Jakobi [LiM] 1–4

Për Jakobin, të jepte mësim fjalën e Perëndisë ishte një “detyrë nga Zoti”, kështu që ai punoi me zell për ta “lartësua[r] detyrën [e tij]” (Jakobi [LiM] 1:17, 19). Çfarë domethënie kanë për ju këto fraza që përdori Jakobi? Mendoni se çfarë bën një xham zmadhues. A ju jep kjo ndonjë ide? Teksa i përsiatni vargjet te Jakobi [LiM] 1:6–8, 15–19 dhe 2:1–11, mendoni për detyrat që Zoti mund të ketë për ju. Çfarë ndiheni i/e frymëzuar të bëni për t’i “lartësua[r]” ato?

Shihni edhe “Atë që Zoti e Thërret, Atë Zoti e Kualifikon”, në Mësime të Presidentëve të Kishës: Tomas S. Monson (2020), f. 209–220; “Rise to Your Call” [“Ngrihuni në Lartësinë e Thirrjes Tuaj”] (material filmik), Gospel Library [Biblioteka e Ungjillit].

Nefitët kishin një problem me kryelartësinë dhe përqendrimin te pasuritë (shihni te Jakobi [LiM] 2:13) dhe ai problem nuk ishte veçse i tyri ose i kohës së tyre. Si e reklamon kundërshtari dashurinë për pasurinë sot? Pasi të lexoni te Jakobi [LiM] 2:12–21, përshkruajeni me fjalët tuaja si dëshiron Perëndia që ta shihni pasurinë materiale. Një himn si “Sepse Mua Shum’ m’Ësht’ Dhën’” (Himne, nr. 136) mund t’ju japë ide shtesë. Çfarë ndiheni i/e frymëzuar të bëni në lidhje me atë që po mësoni?

Ndërsa lexoni te Jakobi [LiM] 2:22–35; 3:10–12, çfarë gjeni që ju ndihmon të kuptoni pse dëlirësia është aq e rëndësishme për Perëndinë? Cilat janë disa nga pasojat negative të imoralitetit në kohën e Jakobit dhe tonën? Cilat janë bekimet e të jetuarit të një jete të dëlirë?

Plaku Dejvid A. Bednar na mësoi se ne jetojmë “në një botë e cila e tall gjithnjë e më shumë shenjtërinë e riprodhimit” (“Ne Besojmë në Qenien të Dëlirë”, Liahona, maj 2013, f. 41–44). Si i ndihmoni të tjerët ta kuptojnë pse i bindeni ligjit të dëlirësisë? Një vend i mirë nga t’ia filloni është shpjegimi i standardeve të Perëndisë për ndjenjat dhe marrëdhëniet seksuale në pjesën “Trupi juaj është i shenjtë” te Për Forcën e Rinisë: Një Udhëzues për Bërjen e Zgjedhjeve (faqet 22–29). Çfarë tjetër gjeni në atë burim që do t’ju ndihmonte të shpjegoni arsyen pse e jetoni ligjin e dëlirësisë?

Mund të gjeni përgjigje të tjera në mesazhin e lartpërmendur të Plakut Bednar ose në materialin filmik “I Choose to Be Pure” [“Zgjedh të Jem i/e Dëlirë”] (Gospel Library) [Biblioteka e Ungjillit].

Ku ndryshon standardi i Perëndisë për pastërtinë seksuale nga mesazhet e tjera të cilat mund të hasni? Cilat janë bekimet e të jetuarit të një jete të dëlirë?

Shihni edhe te Gospel Topics [Tema të Ungjillit], “Virtue” [“Virtyti”], Gospel Library [Biblioteka e Ungjillit]; “Tërheqja ndaj së Njëjtës Gjini” te koleksioni “Life Help” [“Ndihmë për Jetën”] në Gospel Library [Biblioteka e Ungjillit].

Jakobi iu përgjërua popullit të tij që të “pajtoh[ej] me [Perëndinë], nëpërmjet shlyerjes së Krishtit” (Jakobi [LiM] 4:11). Një përkufizim i fjalës pajtohem është të rivendos miqësinë ose harmoninë. Ndërsa përsiatni për jetën tuaj, mendoni rreth një kohe kur mund të jeni ndier i/e largët nga Ati Qiellor. Si ju ndihmon Shpëtimtari ta rivendosni këtë marrëdhënie? Çfarë këshille mund të gjeni në këtë kapitull që ju ndihmon të pajtoheni me Perëndinë? (Shihni vargjet 4–14.)

