“ວັນທີ 22–28 ເດືອນກໍລະກົດ: ‘ປູກພຣະຄຳນີ້ໄວ້ໃນໃຈຂອງພວກທ່ານ.’ ແອວມາ 32–35,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 22–28 ເດືອນກໍລະກົດ. ແອວມາ 32–35,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ເມັດພືດຢູ່ໃນມືຂອງເດັກນ້ອຍ

ວັນທີ 22–28 ເດືອນກໍລະກົດ: “ປູກພຣະຄຳນີ້ໄວ້ໃນໃຈຂອງພວກທ່ານ”

ແອວມາ 32–35

ສຳລັບຊາວໂຊຣຳ, ການອະທິຖານແມ່ນຮ່ວມດ້ວຍການຢືນຢູ່ບ່ອນທີ່ໃຫ້ທຸກຄົນເຫັນ ແລະ ເວົ້າຊ້ຳຄຳເກົ່າທີ່ບໍ່ມີປະໂຫຍດ ແລະ ຄຳທີ່ໃຫ້ຕົວເອງພໍໃຈ. ຊາວໂຊຣຳຂາດສັດທາໃນພຣະເຢຊູຄຣິດ—ແມ່ນແຕ່ປະຕິເສດການເປັນຢູ່ຂອງພຣະອົງ—ແລະ ໄດ້ຂົ່ມເຫັງຄົນຍາກຈົນ (ເບິ່ງ ແອວມາ 31:9–25). ກົງກັນຂ້າມ, ແອວມາ ແລະ ແອມມິວເລັກໄດ້ສິດສອນວ່າ ການອະທິຖານມີສ່ວນກ່ຽວຂ້ອງກັບສິ່ງທີ່ເກີດຂຶ້ນຢູ່ໃນໃຈເຮົາຫລາຍກວ່າການຢືນຢູ່ເທິງເວທີ. ແລະ ຖ້າຫາກເຮົາບໍ່ສະແດງຄວາມເຫັນອົກເຫັນໃຈຕໍ່ຄົນທີ່ຂັດສົນ, ແລ້ວມັນກໍ “ບໍ່ມີປະໂຫຍດ, ແລະ ບໍ່ຊ່ວຍ … ອັນໃດ” (ແອວມາ 34:28). ສິ່ງທີ່ສຳຄັນທີ່ສຸດ, ເຮົາອະທິຖານເພາະວ່າເຮົາມີສັດທາໃນພຣະເຢຊູຄຣິດ, ຜູ້ສະເໜີມອບການໄຖ່ໃຫ້ ຜ່ານທາງ “ການເສຍສະລະອັນບໍ່ມີຂອບເຂດ ແລະ ນິລັນດອນຂອງພຣະອົງ” (ແອວມາ 34:10). ສັດທາດັ່ງກ່າວ, ແອວມາໄດ້ອະທິບາຍ, ເລີ່ມດ້ວຍຄວາມຖ່ອມຕົວ ແລະ “ຄວາມປາດຖະໜາທີ່ຈະເຊື່ອ” (ແອວມາ 32:27). ເມື່ອເວລາຜ່ານໄປ, ດ້ວຍການບຳລຸງລ້ຽງທີ່ສະໝ່ຳສະເໝີ, ພຣະຄຳຂອງພຣະເຈົ້າຈະແຕກຮາກຢູ່ໃນໃຈຂອງເຮົາຈົນມັນກາຍເປັນ “ຕົ້ນທີ່ງອກງາມໄປສູ່ຊີວິດອັນເປັນນິດ” (ແອວມາ 32:41).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ແອວມາ 32:17–43

ເຮົາໃຊ້ສັດທາໃນພຣະເຢຊູຄຣິດ ໂດຍການປູກ ແລະ ບຳລຸງລ້ຽງພຣະຄຳຂອງພຣະອົງ ຢູ່ໃນໃຈເຮົາ.

