I nisi o itu, o se taimi fiafia lea i le avea ma se tagata e talitonu ia Iesu Keriso. Sa faataunuuina valoaga—o faaaliga ma vavega maoae i tagata na faaalia ai o le a le toe mamao ae fanau mai le Faaola. I se isi itu, sa o se taimi atuatuvale foi mo tagata talitonu ona, e ui lava i vavega uma, sa faafinau lava tagata le talitonu e faapea, “ua mavae le taimi” mo le fanau mai o le Faaola (3 Nifae 1:5). O nei tagata na faatupuina “se faanunununu tele i le laueleele atoa” (3 Nifae 1:7) ma faatu foi se aso e fasioti ai tagata uma e talitonu pe afai e le faaalia mai le faailoga na valoia e Samuelu le sa Lamana—o se po e leai se pogisa.
I nei taimi faigata, o le perofeta o Nifae na “tagi faatauanau i lona Atua mo ona tagata” (3 Nifae 1:11). O le tali a le Alii e musuia i soo se tasi o feagai ma sauaga po o masalosaloga ma manaomia ona iloa, o le malamalama o le a faatoilaloina le pogisa: “Ina ea ia lou ulu ma ia olioli; … o le a ou faataunuuina mea uma ia sa ou poloaiina ia fetalai atu e fofoga o au perofeta paia” (3 Nifae 1:13).
O le liua i le talalelei a Iesu Keriso e manaomia ai le onosai ma taumafaiga.
Ua faamatala mai e le3 Nifae 1-7 tagata na liua i le Alii ma isi e lei liua. O le a le mea na faia ai le eseesega i le va o nei vaega? E mafai ona fesoasoani se siata e pei o lea e te faatulagaina ai ou manatu:
Fai fesili patino a o e suesue. Mo se faataitaiga, a o faamaeaina lenei siata, e mafai ona e fai atu fesili e pei o le “O le a le lesona mo au iinei?” O lenei mea o le a aumaia ai musumusuga mai le Agaga Paia.
E silafia e lou Tama Faalelagi o lou olaga o le a aofia ai taimi e faigata, e oo lava i le taufaafefe. Ae e finagalo o Ia ia e mauaina le olioli. Faitau le 3 Nifae 1:1–23 e aoao ai e uiga i mafuaaga na fefefe ai sa Nifae faamaoni. O le a le mafuaaga na tuuina mai e le Alii ia i latou “ia olioli”?
Sa faaaoga e le Faaola le fasifuaitau “ia olioli” i ni nai taimi—mo se faataitaiga, i le Mataio 14:24–27; Ioane 16:33; Mataupu Faavae ma Feagaiga 61:36; 78:17–19. O le a se mea ua faagaeetia ai oe e uiga i nei valaaulia? E mafai ona e faitau i fuaiupu o loo siomia ai ina ia malamalama ai i tulaga na fetalai mai ai le Faaola i nei upu. I tulaga taitasi, o a mafuaaga na Ia tuuina mai e fesoasoani ai i tagata e fetaiai ma o latou popolega? Na faapefea ona Ia faia lea mea mo oe?
Mafaufau e suesue le lauga a Peresitene Russell M. Nelson “Olioli ma le Ola ai Faaleagaga” (Liahona, Nov. 2016, 81–84). O le a se mea ua aoao mai e Peresitene Nelson ia te oe e uiga i le mauaina o le olioli i soo se tulaga? Matau pe faafia ona faaaoga e Peresitene Nelson le upu taulai. Atonu e mafai ona e faatusatusaina le taulai atu o se mea pueata po o isi tioata e taulai atu ai ia Iesu Keriso. O le a faapefea ona e taulai atili atu ia te Ia?
Tagai foi “Grief,” “Hope,” “Mental Health,” po o isi autu i le vaega o le “Life Help” o le Gospel Library.
O le a faataunuu e le Alii Ana afioga uma i Lana taimi.
Faitau le 3 Nifae 1:4–7 ma mafaufau pe mata o a ni ou lagona pe ana faapea o oe o se tasi o e talitonu. O le a se mea na latou faia e faatumauina ai le malosi o lo latou faatuatua? (tagai 3 Nifae 1:4–21 ma le 5:1–3). Na faapefea ona faataunuuina upu a Samuelu? (tagai 3 Nifae 1:19–21). Na faapefea ona faataunuu e le Alii Ana afioga i lou olaga?
