“ວັນທີ 1–7 ເດືອນກໍລະກົດ: ‘ເຮົາຈະເຮັດໃຫ້ພວກເຈົ້າເປັນເຄື່ອງມື.’ ແອວມາ 17–22,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 1–7 ເດືອນກໍລະກົດ. ແອວມາ 17–22,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ອຳໂມນກຳລັງເວົ້າກັບກະສັດລາໂມໄນ

Ammon and King Lamoni [ອຳໂມນ ແລະ ກະສັດລາໂມໄນ], ໂດຍ ສະກາດ ເອັມ ສະໂນ

ວັນທີ 1–7 ເດືອນກໍລະກົດ: “ເຮົາຈະເຮັດໃຫ້ພວກເຈົ້າເປັນເຄື່ອງມື”

ແອວມາ 17–22

ໃຫ້ຄິດເຖິງເຫດຜົນທັງໝົດຂອງຜູ້ຄົນ ທີ່ບໍ່ສາມາດແບ່ງປັນພຣະກິດຕິຄຸນ: “ຂ້ອຍບໍ່ຮູ້ຈັກພຽງພໍ” ຫລື “ຂ້ອຍບໍ່ແນ່ໃຈວ່າ ເຂົາເຈົ້າຊິສົນໃຈ” ຫລື ບາງເທື່ອ “ຂ້ອຍຢ້ານຖືກປະຕິເສດ.” ບາງທີທ່ານພົບເຫັນຕົວເອງວ່າ ກໍຄິດຄ້າຍຄືກັນນີ້ ໃນບາງຄັ້ງ. ຊາວນີໄຟໄດ້ມີເຫດຜົນອື່ນອີກ ທີ່ບໍ່ສາມາດແບ່ງປັນພຣະກິດຕິຄຸນໃຫ້ກັບຊາວເລມັນ: ພວກເຂົາເປັນ “ຄົນປ່າ ແລະ ແຂງກະດ້າງ ແລະ ປ່າເຖື່ອນ; ເປັນຜູ້ຄົນທີ່ເບີກບານໃນການຄາດຕະກຳຊາວນີໄຟ” (ແອວມາ 17:14; ເບິ່ງ ແອວມາ 26:23–25 ນຳອີກ). ແຕ່ພວກລູກຊາຍຂອງໂມໄຊຢາມີເຫດຜົນທີ່ໜັກແໜ້ນກວ່ານັ້ນ ວ່າເປັນຫຍັງເຂົາເຈົ້າຈຶ່ງຮູ້ສຶກວ່າ ເຂົາເຈົ້າ ຕ້ອງ ແບ່ງປັນພຣະກິດຕິຄຸນໃຫ້ກັບຊາວເລມັນ: “ພວກເຂົາປາດຖະໜາທີ່ຈະປະກາດຄວາມລອດໃຫ້ແກ່ມະນຸດທຸກຄົນ, ເພາະວ່າພວກເຂົາທົນບໍ່ໄດ້ທີ່ຈິດວິນຍານຂອງຜູ້ໜຶ່ງຈະຕ້ອງຕາຍ” (ໂມໄຊຢາ 28:3). ຄວາມຮັກນີ້ ທີ່ດົນໃຈອຳໂມນ ແລະ ອ້າຍນ້ອງຂອງເພິ່ນ ກໍສາມາດດົນໃຈທ່ານເພື່ອໃຫ້ແບ່ງປັນພຣະກິດຕິຄຸນໃຫ້ກັບຄອບຄົວຂອງທ່ານ, ໝູ່ເພື່ອນ, ແລະ ຄົນທີ່ທ່ານຮູ້ຈັກນຳອີກ—ແມ່ນແຕ່ໃຫ້ກັບຄົນທີ່ອາດເບິ່ງຄືວ່າ ຈະບໍ່ຮັບເອົາ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ແອວມາ 17:1–4

ການກະທຳທີ່ລຽບງ່າຍ ແລະ ສະໝໍ່າສະເໝີຂອງການອຸທິດຕົນຕໍ່ພຣະຄຣິດ ຊ່ວຍໃຫ້ເຮົາໄດ້ຮັບອຳນາດຂອງພຣະອົງ.

