“ວັນທີ 13–19 ເດືອນພຶດສະພາ: ‘ແສງສະຫວ່າງ … ຊຶ່ງຈະບໍ່ມີຄວາມມືດເລີຍ.’ ໂມໄຊຢາ 11–17,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 13–19 ເດືອນພຶດສະພາ. ໂມໄຊຢາ 11–17,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ຮູບພາບ

ອະບີນາໄດກຳລັງເປັນພະຍານຕໍ່ກະສັດໂນອາ

Abinadi before King Noah [ອະບີນາໄດຢູ່ຕໍ່ໜ້າກະສັດໂນອາ], ໂດຍ ແອນດຣູ ໂບສ໌ລີ

ວັນທີ 13–19 ເດືອນພຶດສະພາ: “ແສງສະຫວ່າງ … ຊຶ່ງຈະບໍ່ມີຄວາມມືດເລີຍ”

ໂມໄຊຢາ 11–17

ໄຟທີ່ລຸກລາມສາມາດເກີດຈາກປະກາຍໄຟພຽງເມັດດຽວ. ອະບີນາໄດເປັນພຽງຄົນດຽວທີ່ໄດ້ເປັນພະຍານຕໍ່ຕ້ານກະສັດທີ່ມີອິດທິພົນ ແລະ ສານຂອງເພິ່ນ. ພາກສ່ວນໃຫຍ່ຂອງຖ້ອຍຄຳຂອງເພິ່ນໄດ້ຖືກປະຕິເສດ, ແລະ ເພິ່ນໄດ້ຖືກສັ່ງປະຫານ. ແຕ່ປະຈັກພະຍານຂອງອະບີນາໄດເຖິງພຣະເຢຊູຄຣິດ, ຜູ້ຊຶ່ງເປັນ “ແສງສະຫວ່າງ … ຊຶ່ງຈະບໍ່ມີຄວາມມືດເລີຍ” (ໂມໄຊຢາ 16:9), ໄດ້ຈຸດປະກາຍບາງຢ່າງໃນປະໂລຫິດໜຸ່ມຄົນໜຶ່ງຊື່ວ່າ ແອວມາ. ແລະ ຈຸດປະກາຍຂອງການປ່ຽນໃຈເຫລື້ອມໃສນັ້ນ ໄດ້ເລີ່ມຕົ້ນເຕີບໂຕຂຶ້ນ ຂະນະທີ່ແອວມາໄດ້ນຳຫລາຍຄົນມາສູ່ການກັບໃຈ ແລະ ມີສັດທາໃນພຣະເຢຊູຄຣິດ. ແປວໄຟທີ່ໄດ້ຂ້າອະບີນາໄດ ໄດ້ດັບມອດໄປແລ້ວ, ແຕ່ແປວໄຟແຫ່ງສັດທາທີ່ຖ້ອຍຄຳຂອງເພິ່ນໄດ້ກໍ່ສ້າງໄວ້ ຈະມີອິດທິພົນຕະຫລອດໄປຕໍ່ຊາວນີໄຟ—ແລະ ຕໍ່ຜູ້ທີ່ອ່ານຖ້ອຍຄຳຂອງເພິ່ນ ໃນທຸກວັນນີ້. ເຮົາສ່ວນຫລາຍຈະບໍ່ເຄີຍປະເຊີນໜ້າກັບສິ່ງທີ່ອະບີນາໄດໄດ້ປະເຊີນ ເພາະປະຈັກພະຍານຂອງເຮົາ, ແຕ່ກໍມີເວລາໃດເວລາໜຶ່ງ ທີ່ເຮົາຈະຖືກທົດສອບເລື່ອງຄວາມກ້າຫານ ແລະ ສັດທາ ເພາະການຕິດຕາມພຣະເຢຊູຄຣິດ. ບາງທີການສຶກສາປະຈັກພະຍານຂອງອະບີນາໄດ ຈະວີແປວໄຟແຫ່ງປະຈັກພະຍານ ແລະ ແຫ່ງຄວາມກ້າຫານໃນໃຈຂອງທ່ານເຊັ່ນກັນ.

