25 Novema–1 Tesema: “O Le Faatuatua e Faataunuu ai Mea Uma.” Eteru 12–15
“25 Novema–1 Tesema: ‘O Le Faatuatua e Faataunuu ai Mea Uma.’ Eteru 12–15” Sau, Mulimuli Mai ia te A’u—Mo Aiga ma le Ekalesia: Tusi a Mamona 2024 (2023)
“25 Novema–1 Tesema. Eteru 12–15,” Sau, Mulimuli Mai ia te A’u—Mo Aiga ma le Ekalesia: 2024 (2023)
Ata
O Eteru o loo ulu atu i se ana
O Eteru o Loo Lafi i le Ana o se Papa, saunia e Gary Ernest Smith
25 Novema–1 Tesema: “O Le Faatuatua e Faataunuu ai Mea Uma”
O valoaga a Eteru ia sa Iareto sa “tetele ma ofoofogia” (Eteru 12:5). Sa ia “tau atu moni lava ia te i latou e uiga i mea uma, mai le amataga o tagata” (Eteru 13:2). Sa ia muai vaai “i aso o Keriso” ma le Ierusalema Fou i aso e gata ai (Eteru 13:4). Ma sa ia tautala e uiga i le “faamoemoe mo se lalolagi sili atu ona lelei, ioe, se nofoaga lava i le aao taumatau o le Atua” (Eteru 12:4). Peitai na teena e sa Iareto ana upu, mo le mafuaaga lava lea sa masani ona teena ai e tagata valoaga a auauna a le Atua i aso nei—“sa latou le [vaai] atu i ai” (Eteru 12:5). E manaomia le faatuatua e talitonu ai i folafolaga po o lapataiga e uiga i mea e le mafai ona tatou vaaia, e pei lava ona manaomia le faatuatua mo Eteru e vavalo ai e uiga i “mea tetele ma ofoofogia” i se nuu le talitonu. Sa manaomia e Moronae le faatuatua e faalagolago ai i le Alii ia avea lona “vaivai i le tusitusi” ma liliu ia avea o se malosiaga (tagai Eteru 12:23–27). O le ituaiga faatuatua lenei e faia i tatou ia “mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua” (Eteru 12:4). Ma o le ituaiga faatuatua lenei e “faataunuu ai mea uma” (Eteru 12:3).
O le faatuatua ia Iesu Keriso e mafai ona taitai atu ai i vavega tetele.
O se mea masani i aso nei, e pei ona i ai i ona po o Eteru, mo tagata e mananao e vaai i faamaoniga a o lei talitonu i le Atua ma Lona mana. O le a se mea ua e aoao mai le Eteru 12:5–6 e uiga i lenei manatu?
A o e faitauina le Eteru 12, e mafai ona e tusitusia i taimi uma e te maua ai le upu “faatuatua.” Mafaufau po o a mea o aoao mai e faataitaiga taitasi e uiga i le faatuatua. O fesili faapenei e mafai ona fesoasoani: O le a le faatuatua? O le a le uiga o le faaaoga le faatuatua? O a fua o le faatuatua ia Iesu Keriso? E mafai foi ona tusifaamaumau ou manatu e uiga i molimau ua e mauaina ina ua “uma ona tofotofoina o lo outou faatuatua” (Eteru 12:6).
Tuu atu i isi e faasoa mai, ma o nisi taimi e aoao atu ai. E sili atu le aoaoina o tagata pe a latou maua avanoa e faasoa atu ai mea o loo latou aoaoina pe aoao atu foi i se faatulagaga aloaia. Pe i le fale po o le lotu, mafaufau e faataga isi, e aofia ai le autalavou, e aoao atu se vaega o le lesona.
E aumai e Iesu Keriso ia i tatou “se faamoemoe lelei silisili atu.”
E faaopoopo atu i malamalamaaga loloto e uiga i le faatuatua, e tele foi tala i le Eteru 12 e uiga i le faamoemoe. Tuu atu i nei fesili e taitaia lau suesuega:
O a ni mafuaaga sa i ai ia Eteru le “faamoemoe mo se lalolagi sili atu ona lelei”? (tagai Eteru 12:2–5).
O le a le faamoemoega o se taula? O le a le mea e fai e le faamoemoe mo lou agaga e talitutusa ma le mea e faia e se taula mo se vaa? (tagai Eteru 12:4).
E mafai e Iesu Keriso ona liliu o’u vaivaiga i le malosi.
A tatou faitau i tusitusiga mamana a Moronae, e faigofie ona galo le faapea sa popole o ia e uiga i lona “vaivai i le tusitusi” ma sa popole ia ne’i ula tagata i ana upu (tagai Eteru 12:23–25). Afai na i ai se taimi na e lagona ai le popole e uiga i ou lava vaivaiga, faitau e uiga i tauiviga a Moronae—ma le tali a le Faaola—i le Eteru 12:23–29. Atonu foi e te mafaufau loloto i taimi na fesoasoani ai Iesu Keriso ia te oe e iloa ou vaivaiga ma faamalosia ai oe—e tusa lava pe Na te lei aveesea atoa. Mafaufau foi i vaivaiga o loo e tauivi ai i le taimi nei. O le a se mea e manaomia ona e faia e maua ai le folafolaga a le Faaola e “faia lea o mea vaivai ia avea ma mea malolosi”? (Eteru 12:27).
