“ວັນທີ 8–14 ເດືອນກໍລະກົດ: ‘ພວກເຂົາ “ບໍ່ເຄີຍຕົກໄປ.’’’ ແອວມາ 23–29,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 8–14 ເດືອນກໍລະກົດ. ແອວມາ 23–29,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
Anti–Nephi–Lehies Bury Their Weapons of War [ຊາວອານໄທ–ນີໄຟ–ລີໄຮຝັງອາວຸດແຫ່ງສົງຄາມຂອງພວກເຂົາ], ໂດຍ ໂຈດີ ລີບວິງສະຕັນ
ວັນທີ 8–14 ເດືອນກໍລະກົດ: ພວກເຂົາ “ບໍ່ເຄີຍຕົກໄປ”
ແອວມາ 23–29
ບາງເທື່ອທ່ານກໍເຄີຍສົງໄສຢູ່ບໍວ່າ ຜູ້ຄົນສາມາດປ່ຽນແປງແທ້ໆ? ບາງທີທ່ານເປັນຫ່ວງກ່ຽວກັບວ່າທ່ານສາມາດເອົາຊະນະການເລືອກທີ່ບໍ່ດີ ທີ່ໄດ້ເຮັດໄປ ຫລື ນິໄສທີ່ບໍ່ດີທີ່ທ່ານໄດ້ພັດທະນາຫລືບໍ່, ຫລື ທ່ານອາດມີຄວາມເປັນຫ່ວງທີ່ຄ້າຍຄືກັນນັ້ນກ່ຽວກັບຄົນທີ່ທ່ານຮັກ. ຖ້າເປັນແນວນັ້ນ, ເລື່ອງເລົ່າກ່ຽວກັບຊາວອານໄທ–ນີໄຟ–ລີໄຮ ສາມາດຊ່ວຍທ່ານໄດ້. ຜູ້ຄົນເຫລົ່ານີ້ໄດ້ສາບານທີ່ຈະເປັນສັດຕູຂອງຊາວນີໄຟ. ເມື່ອພວກລູກຊາຍຂອງໂມໄຊຢາໄດ້ຕັດສິນໃຈໄປສັ່ງສອນພຣະກິດຕິຄຸນໃຫ້ແກ່ພວກເຂົາ, ຊາວນີໄຟ “ກໍຫົວເຍາະເຍີ້ຍ [ພວກເຂົາ].” ການຂ້າຊາວເລມັນເບິ່ງຄືເປັນສິ່ງທີ່ໜ້າເຊື່ອຖື ຫລາຍກວ່າທີ່ຈະໃຫ້ພວກເຂົາປ່ຽນໃຈເຫລື້ອມໃສ. (ເບິ່ງ ແອວມາ 26:23–25.)
ແຕ່ຊາວເລມັນໄດ້ປ່ຽນແປງ—ຜ່ານທາງອຳນາດແຫ່ງການປ່ຽນໃຈເຫລື້ອມໃສຂອງພຣະເຢຊູຄຣິດ. ຄັ້ງໜຶ່ງພວກເຂົາເຄີຍເປັນທີ່ຮູ້ຈັກກັນວ່າ “ຄົນແຂງກະດ້າງ ແລະ ປ່າເຖື່ອນ” (ແອວມາ 17:14), ແຕ່ພວກເຂົາໄດ້ກັບກາຍເປັນຄົນ “ດີເດັ່ນຂຶ້ນ ຍ້ອນວ່າຄວາມກະຕືລືລົ້ນຂອງພວກເຂົາທີ່ມີຕໍ່ພຣະເຈົ້າ” (ແອວມາ 27:27). ຕາມຈິງແລ້ວ, ພວກເຂົາ “ບໍ່ເຄີຍຕົກໄປ” (ແອວມາ 23:6).