ທ່ານຮຽນຮູ້ຫຍັງແດ່ຈາກ ແອວມາ 17:1–4 ກ່ຽວກັບວິທີຮັກສາປະຈັກພະຍານ ແລະ ຄວາມມຸ່ງໝັ້ນຂອງທ່ານຕໍ່ພຣະເຢຊູຄຣິດໃຫ້ເຂັ້ມແຂງ? ພວກລູກຊາຍຂອງໂມໄຊຢາໄດ້ເຮັດຫຍັງ, ແລະ ພຣະຜູ້ເປັນເຈົ້າໄດ້ອວຍພອນເຂົາເຈົ້າແນວໃດ?

ຂະນະທີ່ທ່ານອ່ານກ່ຽວກັບປະສົບການຂອງພວກລູກຊາຍຂອງໂມໄຊຢາໃນ ແອວມາ 17–22, ໃຫ້ສັງເກດເບິ່ງວິທີທີ່ການກຽມພ້ອມທາງວິນຍານຂອງເຂົາເຈົ້າ ມີຜົນກະທົບຕໍ່ການຮັບໃຊ້ຂອງເຂົາເຈົ້າໃນທ່າມກາງຊາວເລມັນແນວໃດ (ຍົກຕົວຢ່າງ, ເບິ່ງ ແອວມາ 18:10–18, 34–36; 20:2–5; 22:12–16). ທ່ານຮູ້ສຶກໄດ້ຮັບການດົນໃຈໃຫ້ເຮັດຕາມແບບຢ່າງຂອງເຂົາເຈົ້າແນວໃດ?

ແອວມາ 17:6–12; 19:16–36

ຮູບພາບ
ໄອຄອນຫ້ອງຮຽນສາດສະໜາ
ເຮົາສາມາດເປັນເຄື່ອງມືໃນພຣະຫັດຂອງພຣະເຈົ້າໄດ້.

ເລື່ອງລາວຂອງການປ່ຽນໃຈເຫລື້ອມໃສ ທີ່ເຮົາໄດ້ອ່ານຢູ່ໃນພຣະຄຳພີ ມັກຈະເປັນທີ່ໜ້າປະທັບໃຈ, ແຕ່ຈຸດສຳຄັນທີ່ສຸດຂອງເລື່ອງເຫລົ່ານັ້ນ ເຮົາມັກຈະພົບເຫັນບຸກຄົນທີ່ມີຄວາມກ້າຫານ ທີ່ຈະເວົ້າ ແລະ ແບ່ງປັນສັດທາຂອງເຂົາເຈົ້າໃນພຣະເຢຊູຄຣິດ. ໃຫ້ຄິດກ່ຽວກັບສິ່ງນີ້ ຂະນະທີ່ທ່ານອ່ານກ່ຽວກັບນາງເອບິດ ແລະ ພວກລູກຊາຍຂອງໂມໄຊຢາໃນອາທິດນີ້.

ທ່ານຄິດວ່າ ການເປັນເຄື່ອງມືໃນພຣະຫັດຂອງພຣະເຈົ້ານັ້ນ ໝາຍຄວາມວ່າແນວໃດ? ມັນອາດຊ່ວຍໄດ້ທີ່ຈະຄິດເຖິງເຄື່ອງມືທີ່ທ່ານອາດໃຊ້ໃນຊີວິດປະຈຳວັນຂອງທ່ານ. ໃນ ແອວມາ 17:6–12, ໃຫ້ຊອກຫາສິ່ງທີ່ພວກລູກຊາຍຂອງໂມໄຊຢາໄດ້ເຮັດ ເພື່ອວ່າເຂົາເຈົ້າຈະສາມາດເປັນເຄື່ອງມືໃນພຣະຫັດຂອງພຣະເຈົ້າໄດ້. ທ່ານຈະສາມາດກາຍເປັນເຄື່ອງມືທີ່ມີປະສິດທິພາບຫລາຍຂຶ້ນ ໃນການຊ່ວຍເຫລືອຄົນອື່ນໃຫ້ມາຫາພຣະຄຣິດໄດ້ແນວໃດ?