ຂະນະທີ່ທ່ານອ່ານ ແອວມາ 32:17–43, ໃຫ້ສັງເກດເບິ່ງຖ້ອຍຄຳ ແລະ ວະລີທີ່ຊ່ວຍທ່ານໃຫ້ເຂົ້າໃຈວິທີທີ່ຈະໃຊ້ສັດທາໃນພຣະເຢຊູຄຣິດ. ທ່ານຮຽນຮູ້ຫຍັງແດ່ກ່ຽວກັບສິ່ງທີ່ສັດທາເປັນ ແລະ ບໍ່ໄດ້ເປັນ?

ອີກວິທີໜຶ່ງ ທີ່ຈະສຶກສາ ແອວມາ 32 ແມ່ນທີ່ຈະແຕ້ມຮູບທີ່ເປັນຕົວແທນໃຫ້ແກ່ຂັ້ນຕອນ ຂອງການເຕີບໂຕຂອງເມັດພືດ. ແລ້ວຂຽນປ້າຍໃສ່ຮູບແຕ່ລະໃບ ດ້ວຍຖ້ອຍຄຳຈາກ ແອວມາ 32:28–43 ທີ່ຊ່ວຍທ່ານໃຫ້ເຂົ້າໃຈເຖິງວິທີທີ່ຈະປູກ ແລະ ບຳລຸງລ້ຽງພຣະຄຳຂອງພຣະເຈົ້າຢູ່ໃນໃຈທ່ານ.

ເບິ່ງ Russell M. Nelson, “Christ Is Risen; Faith in Him Will Move Mountains,” Liahona, May 2021, 101–4 ນຳອີກ.

ແອວມາ 32:26–43

ເຮົາສາມາດຮູ້ໄດ້ດ້ວຍຕົວເອງ.

ຕໍ່ຊາວໂຊຣຳຜູ້ທີ່ຍັງບໍ່ແນ່ໃຈກ່ຽວກັບປະຈັກພະຍານຂອງແອວມາເຖິງພຣະຄຣິດ, ແອວມາໄດ້ແນະນຳ “ການທົດລອງ” (ເບິ່ງ ແອວມາ 32:27). ການທົດລອງຮຽກຮ້ອງຄວາມປາດຖະໜາ, ຄວາມຢາກຮູ້ຢາກເຫັນ, ການກະທຳ, ແລະ ສັດທາໜ້ອຍໜຶ່ງ—ແລະ ມັນສາມາດນຳໄປສູ່ການຄົ້ນພົບທີ່ປະເສີດ. ຂໍໃຫ້ຄິດກ່ຽວກັບການທົດລອງທີ່ທ່ານເຄີຍໄດ້ເຫັນ ຫລື ໄດ້ເຂົ້າຮ່ວມມາແລ້ວ. ອີງຕາມ ແອວມາ 32:26–36, ການທົດລອງແບບໃດທີ່ສາມາດນຳໄປສູ່ສັດທາໃນພຣະເຢຊູຄຣິດໄດ້.

ທ່ານເຄີຍ “ທົດລອງ”ພຣະຄຳຂອງພຣະເຈົ້າ ແລະ ມາຮູ້ວ່າ “ພຣະຄຳນີ້ດີ” ແນວໃດ? (ແອວມາ 32:28).

ແອວມາ 33:2–11; 34:17–29

ເຮົາສາມາດນະມັດສະການພຣະເຈົ້າໃນການອະທິຖານ, ໃນທຸກເວລາ ແລະ ໃນທຸກບ່ອນ.

