“ວັນທີ 26 ເດືອນກຸມພາ–ວັນທີ 3 ເດືອນມີນາ: ‘ພຣະອົງຈະຖືກເອີ້ນວ່າ … ອົງສັນຕິລາດ.’ 2 ນີໄຟ 11–19,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 26 ເດືອນກຸມພາ–ວັນທີ 3 ເດືອນມີນາ. 2 ນີໄຟ 11–19,” ຈົ່ງຕາມເຮົາມາ—ສຳລັບສຳລັບບ້ານ ແລະ ໂບດ: 2024 (2024)

ຮູບພາບ

ເອຊາຢາກຳລັງຂຽນໃສ່ມ້ວນໜັງສື

ວັນທີ 26 ເດືອນກຸມພາ–ວັນທີ 3 ເດືອນມີນາ: “ພຣະອົງຈະຖືກເອີ້ນວ່າ … ອົງສັນຕິລາດ”

2 ນີໄຟ 11–19

ການສະຫລັກອັກຂະລະໃສ່ແຜ່ນໂລຫະບໍ່ໄດ້ເປັນເລື່ອງງ່າຍ, ແລະ ຊ່ອງວ່າງຢູ່ໃນແຜ່ນຈາລຶກນ້ອຍຂອງນີໄຟກໍມີຈຳກັດ. ດັ່ງນັ້ນ ເປັນຫຍັງນີໄຟຈຶ່ງໃຊ້ຄວາມພະຍາຍາມຫລາຍທີ່ສຸດ ເພື່ອກ່າຍການຂຽນຂອງສາດສະດາເອຊາຢາໃສ່ໃນບັນທຶກຂອງເພິ່ນ? ເພິ່ນໄດ້ເຮັດໄປ ເພາະເພິ່ນຢາກໃຫ້ເຮົາເຊື່ອໃນພຣະເຢຊູຄຣິດ. “ຈິດວິນຍານຂອງຂ້າພະເຈົ້າພໍໃຈ,” ເພິ່ນໄດ້ຂຽນ, “ໃນການພິສູດຄວາມຈິງຂອງການສະເດັດມາຂອງພຣະຄຣິດຕໍ່ຄົນຂອງຂ້າພະເຈົ້າ” (2 ນີໄຟ 11:4). ນີໄຟໄດ້ເຫັນສິ່ງທີ່ຈະເກີດຂຶ້ນກັບຜູ້ຄົນຂອງເພິ່ນໃນຄົນລຸ້ນຫລັງ. ເພິ່ນໄດ້ເຫັນວ່າ, ເຖິງແມ່ນພວກເຂົາຈະໄດ້ຮັບພອນອັນຍິ່ງໃຫຍ່, ແຕ່ພວກເຂົາຈະກາຍເປັນຄົນທະນົງຕົວ, ຂັດແຍ້ງ, ແລະ ຕັນຫາຝ່າຍໂລກ (ເບິ່ງ 1 ນີໄຟ 12; 15:4–6). ເພິ່ນຍັງໄດ້ເຫັນບັນຫາທີ່ຄ້າຍຄືກັນນັ້ນລ່ວງໜ້າ ໃນວັນເວລາຂອງເຮົານຳອີກ (ເບິ່ງ 1 ນີໄຟ 14). ການຂຽນຂອງເອຊາຢາໄດ້ເຕືອນຕໍ່ຕ້ານຄວາມຊົ່ວຮ້າຍດັ່ງກ່າວ. ແຕ່ມັນຍັງໄດ້ໃຫ້ຄວາມຫວັງແກ່ນີໄຟສຳລັບອະນາຄົດທີ່ຮຸ່ງເຫລື້ອມ—ທີ່ສຸດຂອງຄວາມຊົ່ວຮ້າຍ, ການເຕົ້າໂຮມຄົນຊື່ສັດ, ແລະ “ແສງສະຫວ່າງຢ່າງໃຫຍ່ຫລວງ” ສຳລັບຜູ້ທີ່ “ດຳເນີນໄປໃນຄວາມມືດ” (2 ນີໄຟ 19:2). ທຸກສິ່ງຢ່າງນີ້ຈະເກີດຂຶ້ນເພາະ “ເດັກນ້ອຍຜູ້ໜຶ່ງ [ໄດ້] ເກີດມາ” ຜູ້ສາມາດກຳຈັດການຜິດຖຽງທັງໝົດ—“ອົງສັນຕິລາດ” (2 ນີໄຟ 19:6).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເຮົາຈະສາມາດເຂົ້າໃຈຄຳສອນຂອງເອຊາຢາ ຫລາຍຂຶ້ນກວ່າເກົ່າໄດ້ແນວໃດ?

