທີ່ເຮົາສາມາດປະກາດ? ເພື່ອຊ່ວຍລູກໆຂອງທ່ານໃຫ້ຄິດກ່ຽວກັບຄຳຖາມນີ້, ພວກທ່ານອາດຮ້ອງເພງໜຶ່ງນຳກັນກ່ຽວກັບພຣະຜູ້ຊ່ວຍໃຫ້ລອດ, ເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27). ພວກທ່ານສາມາດປ່ຽນຜຽນກັນຕື່ມຄຳໃສ່ປະໂຫຍກໃຫ້ສົມບູນ ຄືປະໂຫຍກນີ້: “ເຮົາຮ້ອງສັນເສີນນາມເຢຊູເຈົ້າ ແລະ ເຝົ້າຖວາຍ .” ເຮົາຈະສາມາດຊ່ວຍຄົນອື່ນໃຫ້ຮູ້ເຖິງສິ່ງທີ່ພຣະຜູ້ຊ່ວຍໃຫ້ລອດໄດ້ກະທຳເພື່ອເຮົາໄດ້ແນວໃດ?

2 ນີໄຟ 25:26

“ພວກເຮົາປິຕິຍິນດີໃນພຣະຄຣິດ.”

ທ່ານຈະສາມາດຊ່ວຍລູກໆຂອງທ່ານ ໃຫ້ “ປິຕິຍິນດີໃນພຣະຄຣິດ” ໄດ້ແນວໃດ? ບາງທີທ່ານສາມາດເລົ່າເລື່ອງລາວກ່ຽວກັບພຣະເຢຊູຄຣິດ ທີ່ນຳຄວາມຊື່ນຊົມມາໃຫ້ຄົນອື່ນ, ຫລື ທ່ານສາມາດສາຍວິດີໂອ ເຊັ່ນ “Jesus Heals a Man Born Blind” ຫລື “Suffer the Little Children to Come unto Me” (ຫ້ອງສະໝຸດພຣະກິດຕິຄຸນ). ລູກໆຂອງທ່ານສາມາດບອກເຖິງວາລະທີ່ຊື່ນຊົມໃນເລື່ອງເລົ່າ ຫລື ໃນວິດີໂອ. ແລ້ວ, ຂະນະທີ່ພວກທ່ານອ່ານ 2 ນີໄຟ 25:26 ນຳກັນ, ພວກເຂົາສາມາດເວົ້າລົມກັນກ່ຽວກັບວ່າເປັນຫຍັງພວກເຂົາຈຶ່ງ “ປິຕິຍິນດີໃນພຣະຄຣິດ.”

ເປັນພະຍານເຖິງພຣະຄຣິດ. ຢ່າສັນນິຖານວ່າຄອບຄົວຂອງທ່ານຮູ້ຈັກວ່າທ່ານຮູ້ສຶກແນວໃດກ່ຽວກັບພຣະຜູ້ຊ່ວຍໃຫ້ລອດ. ໃຫ້ບອກພວກເຂົາ, ແລະ ປ່ອຍໃຫ້ຄວາມຮູ້ສຶກຂອງທ່ານກ່ຽວກັບພຣະຜູ້ຊ່ວຍໃຫ້ລອດມີອິດທິພົນໃນທາງທີ່ທ່ານປະຕິສຳພັນກັບພວກເຂົາ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

I’ll Go Where You Want Me to Go [ເຮົາຈະໄປທີ່ພຣະອົງບັນຊາ], ໂດຍ ຣາໂມນ ເອລີ ກາເຊຍ ຣີວາສ໌

ຮູບພາບ

ໜ້າກິດຈະກຳ: ພຣະເຢຊູຄຣິດນຳສັນຕິສຸກ ແລະ ຄວາມຊື່ນຊົມມາໃຫ້