ຄຳແນະນຳຂອງແອວມາ ແລະ ແອມມິວເລັກກ່ຽວກັບການນະມັດສະການ ແລະ ການອະທິຖານ ມີເຈດຕະນາທີ່ຈະແກ້ໄຂຄວາມເຂົ້າໃຈຜິດບາງຢ່າງໃດໜຶ່ງໂດຍສະເພາະ ທີ່ຊາວໂຊຣຳໄດ້ມີ. ໃຫ້ຄິດທີ່ຈະຂຽນລາຍການຄວາມເຂົ້າໃຈຜິດນັ້ນລົງໄວ້ (ເບິ່ງ ແອວມາ 31:13–23). ຢູ່ທາງຂ້າງລາຍການນັ້ນ, ທ່ານສາມາດຂຽນຄວາມຈິງກ່ຽວກັບການອະທິຖານທີ່ທ່ານພົບເຫັນຢູ່ໃນ ແອວມາ 33:2–11 ແລະ 34:17–29 ລົງໄວ້. ສິ່ງທີ່ທ່ານຮຽນຮູ້ຈາກຂໍ້ເຫລົ່ານີ້ ຈະມີຜົນກະທົບຕໍ່ວິທີທີ່ທ່ານອະທິຖານ ແລະ ນະມັດສະການແນວໃດ?

ທ່ານຍັງສາມາດພົບເຫັນຄວາມຮູ້ແຈ້ງຈາກເພງສວດກ່ຽວກັບການອະທິຖານ, ດັ່ງເຊັ່ນ “ອະທິຖານຄອບຄົວ” (ເພງສວດ ແລະ ເພງຂອງເດັກນ້ອຍ, 73) ນຳອີກ.

ແອວມາ 34:9–16

ຮູບພາບ
seminary icon
ເຮົາຕ້ອງການພຣະເຢຊູຄຣິດ ແລະ ການຊົດໃຊ້ຂອງພຣະອົງ.

ໃຫ້ສັງເກດເບິ່ງວ່າ ແອມມິວເລັກໄດ້ໃຊ້ຄຳ ບໍ່ມີຂອບເຂດ ແລະ ນິລັນດອນ ເພື່ອບັນຍາຍການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດແນວໃດໃນ ແອວມາ 34:9–14. ເປັນຫຍັງມັນຈຶ່ງສຳຄັນທີ່ຈະຮູ້ວ່າ ການຊົດໃຊ້ຂອງພຣະຜູ້ຊ່ວຍໃຫ້ລອດແມ່ນບໍ່ມີຂອບເຂດ ແລະ ນິລັນດອນ? ໃຫ້ຊອກຫາຖ້ອຍຄຳ ແລະ ວະລີໃນຂໍ້ເຫລົ່ານີ້ ທີ່ບັນຍາຍເຖິງການຊົດໃຊ້ຂອງພຣະຜູ້ຊ່ວຍໃຫ້ລອດນຳອີກ: ເຮັບເຣີ 10:10; 2 ນີໄຟ 9:21; ໂມໄຊຢາ 3:13.

ແມ່ນແຕ່ເມື່ອເຮົາຮູ້ວ່າອຳນາດຂອງພຣະເຢຊູທີ່ຈະຊ່ວຍໃຫ້ລອດບໍ່ມີຂອບເຂດ ແລະ ນິລັນດອນ, ບາງເທື່ອເຮົາອາດສົງໄສວ່າມັນກ່ຽວກັບເຮົາຢູ່ບໍ—ຫລື ກ່ຽວກັບຄົນໃດຄົນໜຶ່ງຜູ້ທີ່ໄດ້ເຮັດບາບຕໍ່ເຮົາ. ແອວເດີ ເດວິດ ເອ ແບ໊ດນາ ຄັ້ງໜຶ່ງໄດ້ກ່າວເຖິງຜູ້ຄົນທີ່ “ເບິ່ງຄືວ່າມີສັດທາໃນພຣະຜູ້ຊ່ວຍໃຫ້ລອດ, ແຕ່ເຂົາເຈົ້າບໍ່ເຊື່ອວ່າພອນທີ່ພຣະອົງໄດ້ສັນຍາໄວ້ນັ້ນມີໄວ້ໃຫ້ເຂົາເຈົ້າ” (“If Ye Had Known Me,” Liahona, Nov. 2016, 104). ແມ່ນຫຍັງອາດກີດກັນເຮົາຈາກການໄດ້ຮັບອຳນາດຂອງພຣະຜູ້ຊ່ວຍໃຫ້ລອດ? ໄຕ່ຕອງວິທີທີ່ທ່ານສາມາດຮູ້ວ່າ ການຊົດໃຊ້ຂອງພຣະເຢຊູຄຣິດແມ່ນບໍ່ມີຂອບເຂດ ແລະ ນິລັນດອນແນວໃດ.

