Na uunaia e le tamā o Nifae, o Helamana, ona atalii ia “manatua, ia manatua.” Sa manao o ia ia latou manatua o latou tuaa, manatua upu a perofeta, ma le mea aupito taua, ia manatua lo “tatou Togiola, o le o Keriso lea” (tagai Helamana 5:5–14). E manino sa manatua e Nifae, aua o le savali lava foi lea sa ia folafola atu i tausaga mulimuli ane “ma le le faavaivai” i tagata (Helamana 10:4). “Pe ua mafai faapefea ona outou faagaloina lo outou Atua?” na ia fesili atu ai (Helamana 7:20). O taumafaiga uma lava a Nifae—o le talai atu, tatalo, faia o vavega, ma le talosaga atu i le Atua mo se oge—o taumafaiga e fesoasoani ai i tagata ia liliu atu i le Atua ma manatua o Ia. I le tele o itu, o le faagaloina o le Atua o se faafitauli e sili atu nai lo le le iloaina o Ia. Ma e faigofie ona faagalo o Ia pe a faalavelaveina o tatou mafaufau e “mea le aoga a lenei lalolagi” ma faapuaoaina e agasala (Helamana 7:21; tagai foi Helamana 12:2). Peitai, e pei ona faaalia i le auaunaga a Nifae, e le o tuai tele ona manatua ma liliu mai … i le Alii lo outou Atua” (Helamana 7:17).
E faaali e perofeta le finagalo o le Atua i tagata.
O leHelamana 7–11 o se nofoaga lelei faapitoa e aoao ai e uiga i mea e faia e perofeta. A o e faitau i nei mataupu, ia ua’i atu i faatinoga, mafaufauga, ma fegalegaleaiga a Nifae ma le Alii. E faapefea ona fesoasoani le auaunaga a Nifae e te malamalama ai i le matafaioi a perofeta? O nisi nei o faataitaiga. O a isi mea ua e maua?
Helamana 7:17–22: E alaga e Perofeta le salamo ma lapatai atu i taunuuga o le agasala.
E faavae i mea ua e faitauina, e faapefea ona e faamatalaina po o le a le perofeta ma mea na te faia? Mafaufau e tusi se faauigaga puupuu. Ona vaai lea po o le a se mea o le a e faaopoopo atu i lau faauigaga pe a uma ona faitauina le faamatalaga mo “Perofeta” i le O le Taiala i Tusitusiga Paia (Gospel Library) po o le “Mulimuli i le Perofeta Soifua” (Aoaoga a Peresitene o le Ekalesia: Ezra Taft Benson [2014], 147–55).
Na e matauina le lototoa o Nifae i le Helamana 7:11–29? Aisea e te lagona ai e tatau i perofeta ona saunoa atu ma le lototoa i nisi taimi e pei ona sa faia e Nifae? Mafaufau e vaavaai mo tali i le vaega ua faaulutalaina “Aua Ne’i Ofo” i le savali a Elder Neil L. Andersen “O Le Perofeta a le Atua” (Liahona, Me 2018, 26).
Faatasi ai ma nei upumoni i le mafaufau, mafaufau loloto pe na faapefea ona faamanuiaina oe e le Alii e ala i le auaunaga a Ana perofeta. O le a se mea na Ia aoaoina ai oe talu ai nei e ala mai i lo tatou perofeta soifua? O le a lau mea o fai e faalogo ai ma mulimuli i le taitaiga a le Alii?
Tagai foi Autu o le Talalelei, “Perofeta,” Gospel Library.
O lou faatuatua ia Iesu Keriso e tatau ona fausia i luga o mea e sili atu nai lo faailoga ma vavega.
Ana faapea ua lava faailoga ma vavega e suia ai le loto o se tagata, semanu e liliu uma lava sa Nifae i faailoga mataina sa tuuina atu e Nifae i le Helamana 9. Ae sa lei tupu lena mea. Matau auala eseese na tali atu ai tagata i le vavega i le Helamana 9–10. Mo se faataitaiga, e mafai ona e faatusatusaina tali a alii e toalima ma faamasino sili i le Helamana 9:1–20 (tagai foi Helamana 9:39–41; 10:12–15). O le a se mea ua e aoao mai i nei aafiaga e uiga i le ala e atinae ai lou faatuatua ia Iesu Keriso?
E tuuina atu e le Alii le mana ia i latou o e sailia Lona finagalo ma tauivi e tausi Ana poloaiga.
A o e suesueina le Helamana 10:1–12, matau le mea na faia e Nifae ina ia maua ai le faatuatuaga a le Alii. Na faapefea ona faaalia e Nifae sa ia sailia le finagalo o le Alii nai lo lona lava loto? O le a se mea ua musuia oe e le aafiaga o Nifae e fai?
O le mafaufau loloto i le afioga a le Atua e valaaulia ai faaaliga.
Pe a e lagona le solipalaina, atuatuvale, po o le le mautonu, atonu e te aoao mai se lesona taua mai le faataitaiga a Nifae i le Helamana 10:2–4. O le a le mea na ia faia ina ua ia lagonaina le “faanoanoa tele”? (fuaiupu e 3).