Na folafola atu e Mamona: “Faauta, o a’u o se soo o Iesu Keriso” (3 Nifae 5:13). O le a le uiga o lenei fuaitau ia te oe? Mafaufau e suesue le 3 Nifae 1:4–15; 5:12–26; 6:10–15; ma le 7:15–26, ma vaavaai mo uiga auaumama, talitonuga, ma faatinoga a soo o Keriso.
Pe a ou faatinoina le faatuatua ia Iesu Keriso, e le manaomia ona ou fefe.
O le aafiaga o sa Nifae ma noataga o le au faomea atonu o loo i ai ni lesona e mafai ona fesoasoani ia te oe i tulaga matautia faaleagaga o loo feagai ma oe. Vaai mo nei lesona i le 3 Nifae 2:11–12 ma le 3:1–26. Mo se faataitaiga, atonu e mafai ona e suesue i upu a Kitianae i le 3 Nifae 3:2-10 ma faatusatusa i auala a Satani atonu e taumafai ai e faasese i tatou. O le a se mea ua e aoaoina mai le faataitaiga a Lakoneu?
Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .
O le itulau o gaoioiga o lenei vaiaso e mafai ona fesoasoani i lau fanau e aoao ai e uiga i vavega na molimauina e sa Nifae ina ua fanau mai Iesu. E mafai foi ona e faaaogaina le “Mataupu 41: O Faailoga o le Soifua Mai o Keriso” (Tala o le Tusi a Mamona, 114–16) e aoao ai i latou i lenei tala—pe fesoasoani ia i latou e faamatala atu ia te oe.
A o e faitauina ma lau fanau le 3 Nifae 1:4–10, valaaulia i latou e talanoa e uiga i ni lagona atonu na i ai i le avea ai ma se tasi o tagata talitonu na soifua i lena taimi. Ma, a o latou faitauina le vaega o totoe o le tala i fuaiupu 11–15, e mafai ona latou fautuaina mai ni auala e faauma ai lenei fuaiupu: “O le lesona o lenei tala mo au o le …”
Atonu e mafai ona fesoasoani lau fanau ia te oe e mafaufau i isi taimi na faataunuu ai e le Atua Ana folafolaga na tuuina mai e ala mai i Lana perofeta. Atonu latou te mananao e sue ata o nei tala i le Tusi Ata o le Talalelei (tagai, mo se faataitaiga, nu. 7–8 ma le 81). Tuu atu ia i latou e faasoa mai mea latou te iloa e uiga i nei tala, e aofia ai le ala na faataunuuina ai folafolaga a le Atua. Faitau faatasi le 3 Nifae 1:20, ma faasoa atu lau lava molimau e uiga i nei upumoni.
Fesoasoani i lau fanau ia iloa le mafuaaga na faapotopoto faatasi ai sa Nifae ma faamanuiaga na oo mai ia i latou i le 3 Nifae 2:11–12 ma le 3:13–14, 24–26. Aisea e taua ai mo i tatou le faapotopoto i aso nei i o tatou aiga ma i le lotu?
E te iloa se lesona faatino o loo aoao mai ai e uiga i le malosi o le lotogatasi? Atonu e mafai e lau fanau ona taumafai e gagau le fasilaau e tasi ona sosoo lea ma se fusi laau pe sasae se fasipepa se tasi ona sosoo ai lea ma se faaputuga pepa. E faapefea ona pei i tatou o fasilaau po o pepa?
A uma ona faitau faatasi le 3 Nifae 5:13, valaaulia tamaiti e toe fai le fuaitau “O a’u o se soo o Iesu Keriso.” Ina ia aoao i le uiga o le avea ma se soo o Iesu Keriso, faitau faatasi nisi o nei faataitaiga: o sa Lamana ua liua (tagai 3 Nifae 6:14), Mamona (tagai 3 Nifae 5:12–26), ma Nifae (tagai 3 Nifae 7:15–26). E mafai foi ona e maua ni manatu i se pese e pei o le “O Loo Ou Taumafai e Avea e Pei o Iesu” (Tusipese a Tamaiti, 40).
I luga o se fasi pepa, fesoasoani i tamaiti e lolomi o latou lima ma oti ese ata lolomi. Tusi le “O aʻu o se soo o Iesu Keriso” i le tasi itu, ma valaaulia i latou e tusi se mea e mafai ona latou faia e avea ai ma se soo i le isi itu.
Mo nisi manatu, tagai i le lomiga o lenei masina o le mekasini o le Uo .
Ata
Sa molimau tagata sa Nifae i le ao e aunoa ma se po