ເບິ່ງ “Abinadi Testifies of Jesus Christ” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ໂມໄຊຢາ 11–13; 17

ຮູບພາບ
ໄອຄອນຫ້ອງຮຽນສາດສະໜາ
ເຮົາສາມາດຢືນຢັດເພື່ອພຣະເຢຊູຄຣິດ, ເຖິງແມ່ນວ່າເຮົາຈະຢືນຢູ່ຄົນດຽວກໍຕາມ.

ຂະນະທີ່ທ່ານກຳລັງສຶກສາ ໂມໄຊຢາ 11–13; 17, ໃຫ້ເບິ່ງຮູບພາບຂອງອະບີນາໄດໃນໂຄງຮ່າງນີ້. ທ່ານຮຽນຮູ້ຫຍັງແດ່ກ່ຽວກັບການຢືນເປັນພະຍານໃຫ້ພຣະຄຣິດ? ໂດຍສະເພາະຢ່າງຍິ່ງ, ທ່ານສາມາດສຸມການສຶກສາຂອງທ່ານໃສ່ກັບຂໍ້ພຣະຄຳພີ ແລະ ຄຳຖາມຕ່າງໆເຊັ່ນດັ່ງຕໍ່ໄປນີ້:

ທ່ານຈະບັນຍາຍໂນອາ ແລະ ຜູ້ຄົນຂອງເພິ່ນວ່າແນວໃດ? ເປັນຫຍັງອະບີນາໄດຈຶ່ງຈຳເປັນຕ້ອງມີຄວາມກ້າຫານໃນການແບ່ງປັນຂ່າວສານຂອງພຣະເຈົ້າກັບພວກເພິ່ນ? (ເບິ່ງ ໂມໄຊຢາ 11:1–19, 27–29; 12:9–15).
ທ່ານຈະບັນຍາຍອະບີນາໄດວ່າແນວໃດ? ສິ່ງໃດທີ່ອະບີນາໄດໄດ້ເຂົ້າໃຈ ທີ່ໄດ້ຊ່ວຍໃຫ້ເພິ່ນມີຄວາມກ້າຫານໃນປະຈັກພະຍານຂອງເພິ່ນ? (ເບິ່ງ ໂມໄຊຢາ 13:2–9, 28, 33–35; 17:8–10, 20).

ເມື່ອໃດທີ່ທ່ານເຄີຍຮູ້ສຶກວ່າ ທ່ານຢືນຢູ່ຄົນດຽວໃນການປົກປ້ອງພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ? ພຣະອົງໄດ້ຊ່ວຍໃຫ້ທ່ານຮູ້ສຶກວ່າພຣະອົງສະຖິດຢູ່ກັບທ່ານແນວໃດ? ຂະນະທີ່ທ່ານໄຕ່ຕອງເລື່ອງນີ້, ທ່ານສາມາດອ່ານເລື່ອງເລົ່າຂອງເອລີຊາ ແລະ ຜູ້ຮັບໃຊ້ໜຸ່ມຂອງເພິ່ນໃນ 2 ກະສັດ 6:14–17. ແມ່ນຫຍັງທີ່ດົນໃຈທ່ານ ກ່ຽວກັບເລື່ອງເລົ່າຂອງເພິ່ນ?

ທ່ານຍັງສາມາດຄົ້ນຄວ້າ ໜ້າທີ 31–33 ຂອງ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ ເພື່ອຊອກຫາວະລີທີ່ໃຫ້ຄວາມກ້າຫານແກ່ທ່ານໃນການປົກປ້ອງຄວາມຈິງ. ຫລື ທ່ານສາມາດເຮັດຢ່າງດຽວກັນໃນເນື້ອເພງຂອງເພງສວດເຊັ່ນ “ເຮັດແຕ່ຄວາມດີ” ຫລື “ຂໍໃຫ້ເຮົາເດີນໄປ” (ເພງສວດ ແລະ ເພງຂອງເດັກນ້ອຍ, 38, 10).