ແມ່ນຫຍັງທີ່ປະທັບໃຈທ່ານກ່ຽວກັບນາງເອບິດໃນ ແອວມາ 19:16–36? ທ່ານຮຽນຮູ້ຫຍັງແດ່ຈາກນາງ ກ່ຽວກັບການຊ່ວຍເຫລືອຄົນອື່ນໃຫ້ສ້າງສັດທາໃນພຣະຄຣິດ? ຍົກຕົວຢ່າງ, ທ່ານຮູ້ສຶກວ່າສິ່ງໃດຈະຊ່ວຍໃຫ້ຄົນທີ່ທ່ານຮັກ “ເຊື່ອຖືໃນອຳນາດຂອງພຣະເຈົ້າ”? (ແອວມາ 19:17).

ທ່ານຍັງອາດປຽບທຽບປະສົບການຂອງນາງເອບິດກັບຫລັກທຳທີ່ ແອວເດີ ດີເດີ ແອັຟ ອຸກດອບ ໄດ້ສິດສອນນຳອີກໃນ “Missionary Work: Sharing What Is in Your Heart” (Liahona, May 2019, 15–18). ນາງເອບິດໄດ້ເປັນຕົວຢ່າງຂອງ “ຄຳແນະນຳທີ່ລຽບງ່າຍຫ້າຢ່າງ” ຂອງ ແອວເດີ ອຸກດອບ ແນວໃດ? ລອງຂຽນບາງສິ່ງທີ່ທ່ານອາດເວົ້າກ່ຽວກັບພຣະເຢຊູຄຣິດລົງ. ຍົກຕົວຢ່າງ, “ສຳລັບຂ້ອຍ, ພຣະເຢຊູຄຣິດ …” ຫລື “ພຣະຜູ້ຊ່ວຍໃຫ້ລອດຊ່ວຍຂ້ອຍ …”

ເບິ່ງ Gospel Topics, “Ministering as the Savior Does,” ຫ້ອງສະໝຸດພຣະກິດຕິຄຸນ; “ພຣະບິດາ ໂປດຟັງເຮົາວອນ,” ເພງສວດ ແລະ ເພງຂອງເດັກນ້ອຍ, 23; “Come and See,” “Come and Help,” “Come and Belong” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ໃຊ້ບົດຮຽນທີ່ໃຊ້ສິ່ງຂອງ. ທຸກເທື່ອທີ່ຜູ້ຄົນສາມາດເຫັນ ຫລື ສຳຜັດກັບບາງຢ່າງທີ່ກ່ຽວຂ້ອງກັບສິ່ງທີ່ພວກເຂົາກຳລັງຮຽນຮູ້ຢູ່ນັ້ນ, ພວກເຂົາມັກຈະຈົດຈຳສິ່ງນັ້ນໄດ້ດົນກວ່າ. ຍົກຕົວຢ່າງ, ຖ້າທ່ານກຳລັງສິດສອນກ່ຽວກັບ ແອວມາ 17:11, ໃຫ້ພິຈາລະນາເອົາເຄື່ອງດົນຕີ ຫລື ເຄື່ອງມືສຳລັບການຂຽນໃຫ້ເຂົາເຈົ້າເບິ່ງ ເພື່ອຊ່ວຍດົນໃຈການສົນທະນາກ່ຽວກັບການເປັນເຄື່ອງມືໃນພຣະຫັດຂອງພຣະເຈົ້າ.

ແອວມາ 17–19

ເມື່ອເຮົາສະແດງຄວາມຮັກຕໍ່ຄົນອື່ນ, ເຮົາກໍສາມາດຊ່ວຍພວກເຂົາໃຫ້ຮັບພຣະກິດຕິຄຸນຂອງພຣະເຢຊູຄຣິດ.