Mafaufau e suesue ia fuaitau nei e iloa ai pe na faapefea ona maua e isi i tusitusiga paia le malosi e ala i le alofa tunoa o Iesu Keriso:
O le teenaina o perofeta a le Alii e tuu ai au i se tulaga matautia faaleagaga.
O le avea ma tupu o sa Iareto, sa, i lona tulaga faaletalafaasolopito, o se tulaga matautia. Sa faapitoa ona moni lenei mea mo Korianetuma, ona e toatele “ni tagata malolosi, … na saili e faaumatia o ia” (Eteru 13:15–16). I le Eteru 13:15–22, maitau le mea na faia e Korianetuma e puipui ai o ia lava ma le mea na fautuaina o ia e le perofeta o Eteru e fai. A o e faitau i vaega o totoe o le tusi o Eteru, ia mafaufau loloto i taunuuga o le teenaina o perofeta. O le a le mea e tupu i tagata pe a “[taofi] le toe taumafai o le Agaga o le Alii ia te i latou”? (Eteru 15:19). O le a se mea e finagalo le Alii e te aoao mai lenei tala? Mafaufau po o le a se mea o le a e faia e mulimuli ai i Ana perofeta.
O le faatuatua o le talitonu i mea e le mafai ona ou vaaia.
Mafaufau e fesoasoani i lau fanau e toe fai faatasi ma oe le “O le faatuatua o mea ia ua faamoemoe i ai ae ua le vaaia” mai le Eteru 12:6. Atonu latou te fiafia e vaavaai i ata e faaalia ai faataitaiga o le faatuatua i le Eteru 12:13–15, 19–21 (tagai Gospel Art Book, nu. 78, 85, ma le itulau o gaoioiga o lenei vaiaso). Tuu atu i lau fanau e faamatala mai mea latou te iloa e uiga i tala taitasi. O nisi nei o fesili e fesoasoani ia te oe e talanoaina ai nei faataitaiga o le faatuatua:
O le a le mea na faamoemoe i ai nei tagata?
Na faapefea ona tofotofoina lo latou faatuatua?
O le a le mea na tupu ona o lo latou faatuatua?
E mafai foi ona e faasoa atu ou lava aafiaga i le faatinoina o le faatuatua.
Ina ia malamalama i le mea o loo aoao mai e le Eteru 12:4 e uiga i le faamoemoe, e mafai e oe ma lau fanau ona tilotilo i se ata o se vaa ma se taula. Aisea e manaomia ai e vaa ni taula? O le a le mea e tupu i se vaʻa e leai se taula? A o outou faitauina faatasi le Eteru 12:4 talanoa e uiga i le auala e fesoasoani ai le faamoemoe ia i tatou i le ala e fesoasoani ai se taula i se vaa. Valaaulia lau fanau e tusi ni ata o se vaa ma se taula ina ia latou aoaoina o latou aiga e uiga i le faamoemoe.
Afai e manaomia e lau fanau se faauigaga o le faamoemoe, fesoasoani ia i latou e sue se tasi i le Taiala i Tusitusiga Paia, “Faamoemoe” (Potutusi o le Talalelei). E tusa ai ma lenei faamatalaga ma le Eteru 12:4, 32, o le a se mea e tatau ona tatou faamoemoe i ai? (tagai foi Moronae 7:40–42). Fesoasoani i tamaiti e mafaufau i isi upu mo le faamoemoe, faatasi ai ma upu e uiga faafeagai ma le faamoemoe. E mafai foi ona e faasoa atu i le tasi ma le isi nisi o upumoni o le talalelei e avatu ai ia te oe le faamoemoe.
E mafai e Iesu Keriso ona fesoasoani ia ou malosi faaleagaga.
O tamaiti e feagai i nisi taimi ma tulaga latou te lagona ai le vaivai, e pei ona sa tupu ia Moronae. Fesoasoani i lau fanau e saili pe aisea na maua ai e Moronae lenei lagona i le Eteru 12:23–25, ma fesili atu ia i latou pe na i ai se taimi na latou maua ai ni lagona faapena. Ona valaaulia lea o i latou e faitau fuaiupu 26-27 e saili ai pe na faapefea ona fesoasoani le Alii ia Moronae.
Atonu e mafai e tamaiti ona tusi se ata o se mea vaivai ma se mea malosi. Ona mafai lea ona latou faaopoopo atu i la latou ata ni upu ma fasifuaitau mai le Eteru 12:23-29 o loo aoao ai i latou e uiga i le auala e mafai ai e le Faaola ona fesoasoani ia i tatou e liliu o tatou vaivaiga i le malosi. Uunaia lau fanau e mafaufau e uiga i se vaivaiga o loo ia i latou ona saili lea o le fesoasoani a le Faaola ia avea ma tagata malolosi. E mafai foi ona e faasoa atu se aafiaga lea na fesoasoani ai le Faaola ia te oe ina ia lava lou malosi e faia ai se mea faigata.
Mo nisi manatu, tagai i le lomiga o lenei masina o le mekasini o le Uo .