“15–21 Epril:‘Hem I Wok Tru long Mi blong Mekem Samting we Hem I Wantem.’ Inos–Ol Toktok blong Momon,” Kam Folem Mi—Blong Hom mo Jos: Buk blong Momon 2024 (2024)
“15–21 Epril. Inos–Ol Toktok blong Momon,” Kam Folem Mi—Blong Hom mo Jos: 2024 (2024)
Jekob mo Inos, i kam long Scott Snow
15–21 Epril: “Hem I Wok Tru long Mi blong Mekem Samting we Hem I Wantem”
Inos–Ol Toktok blong Momon
Nomata se Inos i go long dakbus blong kilim ol animol from oli bin hanggri tumas long saed blong bodi, be afta hem i go mo i bin prea ful dei mo [kasem] taem we naet i bin kam from “sol blong hem i bin hanggri.” Hanggri ia i bin mekem Inos blong “leftemap voes blong [hem] laod i go antap kasem ol heven.” Hem i tokbaot eksperiens blong hem olsem wan traehad we hem i bin gat long fored blong God (luk long Inos 1:2–4). Aot long Inos yumi lanem se prea i wan tru samting we yumi traehad from blong kam kolosap long God mo lukaotem blong save tingting blong Hem. Taem yu prea olsem ia blong wantem save, bae yu kam blong faenemaot, olsem we Inos i bin mekem, se God i harem yu mo hem i tingbaot yu, olgeta we yu lavem, mo iven ol enemi blong yu (luk long Inos 1:4–17). Taem yu save ol tingting blong Hem, bae yu yu moa gud yet blong save mekem tingting blong Hem. Olsem Momon, ating bae yu “no save evri samting; be Lod i save evri samting … ; taswe, hem i wok tru long [yu] blong mekem samting we hem i wantem” (Ol Toktok blong Momon 1:7).
Ol tingting blong stap lan long Hom mo Jos
God bae i harem mo ansarem ol prea blong mi.
Ol eksperiens blong yu long saed blong prea, maet i no bigwan olsem Inos, be i no minim se oli no gat bigfala mining. Hemia sam kwestin blong tingbaot taem yu stadi Inos 1:1–17:
-
?Wanem toktok nao i tokbaot ol traehad blong Inos taem hem i bin prea?
-
?Olsem wanem nao ol prea blong Inos i bin jenis long ol ves 4 i go long 11?
-
?Wanem nao mi bin lanem long Inos we bae i save helpem mi blong mekem prea blong mi i kam moa gud moa?
Luk tu long “Enos Prays Mightily” (vidio), Gospel Library; “Sweet Hour of Prayer,” Hymns, no. 142.
Serem ol kwestin blong toktokraon long hem. Sapos yu stap tijim ol narafala man, tingting blong stap putum ol kwestin we yu wantem blong toktokraon long hem long wan gudfala ples we evriwan i save luk. Hemia i helpem ol pipol blong tingting hevi long ol kwestin mo save givim ol ansa wetem insperesen.
Lod i save helpem mi wetem paoa ia blong mekem famli blong mi i kam gud.
Ating i gat wan long famli we yu hop yu save helpem hem kam long Kraes, be yu stap tingting long yuwan sapos ol traehad blong yu i bin jenisim hem. ?Wanem nao yu lanem aot long Inos 1:1–4 abaot hao paoa ia long Jekob i bin jenisim pikinini blong hem Inos? Eksampol, ?toktok ia, “long ol fasin we Lod i lukaotgud mo givim advaes long man” i minim wanem long yu? ?Olsem wanem nao bae yu save invaetem paoa blong Hem insaed long hom blong yu?
Taem yu tingbaot famli blong yuwan, tingting lon gol kwestin ia mo ol tul ia:
-
?Hao nao yu save jenisim famli blong yu long wan wei we i moa gud? (luk long 1 Nifae 2:16–18; 3:15–21; 5:1–6; 7:20–21; Alma 36:17–20; “Famli: Wan Ofisol Toktok I Go Long Wol”). ?Wanem nao yu save mekem sapos wan i luk se i no wantem help blong yu o i no kaen long yu?
-
?Wanem ol prinsipol we yu faenem long ol skripja we i save givhan long ol rilesensip blong yu mo ol famli memba blong yu? Matiu 5:21–24, 38–44; 6:14; 7:1–5; 22:36–39; 3 Nifae 18:21; Moronae 7:33; Doktrin mo Ol Kavenan 18:10–13.
Elda Dieter F. Uchtdorf i bin serem wan kaonsel blong ol famli we i save help bigwan insaed long “In Praise of Those Who Save” (Ensign o Liahona, Mei 2016, 77–80). ?Wanem nao mesej ia i givim insperesen long yu blong mekem blong mekem famli blong yu i kam strong moa? “Saving Our Families”).
Luk tu long Gospel Topics, “Family,” Gospel Library; “Home and Family—Through Small Things” (vidio), Gospel Library.
Mi save kasem fasin blong fogiv taem mi praktisim fet long Jisas Kraes.
Sam taem ating yu stap askem yuwan sapos God i bin fogivim ol sin blong yu, iven afta we yu bin sakem ol sin blong yu. ?Wanem ol niu tingting we yu bin kasem aot long eksperiens blong Inos long Inos 1:1–8? ?Olsem wanem Inos i soemaot fet blong hem long Jisas Kraes bifo mo afta we hem i kasem fasin blong fogiv?
Jerom–Omnae
Taem mi traem blong obei long ol komanmen blong Hem, God bae i blesem mi.
