“ວັນທີ 14–20 ເດືອນຕຸລາ: ‘ເຈົ້າເປັນລູກຫລານແຫ່ງພັນທະສັນຍາ.’ 3 ນີໄຟ 20–26,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)

“ວັນທີ 14–20 ເດືອນຕຸລາ. 3 ນີໄຟ 20–26,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)

ຮູບພາບ

ພຣະຄຣິດກຳລັງປະກົດຕົວຕໍ່ຊາວນີໄຟ

ຮູບພຣະຄຣິດກຳລັງປະກົດຕົວຕໍ່ຊາວນີໄຟ, ໂດຍ ແອນດຣູ ໂບສ໌ລີ

ວັນທີ 14–20 ເດືອນຕຸລາ: “ເຈົ້າເປັນລູກຫລານແຫ່ງພັນທະສັນຍາ”

3 ນີໄຟ 20–26

ເມື່ອທ່ານໄດ້ຍິນຜູ້ຄົນໃຊ້ຖ້ອຍຄຳເຊັ່ນ ເຊື້ອສາຍອິດສະຣາເອນ, ທ່ານຮູ້ສຶກວ່າເຂົາເຈົ້າເວົ້າກ່ຽວກັບທ່ານບໍ? ຊາວນີໄຟ ແລະ ຊາວເລມັນເປັນລູກຫລານແທ້ໆຂອງອິດສະຣາເອນ, “ກິ່ງງ່າຂອງຕົ້ນອິດສະຣາເອນ,” ແຕ່ພວກເຂົາກໍຍັງໄດ້ຮູ້ສຶກວ່າ “ຫລົງຈາກຕົ້ນຂອງມັນ” (ແອວມາ 26:36; ເບິ່ງ 1 ນີໄຟ 15:12 ນຳອີກ). ແຕ່ພຣະຜູ້ຊ່ວຍໃຫ້ລອດຢາກໃຫ້ພວກເຂົາຮູ້ວ່າ ພວກເຂົາບໍ່ໄດ້ສູນເສຍໄປຈາກພຣະອົງ. “ເຈົ້າເປັນເຊື້ອສາຍອິດສະຣາເອນ,” ພຣະອົງໄດ້ກ່າວ, “ແລະ ເຈົ້າຢູ່ໃນພັນທະສັນຍາ” (3 ນີໄຟ 20:25). ພຣະອົງອາດເວົ້າບາງສິ່ງທີ່ຄ້າຍຄືກັນນັ້ນກັບທ່ານໃນທຸກວັນນີ້, ເພາະທຸກຄົນທີ່ໄດ້ຮັບບັບຕິສະມາ ແລະ ໄດ້ເຮັດພັນທະສັນຍາກັບພຣະອົງ ກໍເປັນເຊື້ອສາຍອິດສະຣາເອນ, “ຢູ່ໃນພັນທະສັນຍາ” ຄືກັນ. ໃນອີກຄຳໜຶ່ງ, ເມື່ອພຣະເຢຊູກ່າວເຖິງເຊື້ອສາຍອິດສະຣາເອນ, ພຣະອົງໄດ້ກ່າວກ່ຽວກັບທ່ານ. ຄຳແນະນຳໃຫ້ມອບພອນແກ່ “ທຸກຕະກຸນຂອງແຜ່ນດິນໂລກ” ແມ່ນສຳລັບທ່ານ (3 ນີໄຟ 20:27). ຄຳເຊື້ອເຊີນໃຫ້ “ຕື່ນຂຶ້ນອີກ, ແລະ ຈົ່ງມີຄວາມເຂັ້ມແຂງ” ແມ່ນສຳລັບທ່ານ (3 ນີໄຟ 20:36). ແລະ ຄຳສັນຍາທີ່ປະເສີດຂອງພຣະອົງ ທີ່ວ່າ, “ຄວາມຮັກຂອງເຮົາ ໝັ້ນຄົງບໍ່ສິ້ນສຸດໄດ້, ທັງເຮົາຈະຮັກສາສັນຍາແຫ່ງສັນຕິພາບໄວ້ສືບໄປ,” ແມ່ນສຳລັບທ່ານ (3 ນີໄຟ 22:10).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

3 ນີໄຟ 20–22

ໃນຍຸກສຸດທ້າຍ, ພຣະເຈົ້າຈະກະທຳວຽກງານທີ່ມະຫັດສະຈັນ.