ທ່ານຈະນຳໃຊ້ສິ່ງທີ່ທ່ານໄດ້ຮຽນຮູ້ຈາກອະບີນາໄດແນວໃດ? ວິດີໂອ “Dare to Stand Alone” (ຫ້ອງສະໝຸດພຣະກິດຕິຄຸນ) ນຳສະເໜີສະຖານະການຊຶ່ງທ່ານສາມາດຢືນຢັດເພື່ອພຣະຄຣິດ ແລະ ພຣະກິດຕິຄຸນຂອງພຣະອົງ. ມີຕົວຢ່າງອື່ນໃດແດ່ທີ່ທ່ານຄິດອອກ?

ເບິ່ງ ໂຣມ 1:16; 2 ຕີໂມທຽວ 1:7–8; “Chapter 8: The Call for Courage,” Teachings of Presidents of the Church: Thomas S. Monson (2022), 135–47; Gospel Topics, “Faith in Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

ສິດສອນໂດຍພຣະວິນຍານ. “ການສິດສອນພຣະກິດຕິຄຸນທີ່ມີພະລັງຮຽກຮ້ອງບໍ່ພຽງແຕ່ການກະກຽມບົດຮຽນເທົ່ານັ້ນ ແຕ່ຕ້ອງກະກຽມຕົວທ່ານເອງທາງວິນຍານນຳອີກ ເພື່ອຈະໄດ້ຍິນ ແລະ ເຮັດຕາມການຊີ້ນຳຂອງພຣະວິນຍານ ຂະນະທີ່ທ່ານສິດສອນ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 17).

ໂມໄຊຢາ 12:19–37

ເຮົາຕ້ອງຕັ້ງໃຈເພື່ອຈະເຂົ້າໃຈພຣະຄຳຂອງພຣະເຈົ້າ.

ບັນດາປະໂລຫິດຂອງກະສັດໂນອາເຄີຍຄຸ້ນເຄີຍກັບພຣະຄຳຂອງພຣະເຈົ້າ. ພວກເຂົາສາມາດອ້າງເຖິງຂໍ້ຄວາມຢູ່ໃນພຣະຄຳພີ ແລະ ອ້າງວ່າໄດ້ສິດສອນພຣະບັນຍັດ. ເຖິງຢ່າງນັ້ນກໍຕາມ, ຊີວິດຂອງພວກເຂົາເບິ່ງຄືວ່າ ບໍ່ໄດ້ຮັບຜົນກະທົບຫຍັງຈາກພຣະກິດຕິຄຸນຂອງພຣະຜູ້ຊ່ວຍໃຫ້ລອດເລີຍ. ເປັນຫຍັງຄືເປັນແນວນັ້ນ?

ໃຫ້ຄິດກ່ຽວກັບສິ່ງນີ້ ຂະນະທີ່ທ່ານອ່ານ ໂມໄຊຢາ 12:19–37. ທ່ານຄິດວ່າການຕັ້ງໃຈເພື່ອໃຫ້ເຂົ້າໃຈພຣະຄຳຂອງພຣະເຈົ້າ ໝາຍຄວາມວ່າແນວໃດ? ວະລີ ຫລື ຂໍ້ຄວາມໃດທີ່ດົນໃຈທ່ານໃຫ້ປ່ຽນແປງວິທີທີ່ທ່ານເຂົ້າຫາການຮຽນຮູ້ພຣະກິດຕິຄຸນ?

ໂມໄຊຢາ 13:11–26

ພຣະບັນຍັດຂອງພຣະເຈົ້າຄວນມີຂຽນໄວ້ໃນໃຈຂອງເຮົາ.

ໃຫ້ໄຕ່ຕອງຂໍ້ສັງເກດຂອງອະບີນາໄດທີ່ວ່າ ພຣະບັນຍັດ “ບໍ່ມີຂຽນໄວ້ໃນໃຈ” ຂອງພວກປະໂລຫິດເລີຍ (ໂມໄຊຢາ 13:11). ວະລີນີ້ໝາຍຄວາມວ່າແນວໃດ? ຂະນະທີ່ທ່ານອ່ານ ໂມໄຊຢາ 13:11–26, ໃຫ້ພິຈາລະນາວ່າ ພຣະບັນຍັດເຫລົ່ານີ້ໄດ້ມີຂຽນໄວ້ໃຈຂອງທ່ານຫລືບໍ່.

