“8–14 Epril: ‘Lod I Stap Wok Wetem Yumi.’ Jekob 5–7,” Kam Folem Mi—Blong Hom mo Jos: Buk blong Momon 2024 (2024)
“8–14 Epril: Jekob 5–7,” Kam Folem Mi—Blong Hom mo Jos: 2024 (2024)
Stori olsem Parabol blong Olif Tri, i kam long Brad Teare
8–14 Epril: “Lod I Stap Wok Wetem Yumi.”
Jekob 5–7
I gat plante, plante pipol we oli no harem yet abaot gospel blong Jisas Kraes. Sapos yu filim se wok ia blong karem tugeta olgeta insaed long Jos blong Lod i wan wok we i bigwan tumas, stori olsem parabol blong Ol Olif Tri long Jekob 5 i stap rimaenem gud yumi: plantesen ia, hem i blong Lod. Hem i givim wanwan long yumi, wan smol ples nomo, blong yumi givhan long Hem wetem wok blong Hem—famli blong yumi, ol fren blong yumi, ol pipol long ol ples we yumi save lidim tingting blong man. Mo samtaem, faswan we yumi helpem karem i kam, hem i yumiwan. Be yumi neva stap yumiwan insaed long wok ia, from se Lod blong plantesen ia, Hem i stap wok long saed blong ol wokman blong Hem (luk long Jekob 5:72). God i save mo lavem ol pikinini blong Hem, mo bambae Hem i rere wan rod blong wanwan long olgeta blong harem gospel blong Hem, iven olgeta we oli bin sakemaot Hem bifo (luk long Jekob 4:15–18). Mo afta, taem wok i finis, evriwan we oli bin “wok strong wetem strong tingting oltaem wetem [Hem] … bae oli gat glad wetem [Hem] from ol frut blong plantesen blong [Hem]” (Jekob 5:75).
Luk tu long “Jacob Teaches about the Gathering of Israel” (vidio), Gospel Library.
Ol tingting blong stap lan long Hom mo Jos
Jisas Kraes i Lod blong plantesen.
Jekob 5 i wan stori wetem ol simbol we i gat mining blong hem. I tokbaot ol tri mo frut mo ol wokman, be tru mining se i abaot God we i stap dil wetem ol pipol blong Hem truaot long histri. Mekem se taem yu ridim stori ia, tingbaot se wanem sam long ol samting long stori we maet i gat simbol long hem.
Eksampol, sapos plantesen ia i ripresentem wol ia, mo gudfala olif tri i ripresentem Haos blong Isrel (o olgeta we oli bin mekem ol kavenan wetem God; luk long Jekob 5:3), wanem nao maet wael olif tri ia i ripresentem? ?Gud mo nogud frut ia, i save ripresentem wanem? ?Wanem ol narafala simbol we yu luk?
Nomata se Jekob 5 i tij abaot ol nesen mo wol histri blong 100 yia i pas, hem i abaot yu mo laef blong yu tu. ?Wanem ol mesej yu faenem we i blong yuwan insaed long Jekob 5?
Ating hemia we i moa impoten, Jekob 5 hem i abaot Jisas Kraes. Taem yu stap rid, lukaotem Hem. ?Wanem nao yu lanem abaot Hem, eksampol long ol ves 40–41, 46–47?
Blong gat sam moa niu tingting abaot Jekob 5, luk long daegram we i stap long en blong aotlaen ia.
Lod i stap invaetem mi blong wok wetem Hem insaed long plantesen blong Hem.
Ol “narafala wokman” (Jekob 5:70) we God i bin singaotem olgeta i go long plantesen blong Lod, we insaed i gat ol pipol olsem yu. ?Wanem nao ol trutok we yu faenem insaed long Jekob5, speseli ol ves 61–62 mo 70–75, long saed blong fasin blong stap wok insaed long plantesen blong Lod? ?Wanem nao yu bin lanem abaot Hem taem yu stap help wetem wok blong Hem?
Taem yu stap ridim abaot “las taem” ia we Lod i stap wok long plantesen blong Hem, ?wanem nao i givim insperesen long yu blong wok blong Lod “wetem evri paoa blong bodi blong yu”? (Jekob 5:71). Mebi yu save tingting long wan eksperiens blong yuwan we yu bin filim glad taem yu stap wok blong Lod blong plantesen—eksampol taem we oli stap serem gospel, stap givim seves long tempol, o blong mekem ol narafala man oli kam strong moa. Maet yu wantem save moa tu long ol eksampol we Elda Gary E. Stevenson i bin serem long mesej blong hem “I Naes Nomo—I Naes mo Simpol” (Liahona, Nov. 2021, 47–50).
Presiden Russell M. Nelson i tijim: “Eni taem yu mekem eni samting we i helpem eniwan—long tugeta saed blong vel—tekem wan step fored blong stap mekem ol kavenan wetem God mo stap kasem baptaes mo tempol odinens we i nid long bihaf blong olgeta, yu stap help blong karem Isrel i kam tugeta. Hem i simpol olsem” (“Hope of Israel” [worldwide youth devotional, June 3, 2018], ChurchofJesusChrist.org). Tingting blong stap statem wan lis blong ol aedia blong wanem we yu save mekem blong karem Isrel i kambak. Aot long lis blong yu, ?wanem nao yu filim se Lod i wantem yu blong mekem tedei long plantesen blong Hem? Folem ves 75, ?olsem wanem nao Lod i givim riwod long yumi from seves we yumi mekem long plantesen blong Hem?