ໃນ 3 ນີໄຟ 20–22, ພຣະຜູ້ຊ່ວຍໃຫ້ລອດໄດ້ທຳນາຍກ່ຽວກັບອະນາຄົດຂອງຜູ້ຄົນແຫ່ງພັນທະສັນຍາຂອງພຣະອົງ (ເບິ່ງ ໂດຍສະເພາະ 3 ນີໄຟ 20:30–32, 39–41; 21:9–11, 22–29). ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຈື່ຈຳສິ່ງທີ່ປະທານຣະໂຊ ເອັມ ແນວສັນ ໄດ້ກ່າວວ່າ: “ເຮົາກໍເປັນຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ. ເຮົາມີສິດທິພິເສດທີ່ຈະມີສ່ວນຮ່ວມໃນການບັນລຸຄຳສັນຍາເຫລົ່ານີ້. ນີ້ເປັນເວລາທີ່ໜ້າຕື່ນເຕັ້ນພຽງໃດທີ່ຈະມີຊີວິດຢູ່!” (“The Gathering of Scattered Israel,” Liahona, Nov. 2006, 79). ຄຳທຳນາຍຂໍ້ໃດທີ່ໜ້າຕື່ນເຕັ້ນຕໍ່ທ່ານໂດຍສະເພາະ? ທ່ານຈະເຮັດສິ່ງໃດຈຶ່ງຈະຊ່ວຍໃຫ້ມັນເກີດເປັນຈິງໄດ້?

ຊອກຫາຖ້ອຍຄຳ ແລະ ວະລີທີ່ດົນໃຈ. ທ່ານອາດພົບເຫັນຖ້ອຍຄຳ ແລະ ວະລີບາງຢ່າງຢູ່ໃນພຣະຄຳພີ ທີ່ປະທັບໃຈທ່ານ, ຄືກັບວ່າມັນຖືກຂຽນໄວ້ສຳລັບທ່ານໂດຍສະເພາະ. ໃຫ້ຄິດທີ່ຈະໝາຍມັນໄວ້ຢູ່ໃນພຣະຄຳພີຂອງທ່ານ ຫລື ຂຽນມັນໄວ້ຢູ່ໃນປຶ້ມບັນທຶກການສຶກສາສ່ວນຕົວຂອງທ່ານ.

3 ນີໄຟ 22; 24

ພຣະເຈົ້າມີຄວາມເມດຕາຕໍ່ຜູ້ຄົນທີ່ກັບມາຫາພຣະອົງ.

ໃນ 3 ນີໄຟ 22 ແລະ 24, ພຣະຜູ້ຊ່ວຍໃຫ້ລອດອ້າງຖ້ອຍຄຳຂອງເອຊາຢາ ແລະ ມາລາກີ ທີ່ເຕັມໄປດ້ວຍພາບທີ່ແຈ່ມແຈ້ງ ແລະ ການປຽບທຽບ—ຖ່ານຫີນຢູ່ໃນໄຟ, ຊຳລະເງິນໃຫ້ບໍລິສຸດ, ການແຕ່ງງານ, ປະຕູສະຫວັນ (ເບິ່ງ ໂດຍສະເພາະ 3 ນີໄຟ 22:7–8, 10–17; 24:10–12, 17–18). ການປຽບທຽບເຫລົ່ານີ້ສິດສອນທ່ານຫຍັງແດ່ກ່ຽວກັບຄວາມສຳພັນຂອງພຣະເຈົ້າກັບຜູ້ຄົນຂອງພຣະອົງ—ແລະ ຄວາມສຳພັນຂອງພຣະອົງກັບທ່ານ? ຄຳສັນຍາຢູ່ໃນບົດເຫລົ່ານີ້ໄດ້ບັນລຸຄວາມສຳເລັດຢູ່ໃນຊີວິດຂອງທ່ານ ຫລື ຊີວິດຂອງຄອບຄົວທ່ານແນວໃດ?

