“ວັນທີ 18–24 ເດືອນມີນາ: ‘ນີ້ຄືທາງນັ້ນ.’ 2 ນີໄຟ 31–33,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 18–24 ເດືອນມີນາ. 2 ນີໄຟ 31–33,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ: 2024 (2024)

ຮູບພາບ

ພຣະເຢຊູກຳລັງສິດສອນສານຸສິດຂອງພຣະອົງ

Christ Teaching His Disciples [ພຣະຄຣິດກຳລັງສິດສອນສານຸສິດຂອງພຣະອົງ], ໂດຍ ຈັດສະຕິນ ຄູນສ໌

ວັນທີ 18–24 ເດືອນມີນາ: “ນີ້ຄືທາງນັ້ນ”

2 ນີໄຟ 31–33

ໃນບັນດາຖ້ອຍຄຳສຸດທ້າຍທີ່ນີໄຟໄດ້ບັນທຶກ, ເຮົາພົບເຫັນການປະກາດນີ້: “ພຣະຜູ້ເປັນເຈົ້າບັນຊາຂ້າພະເຈົ້າດັ່ງນີ້, ແລະ ຂ້າພະເຈົ້າຕ້ອງເຊື່ອຟັງ” (2 ນີໄຟ 33:15). ສິ່ງນີ້ເບິ່ງຄືວ່າເປັນບົດສະຫລຸບທີ່ດີຂອງຊີວິດຂອງນີໄຟ. ເພິ່ນໄດ້ພະຍາຍາມທີ່ຈະເຂົ້າໃຈພຣະປະສົງຂອງພຣະເຈົ້າ ແລະ ໄດ້ເຊື່ອຟັງຢ່າງກ້າຫານ—ບໍ່ວ່າ ນັ້ນໝາຍຄວາມວ່າ ຕ້ອງສ່ຽງຊີວິດຂອງເພິ່ນ ເພື່ອທີ່ຈະໄດ້ແຜ່ນຈາລຶກທອງເຫລືອງຈາກລາບານ, ການສ້າງເຮືອ ແລະ ການຂ້າມທະເລ, ຫລື ການສິດສອນຄຳສອນຂອງພຣະຄຣິດ ຢ່າງຊື່ສັດ ດ້ວຍຄວາມແຈ່ມແຈ້ງ ແລະ ດ້ວຍອຳນາດກໍຕາມ. ນີໄຟສາມາດກ່າວດ້ວຍຄວາມຈູງໃຈ ເຖິງຄວາມຈຳເປັນຕ້ອງ “ມຸ້ງໜ້າດ້ວຍຄວາມໝັ້ນຄົງໃນພຣະຄຣິດ,” ເຖິງການເດີນຕາມ “ທາງຄັບ ແລະ ແຄບນີ້ຊຶ່ງນຳໄປຫາຊີວິດນິລັນດອນ” (2 ນີໄຟ 31:20, 18), ເພາະວ່ານັ້ນຄືທາງທີ່ເພິ່ນໄດ້ເດີນຕາມ. ເພິ່ນໄດ້ຮູ້ຈັກໂດຍປະສົບການວ່າ ທາງນີ້, ເຖິງແມ່ນຕ້ອງໃຊ້ຄວາມພະຍາຍາມຫລາຍເປັນບາງຄັ້ງ, ແຕ່ກໍເປັນໜ້າປິຕິຍິນດີ, ແລະ ວ່າ “ບໍ່ມີທາງ ຫລື ພຣະນາມອື່ນໃດຈະປະທານໃຫ້ພາຍໃຕ້ສະຫວັນອີກເລີຍ ຊຶ່ງໂດຍທາງນັ້ນມະນຸດຈະລອດໄດ້ໃນອານາຈັກຂອງພຣະເຈົ້າ” (2 ນີໄຟ 31:21).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ນີໄຟ 31

ພຣະເຢຊູຄຣິດ ແລະ ຄຳສອນຂອງພຣະອົງ ເປັນພຽງທາງດຽວທີ່ພາໄປສູ່ຊີວິດນິລັນດອນ.