ບາງທີທ່ານອາດມີຄວາມຄິດ ຫລື ການກະທຳທີ່ຈະຕ້ອງປ່ຽນ ຫລື ມີ “ອາວຸດແຫ່ງການກະບົດ” ທີ່ຈະວາງລົງ (ແອວມາ 23:7). ຫລື ບາງທີທ່ານພຽງແຕ່ຕ້ອງມີຄວາມອຸທິດຕົນຫລາຍຂຶ້ນຕໍ່ພຣະເຈົ້າ. ບໍ່ວ່າທ່ານຕ້ອງປ່ຽນແປງສິ່ງໃດກໍຕາມ, ແອວມາ 23–29 ສາມາດໃຫ້ຄວາມຫວັງແກ່ທ່ານ ຊຶ່ງຜ່ານທາງການຊົດໃຊ້ຂອງພຣະເຢຊູຄຣິດ, ການປ່ຽນແປງອັນຍາວນານສາມາດເປັນໄປໄດ້.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
![]()
ຮູບພາບseminary icon
ຊາວເລມັນເບິ່ງຄືວ່າຄົງຈະບໍ່ປ່ຽນໃຈເຫລື້ອມໃສ, ແຕ່ພວກເຂົາຫລາຍຄົນໄດ້ປະສົບກັບການປ່ຽນແປງທີ່ໜ້າອັດສະຈັນໃຈ ຍ້ອນພຣະເຢຊູຄຣິດ. ຊາວເລມັນທີ່ປ່ຽນໃຈເຫລື້ອມໃສເຫລົ່ານີ້ເອີ້ນຕົນເອງວ່າ ອານໄທ-ນີໄຟ-ລີໄຮ.
ການອ່ານ ແອວມາ 23–25; 27 ອາດກະຕຸ້ນທ່ານໃຫ້ໄຕ່ຕອງການປ່ຽນໃຈເຫລື້ອມໃສຂອງທ່ານເອງ. ຊອກຫາວິທີທີ່ຊາວອານໄທ-ນີໄຟ-ລີໄຮໄດ້ປ່ຽນແປງ—ວິທີທີ່ພວກເຂົາໄດ້ປ່ຽນໃຈເຫລື້ອມໃສ “ໃນພຣະຜູ້ເປັນເຈົ້າ” ແນວໃດ (ແອວມາ 23:6). ຂໍ້ດັ່ງຕໍ່ໄປນີ້ ສາມາດຊ່ວຍທ່ານເລີ່ມຕົ້ນ:
ໃນທາງໃດແດ່ທີ່ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງໄດ້ປ່ຽນແປງທ່ານ? ທ່ານເຄີຍຮູ້ສຶກໃກ້ຊິດກັບພຣະອົງເມື່ອໃດ? ທ່ານຈະສາມາດບອກໄດ້ແນວໃດວ່າທ່ານໄດ້ປ່ຽນໃຈເຫລື້ອມໃສຕໍ່ພຣະເຢຊູຄຣິດ? ພຣະວິນຍານກຳລັງກະຕຸ້ນທ່ານໃຫ້ເຮັດຫຍັງຕໍ່ໄປ?
ເບິ່ງ David A. Bednar, “Converted unto the Lord,” Liahona, Nov. 2012, 106–9; Dale G. Renlund, “Unwavering Commitment to Jesus Christ,” Liahona, Nov. 2019, 22–25; Gospel Topics: “Become like Jesus Christ,” ຫ້ອງສະໝຸດພຣະກິດຕິຄຸນ ນຳອີກ.
ຍ້ອນພຣະເຈົ້າມີຄວາມເມດຕາ, ພຣະອົງຈຶ່ງໄດ້ໃຫ້ອະໄພເຮົາເມື່ອເຮົາກັບໃຈ.