ເບິ່ງ “The Refiner’s Fire” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

3 ນີໄຟ 23:6–13

ການບັນທຶກປະສົບການທາງວິນຍານສາມາດເປັນພອນໃຫ້ແກ່ຄອບຄົວຂອງເຮົາ.

ທ່ານມີຄວາມປະທັບໃຈຢ່າງໃດແດ່ກ່ຽວກັບການປະຕິສຳພັນຂອງພຣະຜູ້ຊ່ວຍໃຫ້ລອດກັບນີໄຟ ຢູ່ໃນ 3 ນີໄຟ 23: 6–13? ຖ້າຫາກພຣະຜູ້ຊ່ວຍໃຫ້ລອດຢາກກວດເບິ່ງບັນທຶກທີ່ທ່ານໄດ້ຂຽນລົງໄວ້, ພຣະອົງອາດຖາມທ່ານຄຳຖາມໃດແດ່? ມີເຫດການທີ່ສຳຄັນ ຫລື ປະສົບການທາງວິນຍານໃດບໍທີ່ເຮົາຄວນບັນທຶກໄວ້? ເປັນຫຍັງມັນຈຶ່ງສຳຄັນທີ່ຈະບັນທຶກໄວ້? (ເບິ່ງ 3 ນີໄຟ 26:2).

3 ນີໄຟ 23; 26:1–12

ພຣະຜູ້ຊ່ວຍໃຫ້ລອດປະສົງໃຫ້ເຮົາຄົ້ນຄວ້າພຣະຄຳພີ.

ຂະນະທີ່ທ່ານອ່ານ 3 ນີໄຟ 20:10–12; 23; 26:1–12, ໃຫ້ໄຕ່ຕອງວ່າພຣະຜູ້ຊ່ວຍໃຫ້ລອດຮູ້ສຶກແນວໃດກ່ຽວກັບພຣະຄຳພີ. ມີຄວາມແຕກຕ່າງຫຍັງແດ່ລະຫວ່າງການຄົ້ນຄວ້າພຣະຄຳພີ ແລະ ການພຽງແຕ່ອ່ານພຣະຄຳພີ? (ເບິ່ງ 3 ນີໄຟ 23:1).

3 ນີໄຟ 24:7–12

ຮູບພາບ
ໄອຄອນຫ້ອງຮຽນສາດສະໜາ
ການຈ່າຍສ່ວນສິບເປີດປະຕູສະຫວັນ.

ຜູ້ຄົນຂອງພຣະເຈົ້າຖືກບັນຊາໃຫ້ຈ່າຍສ່ວນສິບສະເໝີມາ (ເບິ່ງ ປະຖົມມະການ 14:17–20; ມາລາກີ 3:8–11). ຂະນະທີ່ທ່ານສຶກສາ 3 ນີໄຟ 24:7–12, ໃຫ້ຄິດກ່ຽວກັບວ່າ ເປັນຫຍັງພຣະເຈົ້າຈຶ່ງຂໍຮ້ອງໃຫ້ຜູ້ຄົນຂອງພຣະອົງຈ່າຍສ່ວນສິບ. ຄຳຖາມເຫລົ່ານີ້ສາມາດນຳພາການສຶກສາຂອງທ່ານໄດ້.

