“ວັນທີ 21–27 ເດືອນຕຸລາ: ‘ຄົງບໍ່ມີຜູ້ຄົນກຸ່ມໃດທີ່ມີຄວາມສຸກຫລາຍໄປກວ່ານີ້.’ 3 ນີໄຟ 27–4 ນີໄຟ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 21–27 ເດືອນຕຸລາ. 3 ນີໄຟ 27–4 ນີໄຟ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
ວັນທີ 21–27 ເດືອນຕຸລາ: “ຄົງບໍ່ມີຜູ້ຄົນກຸ່ມໃດທີ່ມີຄວາມສຸກຫລາຍໄປກວ່ານີ້”
3 ນີໄຟ 27–4 ນີໄຟ
ຄຳສອນຂອງພຣະເຢຊູຄຣິດ ເປັນຫລາຍກວ່າປັດຊະຍາທີ່ງົດງາມໃຫ້ໄຕ່ຕອງ. ມັນມີໄວ້ເພື່ອດົນໃຈເຮົາໃຫ້ກາຍເປັນເໝືອນດັ່ງພຣະອົງ. ໜັງສື 4 ນີໄຟ ສະແດງໃຫ້ເຫັນວ່າ ພຣະກິດຕິຄຸນຂອງພຣະຜູ້ຊ່ວຍໃຫ້ລອດ ສາມາດປ່ຽນແປງຜູ້ຄົນໄດ້ຢ່າງສົມບູນພຽງໃດ. ຫລັງຈາກການປະຕິບັດສາດສະໜາກິດທີ່ສັ້ນໆຂອງພຣະເຢຊູ, ການຂັດແຍ້ງລະຫວ່າງຊາວນີໄຟ ແລະ ຊາວເລມັນເປັນເວລາຫລາຍສັດຕະວັດໄດ້ຢຸດຕິລົງ. ສອງປະຊາຊາດທີ່ຮູ້ຈັກກັນວ່າເປັນຜູ້ຄົນທີ່ແຕກແຍກ ແລະ ມີຄວາມທະນົງຕົວ ໄດ້ກາຍເປັນ “ພວກດຽວກັນ, ເປັນລູກຂອງພຣະຄຣິດ” (4 ນີໄຟ 1:17), ແລະ ພວກເຂົາເລີ່ມຕົ້ນ “ມີເຂົ້າຂອງທັງໝົດນຳກັນ” (4 ນີໄຟ 1:3). “ຄວາມຮັກຂອງພຣະເຈົ້າ … ມີຢູ່ໃນໃຈຂອງຜູ້ຄົນ,” ແລະ “ຄົງບໍ່ມີຜູ້ຄົນກຸ່ມໃດທີ່ມີຄວາມສຸກຫລາຍໄປກວ່ານີ້ໃນບັນດາຜູ້ຄົນທັງປວງທີ່ພຣະຫັດຂອງພຣະເຈົ້າໄດ້ສ້າງຂຶ້ນມາ” (4 ນີໄຟ 1:15–16). ນີ້ຄືວິທີທີ່ຄຳສອນຂອງພຣະຜູ້ຊ່ວຍໃຫ້ລອດໄດ້ປ່ຽນແປງຊາວນີໄຟ ແລະ ຊາວເລມັນ. ຄຳສອນໄດ້ປ່ຽນແປງທ່ານແນວໃດ?
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ສາດສະໜາຈັກຂອງພຣະເຢຊູຄຣິດໄດ້ຖືກເອີ້ນຕາມພຣະນາມຂອງພຣະອົງ.
ຂະນະທີ່ສານຸສິດຂອງພຣະຜູ້ຊ່ວຍໃຫ້ລອດເລີ່ມຕົ້ນສະຖາປະນາສາດສະໜາຈັກຂອງພຣະອົງຕະຫລອດທົ່ວແຜ່ນດິນ, ໄດ້ເກີດມີຄຳຖາມໜຶ່ງຂຶ້ນມາ, ຊຶ່ງສຳລັບບາງຄົນແລ້ວ, ອາດເບິ່ງຄືວ່າເປັນເລື່ອງເລັກນ້ອຍ—ສາດສະໜາຈັກຄວນມີຊື່ວ່າແນວໃດ? (ເບິ່ງ 3 ນີໄຟ 27:1–3). ທ່ານຮຽນຮູ້ຫຍັງແດ່ກ່ຽວກັບຄວາມສຳຄັນຂອງຊື່ນີ້ຈາກຄຳຕອບຂອງພຣະຜູ້ຊ່ວຍໃຫ້ລອດ ຢູ່ໃນ 3 ນີໄຟ 27:4–12?