ເພື່ອໄຕ່ຕອງວ່າທ່ານຕ້ອງການການຊົດໃຊ້ຂອງພຣະຜູ້ຊ່ວຍໃຫ້ລອດຫລາຍປານໃດ, ມັນອາດເປັນປະໂຫຍດທີ່ຈະຄິດເຖິງບາງສິ່ງທີ່ທ່ານຕ້ອງການທຸກໆມື້. ໃຫ້ຖາມຕົວເອງວ່າ, “ຊີວິດຂອງເຮົາຈະເປັນແບບໃດຖ້າປາດສະຈາກສິ່ງນີ້?” ແລ້ວ, ຂະນະທີ່ທ່ານສຶກສາ ແອວມາ 34:9–16, ໃຫ້ໄຕ່ຕອງວ່າຊີວິດຂອງທ່ານຈະເປັນແບບໃດຖ້າປາດສະຈາກພຣະເຢຊູຄຣິດ. ທ່ານສາມາດຊອກຫາຄວາມຮູ້ແຈ້ງຢ່າງອື່ນຢູ່ໃນ 2 ນີໄຟ 9:7–9. ທ່ານຈະສະຫລຸບ ແອວມາ 34:9–10 ໃນປະໂຫຍກດຽວແນວໃດ?

ເບິ່ງ Michael John U. Teh, “Our Personal Savior,” Liahona, May 2021, 99–101; Gospel Topics,“Atonement of Jesus Christ,” ຫ້ອງສະໝຸດພຣະກິດຕິຄຸນ; “Reclaimed” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ແອວມາ 34:30–41

“ບັດນີ້ຄືເວລາ ແລະ ວັນແຫ່ງຄວາມລອດຂອງພວກທ່ານ.”

ໃຫ້ວາດພາບເຫັນວ່າ ທ່ານຢາກເຂົ້າຮ່ວມການແລ່ນໄລຍະຍາວ ຫລື ການສະແດງດົນຕີ. ຈະມີຫຍັງເກີດຂຶ້ນ ຖ້າຫາກທ່ານໄດ້ລໍຖ້າຈົນເຖິງວັນຂອງກິດຈະກຳກ່ອນຈະກະກຽມ? ຕົວຢ່າງນີ້ກ່ຽວພັນກັບການເຕືອນຂອງແອມມິວເລັກ ທີ່ຢູ່ໃນ ແອວມາ 34:32–35 ແນວໃດ? ແມ່ນຫຍັງຄືອັນຕະລາຍຂອງການລັ່ງເລຄວາມພະຍາຍາມຂອງເຮົາທີ່ຈະກັບໃຈ ແລະ ປ່ຽນແປງ?

ຂໍ້ທີ 31 ຍັງມີຂ່າວສານນຳອີກສຳລັບຜູ້ຄົນທີ່ອາດເປັນຫ່ວງວ່າເຂົາເຈົ້າໄດ້ລັ່ງເລດົນເກີນໄປແລ້ວ ແລະ ວ່າມັນສາຍເກີນໄປທີ່ຈະກັບໃຈ. ທ່ານຄິດວ່າແມ່ນຫຍັງຄືຂ່າວສານນັ້ນ?

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ແອວມາ 32:1–16

ພຣະຜູ້ເປັນເຈົ້າສາມາດສິດສອນເຮົາເມື່ອເຮົາເລືອກທີ່ຈະຖ່ອມຕົວ.