ເບິ່ງ ເຢເຣມີຢາ 31:31–34; 2 ໂກຣິນໂທ 3:3 ນຳອີກ.

ໂມໄຊຢາ 14–15

ພຣະເຢຊູຄຣິດໄດ້ຮັບທຸກທໍລະມານເພື່ອເຮົາ.

ໃນ ໂມໄຊຢາ 14–15, ໃຫ້ສັງເກດເບິ່ງຖ້ອຍຄຳ ແລະ ວະລີທີ່ບັນຍາຍກ່ຽວກັບພຣະຜູ້ຊ່ວຍໃຫ້ລອດ ແລະ ສິ່ງທີ່ພຣະອົງໄດ້ຮັບທຸກທໍລະມານເພື່ອທ່ານ. ຂໍ້ໃດແດ່ທີ່ຊ່ວຍທ່ານເຮັດໃຫ້ຄວາມຮັກ ແລະ ຄວາມຮູ້ບຸນຄຸນຂອງທ່ານຕໍ່ພຣະອົງ ເລິກເຊິ່ງຫລາຍຂຶ້ນ?

ໂມໄຊຢາ 15:1–12

ພຣະເຢຊູຄຣິດເປັນທັງພຣະບິດາ ແລະ ພຣະບຸດແນວໃດ?

ອະບີນາໄດໄດ້ສິດສອນວ່າ ພຣະເຈົ້າອົງເປັນພຣະບຸດ—ພຣະເຢຊູຄຣິດ—ຈະເປັນພຣະຜູ້ໄຖ່ (ເບິ່ງ ໂມໄຊຢາ 15:1), ຢູ່ໃນເນື້ອໜັງ, ໂດຍເປັນທັງມະນຸດ ແລະ ພຣະເຈົ້າ (ຂໍ້ທີ 2–3). ພຣະອົງໄດ້ຍິນຍອມຕໍ່ພຣະປະສົງຂອງພຣະເຈົ້າອົງເປັນພຣະບິດາທັງໝົດ (ຂໍ້ທີ 5–9). ເພາະສິ່ງນີ້, ພຣະເຢຊູຄຣິດຈຶ່ງໄດ້ເປັນທັງພຣະບຸດຂອງພຣະເຈົ້າ ແລະ ເປັນຕົວແທນໃຫ້ແກ່ພຣະເຈົ້າອົງເປັນພຣະບິດາຢູ່ໃນໂລກ (ເບິ່ງ ໂຢຮັນ 14:6–10).

ພຣະເຢຊູຄຣິດກໍຍັງເປັນພຣະບິດານຳອີກ ໃນຄວາມໝາຍທີ່ວ່າ ເມື່ອເຮົາຮັບເອົາການໄຖ່ຂອງພຣະອົງ, ເຮົາກໍກາຍເປັນ “ລູກຫລານຂອງພຣະອົງ” ແລະ “ທາຍາດຂອງອານາຈັກຂອງພຣະເຈົ້າ” (ໂມໄຊຢາ 15:11–12). ໃນອີກຄຳໜຶ່ງ, ເຮົາໄດ້ເກີດໃໝ່ທາງວິນຍານຜ່ານທາງພຣະອົງ (ເບິ່ງ ໂມໄຊຢາ 5:7).

ເປັນຫຍັງທ່ານຈຶ່ງຮູ້ສຶກວ່າ ມັນສຳຄັນທີ່ຈະຮູ້ຈັກຄວາມຈິງເຫລົ່ານີ້ກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ? ປະຈັກພະຍານຂອງອະບີນາໄດໄດ້ສ້າງຄວາມເຂັ້ມແຂງໃຫ້ແກ່ສັດທາຂອງທ່ານໃນພວກພຣະອົງແນວໃດ?