ພຣະຜູ້ເປັນເຈົ້າໄດ້ເປີດເຜີຍຊື່ຂອງສາດສະໜາຈັກຂອງພຣະອົງໃນສະໄໝປະຈຸບັນໃນ ຄຳສອນ ແລະ ພັນທະສັນຍາ 115:4. ໃຫ້ໄຕ່ຕອງແຕ່ລະຄຳຢູ່ໃນຊື່ນັ້ນ. ຄຳເຫລົ່ານີ້ຊ່ວຍເຮົາໃຫ້ຮູ້ເຖິງຜູ້ທີ່ເຮົາເປັນ, ສິ່ງທີ່ເຮົາເຊື່ອຖື, ແລະ ວິທີທີ່ເຮົາຄວນປະຕິບັດແນວໃດ?
ເບິ່ງ Russell M. Nelson, “The Correct Name of the Church,” Liahona, Nov. 2018, 87–89; “Jesus Christ Declares the Name of His Church and His Doctrine” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.
ສາດສະໜາຈັກຂອງພຣະເຢຊູຄຣິດໄດ້ຖືກສ້າງຂຶ້ນເທິງພຣະກິດຕິຄຸນຂອງພຣະອົງ.
ຫລັງຈາກທີ່ອະທິບາຍວ່າ ສາດສະໜາຈັກຂອງພຣະອົງຕ້ອງ “ຖືກສ້າງຂຶ້ນເທິງພຣະກິດຕິຄຸນຂອງ [ພຣະອົງ]” (3 ນີໄຟ 27:10), ພຣະຜູ້ຊ່ວຍໃຫ້ລອດໄດ້ອະທິບາຍວ່າ ພຣະກິດຕິຄຸນຂອງພຣະອົງນັ້ນແມ່ນຫຍັງ. ທ່ານຈະສະຫລຸບສິ່ງທີ່ພຣະອົງໄດ້ກ່າວໃນ 3 ນີໄຟ 27:13–22 ວ່າແນວໃດ? ອີງຕາມນິຍາມນີ້, ມັນໝາຍຄວາມວ່າແນວໃດຕໍ່ສາດສະໜາຈັກ—ແລະ ຕໍ່ທ່ານ—ທີ່ຈະຖືກສ້າງຂຶ້ນເທິງພຣະກິດຕິຄຸນຂອງພຣະອົງ?
ບັນທຶກສິ່ງທີ່ທ່ານກຳລັງຮຽນຮູ້. ສັງເກດສິ່ງທີ່ພຣະຜູ້ຊ່ວຍໃຫ້ລອດໄດ້ສິດສອນບັນດາສານຸສິດຂອງພຣະອົງ 3 ນີໄຟ 27:23–26. ເປັນຫຍັງການບັນທຶກປະສົບການທາງວິນຍານຈຶ່ງສຳຄັນ? ທ່ານຮູ້ສຶກໄດ້ຮັບການດົນໃຈໃຫ້ບັນທຶກຫຍັງ ເມື່ອທ່ານສຶກສາການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດໃນ 3 ນີໄຟ ແລ້ວ?
“ພວກເຈົ້າປາດຖະໜາອັນໃດຈາກເຮົາ?”
ທ່ານຈະວ່າແນວໃດ ຖ້າຫາກພຣະຜູ້ຊ່ວຍໃຫ້ລອດໄດ້ຖາມທ່ານ, ຄືກັນກັບທີ່ພຣະອົງໄດ້ຖາມສານຸສິດຂອງພຣະອົງວ່າ, “ພວກເຈົ້າປາດຖະໜາອັນໃດຈາກເຮົາ?” (3 ນີໄຟ 28:1). ໃຫ້ຄິດກ່ຽວກັບເລື່ອງນີ້ ຂະນະທີ່ທ່ານອ່ານ 3 ນີໄຟ 28:1–11. ທ່ານຮຽນຮູ້ຫຍັງແດ່ກ່ຽວກັບຄວາມປາດຖະໜາໃນໃຈຂອງສານຸສິດ ຈາກຄຳຕອບຂອງພວກເຂົາຕໍ່ຄຳຖາມຂອງພຣະອົງ? ຄວາມປາດຖະໜາຂອງທ່ານປ່ຽນແປງທ່ານແນວໃດ ຂະນະທີ່ທ່ານດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ?