ແອວມາ ແລະ ແອມມິວເລັກໄດ້ປະສົບຜົນສຳເລັດໃນການສິດສອນຊາວໂຊຣຳຜູ້ທີ່ຖ່ອມຕົວ. ການຖ່ອມຕົວໝາຍຄວາມວ່າແນວໃດ? ຊ່ວຍໃຫ້ລູກໆຂອງທ່ານຊອກຫານິຍາມຂອງຄຳວ່າ ຖ່ອມຕົວ ຢູ່ໃນ ຄູ່ມືພຣະຄຳພີ. ມີຮ່ອງຮອຍອື່ນໃດແດ່ກ່ຽວກັບຄວາມໝາຍຂອງຄຳສັບເຫລົ່ານີ້ທີ່ເຮົາສາມາດພົບເຫັນຢູ່ໃນ ແອວມາ 32:13–16? ເຊື້ອເຊີນລູກໆຂອງທ່ານໃຫ້ປະກອບປະໂຫຍກໃຫ້ສົມບູນ ດັ່ງເຊັ່ນ “ເຮົາຖ່ອມຕົວເມື່ອເຮົາ .”

ແອວມາ 32:28–43

ປະຈັກພະຍານຂອງເຮົາເຖິງພຣະເຢຊູຄຣິດເຕີບໂຕຂະນະທີ່ເຮົາບຳລຸງລ້ຽງມັນ.

ເມັດພືດ, ຕົ້ນໄມ້, ແລະ ໝາກໄມ້ເປັນວັດຖຸທີ່ຄຸ້ນເຄີຍທີ່ສາມາດຊ່ວຍເດັກນ້ອຍໃຫ້ເຂົ້າໃຈຫລັກທຳທີ່ເປັນແນວຄິດດັ່ງເຊັ່ນ ສັດທາ ແລະ ປະຈັກພະຍານ. ໃຫ້ລູກໆຂອງທ່ານຈັບເມັດພືດໃນຂະນະທີ່ທ່ານອ່ານ ແອວມາ 32:28. ແລ້ວທ່ານສາມາດຂໍໃຫ້ພວກເຂົາຊ່ວຍທ່ານຄິດຫາວິທີທີ່ວ່າ ການປູກຝັງປະຈັກພະຍານເຖິງພຣະເຢຊູຄຣິດກໍຄືກັນກັບການປູກ ແລະ ການບຳລຸງລ້ຽງເມັດພືດ (ເບິ່ງ “ບົດທີ 29: ແອວມາສິດສອນກ່ຽວກັບສັດທາ ແລະ ພຣະຄຳຂອງພຣະເຈົ້າ,” ເລື່ອງພຣະຄຳພີມໍມອນ, 81). ບາງທີທ່ານສາມາດປູກເມັດພືດຂອງທ່ານ ແລະ ເວົ້າລົມກັນກ່ຽວກັບສິ່ງທີ່ຕ້ອງການເພື່ອຊ່ວຍໃຫ້ເມັດພືດ—ຫລື ປະຈັກພະຍານຂອງທ່ານ—ເຕີບໂຕ.
ຮູບພາບຕົ້ນໄມ້ກໍມີຢູ່ໃນໂຄງຮ່າງນີ້; ທ່ານສາມາດໃຊ້ມັນເພື່ອສະແດງເຖິງຖ້ອຍຄຳຂອງແອວມາ ຢູ່ໃນ ແອວມາ 32:28–43. ຫລື ທ່ານສາມາດໄປຍ່າງຫລິ້ນ ແລະ ຊອກຫາຕົ້ນໄມ້ທີ່ຢູ່ໃນຂັ້ນຕອນການເຕີບໂຕທີ່ແຕກຕ່າງກັນ ແລະ ອ່ານຂໍ້ພຣະຄຳພີຈາກ ແອວມາ 32 ທີ່ປຽບທຽບການເຕີບໂຕຂອງຕົ້ນໄມ້ກັບສັດທາຂອງເຮົາ. ຫລື ບາງທີລູກໆຂອງທ່ານສາມາດແຕ້ມຮູບຕົ້ນໄມ້ຢູ່ເທິງກະດານ ແລະ ຕື່ມໃບໄມ້ ຫລື ໝາກໄມ້ໃສ່ ທຸກໆເທື່ອທີ່ພວກເຂົາຄິດເຖິງສິ່ງໃດສິ່ງໜຶ່ງທີ່ພວກເຂົາສາມາດເຮັດເພື່ອຊ່ວຍໃຫ້ປະຈັກພະຍານຂອງພວກເຂົາເຖິງພຣະເຢຊູຄຣິດເຕີບໂຕ.
ທ່ານສາມາດປ່ອຍໃຫ້ລູກໆຂອງທ່ານແຍ່ເມັດພືດ (ເປັນຕົວແທນໃຫ້ແກ່ພຣະຄຳຂອງພຣະເຈົ້າ) ເຂົ້າໄປໃນຫີນ (ເປັນຕົວແທນໃຫ້ແກ່ຫົວໃຈທີ່ທະນົງ) ແລະ ເຂົ້າໄປໃນດິນທີ່ນຸ້ມນວນ (ເປັນຕົວແທນໃຫ້ແກ່ຫົວໃຈທີ່ຖ່ອມ). ອ່ານ ແອວມາ 32:27–28 ນຳກັນ. ເວົ້າລົມກ່ຽວກັບການ “ໃຫ້ບ່ອນ” (ຂໍ້ທີ 27) ສຳລັບພຣະຄຳຂອງພຣະເຈົ້າໄວ້ໃນໃຈຂອງເຮົາ ໝາຍຄວາມວ່າແນວໃດ.