ແນວຄິດສຳລັບການສິດສອນເດັກນ້ອຍ

ໂມໄຊຢາ 11–13; 17

ເຮົາສາມາດຢືນຢັດເພື່ອພຣະເຢຊູຄຣິດ, ເຖິງແມ່ນວ່າເຮົາຈະຢືນຢູ່ຄົນດຽວກໍຕາມ.

ບາງຄັ້ງໃນຊີວິດຂອງເຮົາ, ເຮົາປະເຊີນກັບຄວາມກົດດັນໃຫ້ເລືອກສິ່ງທີ່ຂັດກັບສັດທາຂອງເຮົາໃນພຣະເຢຊູຄຣິດ. ລູກໆຂອງທ່ານສາມາດຮຽນຮູ້ຫຍັງແດ່ຈາກອະບີນາໄດກ່ຽວກັບການຢືນເປັນພະຍານຂອງພຣະເຢຊູຄຣິດ, ເຖິງແມ່ນວ່າ ມັນຈະບໍ່ເປັນທີ່ນິຍົມກໍຕາມ? ວຽກງານສິລະປະໃນໂຄງຮ່າງນີ້ ຫລື “ບົດທີ 14: ອະບີນາໄດ ແລະ ກະສັດໂນອາ” (ໃນ ເລື່ອງພຣະຄຳພີມໍມອນ, 38–42) ສາມາດຊ່ວຍໃຫ້ພວກເຂົານຶກພາບເລື່ອງລາວໃນ ໂມໄຊຢາ 11–13; 17. ຖາມພວກເຂົາວ່າ ພວກເຂົາມັກຫຍັງກ່ຽວກັບອະບີນາໄດ.
ລູກໆຂອງທ່ານອາດມ່່ວນຊື່ນກັບການສະແດງຕາມເລື່ອງລາວຂອງອະບີນາໄດ. ແລ້ວພວກເຂົາຍັງສາມາດສະແດງຈຳລອງ ເພື່ອຝຶກຊ້ອມສິ່ງທີ່ພວກເຂົາອາດເຮັດ ຖ້າຄົນອື່ນຢາກໃຫ້ພວກເຂົາເຮັດບາງສິ່ງທີ່ຜິດ. ຫລື ພວກເຂົາສາມາດແບ່ງປັນປະສົບການຕອນທີ່ພວກເຂົາກ້າຫານໃນການຕິດຕາມພຣະເຢຊູຄຣິດ. ອະບີນາໄດໄດ້ຕິດຕາມພຣະເຢຊູຄຣິດແນວໃດ? (ເບິ່ງ ໂມໄຊຢາ 13:2–9; 17:7–10). ເປັນຫຍັງກະສັດໂນອາຈຶ່ງບໍ່ເຮັດໃນສິ່ງທີ່ເພິ່ນຄິດວ່າຖືກຕ້ອງ? (ເບິ່ງ ໂມໄຊຢາ 17:11–12).

ໂມໄຊຢາ 12:33–36; 13:11–24

ເຮົາຄວນເຊື່ອຟັງພຣະບັນຍັດສິບຂໍ້.

ພວກປະໂລຫິດຂອງກະສັດໂນອາຮູ້ຈັກພຣະບັນຍັດສິບຂໍ້ ແຕ່ພວກເຂົາພັດບໍ່ມີມັນ “ຂຽນໄວ້ໃນໃຈຂອງ [ພວກເຂົາ]” (ໂມໄຊຢາ 13:11). ທ່ານຈະຊ່ວຍລູກໆຂອງທ່ານໃຫ້ຮູ້ຈັກພຣະບັນຍັດ ແລະ ຮັກມັນແນວໃດ? ບາງເທື່ອພວກເຂົາອາດສາມາດຂຽນພຣະບັນຍັດຈາກ ໂມໄຊຢາ 12:33–36 ແລະ 13:11–24 ໃສ່ໃນເຈ້ຍຮູບຫົວໃຈ. ຂະນະທີ່ພວກເຂົາເຮັດເຊັ່ນນັ້ນ, ໃຫ້ເວົ້າລົມກັບພວກເຂົາກ່ຽວກັບວ່າ ພຣະບັນຍັດເຫລົ່ານີ້ໝາຍເຖິງຫຍັງ ແລະ ຈະຕິດຕາມມັນແນວໃດ. ເຮົາຈະຂຽນພຣະບັນຍັດເຫລົ່ານີ້ໄວ້ໃນໃຈຂອງເຮົາໄດ້ແນວໃດ?
ທ່ານຍັງສາມາດຮ້ອງເພງນຳກັນກ່ຽວກັບພຣະບັນຍັດ, ເຊັ່ນ “ພື້ນໝັ້ນຄົງໜັກໜາ” (ເພງສວດ ແລະ ເພງຂອງເດັກນ້ອຍ, 6). ພອນໃດແດ່ທີ່ມາຈາກການຮັກສາພຣະບັນຍັດ?