Ol buk blong Jerom mo Omnae tugeta, oli tokbaot rilesensip bitwin stret mo gud fasin mo fasin blong kam antap gud. ?Wanem nao yu lanem aot long Jerom 1:7–12; Omnae 1:5–7, 12–18? ?Olsem wanem mining blong fasin blong kam antap gud we i kam long wol, i defren long mining we i kam long Lod? ?Olsem wanem nao Lod i helpem ol pipol blong Hem blong kam antap gud? (luk long Alma 37:13; 48:15–16).
“Kam long Kraes, Tabu Wan blong Isrel.”
Invitesen ia “Kam long Kraes” i stap kamaot plante long Buk blong Momon. I tru, wan long ol mein stamba tingting blong buk ia i blong givimaot invitesen i go long evriwan. Taem yu ridim Omnae 1:25–26, ?wanem ol toktok o sentens we yu faenem se i tokbaot olsem wanem blong kam long Kraes? ?Wanem nao bae yu mekem blong kam fulwan long Hem?
Momon I Stap Putum Tugeta Ol Buk, i kam long Jorge Cocco
God bambae i wok tru long mi sapos mi folem wanem Hem i talem long mi blong mekem.
Wan risen we Lod i givim insperesen long Momon blong putum insaed long Buk blong Momon ol smol plet blong Nifae, hem i from God i bin save se ol fas 116 pej we oli bin transletem bae i lus (luk long Doktrin mo Ol Kavenan 10; Saints, volume 1, chapter 5). ?From wanem yu talem tangkyu se Momon i bin folem instraksen we i kam long Lod blong putum insaed ol raeting ia (we i tekem 1 Nifae i go kasem Omnae)? ?Wanem ol risen we Momon i bin givim blong putum ol ples ia insaed? (luk long Ol Toktok blong Momon 1:3–7). ?Wetaem nao yu bin luk God i stap mekem wok blong Hem tru long yu o ol narawan?
Blong moa tingting, lukluk long namba blong manis ia long Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Mi save toktok long Papa long Heven tru long prea.
-
?Olsem wanem nao yu save helpem ol pikinini blong yu blong oli mekem ol prea blong olgeta i gat moa mining? Tingting blong stap soem olgeta wan pikja blong Inos i stap prea, lego olgeta i tokbaot wanem we oli luk. Oli save sarem ol ae blong olgeta mo tingting long maen blong olgeta se oli stap luk fes mo stap toktok wetem Papa long Heven. ?Wanem nao oli laekem blong tokbaot? ?Wanem nao maet Hem i wantem blong talem long olgeta?
-
Taem yu ridim laod Inos 1:1–5, ol smol pikinini oli save priten se olgeta nao Inos taem oli stap aktem se oli go lukaotem ol animol long bus, oli nildaon blong prea, mo samfala moa. Ol pikinini we oli bigwan, oli save lisin long wan toktok o sentens we i stap tokbaot ol prea blong Inos. ?Wanem nao ol toktok ia i talem long yumi abaot ol prea blong Inos? Serem wan eksperiens taem we sol blong yu i “bin hanggri” mo yu “bin prea wetem wan strongfala prea” i go long Lod (Inos 1:4).
Olsem ol pikinini blong God, yumi save prea i go long Papa blong yumi long Heven.
Papa long Heven i harem mo ansarem ol prea blong mi.
-
?Olsem wanem nao yu save helpem ol pikinini blong yu blong andastanem se Papa long Heven bae i harem mo ansarem ol prea blong olgeta? Tingting blong stap invaetem olgeta blong mekem wan lis blong sam samting we oltaem oli prea from. Afta yu save helpem olgeta blong faenem wanem we Inos i bin prea from long Inos 1:2, 9, 13–14, mo 16 (luk tu long “Japta 11: Inos,” Ol Stori long Buk blong Momon, 30–31).
?Wanem nao ol ansa long ol prea blong Inos? (luk long ol ves 6, 9, 11).
?Wanem nao yumi lanem long ol eksperiens blong Inos abaot hao blong mekem ol prea blong yumi i kam moa gud?
-
Singsing tugeta wan singsing abaot prea olsem “A Child’s Prayer” (Children’s Songbook, 12–13). Ating ol pikinini blong yu oli save leftemap han blong olgeta evri taem oli harem toktok ia “prea” o wan narafala toktok we oli ripitim. Talem long ol pikinini blong yu abaot sam long ol wei we Papa long Heven i bin ansarem ol prea blong yu.
Mi save blesem ol narafala man taem mi lisin long Tabu Spirit.
-
Tabu Spirit i bin lidim Momon blong putum insaed ol smol buk blong Nifae long Buk blong Momon. Evri samting we yumi bin stadi long hem insaed long Buk blong Momon kam kasem ples ia long yia, i kam long yumi from Momon i bin jusum blong lisin long Spirit. ?Olsem wanem nao yu save helpem ol pikinini blong yu blong lanem abaot fasin blong stap lisin long Spirit? Invaetem ol pikinini blong oli gat taem blong ridim ol ves aot long Ol Toktok blong Momon 1:3–8. Yu save tokbaot wanem oli bin lanem aot long wanwan ves ia. Afta ol pikinini blong yu oli save:
-
Serem wanem oli bin lanem aot long Ol Stori long Buk blong Momon long yia ia (ol pikja aot long Kam Folem Mi i save helpem olgeta blong tingbaot).
-
Singsing tugeta wan singsing abaot Tabu Spirit, olsem “The Still Small Voice” (Children’s Songbook, 106–7).
-
Tokbaot ol eksperiens we Spirit i bin lidim olgeta blong mekem wan samting we i bin blesem wan narafala man.
-
Blong moa tingting, luk long namba blong manis ia blong Fren magasin.
Inos I Stap Prea, i kam long Robert T. Barrett