Çfarë idesh shtesë fitoni nga Mateu 5:23–24? Si mund t’ju ndihmojë Shpëtimtari që të pajtoheni me Perëndinë dhe të tjerët?

Shihni edhe te 2 Nefi 10:24.

Ndërsa Jakobi kërkoi ta kthente popullin e tij më plotësisht te Zoti, ai i paralajmëroi ata të mos ishin të verbër shpirtërisht dhe të mos i përçmonin “fjalët e qartësisë” së ungjillit (shihni te Jakobi [LiM] 4:13–14). Sipas vargjeve te Jakobi [LiM] 4:8–18, çfarë mund të bëjmë për ta shmangur verbërinë shpirtërore?

Shihni edhe Quentin L. Cook, “Looking beyond the Mark”, Ensign, mars 2003, f. 40–44.

• Për t’i ndihmuar fëmijët tuaj të kuptojnë se si mund të shërohet një “shpirt [i] plagosur”, ju mund të diskutoni së bashku se si trupat tanë plagosen dhe çfarë mund t’i ndihmojë ata të shërohen. Mbase fëmijët tuaj mund të bisedojnë për raste kur u lënduan dhe çfarë i ndihmoi ata të shëroheshin. Mund edhe t’u tregoni fasha ose mjekime si pjesë e këtij bashkëbisedimi. Ndoshta mund t’u tregoni se si ju ka ndihmuar Shpëtimtari kur shpirti juaj kishte nevojë për shërim.

• Disa nga njerëzit në kohën e Jakobit ishin shumë të pasur, por ata nuk donin ta ndanin atë që kishin me të tjerët. Teksa ua lexoni fëmijëve mësimet e Jakobit te Jakobi [LiM] 2:17–19, mund t’u jepni atyre figura ose sende për t’i mbajtur në duar që shkojnë me fjalët ose frazat në këto vargje. Mund t’u shpjegoni se ju po i ndani këto sende me ta; mbase më pas mund t’i ftoni ata të ndajnë sende me ju ose me njëri-tjetrin. Bisedoni rreth faktit se si ndiheni kur i ndani gjërat me dikë. Çfarë tjetër mund të ndajmë me të tjerët që t’i ndihmojmë të ndihen të lumtur?

• Pasi të lexoni së bashku te Jakobi [LiM] 2:17, ndoshta fëmijët tuaj mund të përmendin disa bekime që Ati Qiellor i ka ndarë me ta. Përse dëshiron Ai që ta ndajmë atë që kemi me njëri-tjetrin?

• Besimi i Jakobit te Krishti qe aq i fortë sa nuk mund të tundej. Për t’u mësuar fëmijëve tuaj se si të ndërtojnë një besim si ai, mund t’i pyesni ata për gjërat që bëjmë për t’i bërë më të fortë trupat tanë. Çfarë mund të bëjmë ne për ta bërë më të fortë besimin tonë te Jezu Krishti? Lexoni te Jakobi [LiM] 4:6 së bashku për t’i ndihmuar fëmijët të zbulojnë se çfarë bënë Jakobi dhe populli i tij për ta bërë besimin e tyre “[të] patundur”.

• Një mënyrë tjetër për t’i ndihmuar fëmijët tuaj të kuptojnë se çfarë do të thotë të jenë “[të] patundur” në besimin e tyre, do të ishte të gjenit një pemë të madhe dhe t’u kërkoni atyre që të shkundin degë të veçanta. Më pas lërini që të përpiqen ta shkundin trungun. Përse është më e vështirë ta shkundësh trungun? Cilat fraza te Jakobi [LiM] 4:6, 10–11, e përshkruajnë atë që mund të bëjmë për ta bërë të patundur besimin tonë te Jezu Krishti?

  Pamja

  pemë e madhe në park

• Për krahasime të tjera që t’u jepni mësim fëmijëve tuaj rreth besimit të patundur te Jezu Krishti, shihni te Nil L. Andersen, “Vorbullat e Erërave Shpirtërore” (Liahona, maj 2014, f. 18–21 dhe materialin filmik “Vorbullat e Erërave Shpirtërore”) ose këngën “Burri i Urt’ dhe Burri Pa Mend” (Libri i Këngëve të Fëmijëve, f. 132; shihni edhe te Mateu 7:24–27).