ການປ່ຽນແປງທີ່ຊາວອານໄທ–ນີໄຟ–ລີໄຮໄດ້ປະສົບແມ່ນເກີນກວ່າການພຽງແຕ່ປ່ຽນແປງພຶດຕິກຳຂອງພວກເຂົາເທົ່ານັ້ນ—ມັນເປັນການປ່ຽນໃຈທີ່ເກີດຈາກສັດທາໃນພຣະເຢຊູຄຣິດ ແລະ ການກັບໃຈຢ່າງຈິງໃຈ. ບາງທີທ່ານສາມາດຊອກຫາຄວາມຈິງກ່ຽວກັບການກັບໃຈໃນແຕ່ລະຂໍ້ ໃນ ແອວມາ 24:7–19. ຂໍ້ເຫລົ່ານີ້ສິດສອນຫຍັງແດ່ກ່ຽວກັບຄວາມເມດຕາຂອງພຣະເຈົ້າຕໍ່ຜູ້ທີ່ກັບໃຈ? ມີຄວາມຈິງເພີ່ມເຕີມຢ່າງໃດແດ່ທີ່ທ່ານຮຽນຮູ້ຈາກ ແອວມາ 26:17–22?
ໄຕ່ຕອງວ່າພຣະເຈົ້າໄດ້ສະແດງຄວາມເມດຕາຂອງພຣະອົງໃນຊີວິດຂອງທ່ານແນວໃດ. ທ່ານຈະສາມາດສະແດງຄວາມກະຕັນຍູຂອງທ່ານຕໍ່ພຣະອົງໄດ້ແນວໃດ?
ການແບ່ງປັນພຣະກິດຕິຄຸນນຳຄວາມຊື່ນຊົມມາໃຫ້ເຮົາ.
ຄຳວ່າ ຊື່ນຊົມ ປະກົດ 24 ເທື່ອໃນ ແອວມາ 23–29, ເຮັດໃຫ້ບົດເຫລົ່ານີ້ເປັນບ່ອນທີ່ດີໃນການຮຽນຮູ້ວິທີທີ່ຈະມີຄວາມຊື່ນຊົມໃນການດຳລົງຊີວິດ—ແລະ ໃນການແບ່ງປັນ—ພຣະກິດຕິຄຸນຂອງພຣະຜູ້ຊ່ວຍໃຫ້ລອດ. ໃຫ້ຄິດທີ່ຈະສຶກສາ ແອວມາ 26:12–22, 35–37; ແລະ 29:1–17, ຊອກຫາເຫດຜົນວ່າ ເປັນຫຍັງອຳໂມນ, ພວກລູກຊາຍຂອງໂມໄຊຢາ, ແລະ ແອວມາຈຶ່ງປິຕິຍິນດີ. ທ່ານຮຽນຮູ້ຫຍັງແດ່ຈາກຂໍ້ພຣະຄຳພີເຫລົ່ານີ້ ທີ່ສາມາດນຳພາໄປສູ່ຄວາມຊື່ນຊົມຫລາຍຂຶ້ນໃນຊີວິດຂອງທ່ານ?
ແອວເດີ ມາກັສ ບີ ແນຊ໌ ໄດ້ສິດສອນວ່າ: “ການແບ່ງປັນພຣະກິດຕິຄຸນສ່ອງແສງຄວາມຊື່ນຊົມ ແລະ ຄວາມຫວັງເຂົ້າໄປໃນຈິດວິນຍານຂອງທັງຜູ້ໃຫ້ ແລະ ຜູ້ຮັບ. ການແບ່ງປັນພຣະກິດຕິຄຸນຄືຄວາມຊື່ນຊົມເພີ່ມຕື່ມໃສ່ຄວາມຊື່ນຊົມ, ຄວາມຫວັງເພີ່ມຕື່ມໃສ່ຄວາມຫວັງ” (“Hold Up Your Light,” Liahona, Nov. 2021, 71). ທ່ານເຄີຍມີປະສົບການໃດແດ່ໃນການແບ່ງປັນພຣະກິດຕິຄຸນກັບຄົນອື່ນ? ທ່ານເຄີຍປະເຊີນກັບການທ້າທາຍໃດແດ່ເມື່ອທ່ານສະແຫວງຫາທີ່ຈະແບ່ງປັນພຣະກິດຕິຄຸນ? ພຣະບິດາເທິງສະຫວັນສາມາດຊ່ວຍທ່ານເອົາຊະນະການທ້າທາຍເຫລົ່ານີ້ແນວໃດ?