ຊອກຫາຂໍ້ພຣະຄຳພີໃນ ແອວມາ 17–19 ທີ່ສະແດງວ່າ ຄວາມຮັກຂອງອຳໂມນຕໍ່ຊາວເລມັນ ໄດ້ດົນໃຈຄວາມພະຍາຍາມຂອງເພິ່ນໃນການແບ່ງປັນພຣະກິດຕິຄຸນຂອງພຣະເຢຊູຄຣິດໄດ້ແນວໃດ. ມີຄວາມຈິງອື່ນໃດອີກແດ່ກ່ຽວກັບການແບ່ງປັນພຣະກິດຕິຄຸນ ທີ່ທ່ານຮຽນຮູ້ຈາກຕົວຢ່າງຂອງເພິ່ນ?

ເບິ່ງ “Ammon Serves and Teaches King Lamoni” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ມິເນີວາ ໄທເກີດ (1888–1976), Ammon Saves the King’s Flocks [ອຳໂມນປົກປ້ອງຝູງສັດຂອງກະສັດ], 1949–1951, ສີນ້ຳມັນເທິງແຜ່ນໄມ້ອັດ, 35 15/16 × 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ, 1969.

ແອວມາ 19:36

ພຣະຜູ້ເປັນເຈົ້າຈະຊ່ວຍເຮົາໃຫ້ກັບໃຈ.

ຫລັງຈາກໄດ້ເລົ່າເລື່ອງການປ່ຽນໃຈເຫລື້ອມໃສຂອງລາໂມໄນ ແລະ ຜູ້ຄົນຂອງເພິ່ນແລ້ວ, ມໍມອນໄດ້ສະຫລຸບເລື່ອງລາວດ້ວຍຂໍ້ສັງເກດກ່ຽວກັບພຣະເຢຊູຄຣິດ. ແອວມາ 19:36 ສິດສອນທ່ານຫຍັງແດ່ກ່ຽວກັບລັກສະນະຂອງພຣະຜູ້ເປັນເຈົ້າ? ເລື່ອງລາວໃນ ແອວມາ 19:16–36 ສິດສອນທ່ານຫຍັງອີກແດ່ກ່ຽວກັບພຣະອົງ? ເມື່ອໃດທີ່ທ່ານເຄີຍຮູ້ສຶກວ່າພຣະຜູ້ເປັນເຈົ້າໄດ້ເດ່ພຣະຫັດອອກມາຫາທ່ານ?

ແອວມາ 20:23; 22:15–18

ການຮູ້ຈັກພຣະເຈົ້າມີຄ່າແກ່ການເສຍສະລະໃດໆ.

ປຽບທຽບສິ່ງທີ່ບິດາຂອງລາໂມໄນເຕັມໃຈທີ່ຈະປະຖິ້ມ ເພື່ອຮັກສາຊີວິດຂອງເພິ່ນ (ເບິ່ງ ແອວມາ 20:23) ກັບສິ່ງທີ່ເພິ່ນເຕັມໃຈທີ່ຈະປະຖິ້ມຫລັງຈາກນັ້ນ ເພື່ອທີ່ຈະຮັບຄວາມຊື່ນຊົມຂອງພຣະກິດຕິຄຸນ ແລະ ຮູ້ຈັກພຣະເຈົ້າ (ເບິ່ງ ແອວມາ 22:15, 18). ໃຫ້ໄຕ່ຕອງສິ່ງທີ່ທ່ານເຕັມໃຈທີ່ຈະເສຍສະລະ ເພື່ອທີ່ຈະຮູ້ຈັກພຣະເຈົ້າຢ່າງຄົບຖ້ວນຫລາຍຍິ່ງຂຶ້ນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ແອວມາ 17:2–3

ປະຈັກພະຍານຂອງເຮົາກ່ຽວກັບພຣະເຢຊູຄຣິດ ເຕີບໃຫຍ່ຂຶ້ນເມື່ອເຮົາອ່ານພຣະຄຳພີ, ອະທິຖານ, ແລະ ຖືສິນອົດເຂົ້າ.