ຖ້າຫາກທ່ານຕ້ອງສະຫລຸບເສັ້ນທາງທີ່ພາໄປສູ່ຊີວິດນິລັນດອນ ໃນສອງສາມຄຳ, ທ່ານຈະວ່າແນວໃດ? ສັງເກດເບິ່ງວ່າ ນີໄຟໄດ້ບັນຍາຍມັນວ່າແນວໃດໃນ 2 ນີໄຟ 31. ໃຫ້ຄິດທີ່ຈະແຕ້ມເສັ້ນທາງໜຶ່ງ ຫລື ເຮັດຮອຍຕີນ ແລະ ຂຽນຫລັກທໍາບາງຈຳນວນໃສ່ຕາມເສັ້ນທາງ ດັ່ງທີ່ທ່ານພົບເຫັນຢູ່ໃນບົດເຫລົ່ານີ້. ທ່ານສາມາດຕື່ມຮູບພາບ ຫລື ບົດສະຫລຸບຂອງທ່ານເອງກ່ຽວກັບສິ່ງທີ່ນີໄຟສິດສອນກ່ຽວກັບແຕ່ລະຫລັກທຳໃສ່ນຳ.

ຂະນະທີ່ທ່ານອ່ານ 2 ນີໄຟ 31:18–20, ໃຫ້ປະເມີນຄວາມພະຍາຍາມຂອງທ່ານເອງໃນການ “ມຸ້ງໜ້າ” ໄປໃນເສັ້ນທາງແຫ່ງພຣະກິດຕິຄຸນ.

ເບິ່ງ “ສິດທິຊົນມາ,” ເພງສວດ ແລະ ເພງຂອງເດັກນ້ອຍ, 2 ນຳອີກ.

ການເຮັດຕາມຄຳສອນຂອງພຣະເຢຊູຄຣິດນຳເຮົາໄປສູ່ຊີວິດນິລັນດອນ.

2 ນີໄຟ 31:4–13

ພຣະເຢຊູຄຣິດເປັນຕົວຢ່າງທີ່ດີເລີດເຖິງການເຊື່ອຟັງ ເມື່ອພຣະອົງໄດ້ຮັບບັບຕິສະມາ.

ບໍ່ວ່າການບັບຕິສະມາຂອງທ່ານໄດ້ເກີດຂຶ້ນມື້ວານນີ້ ຫລື ເມື່ອ 80 ປີ ກ່ອນກໍຕາມ, ມັນເປັນຊ່ວງເວລາທີ່ສຳຄັນ. ທ່ານໄດ້ເຂົ້າສູ່ພັນທະສັນຍານິລັນດອນເພື່ອຕິດຕາມພຣະເຢຊູຄຣິດ. ໃຫ້ຄິດກ່ຽວກັບການບັບຕິສະມາຂອງທ່ານ ຂະນະທີ່ທ່ານອ່ານກ່ຽວກັບການບັບຕິສະມາຂອງພຣະຜູ້ຊ່ວຍໃຫ້ລອດ ຢູ່ໃນ 2 ນີໄຟ 31:4–13. ການຕອບຄຳຖາມດັ່ງເຊັ່ນຕໍ່ໄປນີ້ອາດຊ່ວຍໄດ້:

ເປັນຫຍັງພຣະຄຣິດຈຶ່ງຮັບບັບຕິສະມາ? ເປັນຫຍັງເຮົາຈຶ່ງເລືອກທີ່ຈະຮັບບັບຕິສະມາ?
ຄຳສັນຍາຫຍັງແດ່ທີ່ເຮົາໄດ້ເຮັດໄວ້ ເມື່ອເຮົາຮັບບັບຕິສະມາ? ພຣະຜູ້ເປັນເຈົ້າສັນຍາຫຍັງຕອບແທນ? (ເບິ່ງ ຂໍ້ທີ 12–13; ເບິ່ງ ໂມໄຊຢາ 18:10, 13) ນຳອີກ.
ເຮົາຈະສາມາດສະແດງໃຫ້ເຫັນວ່າ ເຮົາມຸ່ງໝັ້ນທີ່ຈະຕິດຕາມພຣະເຢຊູຄຣິດໄດ້ແນວໃດ?