ສຳລັບຄຳແນະນຳຂອງສາດສະດາກ່ຽວກັບ ວິທີ ແບ່ງປັນພຣະກິດຕິຄຸນ—ແລະ ພົບຄວາມຊື່ນຊົມໃນການແບ່ງປັນ—ໃຫ້ຄິດທີ່ຈະສຶກສາຂ່າວສານຂອງປະທານດາລິນ ເອັຈ ໂອກສ໌ “Sharing the Restored Gospel,” (Liahona, Nov. 2016, 57–60). ເຮົາພົບເຫັນຄຳແນະນຳແນວໃດແດ່ ໃນຂ່າວສານຂອງເພິ່ນ?
ເບິ່ງ “The Bush Family Story,” “Sharing Your Beliefs,” “Sharing the Gospel” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ໃຫ້ຄິດທີ່ຈະຂຽນລາຍຊື່ຂອງສິ່ງທີ່ທ່ານຈະແບ່ງປັນກັບເພື່ອນຄົນໜຶ່ງຂອງທ່ານກ່ຽວກັບພຣະຄຳພີມໍມອນ. ໃຫ້ພະຍາຍາມແບ່ງປັນພຣະຄຳພີມໍມອນໂດຍການໃຊ້ ແອັບພຣະຄຳພີມໍມອນ.
ຊອກຫາແບບແຜນ ແລະ ຫົວຂໍ້. ເມື່ອສຶກສາພຣະຄຳພີ, ເຮົາສາມາດພົບຄວາມຈິງອັນລ້ຳຄ່າໄດ້ ໂດຍການຊອກຫາຄຳ, ວະດີ, ຫລື ແນວຄິດຊ້ຳໆ. ແນວຄິດຊ້ຳໆເຫລົ່ານັ້ນສາມາດອ້າງອີງ ຫລື ເຊື່ອມໂຍງໃນພຣະຄຳພີຂອງທ່ານ ເພື່ອໃຫ້ເບິ່ງງ່າຍຂຶ້ນ.
ເຮົາສາມາດພົບບ່ອນຫລົບໄພໃນພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ.
ໃນລະດູເກັບກ່ຽວ, ເຂົ້າມັກຈະຖືກຮວບຮວມໄວ້ເປັນມັດໆ ເອີ້ນວ່າ ຟ່ອນເຂົ້າ ແລະ ຖືກເກັບໄວ້ຢູ່ໃນສາງ, ບາງເທື່ອເອີ້ນວ່າ ເລົ້າ. ໃນ ແອວມາ 26:5–7 ໃຫ້ໄຕ່ຕອງກ່ຽວກັບຟ່ອນເຂົ້າ, ເລົ້າ, ແລະ ພະຍຸວ່າອາດເປັນຕົວແທນໃຫ້ກັບສິ່ງໃດໃນຊີວິດຂອງທ່ານ. ທ່ານຈະພົບບ່ອນຫລົບໄພໃນພຣະເຢຊູຄຣິດໄດ້ແນວໃດ?
ເບິ່ງ Russell M. Nelson, “The Temple and Your Spiritual Foundation,” Liahona, Nov. 2021, 93–96; David A. Bednar, “Honorably Hold a Name and a Standing,” Liahona, May 2009, 97–100; “ພຣະຜູ້ຊ່ວຍດ້ວຍຄວາມຖ່ອມ,” ເພງສວດ ແລະ ເພງຂອງເດັກນ້ອຍ, 28.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະຜູ້ເປັນເຈົ້າອວຍພອນເຮົາຂະນະທີ່ເຮົາພະຍາຍາມຮັກສາຄຳສັນຍາຂອງເຮົາກັບພຣະອົງ.