ແມ່ນຫຍັງຄືກົດສ່ວນສິບ? (ເບິ່ງ ຄຳສອນ ແລະ ພັນທະສັນຍາ 119. “ລາຍໄດ້” ໃນການເປີດເຜີຍນີ້ໝາຍເຖິງລາຍຮັບ. ສະມາຊິກທຸກຄົນທີ່ມີລາຍຮັບຄວນຈ່າຍສ່ວນສິບ.) ເງິນສ່ວນສິບແຕກຕ່າງຈາກການບໍລິຈາກແບບອື່ນແນວໃດ?
ເງິນສ່ວນສິບຖຶກນຳໃຊ້ແບບໃດ? ທ່ານສາມາດຊອກຫາລາຍການສ່ວນໜຶ່ງຢູ່ໃນ Gospel Topics, “Tithing” (ຫ້ອງສະໝຸດພຣະກິດຕິຄຸນ). ໃນວິທີທາງໃດແດ່ທີ່ທ່ານໄດ້ຮັບພອນ ເພາະວ່າສະມາຊິກຂອງສາດສະໜາຈັກໄດ້ຈ່າຍສ່ວນສິບ?
ພອນຫຍັງແດ່ທີ່ໄດ້ມາສູ່ຜູ້ຄົນທີ່ດຳລົງຊີວິດຕາມກົດສ່ວນສິບ? (ເບິ່ງ 3 ນີໄຟ 24:7–12). ທ່ານສາມາດຊອກຫາພອນທີ່ຖືກບັນຍາຍຢູ່ໃນຂ່າວສານຂອງແອວເດີ ເດວິດ ເອ ແບ໊ດນາ “The Windows of Heaven” (Liahona, Nov. 2013, 17–20). ໃຫ້ຊອກຫາ, ໂດຍສະເພາະ, ພອນທີ່ບໍ່ຈຳເປັນຕ້ອງເປັນເລື່ອງເງິນ. ທ່ານເຄີຍເຫັນພອນເຫລົ່ານີ້ໃນຊີວິດຂອງທ່ານແນວໃດ?

ທ່ານອາດຢາກເບິ່ງວິດີໂອ “Jesus Teaches about the Widow’s Mite” (ຫ້ອງສະໝຸດພຣະກິດຕິຄຸນ), ຫລື ອ່ານ ມາຣະໂກ 12:41–44. ເລື່ອງລາວນີ້ສິດສອນທ່ານຫຍັງແດ່?

3 ນີໄຟ 25:5–6

ພຣະຜູ້ເປັນເຈົ້າໄດ້ສົ່ງເອລີຢາມາ ເພື່ອຫັນຫົວໃຈຂອງເຮົາໄປຫາບັນພະບຸລຸດຂອງເຮົາ.

ໃນວັນເວລາຂອງເຮົາ, ຫົວໃຈຂອງເຮົາຖືກ “ຫັນໄປຫາບັນພະບຸລຸດ [ຂອງເຮົາ]” ຜ່ານທາງວຽກງານພຣະວິຫານ ແລະ ປະຫວັດຄອບຄົວ. ສິ່ງນີ້ໄດ້ເກີດຂຶ້ນສຳລັບທ່ານແນວໃດ? ຂະນະທີ່ທ່ານອ່ານ 3 ນີໄຟ 25:5–6 ແລະ ຄຳສອນ ແລະ ພັນທະສັນຍາ 110:13–16, ໃຫ້ໄຕ່ຕອງວ່າເປັນຫຍັງສິ່ງນີ້ຈຶ່ງເປັນພາກສ່ວນທີ່ສຳຄັນຂອງແຜນຂອງພຣະເຈົ້າ?

ເບິ່ງ: “ອະທິຖານຄອບຄົວ,” ເພງສວດ ແລະ ເພງຂອງເດັກນ້ອຍ, 73 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

3 ນີໄຟ 23:1, 5

ເຮົາສາມາດຄົ້ນຄວ້າພຣະຄຳພີຢ່າງພາກພຽນ.