2 ນີໄຟ 31:15–20

“ຜູ້ໃດອົດທົນຈົນເຖິງທີ່ສຸດ ຜູ້ນັ້ນຈະລອດ.”

ຂະນະທີ່ທ່ານອ່ານ 2 ນີໄຟ 31: 15–20, ໃຫ້ຖາມຕົວເອງວ່າ, “ເຮົາຈະຮູ້ໄດ້ແນວໃດວ່າເຮົາກຳລັງອົດທົນຈົນເຖິງທີ່ສຸດ?” ທ່ານໄດ້ຮຽນຮູ້ຫຍັງແດ່ຈາກນີໄຟທີ່ຊ່ວຍທ່ານຕອບຄຳຖາມນີ້?

ແອວເດີ ແດວ ຈີ ເຣັນລັນ ໄດ້ສິດສອນວ່າ: “ການອົດທົນຈົນເຖິງທີ່ສຸດ ບໍ່ແມ່ນຂັ້ນຕອນທີ່ແຍກຕົວອອກຈາກຄຳສອນຂອງພຣະຄຣິດ—ຄືກັບວ່າ ເຮົາຈະເຮັດສີ່ຂັ້ນຕອນທຳອິດສຳເລັດ ແລ້ວຫຍໍ້ຕົວລົງ, ກັດແຂ້ວ, ແລະ ລໍຖ້າຄວາມຕາຍ. ບໍ່ເລີຍ, ການອົດທົນຈົນເຖິງທີ່ສຸດ ແມ່ນການເຮັດຂັ້ນຕອນຕ່າງໆຢ່າງຫ້າວຫັນ ແລະ ຕັ້ງໃຈ ຊໍ້າແລ້ວຊໍ້າອີກ” (“Lifelong Conversion” [Brigham Young University devotional, Sept. 14, 2021], 2, speeches.byu.edu). ທ່ານຈະສາມາດເຮັດຂັ້ນຕອນໃນຄຳສອນຂອງພຣະຄຣິດຢ່າງຊໍ້າໆໄດ້ແນວໃດ? (ສັດທາ, ການກັບໃຈ, ບັບຕິສະມາ, ແລະ ການຮັບເອົາຂອງປະທານແຫ່ງພຣະວິນຍານບໍລິສຸດ)?

2 ນີໄຟ 32; 33:2

ຮູບພາບ
ໄອຄອນຫ້ອງຮຽນສາດສະໜາ
ຜ່ານທາງພຣະຄຳຂອງພຣະຄຣິດ ແລະ ພຣະວິນຍານບໍລິສຸດ, ພຣະເຈົ້າຈະສະແດງໃຫ້ເຮົາເຫັນສິ່ງທີ່ເຮົາຄວນເຮັດ.

ທ່ານເຄີຍຮູ້ສຶກບໍ່ແນ່ໃຈກ່ຽວກັບຂັ້ນຕອນຕໍ່ໄປໃນຊີວິດຂອງທ່ານບໍ່? ຜູ້ຄົນຂອງນີໄຟໄດ້ມີຄວາມກັງວົນທີ່ຄ້າຍຄືກັນນີ້ (ເບິ່ງ 2 ນີໄຟ 32:1). ໃຫ້ຊອກຫາຄຳຕອບຂອງນີໄຟໃນ 2 ນີໄຟ 32:2–9. ທ່ານຈະກ່າວເຖິງສິ່ງທີ່ນີໄຟສິດສອນເປັນຄຳເວົ້າຂອງທ່ານເອງແນວໃດ? ມີປະສົບການໃດແດ່ທີ່ໄດ້ສິດສອນທ່ານວ່າ ຖ້ອຍຄຳຂອງນີໄຟເປັນຄວາມຈິງ?