ເພງສວດມັກຈະສະແດງຄວາມປາດຖະໜາຈາກໃຈຈິງ—“ຂໍເພິ່ງພຣະທຸກຊົ່ວໂມງ” ເປັນແບບຢ່າງທີ່ດີ (ເພງສວດ ແລະ ເພງຂອງເດັກນ້ອຍ, 12). ໃຫ້ຄິດທີ່ຈະຊອກຫາເພງສວດທີ່ສະທ້ອນເຖິງຄວາມປາດຖະໜາຂອງທ່ານ.
ພຣະຄຳພີມໍມອນເປັນເຄື່ອງໝາຍວ່າ ວຽກງານຍຸກສຸດທ້າຍຂອງພຣະເຈົ້າກຳລັງບັນລຸຄວາມສຳເລັດ.
ໃຫ້ຄິດກ່ຽວກັບເຄື່ອງໝາຍທີ່ເຮັດໃຫ້ທ່ານຮູ້ວ່າ ບາງຢ່າງຈະເກີດຂຶ້ນ. ຍົກຕົວຢ່າງ, ທ່ານຈະຮູ້ໄດ້ແນວໃດວ່າຝົນກຳລັງຈະຕົກ ຫລື ລະດູກຳລັງຈະປ່ຽນ? ອີງຕາມ 3 ນີໄຟ 29:1–3, ທ່ານຈະຮູ້ໄດ້ແນວໃດວ່າ ວຽກງານຂອງພຣະເຈົ້າໃນການເຕົ້າໂຮມຜູ້ຄົນຂອງພຣະອົງ “ໄດ້ເລີ່ມສຳເລັດແລ້ວ”? (ເບິ່ງ 3 ນີໄຟ 21:1–7 ນຳອີກ). ທ່ານອາດສັງເກດໄດ້ອີກ, ໃນ 3 ນີໄຟ 29:4–9, ເຖິງສິ່ງທີ່ຜູ້ຄົນຈະປະຕິເສດໃນສະໄໝຂອງພວກເຮົາ. ພຣະຄຳພີມໍມອນເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານເຖິງສິ່ງເຫລົ່ານີ້ແນວໃດ?
![]()
ຮູບພາບໄອຄອນຫ້ອງຮຽນສາດສະໜາ
ມັນຈະເປັນແນວໃດຖ້າທ່ານມີຊີວິດຢູ່ໃນຊ່ວງໄລຍະຊຸມປີ ຫລັງຈາກການມາຢ້ຽມຢາມຂອງພຣະຜູ້ຊ່ວຍໃຫ້ລອດ? ຂະນະທີ່ທ່ານສຶກສາ 4 ນີໄຟ 1:1–18, ໃຫ້ຄິດທີ່ຈະຂຽນລາຍການພອນທີ່ຜູ້ຄົນໄດ້ຮັບ. ທ່ານຍັງອາດໝາຍ ຫລື ສັງເກດການຕັດສິນໃຈທີ່ພວກເຂົາໄດ້ເລືອກ ທີ່ໄດ້ຊ່ວຍນຳໄປສູ່ຊີວິດທີ່ໄດ້ຮັບພອນນຳອີກ. ພຣະເຢຊູໄດ້ສິດສອນຫຍັງໃຫ້ແກ່ພວກເຂົາ ທີ່ອາດດົນໃຈການເລືອກທີ່ຊອບທຳຂອງພວກເຂົາ? ນີ້ແມ່ນຕົວຢ່າງຈຳນວນໜຶ່ງ, ແຕ່ທ່ານອາດພົບຕົວຢ່າງອື່ນໆອີກ: 3 ນີໄຟ 11:28–30; 12:8–9, 21–24, 40–44; 13:19–21, 28–33; 14:12; 18:22–25.
ໃຫ້ໄຕ່ຕອງສິ່ງທີ່ທ່ານສາມາດເຮັດໄດ້ ເພື່ອຊ່ວຍຄອບຄົວ, ຫວອດ, ຫລື ຊຸມຊົນຂອງທ່ານໃຫ້ດຳລົງຊີວິດໃນຄວາມເປັນອັນໜຶ່ງດຽວກັນ ແລະ ມີຄວາມສຸກຫລາຍກວ່າເກົ່າ. ທ່ານສາມາດເຮັດຫຍັງໄດ້ແດ່ເພື່ອເອົາຊະນະຄວາມແຕກແຍກ ແລະ ກາຍເປັນ “ໜຶ່ງດຽວ” ຢ່າງແທ້ຈິງ ກັບບັນດາລູກຄົນອື່ນໆຂອງພຣະເຈົ້າ? ຄຳສອນໃດແດ່ຂອງພຣະເຢຊູຄຣິດ ທີ່ຊ່ວຍໃຫ້ທ່ານບັນລຸເປົ້າໝາຍນີ້ໄດ້?