Sa faamalamalama mai e Peresitene Henry B. Eyring, “A tatou manatunatu loloto, ua tatou valaaulia faaaliga e ala i le Agaga” (“Auauna Atu ma le Agaga,” Liahona, Nov. 2010, 60). E ono mafai faapefea ona e fatuina se masani o le mafaufau loloto?
E faapefea ona e manatua faamatalaga taua—e pei o le aso fanau o se tagata o le aiga po o faamatalaga mo se suega? E faapefea ona tutusa lenei mea ma le taumafaiga e manaomia ia “manatua le Alii”? (Helamana 12:5). E faapefea ona eseese?
O leHelamana 12 loo faamatala mai ai ni mea se tele e mafua ai ona galo i tagata le Alii. Atonu e mafai ona e lisiina i latou ma mafaufau loloto pe e mafai ona latou faalavelaveina oe mai ia te Ia. O le a se mea e fesoasoani ia te oe e manatua ai Iesu Keriso? O a ni mea ua musuia oe e fai e faavae i mea ua e aoaoina?
Faaaoga lesona faatino. E masani ona faamatala e le Faaola ia mataupu faavae o le talalelei i mea o aso uma sa masani ai tagata. Pe a aoao mai pe aoao atu e uiga i le Helamana 12:1–6, e mafai ona e faatusatusaina “le le maumaututu … o tagata” i le ala tatou te lagona ai le taumafai e [tu] faapaleni i le vae e tasi. E mafai faapefea ona tatou mautu faaleagaga?
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
Ina ia amata se talanoaga e uiga i le manatuaina o le Alii, e mafai ona e ta’u atu i lau fanau e uiga i se taimi na galo ai ia te oe se mea. Tuu atu ia i latou e faasoa mai ni o latou lava aafiaga faapena. Ona faitau faatasi lea o le Helamana 7:20--21 ma fesili i tamaiti pe o le a le uiga o le faagaloina o le Atua. Atonu e mafai e lau fanau ona tusi ni ata o mea e ono mafua ai ona galo ia i tatou le Alii ma faaaoga a latou ata e ufiufi ai se ata o Iesu. Ona mafai lea ona latou mafaufau i mea e mafai ona latou faia e manatua ai o Ia. A o latou fefaasoaai o latou manatu, e mafai ona latou aveese ata taitasi seia oo ina faaalia le ata o le Faaola.
Fesoasoani i lau fanau e suesue le Helamana 8:13–23 e sue ai igoa o perofeta o e na aoao mai e uiga ia Iesu Keriso. Atonu e mafai ona latou pasi faasolo se ata o Iesu i taimi taitasi latou te maua ai se ata. O le a se mea na aoao mai e lo tatou perofeta soifua e uiga i le Faaola?
E mafai ona usu faatasi se pese e faatatau i perofeta, e pei o le “Mulimuli i le Perofeta” (Tusipese a Tamaiti, 58). Atonu e mafai e oe ma lau fanau ona filifili se fasi fuaitau autu mai le pese, ma tusi se upu se tasi mai le fasi fuaitau i luga o ni tulagavae pepa. Ona mafai lea ona e faataatia tulagavae i luga o le fola e tau atu i se ata o le Faaola, ma e mafai e lau fanau ona mulimuli i tulagavae agai i le ata. Na faapefea e le mulimuli i le perofeta ona taitai atu i tatou ia Iesu Keriso?
O le mafaufau loloto i afioga a le Atua e valaaulia ai faaaliga.
Ina ia fesoasoani i lau fanau ia malamalama i le uiga o le mafaufau loloto, e mafai ona outou faitau faatasi le “MafaufauLoloto” i le O le Taiala i Tusitusiga Paia (Potutusi o le Talalelei). O a nisi upu e talitutusa ma le mafaufau loloto? Atonu e mafai ona outou faitauina faatasi le Helamana 10:1–3 ma sui le upu mafaufau loloto i isi na upu. Talanoa ma lau fanau e uiga i auala e faia ai le mafaufau loloto o se vaega o a latou suesuega o tusitusiga paia.
Sa usitai Nifae i le Tama Faalelagi e tusa lava pe o lona uiga o le faia o se mea faigata. Mo se faataitaiga o lenei mea, e mafai e oe ma lau fanau ona faitau le Helamana 10:2, 11–12. Atonu e mafai e lau fanau ona faatino le mea na fai e Nifae—savavali agai i le isi itu o le potu (pei o latou o atu i le fale), taofi, liliu, ma savavali agai i le isi itu o le potu (pei o latou toe foi atu e aoao tagata). O a ni nai mea e finagalo le Tama Faalelagi tatou te faia?
Mo nisi manatu, tagai i le lomiga o lenei masina o le mekasini o le Uo .
Ata
Ua maua Seanetuma o le fasioti tagata
E ala i le meaalofa o valoaga, na maua ai e Nifae le fasiotiga o le faamasino sili.