ໃຫ້ຄິດທີ່ຈະຂຽນລາຍການການຕັດສິນໃຈ ຫລື ສະຖານະການ (ໃນປະຈຸບັນ ແລະ ໃນອະນາຄົດ) ຊຶ່ງທ່ານຕ້ອງການການນຳພາຈາກພຣະເຈົ້າ. ທ່ານສາມາດຮຽນຮູ້ຫຍັງແດ່ຈາກ 2 ນີໄຟ 32 ທີ່ຈະຊ່ວຍໃຫ້ທ່ານປະສົບຜົນສຳເລັດໃນການຮັບເອົາການດົນໃຈຈາກພຣະອົງ? ແມ່ນຫຍັງທີ່ອາດນຳພາຜູ້ຄົນໄປສູ່ “ໃຈແຂງກະດ້າງຕໍ່ພຣະວິນຍານສັກສິດ”? (2 ນີໄຟ 33:2).

ຂະນະທີ່ທ່ານໄຕ່ຕອງຄຳແນະນຳຂອງນີໄຟ, ໃຫ້ຄິດກ່ຽວກັບວິທີທີ່ທ່ານສຶກສາພຣະຄຳຂອງພຣະຜູ້ຊ່ວຍໃຫ້ລອດ. ທ່ານຈະບັນຍາຍມັນວ່າເປັນການກິນຫລິ້ນ, ການກິນທຳມະດາ, ຫລື ແບບງານກິນລ້ຽງ? ໃນຄວາມຄິດຂອງທ່ານແລ້ວ, ມັນແຕກຕ່າງກັນແນວໃດ? ໃຫ້ພິຈາລະນາວ່າ ທ່ານຈະສາມາດເຮັດໃຫ້ປະສົບການຂອງທ່ານກັບພຣະຄຳຂອງພຣະຜູ້ຊ່ວຍໃຫ້ລອດ ເປັນຄືກັນກັບງານກິນລ້ຽງຫລາຍຂຶ້ນໄດ້ແນວໃດ. ບາງເທື່ອທ່ານກໍສາມາດຮັບແນວຄິດຈາກໝູ່ເພື່ອນ ຫລື ສະມາຊິກໃນຄອບຄົວ.

ຊື່ນຊົມດ້ວຍພຣະຄຳຂອງພຣະຄຣິດ. ມີຫລາຍວິທີທີ່ຈະຊື່ນຊົມດ້ວຍພຣະຄຳຂອງພຣະຄຣິດ, ລວມທັງການອະທິຖານເພື່ອຂໍການດົນໃຈ, ການຖາມຄຳຖາມກ່ອນ ແລະ ຂະນະທີ່ສຶກສາ, ການນິຍາມຄຳຕ່າງໆ, ການໄຕ່ຕອງ, ການອ້າງອີງເຊື່ອມໂຍງ, ການຈົດບັນທຶກ, ການຊອກຫາຄວາມຈິງຂອງພຣະກິດຕິຄຸນ, ແລະ ການນຳໃຊ້ພຣະຄຳພີໃນຊີວິດຂອງທ່ານ (ເບິ່ງ 1 ນີໄຟ 19:23).

ທ່ານຈະເຊື້ອເຊີນພຣະວິນຍານບໍລິສຸດໃຫ້ເປັນເພື່ອນໃນຊີວິດຂອງທ່ານສະເໝີ, ແທນທີ່ຈະເປັນຜູ້ຢ້ຽມຢາມໃນບາງໂອກາດໄດ້ແນວໃດ? ອ່ານຄຳແນະນຳສາມຢ່າງຂອງ ເດວິດ ເອ ແບ໊ດນາ ເພື່ອເຮັດໃຫ້ມິດຕະພາບຂອງພຣະວິນຍານບໍລິສຸດເປັນ “ຄວາມເປັນຈິງທີ່ຕໍ່ເນື່ອງ” ໃນ “Receive the Holy Ghost” (Liahona, Nov. 2010, 94–97). ທ່ານຈະນຳໃຊ້ຄຳແນະນຳຂອງເພິ່ນແນວໃດ?