ໜ້າເສຍດາຍທີ່ສັງຄົມຊີໂອນ ຊຶ່ງມີບັນຍາຍຢູ່ໃນ 4 ນີໄຟ ໃນທີ່ສຸດ ໄດ້ເລີ່ມເສື່ອມໂຊມລົງໄປສູ່ຄວາມຊົ່ວຮ້າຍ. ຂະນະທີ່ທ່ານອ່ານ 4 ນີໄຟ 1:19–49, ໃຫ້ຊອກຫາທັດສະນະຄະຕິ ແລະ ການປະພຶດ ທີ່ເຮັດໃຫ້ຄວາມສຸກ ແລະ ຄວາມເປັນອັນໜຶ່ງອັນດຽວກັນຂອງພວກເຂົາສິ້ນສຸດລົງ. ທ່ານສາມາດເຮັດຫຍັງໄດ້ແດ່ເພື່ອຊ່ວຍກຳຈັດທັດສະນະຄະຕິ ຫລື ການປະພຶດເຫລົ່ານີ້?
ເບິ່ງ ໂມເຊ 7:18; D. Todd Christofferson, “Sustainable Societies,” Liahona, Nov. 2020, 32–35; Reyna I. Aburto, “With One Accord,” Liahona, May 2018, 78–80; Gospel Topics, “Belonging in the Church of Jesus Christ,” ຫ້ອງສະໝຸດພຣະກິດຕິຄຸນ ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເຮົາເປັນສະມາຊິກຂອງສາດສະໜາຈັກຂອງພຣະເຢຊູຄຣິດ.
-
ເພື່ອແນະນຳຄວາມສຳຄັນຂອງຊື່ຂອງສາດສະໜາຈັກຂອງພຣະເຢຊູ, ໃຫ້ລົມກັບລູກໆຂອງທ່ານກ່ຽວກັບຊື່ຂອງພວກເຂົາເອງ. ເປັນຫຍັງຊື່ຂອງພວກເຮົາຈຶ່ງສຳຄັນ? ແລ້ວພວກທ່ານກໍສາມາດອ່ານ 3 ນີໄຟ 27:3 ນຳກັນ, ເພື່ອຊອກຫາຄຳຖາມທີ່ສານຸສິດຂອງພຣະເຢຊູໄດ້ມີ. ຊ່ວຍລູກໆຂອງທ່ານຊອກຫາຄຳຕອບໃນ 3 ນີໄຟ 27:5–8. ເປັນຫຍັງຊື່ຂອງສາດສະໜາຈັກຈຶ່ງສຳຄັນ?
-
ທ່ານອາດສາມາດຊ່ວຍລູກໆຂອງທ່ານໃຫ້ຄິດກ່ຽວກັບກຸ່ມທີ່ແຕກຕ່າງກັນທີ່ພວກເຂົາເປັນສະມາຊິກ, ເຊັ່ນ ຄອບຄົວ ຫລື ຫ້ອງຮຽນປະຖົມໄວ. ຖາມພວກເຂົາວ່າ ພວກເຂົາມັກຫຍັງກ່ຽວກັບການເປັນສະມາຊິກໃນແຕ່ລະກຸ່ມ. ແລ້ວພວກທ່ານກໍສາມາດຮ້ອງເພງ “ມາເຖີດ, ທ່ານລູກຫລານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 4) ນຳກັນ ແລະ ເວົ້າກ່ຽວກັບວ່າ ເປັນຫຍັງທ່ານຈຶ່ງຮູ້ສຶກຂອບພຣະຄຸນທີ່ໄດ້ເປັນສະມາຊິກຂອງສາດສະໜາຈັກຂອງພຣະຜູ້ຊ່ວຍໃຫ້ລອດ.
ສາດສະໜາຈັກຂອງພຣະເຢຊູຄຣິດໄດ້ຖືກສ້າງຂຶ້ນເທິງພຣະກິດຕິຄຸນຂອງພຣະອົງ.