ນີໄຟໄດ້ຍອມຮັບວ່າ “ຄຳເວົ້າຂອງເອຊາຢາບໍ່ແຈ່ມແຈ້ງ” (2 ນີໄຟ 25:4). ແຕ່ເພິ່ນກໍຍັງໄດ້ແບ່ງປັນແນວຄິດ ເພື່ອຊ່ວຍເຮົາໃຫ້ພົບເຫັນຄວາມໝາຍຢູ່ໃນການຂຽນຂອງເອຊາຢາ ທີ່ວ່າ:

ໃຫ້ “ປຽບທຽບຄຳເວົ້າຂອງເພິ່ນກັບ” ຕົວທ່ານເອງ (2 ນີໄຟ 11:2). ຄຳສອນຂອງເອຊາຢາຫລາຍຢ່າງ ອາດມີຫລາກຫລາຍຄວາມໝາຍ ແລະ ການນຳມາໃຊ້ ໃນຫລາຍຮູບແບບ. ຍົກຕົວຢ່າງ, ເມື່ອທ່ານອ່ານກ່ຽວກັບບ່ອນອາໄສຢູ່ໃນ 2 ນີໄຟ 14:5–6, ໃຫ້ພິຈາລະນາວ່າຂໍ້ເຫລົ່ານີ້ນຳໃຊ້ກັບບ້ານຂອງທ່ານແນວໃດ. ໃຫ້ຖາມຕົວທ່ານເອງວ່າ, “ພຣະບິດາເທິງສະຫວັນຢາກໃຫ້ເຮົາຮຽນຮູ້ຫຍັງແດ່?”
ໃຫ້ຊອກຫາສັນຍາລັກເຖິງພຣະເຢຊູຄຣິດ (ເບິ່ງ 2 ນີໄຟ 11:4). ຄຳສອນຫລາຍຢ່າງຂອງເອຊາຢາກ່ຽວກັບພຣະຜູ້ຊ່ວຍໃຫ້ລອດແມ່ນຖືກສື່ສານຜ່ານທາງສັນຍາລັກ. ຍົກຕົວຢ່າງ, ພຣະຜູ້ຊ່ວຍໃຫ້ລອດເປັນຕົວແທນແບບໃດໃນ 2 ນີໄຟ 19:2? ສັນຍາລັກນີ້ສິດສອນທ່ານຫຍັງແດ່ກ່ຽວກັບພຣະອົງ?
ສະແຫວງຫາທີ່ຈະ “ເຕັມໄປດ້ວຍວິນຍານແຫ່ງການທຳນາຍ” (2 ນີໄຟ 25:4). ຂະນະທີ່ທ່ານສຶກສາ, ໃຫ້ອະທິຖານເພື່ອການນຳພາທາງວິນຍານ. ທ່ານອາດບໍ່ເຂົ້າໃຈທຸກຢ່າງບາດດຽວ, ແຕ່ພຣະວິນຍານສາມາດຊ່ວຍທ່ານໃຫ້ຮຽນຮູ້ສິ່ງທີ່ທ່ານຕ້ອງຮູ້.