-
ບາງທີລູກໆຂອງທ່ານອາດຊື່ນຊົມກັບການຝັງ “ອາວຸດ” ຂອງພວກເຂົາ ຄືກັນກັບຊາວອານໄທ-ນີໄຟ-ລີໄຮ. ທ່ານສາມາດອ່ານສອງສາມຂໍ້ຈາກ ແອວມາ 24:6–24 ເພື່ອສິດສອນລູກໆກ່ຽວກັບຄຳສັນຍາທີ່ຊາວອານໄທ-ນີໄຟ-ລີໄຮໄດ້ເຮັດເພື່ອຕິດຕາມພຣະຜູ້ຊ່ວຍໃຫ້ລອດ. ແລ້ວພວກເຂົາສາມາດຄິດຫາບາງສິ່ງທີ່ພວກເຂົາຈະປ່ຽນແປງ ເພື່ອຕິດຕາມພຣະອົງ, ຂຽນມັນລົງໃນໜ້າກິດຈະກຳຂອງອາທິດນີ້, ແລະ ທຳທ່າຂຸດຂຸມ ແລະ ຝັງອາວຸດຂອງພວກເຂົາ.
-
ລູກໆຂອງທ່ານສາມາດອ່ານ ແອວມາ 24:15–19, ເພື່ອຊອກຫາສິ່ງທີ່ຊາວອານໄທ-ນີໄຟ-ລີໄຮໄດ້ເຮັດເພື່ອ “ເປັນປະຈັກພະຍານຕໍ່ພຣະເຈົ້າ.” ແລ້ວທ່ານສາມາດເວົ້າລົມກັບພວກເຂົາກ່ຽວກັບວິທີທີ່ພັນທະສັນຍາຂອງເຮົາສາມາດ “ເປັນປະຈັກພະຍານຕໍ່ພຣະເຈົ້າ” ແນວໃດ (ຂໍ້ທີ 18). ປ່ອຍໃຫ້ລູກໆຂອງທ່ານເວົ້າກ່ຽວກັບວິທີທີ່ພວກເຂົາຈະສະແດງຕໍ່ພຣະເຈົ້າວ່າ ພວກເຂົາຕ້ອງການທີ່ຈະຕິດຕາມພຣະອົງແນວໃດ. ການຮ້ອງເພງເຊັ່ນ “ໂອ້ພຣະບິດາຜູ້ນິລັນ” (ເພງສວດ ແລະ ເພງຂອງເດັກນ້ອຍ, 18) ສາມາດຊ່ວຍດົນໃຈພວກເຂົາໄດ້.
ແອວມາ 24:7–10; 26:23–34; 27:27–30
ເຮົາສາມາດກັບໃຈ.
-
ເພື່ອຊ່ວຍໃຫ້ລູກໆຂອງທ່ານເຫັນວິທີທີ່ພຣະເຢຊູຄຣິດສາມາດຊ່ວຍເຮົາໃຫ້ປ່ຽນແປງເມື່ອເຮົາກັບໃຈ, ທ່ານສາມາດສິດສອນພວກເຂົາກ່ຽວກັບຊາວອານໄທ-ນີໄຟ-ລີໄຮ. ໃນການເຮັດສິ່ງນີ້, ທ່ານສາມາດເຮັດປ້າຍໝາຍຖ້ວຍສອງໃບ “ກ່ອນ” ແລະ “ຫລັງຈາກ.” ແລ້ວລູກໆຂອງທ່ານສາມາດອ່ານ ແອວມາ 17:14–15 ແລະ 27:27–30, ຂຽນສິ່ງທີ່ຊາວເລມັນເປັນຄົນແບບໃດ ກ່ອນ ແລະ ຫລັງຈາກການກັບໃຈ, ແລະ ເອົາມັນໃສ່ໄວ້ໃນຖ້ວຍໃບທີ່ຖືກຕ້ອງ. ອີງຕາມ ແອວມາ 24:7–10, ແມ່ນຫຍັງທີ່ຊ່ວຍພວກເຂົາໃຫ້ປ່ຽນແປງ? ເຮົາຈະສາມາດສະແດງຄວາມຂອບພຣະຄຸນຂອງເຮົາຕໍ່ພຣະເຈົ້າສຳລັບຄວາມເມດຕາຂອງພຣະອົງໄດ້ແນວໃດ?