ເບິ່ງ Gospel Topics, “Revelation,” ຫ້ອງສະໝຸດພຣະກິດຕິຄຸນ; “Daily Bread: Pattern” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

2 ນີໄຟ 33

ພຣະຄຳພີມໍມອນຊັກຊວນໃຫ້ພວກເຮົາທຸກຄົນເຊື່ອໃນພຣະຄຣິດ.

ໃນ 2 ນີໄຟ 33, ຂະນະທີ່ນີໄຟໄດ້ສະຫລຸບການຂຽນຂອງເພິ່ນ, ເພິ່ນໄດ້ອະທິບາຍວ່າ ເປັນຫຍັງເພິ່ນຈຶ່ງຂຽນມັນຕັ້ງແຕ່ແລກ. ມີເຫດຜົນຢ່າງໃດແດ່ທີ່ທ່ານພົບເຫັນຢູ່ໃນບົດນີ້? ໃຫ້ສະທ້ອນເຖິງເລື່ອງລາວ ແລະ ຄຳສອນຕ່າງໆທີ່ທ່ານໄດ້ອ່ານມາຈົນຮອດຕອນນີ້ໃນ 1 ນີໄຟ ແລະ 2 ນີໄຟ. ຄຳສອນໃດທີ່ມີອິດທິພົນຕໍ່ທ່ານ ແລະ ສັດທາຂອງທ່ານໃນພຣະຄຣິດຫລາຍທີ່ສຸດ?

ເບິ່ງ “Nephi Records His Final Testimony” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ນີໄຟ 31:4–13

ເມື່ອເຮົາຮັບບັບຕິສະມາ, ເຮົາກໍກຳລັງຕິດຕາມພຣະເຢຊູຄຣິດ.

ມີຮູບພາບຂອງພຣະເຢຊູທີ່ກຳລັງຮັບບັບຕິສະມາຢູ່ທ້າຍຂອງໂຄງຮ່າງນີ້. ບາງເທື່ອລູກໆຂອງທ່ານສາມາດໃຊ້ມັນເພື່ອບອກທ່ານເຖິງສິ່ງທີ່ພວກເຂົາຮູ້ກ່ຽວກັບເຫດການນີ້ (ເບິ່ງ ມັດທາຍ 3:13–17 ນຳອີກ) ເປັນຫຍັງພຣະເຢຊູຈຶ່ງປະສົງໃຫ້ເຮົາຮັບບັບຕິສະມາຄືກັນກັບພຣະອົງ? ລູກໆຂອງທ່ານສາມາດຟັງເຫດຜົນຕ່າງໆ ຂະນະທີ່ພວກທ່ານອ່ານບາງສ່ວນຂອງ 2 ນີໄຟ 31: 4–13 ນຳກັນ. ມັນອາດເປັນປະໂຫຍດ ຖ້າຜູ້ໃດຜູ້ໜຶ່ງທີ່ຫາກໍຮັບບັບຕິສະມາເມື່ອບໍ່ດົນມານີ້ ສາມາດແບ່ງປັນປະສົບການຂອງລາວ.

2 ນີໄຟ 31

ພຣະເຢຊູຄຣິດໄດ້ສິດສອນເຮົາເຖິງວິທີທີ່ຈະກັບຄືນໄປຫາພຣະບິດາເທິງສະຫວັນ.

ເພື່ອຊ່ວຍໃຫ້ລູກໆຂອງທ່ານເຫັນພາບຄຳສອນໃນ 2 ນີໄຟ 31, ພວກເຂົາສາມາດແຕ້ມເສັ້ນທາງ ໂດຍມີຮູບຂອງພຣະເຢຊູຄຣິດຢູ່ຕອນທ້າຍ. ທ່ານສາມາດຊ່ວຍພວກເຂົາໃຫ້ຊອກຫາ ຫລື ແຕ້ມຮູບທີ່ເປັນຕົວແທນໃຫ້ຂັ້ນຕອນຕ່າງໆຢູ່ທີ່ເສັ້ນທາງນັ້ນ, ດັ່ງເຊັ່ນ: ສັດທາໃນພຣະຄຣິດ, ການກັບໃຈ, ການບັບຕິສະມາ, ການຮັບຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ. ພວກເຂົາສາມາດຊີ້ໃສ່ຮູບຂະນະທີ່ພວກທ່ານອ່ານ 2 ນີໄຟ 31:17–20 ນຳກັນ.