ທ່ານອາດພົບວ່າມັນເປັນປະໂຫຍດທີ່ຈະກວດເບິ່ງ ສິ່ງຊ່ວຍສຶກສາ ຢູ່ໃນພຣະຄຳພີ, ລວມທັງໝາຍເຫດຢູ່ທາງລຸ່ມໜ້າປຶ້ມ, ຫົວຂໍ້ບົດ, ແລະ ຄູ່ມືພຣະຄຳພີ. ຄູ່ມືສະຖາບັນສະບັບພຣະຄຳພີມໍມອນ ແລະ ພຣະຄຳພີເດີມ ມີຂໍ້ມູນເພີ່ມເຕີມທີ່ສາມາດຊ່ວຍທ່ານໃຫ້ຮຽນຮູ້ກ່ຽວກັບສະພາບການທາງປະຫວັດສາດຂອງຄຳສອນຂອງເອຊາຢາໄດ້.

2 ນີໄຟ 11–19

ເອຊາຢາໄດ້ເປັນພະຍານເຖິງພຣະເຢຊູຄຣິດ.

ເພາະເອຊາຢາໄດ້ໃຊ້ພາສາທີ່ເປັນສັນຍາລັກ, ມັນຈຶ່ງເປັນເລື່ອງງ່າຍທີ່ຈະມອງຂ້າມການເປັນພະຍານທີ່ມີພະລັງຂອງເພິ່ນເຖິງພຣະເຢຊູຄຣິດ. ໃຫ້ຊອກຫາພຣະຜູ້ຊ່ວຍໃຫ້ລອດຢູ່ໃນ 2 ນີໄຟ 13:13; 14:4–6; 15:1–7; 16:1–7; 17:14; 18:14–15; 22:2. ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບພຣະອົງ?

ຄຳທຳນາຍຢູ່ໃນ 2 ນີໄຟ 19:6 ລະບຸຫລາຍໆພຣະນາມຂອງພຣະເຢຊູຄຣິດ. ພຣະອົງໄດ້ບັນລຸບົດບາດເຫລົ່ານີ້ໃນຊີວິດຂອງທ່ານແນວໃດ?

ເບິ່ງ Ulisses Soares, “Jesus Christ: The Caregiver of Our Soul,” Liahona, May 2021, 82–84 ນຳອີກ.

2 ນີໄຟ 12–13; 15

ຄົນອວດດີ ແລະ ຄົນເຫັນແກ່ໂລກ ຈະຖ່ອມຕົວລົງ.

ນີໄຟໄດ້ເຫັນລ່ວງໜ້າວ່າ ຄວາມທະນົງໃຈຈະເປັນສາເຫດຂອງຄວາມພິນາດຂອງຜູ້ຄົນຂອງເພິ່ນ (ເບິ່ງ 1 ນີໄຟ 12:19). ດັ່ງນັ້ນ ມັນຈຶ່ງບໍ່ແປກເລີຍທີ່ນີໄຟໄດ້ແບ່ງປັນຄຳເຕືອນຂອງເອຊາຢາຄືນອີກ ກັບຜູ້ຄົນຂອງເພິ່ນ ເພື່ອຕໍ່ຕ້ານກັບຄວາມທະນົງໃຈ. ໃນ ບົດທີ 12 ແລະ 13, ໃຫ້ຊອກຫາຖ້ອຍຄຳທີ່ເອຊາຢາໄດ້ໃຊ້ ເພື່ອບັນຍາຍເຖິງຄວາມທະນົງໃຈ, ດັ່ງເຊັ່ນ ຄົນຫຍິ່ງຍະໂສ ແລະ ຄົນຈອງຫອງ. ໃນ 2 ນີໄຟ 15:1–24, ໃຫ້ຊອກຫາພາສາທີ່ເປັນສັນຍາລັກທີ່ບັນຍາຍເຖິງຜົນສະທ້ອນຂອງຄວາມທະນົງໃຈ. ແລ້ວທ່ານອາດພະຍາຍາມສະຫລຸບສິ່ງທີ່ທ່ານໄດ້ອ່ານດ້ວຍຖ້ອຍຄຳຂອງທ່ານເອງ. ໃຫ້ຄິດກ່ຽວກັບວ່າ ທ່ານຈະເລືອກເປັນຄົນຖ່ອມຕົວແນວໃດ.