ແຕ້ມຮູບ. ບາງຄົນຮຽນຮູ້ໄດ້ດີກວ່າເມື່ອເຂົາເຈົ້າແຕ້ມຮູບຂອງສິ່ງທີ່ເຂົາເຈົ້າກຳລັງຮຽນຮູ້ຢູ່. ລູກໆຂອງທ່ານອາດມ່ວນຊື່ນກັບການແຕ້ມຮູບ ກ່ຽວກັບເມັດພືດເຕີບໂຕເປັນຕົ້ນໄມ້ ຂະນະທີ່ພວກເຂົາສຶກສາ ແອວມາ 32.

ແອວມາ 33:2–11; 34:17–27

ເຮົາສາມາດອະທິຖານຫາພຣະບິດາເທິງສະຫວັນເວລາໃດກໍໄດ້, ກ່ຽວກັບສິ່ງໃດໆກໍຕາມ.

ຊ່ວຍລູກໆຂອງທ່ານຊອກຫາວະລີທີ່ບັນຍາຍສະຖານທີ່ ທີ່ເຮົາສາມາດອະທິຖານ (ໃນ ແອວມາ 33:4–11) ແລະ ສິ່ງທີ່ເຮົາສາມາດອະທິຖານກ່ຽວກັບ (ໃນ ແອວມາ 34:17–27). ບາງທີພວກເຂົາສາມາດແຕ້ມຮູບຕົວເອງອະທິຖານຢູ່ໃນສະຖານທີ່ເຫລົ່ານີ້. ແບ່ງປັນປະສົບການນຳກັນເມື່ອພຣະບິດາເທິງສະຫວັນໄດ້ຍິນຄຳອະທິຖານຂອງທ່ານ. ພວກທ່ານກໍສາມາດຮ້ອງເພງກ່ຽວກັບການອະທິຖານນຳອີກ, ດັ່ງເຊັ່ນ “ອະທິຖານຄອບຄົວ” (ເພງສວດ ແລະ ເພງຂອງເດັກນ້ອຍ, 73).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

“ເພາະຄວາມພາກພຽນຂອງພວກທ່ານ ແລະ ສັດທາຂອງພວກທ່ານ ແລະ ດ້ວຍຄວາມອົດທົນຂອງພວກທ່ານໃນການບຳລຸງລ້ຽງພຣະຄຳ, … ຈົ່ງເບິ່ງ, ໃນບໍ່ຊ້ານີ້ພວກທ່ານຈະເກັບໝາກຂອງມັນໄດ້ ຊຶ່ງມີຄ່າທີ່ສຸດ” (ແອວມາ 32:42).

ຮູບພາບ

ໜ້າກິດຈະກຳ: ເຮົາສາມາດມີສັດທາໃນພຣະເຢຊູຄຣິດ