2 ນີໄຟ 32:3–5

ເຮົາສາມາດຊື່ນຊົມດ້ວຍພຣະຄຳຂອງພຣະຄຣິດ

ເພື່ອສິດສອນກ່ຽວກັບ “ການຊື່ນຊົມ” ດ້ວຍພຣະຄຳຂອງພຣະຄຣິດ, ທ່ານສາມາດຂໍໃຫ້ລູກໆຂອງທ່ານສະແດງບົດບາດວ່າ ພວກເຂົາຈະຊື່ນຊົມກັບອາຫານທີ່ພວກເຂົາມັກທີ່ສຸດແນວໃດ. ໃນ 2 ນີໄຟ 32:3, ນີໄຟໄດ້ກ່າວວ່າ ພວກເຮົາຄວນຊື່ນຊົມກັບຫຍັງ? ການຊື່ນຊົມດ້ວຍພຣະຄຳຂອງພຣະເຈົ້າ ແຕກຕ່າງຈາກພຽງແຕ່ ອ່ານ ຊື່ໆແນວໃດ? ບາງເທື່ອລູກໆຂອງທ່ານກໍສາມາດສະແດງບົດບາດເຖິງຄວາມແຕກຕ່າງ. ໃຫ້ແບ່ງປັນກັບພວກເຂົາເຖິງພອນທີ່ທ່ານເຄີຍໄດ້ຮັບເມື່ອທ່ານຊື່ນຊົມດ້ວຍພຣະຄຳພີ.

2 ນີໄຟ 32:8–9

ພຣະບິດາເທິງສະຫວັນປະສົງໃຫ້ເຮົາອະທິຖານຢູ່ສະເໝີ.

ຫລັງຈາກທີ່ອ່ານ 2 ນີໄຟ 32:8–9, ໃຫ້ເວົ້າລົມກັບລູກໆຂອງທ່ານກ່ຽວກັບວ່າ ເປັນຫຍັງຊາຕານຈຶ່ງບໍ່ຢາກໃຫ້ເຮົາອະທິຖານ. ເປັນຫຍັງພຣະເຈົ້າຈຶ່ງຢາກໃຫ້ເຮົາ “ອະທິຖານຢູ່ສະເໝີ”? ລູກໆຂອງທ່ານສາມາດຂຽນລາຍການ ຫລື ແຕ້ມຮູບສະຖານະການຕ່່າງໆ ຊຶ່ງພວກເຂົາສາມາດອະທິຖານໄດ້. ແລ້ວພວກທ່ານກໍສາມາດຮ້ອງເພງ ທີ່ສິດສອນກ່ຽວກັບການອະທິຖານ, ດັ່ງເຊັ່ນ “ອະທິຖານຄອບຄົວ” ເພງສວດ ແລະ ເພງຂອງເດັກນ້ອຍ, 73. ທ່ານສາມາດປ່ຽນແທນບາງຄຳຢູ່ໃນເພງດ້ວຍຄຳສັບຈາກລາຍການຂອງພວກເຂົາ. ພຣະເຈົ້າປະທານພອນໃຫ້ແກ່ເຮົາແນວໃດ ເມື່ອເຮົາອະທິຖານສະເໝີ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

To Fulfill All Righteousness [ເພື່ອບັນລຸຄວາມຊອບທຳທັງປວງ], ໂດຍ ລີສ໌ ລີມັນ ສະວິນໂດ

ຮູບພາບ

ໜ້າກິດຈະກຳ: ເຮົາສາມາດ “ຊື່ນຊົມດ້ວຍພຣະຄຳຂອງພຣະຄຣິດ”