ຄຳແນະນຳຂອງພຣະຜູ້ຊ່ວຍໃຫ້ລອດ ຢູ່ໃນ 3 ນີໄຟ 23 ສະແດງໃຫ້ເຫັນວ່າພຣະຄຳພີສຳຄັນຫລາຍຂະໜາດໃດສຳລັບພຣະອົງ. ເພື່ອຊ່ວຍລູກໆຂອງທ່ານໃຫ້ຄົ້ນພົບສິ່ງນີ້, ທ່ານສາມາດອ່ານ 3 ນີໄຟ 23:1, 5 ອອກສຽງ ແລະ ຂໍໃຫ້ພວກເຂົາຟັງເພື່ອຫາຖ້ອຍຄຳທີ່ຖືກກ່າວຊ້ຳສາມເທື່ອ. ການຄົ້ນຄວ້າແຕກຕ່າງຈາກພຽງແຕ່ການອ່ານເທົ່ານັ້ນແນວໃດ?
ບາງທີທ່ານ ແລະ ລູກໆຂອງທ່ານສາມາດຂຽນຂໍ້ພຣະຄຳພີທີ່ໂປດປານ ແລະ ເຊື່ອງມັນໄວ້. ແລ້ວພວກທ່ານສາມາດປ່ຽນຜຽນກັນຊອກຫາຂໍ້ພຣະຄຳພີຂອງກັນແລະກັນ, ອ່ານມັນນຳກັນ, ແລະ ເວົ້າລົມກັນກ່ຽວກັບວ່າ ເປັນຫຍັງຂໍ້ພຣະຄຳພີເຫລົ່ານີ້ຈຶ່ງມີຄວາມໝາຍ.

3 ນີໄຟ 24:8–12

ການຈ່າຍສ່ວນສິບເປີດປະຕູສະຫວັນ.

ຊ່ວຍລູກໆຂອງທ່ານຄົ້ນຄວ້າ 3 ນີໄຟ 24:8–12 ເພື່ອຊອກຫາວິທີຈະປະກອບປະໂຫຍກນີ້ໃຫ້ສົມບູນ: ຖ້າເຮົາຈ່າຍສ່ວນສິບ, ພຣະຜູ້ເປັນເຈົ້າຈະ … . ທ່ານຍັງສາມາດແບ່ງປັນປະສົບການນຳອີກ ຊຶ່ງໃນນັ້ນທ່ານໄດ້ຮັບພອນ ເພາະທ່ານໄດ້ຈ່າຍສ່ວນສິບ. ຖ້າວ່າມັນຈະຊ່ວຍໄດ້, ໃຫ້ຄິດທີ່ຈະຂຽນຈຳນວນເງິນ ແລະ ຊ່ວຍໃຫ້ລູກໆຂອງທ່ານຄຳນວນວ່າການຈ່າຍ (10 ເປີເຊັນ) ຂອງສ່ວນສິບນັ້ນແມ່ນຫລາຍເທົ່າໃດສຳລັບແຕ່ລະຈຳນວນ.
ໜ້າກິດຈະກຳຂອງອາທິດນີ້ ສາມາດຊ່ວຍລູກໆຂອງທ່ານເວົ້າລົມກ່ຽວກັບບາງວິທີທີ່ພຣະຜູ້ເປັນເຈົ້າໃຊ້ເງິນສ່ວນສິບ ເພື່ອເປັນພອນໃຫ້ແກ່ສະມາຊິກຂອງສາດສະໜາຈັກ. ບາງທີພວກເຂົາສາມາດແຕ້ມຮູບ (ຫລື ຊອກຫາຮູບຢູ່ໃນວາລະສານຂອງສາດສະໜາຈັກ) ກ່ຽວກັບວິທີທີ່ເງິນສ່ວນສິບເປັນພອນໃຫ້ແກ່ພວກເຂົາ.

3 ນີໄຟ 25:5–6

ພຣະບິດາເທິງສະຫວັນປະສົງໃຫ້ເຮົາຮຽນຮູ້ກ່ຽວກັບບັນພະບຸລຸດຂອງເຮົາ.