ພຣະຄຳພີສິດສອນເຮົາກ່ຽວກັບພຣະບັນຍັດຂອງພຣະເຈົ້າ.

ໂມໄຊຢາ 14; 16:4–9

ພຣະບິດາເທິງສະຫວັນໄດ້ສົ່ງພຣະເຢຊູຄຣິດມາເພື່ອນຳພາເຮົາກັບຄືນໄປຫາພຣະອົງ.

ເຖິງແມ່ນຈະເປັນບົດທີ່ສັ້ນກໍຕາມ, ໂມໄຊຢາ 14 ມີຄຳສັບ ແລະ ວະລີຫລາຍຄຳ ທີ່ບັນຍາຍກ່ຽວກັບພຣະເຢຊູຄຣິດ. ບາງເທື່ອທ່ານ ແລະ ລູກໆຂອງທ່ານ ສາມາດຂຽນເປັນລາຍການອອກມາ ຂະນະທີ່ພວກທ່ານອ່ານບົດນີ້ນຳກັນ. ແລ້ວພວກທ່ານກໍສາມາດເວົ້າລົມນຳກັນກ່ຽວກັບວ່າ ພວກທ່ານຮູ້ສຶກແນວໃດກ່ຽວກັບພຣະຜູ້ຊ່ວຍໃຫ້ລອດ ຂະນະທີ່ພວກທ່ານສຶກສາຄຳສັບ ແລະ ວະລີເຫລົ່ານີ້.
ເພື່ອສິດສອນກ່ຽວກັບພຣະເຢຊູຄຣິດ, ອະບີນາໄດໄດ້ອ້າງເຖິງສາດສະດາເອຊາຢາ, ຜູ້ທີ່ໄດ້ປຽບທຽບເຮົາໃສ່ກັບແກະທີ່ເສຍໄປ. ບາງທີລູກໆຂອງທ່ານສາມາດແບ່ງປັນປະສົບການຕ່າງໆ ຕອນທີ່ພວກເຂົາໄດ້ສູນເສຍບາງຢ່າງ ແລະ ຕອນທີ່ຕົວພວກເຂົາເອງຫລົງທາງ. ພວກເຂົາໄດ້ຮູ້ສຶກແນວໃດ? ພວກເຂົາໄດ້ເຮັດແນວໃດ? ແລ້ວພວກທ່ານສາມາດອ່ານ ໂມໄຊຢາ 14:6 ແລະ 16:4–9 ນຳກັນ. ເຮົາເປັນຄືດັ່ງແກະທີ່ຊັດເຊໄປຈາກພຣະເຈົ້າແນວໃດ? ພຣະເຢຊູຄຣິດໄດ້ຊ່ວຍໃຫ້ເຮົາກັບຄືນມາແນວໃດ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

His Face Shone with Exceeding Luster [ໃບໜ້າຂອງເພິ່ນສົ່ງແສງສະຫວ່າງອອກມາດ້ວຍລັດສະໝີ], ໂດຍ ແຈຣາມີ ວິນບອກ

ຮູບພາບ

ໜ້າກິດຈະກຳ: ເຮົາສາມາດຢືນຢັດເພື່ອພຣະເຢຊູຄຣິດ, ເຖິງແມ່ນວ່າເຮົາຈະຢືນຢູ່ຄົນດຽວກໍຕາມ