ພຣະເຢຊູຄຣິດນຳຄວາມຊື່ນຊົມມາໃຫ້ເຮົາ, ແລະ ເຮົາສາມາດແບ່ງປັນຄວາມຊື່ນຊົມນີ້.
-
ບາງທີທ່ານ ແລະ ລູກໆຂອງທ່ານອາດຊື່ນຊົມກັບການແຕ້ມຮູບຕ່າງໆໃນພຣະກິດຕິຄຸນຂອງພຣະເຢຊູຄຣິດ ທີ່ນຳຄວາມຊື່ນຊົມມາໃຫ້ພວກທ່ານ. ເອົາຮູບທີ່ທ່ານແຕ້ມໃຫ້ລູກໆຂອງທ່ານເບິ່ງ, ແລະ ຊຸກຍູ້ພວກເຂົາໃຫ້ເຮັດເຊັ່ນດຽວກັນ ເພື່ອຄົນອື່ນຈະຊື່ນຊົມດ້ວຍ.
-
ຊ່ວຍລູກໆຂອງທ່ານຊອກຫາຄຳວ່າ ຊື່ນຊົມ ແລະ ປິຕິຍິນດີ ໃນ ແອວມາ 26 ແລະ 29. ແມ່ນຫຍັງທີ່ນຳຄວາມຊື່ນຊົມມາໃຫ້ອຳໂມນ ແລະ ແອວມາ ຫລື ເຮັດໃຫ້ພວກເພິ່ນປິຕິຍິນດີ? ຄຳຖາມນີ້ສາມາດນຳໄປສູ່ການສົນທະນາກ່ຽວກັບຄວາມຊື່ນຊົມທີ່ມາຈາກການດຳລົງຊີວິດຕາມ ຫລື ການແບ່ງປັນພຣະກິດຕິຄຸນຂອງພຣະເຢຊູຄຣິດ.
ເຮົາສາມາດຊ່ວຍໝູ່ເພື່ອນຂອງເຮົາໃຫ້ດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ.
-
ລູກໆຂອງທ່ານສາມາດອ່ານ ແອວມາ 27:22–23, ເພື່ອຊອກຫາສິ່ງທີ່ຊາວນີໄຟໄດ້ເຮັດ ເພື່ອຊ່ວຍເຫລືອຊາວອານໄທ-ນີໄຟ-ລີໄຮ ໃຫ້ຮັກສາຄຳສັນຍາຂອງພວກເຂົາ ທີ່ຈະບໍ່ຕໍ່ສູ້ອີກ. ເຮົາຈະສາມາດຊ່ວຍໃຫ້ໝູ່ເພື່ອນຂອງເຮົາຮັກສາຄຳສັນຍາຂອງເຂົາເຈົ້າໄດ້ແນວໃດ? ລູກໆຂອງທ່ານສາມາດຫລິ້ນລະຄອນກ້ອມກ່ຽວກັບສະຖານະການໄດ້. ຍົກຕົວຢ່າງ, ເຮົາສາມາດເວົ້າຫຍັງກັບໝູ່ ຜູ້ທີ່ຢາກເວົ້າຕົວະ ຫລື ປະພຶດຫຍາບຄາຍ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
ຮູບພາບຊາວອານໄທ–ນີໄຟ–ລີໄຮກຳລັງຝັງອາວຸດຂອງພວກເຂົາ, ໂດຍ ແດນ ເບີ