ທ່ານຈະດົນໃຈລູກໆຂອງທ່ານໃຫ້ຄົ້ນຫາ ແລະ ຮຽນຮູ້ກ່ຽວກັບບັນພະບຸລຸດຂອງພວກເຂົາແນວໃດ? ທ່ານຈະຊຸກຍູ້ລູກໆຂອງທ່ານໃຫ້ປະຕິບັດພິທີການແທນບັນພະບຸລຸດຂອງພວກເຂົາແນວໃດເມື່ອພວກເຂົາໃຫຍ່ຂຶ້ນ? ໃຫ້ພິຈາລະນາທີ່ຈະຊ່ວຍພວກເຂົາໃຫ້ຄົ້ນຄວ້າ 3 ນີໄຟ 25:5–6 ເພື່ອຊອກຫາສິ່ງໃດສິ່ງໜຶ່ງທີ່ຈະເກີດຂຶ້ນໃນຍຸກສຸດທ້າຍ. ລູກຜູ້ນ້ອຍສາມາດວາງມືຂອງພວກເຂົາໃສ່ຫົວໃຈ ທຸກໆເທື່ອທີ່ພວກເຂົາໄດ້ຍິນຄຳວ່າ “ໃຈ” ຂະນະທີ່ທ່ານອ່ານຂໍ້ເຫລົ່ານີ້. ທ່ານສາມາດອ່ານກ່ຽວກັບວ່າຄຳທຳນາຍນີ້ໄດ້ເກີດເປັນຈິງແນວໃດຢູ່ໃນ ຄຳສອນ ແລະ ພັນທະສັນຍາ 110:13–16 (ເບິ່ງ ປຶ້ມຮູບພຣະກິດຕິຄຸນ, ເລກທີ 95) ນຳອີກ. ບອກລູກໆຂອງທ່ານກ່ຽວກັບວ່າ ໃຈຂອງທ່ານໄດ້ຫັນໄປຫາບັນພະບຸລຸດຂອງທ່ານແນວໃດ. ຍົກຕົວຢ່າງ, ທ່ານສາມາດແບ່ງປັນປະສົບການທີ່ທ່ານເຄີຍມີໃນການຮຽນຮູ້ກ່ຽວກັບບັນພະບຸລຸດຂອງທ່ານ ແລະ ການເຮັດພິທີການພຣະວິຫານແທນເຂົາເຈົ້າ.
ຊ່ວຍລູກໆຂອງທ່ານໃຫ້ຂຽນຊື່ໃສ່ຕົ້ນຕະກຸນ ດ້ວຍຊື່ຂອງພໍ່ແມ່ ແລະ ປູ່ຍ່າຕາຍາຍຂອງພວກເຂົາ. ມີເລື່ອງລາວໃດແດ່ທີ່ທ່ານສາມາດແບ່ງປັນກ່ຽວກັບບັນພະບຸລຸດຂອງທ່ານ? ສະແດງຮູບພາບຖ້າເປັນໄປໄດ້. ທ່ານຍັງສາມາດຮ້ອງເພງ “ຮັກທີ່ບ້ານ” (ເພງສວດ ແລະ ເພງຂອງເດັກນ້ອຍ, 48) ນຳກັນ ແລະ ເວົ້າລົມກັບລູກໆຂອງທ່ານກ່ຽວກັບວ່າ ເປັນຫຍັງຄອບຄົວຈຶ່ງສຳຄັນໃນແຜນຂອງພຣະບິດາເທິງສະຫວັນ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

Bring Forth the Record [ຈົ່ງນຳບັນທຶກອອກມາ], ໂດຍ ແກຣີ ແອວ ແຄບ.

ຮູບພາບ

ໜ້າກິດຈະກຳ: ການຈ່າຍສ່ວນສິບສ້າງສາອານາຈັກຂອງພຣະເຈົ້າ