ຕົວຢ່າງຂອງພວກລູກຊາຍຂອງໂມໄຊຢາ ສາມາດຊ່ວຍໃຫ້ລູກໆຂອງທ່ານສ້າງປະຈັກພະຍານຂອງພວກເຂົາກ່ຽວກັບພຣະເຢຊູຄຣິດໄດ້ແນວໃດ? ທ່ານສາມາດຊ່ວຍລູກໆຂອງທ່ານຊອກຫາສິ່ງທີ່ພວກລູກຊາຍຂອງໂມໄຊຢາໄດ້ເຮັດ ເພື່ອສ້າງຄວາມເຂັ້ມແຂງທາງວິນຍານຂອງພວກເຂົາໃນ ແອວມາ 17:2–3. ຫລັງຈາກນັ້ນ ພວກເຂົາສາມາດແຕ້ມຮູບ ຫລື ຊອກຫາວັດຖຸທີ່ເປັນຕົວແທນເຖິງສິ່ງເຫລົ່ານີ້. ຊ່ວຍພວກເຂົາວາງແຜນສິ່ງທີ່ພວກເຂົາຈະເຮັດ ເພື່ອເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງພວກເຂົາກ່ຽວກັບພຣະຜູ້ຊ່ວຍໃຫ້ລອດ.

ແອວມາ 17–19

ເຮົາສາມາດແບ່ງປັນພຣະກິດຕິຄຸນຂອງພຣະເຢຊູຄຣິດກັບຄົນອື່ນໄດ້.

ເພື່ອຮຽນຮູ້ກ່ຽວກັບການເປັນເຄື່ອງມືໃນພຣະຫັດຂອງພຣະເຈົ້າ, ດັ່ງທີ່ພວກລູກຊາຍຂອງໂມໄຊຢາໄດ້ເປັນ, ທ່ານ ແລະ ລູກໆຂອງທ່ານສາມາດເບິ່ງເຄື່ອງມືຊະນິດໃດໜຶ່ງ ແລະ ເວົ້າກ່ຽວກັບວ່າ ມັນໃຊ້ໄວ້ເຮັດຫຍັງ. ແລ້ວທ່ານສາມາດອ່ານ ແອວມາ 17:11 ແລະ ເວົ້າກ່ຽວກັບວ່າ ການເປັນເຄື່ອງມືຂອງພຣະບິດາເທິງສະຫວັນ ເພື່ອຊ່ວຍໃຫ້ຜູ້ຄົນຮຽນຮູ້ກ່ຽວກັບພຣະເຢຊູຄຣິດນັ້ນ ໝາຍຄວາມວ່າແນວໃດ.
ໜ້າກິດຈະກຳຂອງອາທິດນີ້ ມີຮູບທີ່ເປັນຕົວແທນເຖິງຄວາມຈິງທີ່ອຳໂມນໄດ້ສິດສອນກະສັດລາໂມໄນ. ທ່ານສາມາດຊ່ວຍລູກໆຂອງທ່ານຊອກຫາຄວາມຈິງເຫລົ່ານີ້ໃນ ແອວມາ 18:24–40. ລູກໆຂອງທ່ານສາມາດທຳທ່າເປັນຜູ້ສອນສາດສະໜາ ແລະ ແບ່ງປັນສິ່ງທີ່ພວກເຂົາຮູ້ຈັກກ່ຽວກັບຄວາມຈິງເຫລົ່ານີ້.
ຫລັງຈາກທີ່ທ່ານອ່ານກ່ຽວກັບນາງເອບິດກັບລູກໆຂອງທ່ານແລ້ວ (ເບິ່ງ ແອວມາ 19:16–20, 28–29), ພວກເຂົາສາມາດທຳທ່າເປັນຄືດັ່ງນາງເອບິດ ໂດຍການແລ່ນຢູ່ບ່ອນເກົ່າ, ເຄາະປະຕູ, ແລະ ບອກເລົ່າກ່ຽວກັບສິ່ງທີ່ເກີດຂຶ້ນໃນ ແອວມາ 19:1–17. ເຮົາຈະສາມາດເປັນຄືດັ່ງນາງເອບິດ ແລະ ແບ່ງປັນສິ່ງທີ່ເຮົາຮູ້ກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງໄດ້ແນວໃດ? ລູກໆຂອງທ່ານສາມາດແຕ້ມຮູບຕົນເອງກຳລັງແບ່ງປັນພຣະກິດຕິຄຸນກັບໃຜບາງຄົນ ຫລື ຮ້ອງເພງນຳກັນກ່ຽວກັບການແບ່ງປັນພຣະກິດຕິຄຸນ, ດັ່ງເຊັ່ນ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50).