ເບິ່ງ “Chapter 18: Beware of Pride,” Teachings of Presidents of the Church: Ezra Taft Benson (2014), 229–40 ນຳອີກ.

2 ນີໄຟ 12:2–3

ຮູບພາບ
ໄອຄອນຫ້ອງຮຽນສາດສະໜາ
ພຣະວິຫານແມ່ນບ້ານຂອງພຣະຜູ້ເປັນເຈົ້າ.

ເອຊາຢາໄດ້ເອີ້ນພຣະວິຫານວ່າເປັນ “ພູທີ່ເປັນບ່ອນຕັ້ງພຣະວິຫານຂອງພຣະຜູ້ເປັນເຈົ້າ” (2 ນີໄຟ 12:2). ເປັນຫຍັງພູຈຶ່ງເປັນສັນຍາລັກທີ່ດີສຳລັບພຣະວິຫານ?

ທ່ານຈະອະທິບາຍຕໍ່ບາງຄົນແນວໃດວ່າ ເປັນຫຍັງເຮົາຈຶ່ງຕ້ອງການພຣະວິຫານ? ທ່ານສາມາດພົບເຫັນຄຳຕອບບາງຢ່າງທີ່ເປັນໄປໄດ້ຢູ່ໃນ 2 ນີໄຟ 12:2–3 ແລະ ຂ່າວສານຂອງປະທານຣະໂຊ ເອັມ ແນວສັນ “The Temple and Your Spiritual Foundation” (Liahona, Nov. 2021, 93–96) ນຳອີກ. ອີງຕາມສິ່ງທີ່ທ່ານໄດ້ອ່ານ, ພຣະຜູ້ເປັນເຈົ້າຢາກໃຫ້ທ່ານຮຽນຮູ້ ແລະ ມີປະສົບການຫຍັງແດ່ຢູ່ໃນບ້ານທີ່ສັກສິດຂອງພຣະອົງ? ທ່ານໄດ້ມີປະສົບການໃດແດ່ໃນທີ່ນັ້ນ?

ທ່ານສາມາດພົບເຫັນຄຳຖາມການສຳພາດໃບຮັບຮອງເຂົ້າພຣະວິຫານໄດ້ຢູ່ໃນ ໜ້າ 36–37 ຂອງປຶ້ມ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ. ໃຫ້ພິຈາລະນາທີ່ຈະອ່ານແຕ່ລະຄຳຖາມ ແລະ ຖາມຕົວທ່ານເອງວ່າ, ຄຳຖາມນີ້ສິດສອນເຮົາຫຍັງແດ່ກ່ຽວກັບທາງຂອງພຣະຜູ້ເປັນເຈົ້າ? ມັນຊ່ວຍໃຫ້ເຮົາ “ເດີນຕາມທາງຂອງພຣະອົງ” ແນວໃດ?

ເບິ່ງ Gospel Topics, “Temples,” ຫ້ອງສະໝຸດພຣະກິດຕິຄຸນ; “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68 ນຳອີກ.

2 ນີໄຟ 12–19

ພຣະເຢຊູຄຣິດຈະໄຖ່ຜູ້ຄົນຂອງພຣະອົງ.