-
ພຣະຜູ້ຊ່ວຍໃຫ້ລອດໄດ້ສະຫລຸບພຣະກິດຕິຄຸນຂອງພຣະອົງໃນ 3 ນີໄຟ 27. ທ່ານອາດອະທິບາຍຕໍ່ລູກໆຂອງທ່ານວ່າ ພຣະກິດຕິຄຸນ ໝາຍເຖິງ “ຂ່າວດີ.” ຂ່າວດີຫຍັງທີ່ພວກເຮົາພົບໃນ 3 ນີໄຟ 27:13–16? ໃຊ້ ໜ້າກິດຈະກຳຂອງອາທິດນີ້ ເພື່ອສິດສອນພວກເຂົາວ່າ ສາດສະໜາຈັກຂອງພຣະຜູ້ຊ່ວຍໃຫ້ລອດ ແມ່ນຖືກສ້າງຂຶ້ນເທິງພຣະກິດຕິຄຸນຂອງພຣະອົງແນວໃດ.
ພຣະບິດາເທິງສະຫວັນປິຕິຍິນດີ ເມື່ອລູກໆຂອງພຣະອົງກັບຄືນມາຫາພຣະອົງ.
-
ໃຫ້ຄິດທີ່ຈະຫລິ້ນເກມ ທີ່ໃຫ້ຄົນໜຶ່ງໄປລີ້ ແລະ ໃຫ້ຄົນອື່ນໆໄປຊອກຫາລາວ. ສິ່ງນີ້ສາມາດນຳໄປສູ່ການສົນທະນາກ່ຽວກັບຄວາມຊື່ນຊົມທີ່ເຮົາຮູ້ສຶກ ເມື່ອຄົນທີ່ເສຍໄປຖືກພົບເຫັນ. ຫລັງຈາກທີ່ອ່ານ 3 ນີໄຟ 27:30–31, ທ່ານສາມາດເວົ້າກ່ຽວກັບວິທີທີ່ຈະຊ່ວຍເຫລືອກັນໃຫ້ຢູ່ໃກ້ພຣະບິດາເທິງສະຫວັນ ເພື່ອວ່າຈະ “ບໍ່ມີຜູ້ໃດ … ເສຍໄປ.”
4 ນີໄຟ
ການຕິດຕາມພຣະເຢຊູຄຣິດນຳຄວາມຊື່ນຊົມມາໃຫ້ເຮົາ.
-
ເພື່ອທີ່ຈະຊ່ວຍໃຫ້ລູກໆຂອງທ່ານຮຽນຮູ້ກ່ຽວກັບຄວາມສຸກຂອງຜູ້ຄົນທີ່ມີບັນຍາຍໄວ້ໃນ 4 ນີໄຟ, ທ່ານສາມາດເອົາຮູບຂອງຄົນທີ່ມີຄວາມສຸກໃຫ້ພວກເຂົາເບິ່ງ. ແລ້ວ, ຂະນະທີ່ພວກທ່ານອ່ານ ຂໍໍ້ທີ 2–3 ແລະ 15–17 ນຳກັນ (ຫລື “ບົດທີ 48: ຄວາມຜາສຸກໃນອາເມຣິກາ,” ເລື່ອງພຣະຄຳພີມໍມອນ, 136–37), ພວກເຂົາສາມາດຊີ້ໄປຍັງຮູບ ເມື່ອທ່ານຮອດບາງບ່ອນໃນເລື່ອງລາວທີ່ນຳຄວາມສຸກມາໃຫ້.
-
ເພື່ອຊ່ວຍໃຫ້ລູກໆຂອງທ່ານຝຶກຝົນສິ່ງທີ່ສິດສອນໃນ 4 ນີໄຟ 1:15–16, ທ່ານສາມາດນຳສະເໜີສະຖານະການຕ່າງໆທີ່ຄົນໃຈຮ້າຍໃຫ້ກັນ. ເຊື້ອເຊີນໃຫ້ພວກເຂົາຫລິ້ນລະຄອນກ້ອມ ວ່າສະຖານະການຈະເປັນແນວໃດ ຖ້າພວກເຮົາມີ “ຄວາມຮັກຂອງພຣະເຈົ້າ” ໃນໃຈຂອງພວກເຮົາ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Christ with Three Nephite Disciples [ພຣະຄຣິດກັບສານຸສິດຊາວນີໄຟສາມຄົນ], ໂດຍ ແກຣີ ແອວ ແຄບ.