ແອວມາ 17:21–25; 20:8–27; 22:1–3

ເຮົາສາມາດຊ່ວຍຄົນອື່ນໃຫ້ມາຫາພຣະຄຣິດໄດ້ ໂດຍການສະແດງຄວາມຮັກຂອງເຮົາຕໍ່ພວກເຂົາ.

ຕອນທຳອິດ, ທັງກະສັດລາໂມໄນ ແລະ ບິດາຂອງເພິ່ນ ມີໃຈທີ່ແຂງກະດ້າງຕໍ່ພຣະກິດຕິຄຸນ. ຕໍ່ມາ, ໃຈຂອງພວກເພິ່ນກໍອ່ອນລົງ, ພວກເພິ່ນໄດ້ເຊື່ອໃນພຣະເຢຊູຄຣິດ. ສິ່ງນີ້ເກີດຂຶ້ນໄດ້ແນວໃດ? ຊ່ວຍລູກໆຂອງທ່ານຄົ້ນຫາຄຳຕອບໃຫ້ກັບຄຳຖາມນີ້ ຂະນະທີ່ທ່ານທົບທວນປະສົບການຂອງອຳໂມນກັບພວກເຂົາ. ພວກເຂົາສາມາດສະແດງ “ບົດທີ 23: ອຳໂມນ: ຂ້າໃຊ້ຜູ້ຍິ່ງໃຫຍ່” ແລະ “ບົດທີ 24: ອຳໂມນພົບກັບບິດາຂອງກະສັດລາໂມໄນ” (ເລື່ອງພຣະຄຳພີມໍມອນ, 64–68, 69–70). ຫລື ບາງທີລູກໆຂອງທ່ານອາດຢາກແຕ້ມຮູບຂອງພາກສ່ວນທີ່ແຕກຕ່າງກັນຂອງເລື່ອງລາວນັ້ນ ແລະ ໃຊ້ຮູບເຫລົ່ານັ້ນເພື່ອເລົ່າເລື່ອງ. ອຳໂມນໄດ້ເຮັດຫຍັງເພື່ອຊ່ວຍໃຫ້ລາໂມໄນ ແລະ ບິດາຂອງເພິ່ນເປີດໃຈຂອງພວກເພິ່ນຕໍ່ພຣະກິດຕິຄຸນຂອງພຣະເຢຊູຄຣິດ? (ເບິ່ງ ແອວມາ 17:21–25; 20:8–27; 22:1–3).
ບາງທີທ່ານ ແລະ ລູກໆຂອງທ່ານສາມາດຄິດເຖິງຄົນໃດຄົນໜຶ່ງທີ່ຢາກຮູ້ຈັກກ່ຽວກັບພຣະເຢຊູຄຣິດ. ຊ່ວຍພວກເຂົາໃຫ້ຄິດເຖິງວິທີທີ່ພວກເຂົາສາມາດເປັນຕົວຢ່າງທີ່ດີ ແລະ ສະແດງຄວາມຮັກຕໍ່ຄົນໆນັ້ນ, ເໝືອນດັ່ງທີ່ອຳໂມນໄດ້ເຮັດກັບລາໂມໄນ ແລະ ບິດາຂອງເພິ່ນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບພາບ

ໜ້າກິດຈະກຳ: ເຮົາສາມາດແບ່ງປັນພຣະກິດຕິຄຸນກັບຄົນອື່ນໄດ້