ເຖິງແມ່ນເພິ່ນໄດ້ສັງເກດເຫັນຄວາມຊົ່ວຮ້າຍ, ແຕ່ເອຊາຢາກໍຍັງໄດ້ເຫັນຄວາມຫວັງສຳລັບອະນາຄົດ. ໃຫ້ພິຈາລະນາທີ່ຈະສຶກສາພຣະຄຳພີແຕ່ລະຂໍ້ດັ່ງຕໍ່ໄປນີ້. ຂຽນຄວາມຈິງຢ່າງໜຶ່ງ ຫລື ຫລາຍກວ່ານັ້ນ ທີ່ພຣະຄຳພີແຕ່ລະຂໍ້ສິດສອນກ່ຽວກັບວັນເວລາຂອງເຮົາ: 2 ນີໄຟ 12:1–5; 14:2–6; 15:20–26; 19:2–8. ເປັນຫຍັງທ່ານຈຶ່ງຮູ້ສຶກວ່າຂໍ້ພຣະຄຳພີເຫລົ່ານີ້ແມ່ນສຳຄັນສຳລັບເຮົາທີ່ຈະເຂົ້າໃຈ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ຊອກຫາແບບແຜນ. ຢູ່ໃນພຣະຄຳພີ ເຮົາສາມາດພົບເຫັນແບບແຜນ ທີ່ສະແດງແກ່ເຮົາເຖິງວິທີທີ່ພຣະຜູ້ເປັນເຈົ້າທຳງານ. ຢູ່ໃນ 2 ນີໄຟ 11–19, ທ່ານອາດຊອກຫາແບບແຜນທີ່ສະແດງໃຫ້ເຫັນວ່າ ພຣະຜູ້ເປັນເຈົ້າເຕືອນເຖິງບາບ ແລະ ໃຫ້ອະໄພຜູ້ຄົນທີ່ກັບໃຈແນວໃດ.

ແນວຄິດສຳລັບການສິດສອນເດັກນ້ອຍ

2 ນີໄຟ 12:2–3

ພຣະວິຫານແມ່ນບ້ານຂອງພຣະຜູ້ເປັນເຈົ້າ.

ເອຊາຢາໄດ້ບັນຍາຍວ່າພຣະວິຫານເປັນ “ພູທີ່ເປັນບ່ອນຕັ້ງພຣະວິຫານຂອງພຣະຜູ້ເປັນເຈົ້າ.” ລູກໆຂອງທ່ານອາດມັກທຳທ່າປີນພູຂະນະທີ່ທ່ານອ່ານ 2 ນີໄຟ 12:2–3. ຊ່ວຍພວກເຂົາຊອກຫາວະລີຕ່າງໆຢູ່ໃນຂໍ້ເຫລົ່ານີ້ທີ່ບັນຍາຍວ່າເປັນຫຍັງເຮົາຈຶ່ງມີພຣະວິຫານ.
ເພື່ອສາທິດວະລີ “ເດີນຕາມທາງຂອງພຣະອົງ” ຈາກ 2 ນີໄຟ 12:3, ທ່ານສາມາດຈັດເສັ້ນທາງຢູ່ທີ່ພື້ນ, ທີ່ນຳໄປສູ່ຮູບພຣະວິຫານ. ຂະນະທີ່ລູກໆຂອງທ່ານຍ່າງຢູ່ໃນເສັ້ນທາງ, ພວກເຂົາສາມາດບອກຊື່ຂອງສິ່ງທີ່ພວກເຂົາສາມາດເຮັດໄດ້ເພື່ອຈະຍ່າງຕາມເສັ້ນທາງຂອງພຣະຜູ້ເປັນເຈົ້າ.
ບາງທີລູກໆຂອງທ່ານສາມາດແຕ້ມຮູບຂອງຕົວພວກເຂົາເອງກຳລັງໄປພຣະວິຫານ. ພວກເຂົາສາມາດຮ້ອງ ຫລື ຟັງເພງທີ່ກ່ຽວກັບພຣະວິຫານນຳອີກ, ດັ່ງເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68). ຊ່ວຍພວກເຂົາຊອກຫາວະລີຢູ່ໃນບົດເພງທີ່ສິດສອນວ່າພຣະວິຫານນັ້ນຄືຫຍັງ ແລະ ວ່າເຮົາເຮັດຫຍັງຢູ່ທີ່ນັ້ນ.

2 ນີໄຟ 11:4–7; 17:14; 19:6

ພຣະເຢຊູຄຣິດເປັນພຣະຜູ້ຊ່ວຍໃຫ້ລອດຂອງເຮົາ.