Luk tu long “Israel, Israel, God Is Calling,” Hymns, no. 7; “Old Testament Olive Vineyard” (vidio), Gospel Library; Gospel Topics, “Gathering Israel,” “Inviting All to Receive the Gospel of Jesus Christ,” “Participating in Temple and Family History Work,” Gospel Library.
Tijim Doktrin Mekemsua se ol storian blong yufala insaed long klas i lukluk nomo long fandesen doktrin ia insaed long ol skripja. Yu save mekem hemia taem ridim ol skripja tugeta, mo afta, stap serem wetem wanwan long yufala ol trutok we oli faenem, mo tu, ol eksperiens blong stap laef folem ol trutok ia.
Lod, wetem lav mo sore, i tingbaot ol pipol blong Hem.
Wan mining blong toktok ia stap tru hem i blong folem gud o hang strong long wan samting, holem kolosap, mo no muvmuv. ?Olsem wanem mining ia i jenisim wei we yu andastanem Jekob 6:4–5? Long stori blong olif tri, ?olsem wanem Lod blong plantesen i putumaot moa “han blong sore” blong Hem? (eksampol luk long, Jekob 5:47, 51, 60–61, 71–72). ?Olsem wanem nao Hem i mekem hemia blong yu?
Mi save stanap strong taem ol narafala man oli givim jalenj long mi from fet blong mi long Jisas Kraes.
Eksperiens blong Ol Man blong Nifae wetem Serem, oli ripitim plante taem tedei: pipol oli stap traem blong prapa spolem gud fet long Kraes. ?Olsem wanem nao Jekob i mekem taem oli atakem bilif blong hem? ?Wanem nao yu lanem aot long ol ansa blong hem? ?Wanem nao yu save mekem naoia blong rere from ol taem we bae yu kasem jalenj from fet blong yu long Sevya?
Luk tu long Jeffrey R. Holland, “The Cost—and Blessings—of Discipleship,” Ensign o Liahona, May 2014, 6–9; “Sherem Denies Christ” (vidio), Gospel Library.
Blong moa tingting, lukluk long namba blong manis ia long Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Lod i stap kea long ol pipol blong Hem.
-
?Olsem wanem nao yu save serem stori blong ol olif tri long wan wei we ol pikinini blong yu oli save andastanem? Wan wei i blong wokbaot aotsaed blong luk wan tri, mo tekem sot taem blong luklukbak long ol stamba lesen blong stori ia. ?Wanem nao Lod blong plantesen ia i mekem blong ol tri blong Hem? ?Olsem wanem yumi save kam olsem olsem ol wokman long stori ia mo helpem ol narawan blong filim lav blong Sevya?
-
Jekob i serem stori blong ol olif tri blong invaetem ol pipol blong hem blong kam long Kraes. I save mekem semmak long ol pikinini blong yu. Ating yu save mekem i sot stori ia wetem ol ves olsem Jekob 5:3–4, 28–29, 47, mo 70–72 (luk tu long “Old Testament Olive Vineyard” [vidio], Gospel Library). Afta, yu o ol pikinini blong yu i save ridim Jekob 5:11, 41, 47, mo 72, mo lukaotem ol samting we i soemaot hamas Lod blong plantesen (Jisas Kraes) i bin kea from ol tri ia. ?Wanem nao Sevya i mekem blong soemaot se hem i stap kea from yumi?
Papa long Heven i lavem mi mo bae i fogivim mi taem mi sakem sin.
-
Jekob 6:4–5 i gat wan impoten mesej blong yumi taem yumi mekem ol rong joes. Ating yu save helpem ol pikinini blong yu blong faenem. ?Wanem ol toktok long ol ves ia we i givim hop long yumi tru long lav blong God we i pemaot man long hem? Stori blong Elda Allen D. Haynie abaot taem we hem i pleiplei mo kam doti wetem graon long wan pul blong sofmad; stori i stap long mesej blong hem “Tingbaot Huia Yumi Bin Trastem” (Liahona, o www.lds.org/languages/bis/content/general-conference/2015/10/remembering-in-whom-we-have-trusted,Okt 2015), i save help. ?Wanem nao stori ia mo Jekob 6:4–5 i tijim yumi abaot wanem we yumi nidim blong mekem blong save stap long sef ples insaed long kingdom blong God?
Mi save faet from wanem we mi save se i tru.
-
?Olsem wanem nao yu save givim insperesen long ol pikinini blong yu blong oli save faet from trutok olsem we Jekob i bin mekem? Ol pikinini blong yu oli save wajem vidio ia “Chapter 10: Jacob and Sherem” (Gospel Library) mo aktemaot wanem we i stap gohed bitwin Jekob mo Serem, taem yu stap yusum Jekob 7:1–23 olsem wan gaed. ?Olsem wanem nao Jekob i bin faet from wanem we hem i bin save se i raet? Invaetem ol pikinini blong yu blong serem ol eksperiens blong ol taem we oli bin faet from raet, o serem eksperiens blong yuwan. Ating oli save singsing tu wan singsing we i tokbaot fasin blong gat strong tingting olsem Jekob, olsem “Stand for the Right,” Children’s Songbook, 159.
Blong moa tingting, luk long namba blong manis ia blong Fren magasin.