ມີຫລາຍພຣະນາມສຳລັບພຣະເຢຊູຄຣິດ ຢູ່ໃນ 2 ນີໄຟ 11:4–7; 17:14; 19:6. ຊ່ວຍລູກໆຂອງທ່ານໃຫ້ຊອກຫາ ແລະ ເວົ້າລົມກ່ຽວກັບສິ່ງທີ່ພຣະນາມເຫລົ່ານັ້ນໝາຍເຖິງ. ຍົກຕົວຢ່າງ, “ພຣະຄຣິດ” ໝາຍຄວາມວ່າ “ຜູ້ທີ່ຖືກເຈີມ” ແລະ “ເອມານູເອນ” ໝາຍຄວາມວ່າ “ພຣະເຈົ້າສະຖິດຢູ່ກັບເຮົາ.” ພຣະນາມເຫລົ່ານີ້ສິດສອນເຮົາຫຍັງແດ່ກ່ຽວກັບພຣະເຢຊູຄຣິດ?
ສາຍສ່ວນໃດໜຶ່ງຂອງວິດີໂອ “The Christ Child” (ຫ້ອງສະໝຸດພຣະກິດຕິຄຸນ) ທີ່ສະແດງໃຫ້ເຫັນຜູ້ຄົນຕ່າງໆເຫັນພຣະເຢຊູເປັນເທື່ອທຳອິດ. ຢຸດວິດີໂອບຶດໜຶ່ງລະຫວ່າງການບັນຍາຍເຫລົ່ານີ້, ແລະ ຖາມລູກໆຂອງທ່ານກ່ຽວກັບສິ່ງທີ່ຜູ້ຄົນເຫລົ່ານີ້ອາດໄດ້ຮູ້ສຶກ. ທ່ານຈະຮູ້ສຶກຫຍັງແດ່ຖ້າຫາກເຮົາໄດ້ຢູ່ທີ່ນັ້ນ? ເຮົາຈະຮູ້ສຶກແນວໃດ ເມື່ອເຮົາເຫັນພຣະອົງອີກຄັ້ງ?

2 ນີໄຟ 15:20

ຊາຕານພະຍາຍາມເຮັດໃຫ້ເຮົາສັບສົນກ່ຽວກັບຄວາມດີ ແລະ ຄວາມຊົ່ວ.

ສະແດງສິ່ງທີ່ຂົມ ຫລື ສົ້ມໃຫ້ລູກໆຂອງທ່ານເຫັນ, ດັ່ງເຊັ່ນປ່ຽງໝາກນາວ, ຢູ່ໃນເຈ້ຍຫໍ່ເຂົ້າໜົມ. ອ່ານ 2 ນີໄຟ 15:20 ນຳກັນ. ຊາຕານພະຍາຍາມຈະເຮັດໃຫ້ສິ່ງທີ່ບໍ່ດີເບິ່ງຄືວ່າດີແນວໃດ? ທ່ານກໍສາມາດສາຍ 90 ວິນາທີທຳອິດຂອງວິດີໂອ “You Will Be Freed” (ຫ້ອງສະໝຸດພຣະກິດຕິຄຸນ) ນຳອີກ. ເປັນຫຍັງຊາວປະມົງຈຶ່ງປອມແປງເບັດຂອງລາວ? ເປັນຫຍັງຊາຕານຈຶ່ງປອມແປງບາບ? ພຣະເຢຊູຄຣິດຊ່ວຍໃຫ້ເຮົາຫລີກລ້ຽງຈາກການຖືກຫລອກໂດຍຊາຕານແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະວິຫານພານາມາຊີທີ ພານາມາ. “ພຣະວິຫານຂອງພຣະຜູ້ເປັນເຈົ້າຈະຖືກສະຖາປະນາຂຶ້ນເທິງຈອມພູທັງຫລາຍ, … ແລະ ປະຊາຊາດທັງປວງຈະຫລັ່ງໄຫລໄປບ່ອນນັ້ນ” (2 ນີໄຟ 12:2).

ຮູບພາບ

ໜ້າກິດຈະກຳ: ພຣະວິຫານແມ່ນບ້ານຂອງພຣະຜູ້ເປັນເຈົ້າ