23–29 Tesema: “Ma o le a Afio Mai o Ia i le Lalolagi e Togiola Ona Tagata.” Kerisimasi
“23–29 Tesema: ‘Ma o le a Afio Mai o Ia i le Lalolagi e Togiola Ona Tagata.’ Kerisimasi,” Sau, Mulimuli Mai ia te A’u—Mo Aiga ma le Ekalesia: Tusi a Mamona 2024 (2023)
“23–29 Tesema. Kerisimasi,” Sau, Mulimuli Mai ia te A’u—Mo Aiga ma le Ekalesia: 2024 (2023)
Ata
Iosefa, Maria, ma le pepe o Iesu i se fale o manu
Faauta i le Tamai Mamoe a le Atua, saunia e Walter Rane
23–29 Tesema: “Ma o le a Afio Mai o Ia i le Lalolagi e Togiola Ona Tagata”
Kerisimasi
Mai ia Nifae e oo ia Moronae, o perofeta uma o le Tusi a Mamona sa tuuto i le faamoemoega paia ua aoteleina i luga o le itulau autuo le tusi: “o le faatalitonuina o [tagata uma] o Iesu o le Keriso.” Sa vaai se tasi o perofeta ia te Ia o se agaga i le muai olaga, ae o le isi na vaai i Ana galuega i le olaga nei i se faaaliga vaaia. O le tasi sa tu i luga o se puipui e folafola atu faailoga o Lona soifua mai ma Lona maliu, ae o le isi na tootuli i luma o Lona tino toetu, na tagotago i manu’a i Ona lima, vae, ma le itu. Sa iloa uma e i latou lenei upumoni taua: “Ua leai se isi ala po o ni auala e mafai ona faaolaina ai le tagata, ua nao i le toto togiola lava o Iesu Keriso, … e afio mai o ia e togiola le lalolagi” (Helamana 5:9).
O lea la, i lenei vaitau o le Kerisimasi, a o faamanatu e tagata talitonu i le lalolagi atoa le agalelei ma le alofa o le Atua i le auina mai o Lona Alo, ia mafaufau loloto i le ala ua faamalosia ai e le Tusi a Mamona lou faatuatua ia Keriso. A o e mafaufau i Lona soifua mai, mafaufau loloto pe aisea na Ia afio mai ai, ma pe na suia faapefea e Lona afio mai lou olaga. Ona mafai lea ona e maua le olioli moni o le Kerisimasi—o le meaalofa ua tuuina mai e Iesu Keriso ia te oe.
Manatu mo le Aoaoina i le Aiga ma i le Lotu
Na soifua mai Iesu Keriso e avea ma oʻu Faaola.
O se aga masani le faitau o le tala i le soifua mai o le Faaola o loo i le Feagaiga Fou i le vaitaimi o le Kerisimasi, ae e mafai foi ona e maua ni valoaga faagaeetia e uiga i lenei mea paia na tupu i le Tusi a Mamona. Mo se faataitaiga, o valoaga i le soifua mai ma galuega a le Faaola o loo maua i le 1 Nifae 11:13–36; Mosaea 3:5–10; ma le Helamana 14:1–13. O a ni uunaiga e uiga ia Iesu Keriso ua oo mai ia te oe ao e faitau i nei fuaitau ma manatunatu i uiga o faailoga o Lona soifua mai? E faapefea e molimau a nei perofeta ona faamalosia lau molimau ia Keriso ma Lana misiona?
O nisi nei o fautuaga e fesoasoani ia te oe e taulai atu ai ia Iesu Keriso i le taimi o le Kerisimasi:
Na e iloa e mafai ona e matamata i savali mai faigalotu talu ai o le Kerisimasi a le Au Peresitene Sili i le Potutusi o le Talalelei? Vaavaai mo i latou i le faaputuga o “Christmas Videos”. Mafaufau e faasoa atu nei savali ma musika e faasalalau atu ai le fiafia o le Kerisimasi.
Atonu foi e te fiafia ma lou aiga e faalogologo i vaega filifilia mai le faaputuga o “Christmas Music” i le Potutusi o le Talalelei.
Mafaufau e fuafua ni gaoioiga e mafai ona fai e lou aiga i aso e tau atu i le Kerisimasi ia lagona ai le Agaga o Keriso, e pei o le auauna atu i se tasi po o le usuina faatasi o viiga o le Kerisimasi. Tagai i le LighttheWorld.org mo nisi o manatu.
O le mafuaaga autu tatou te faamanatuina ai le soifua mai o Iesu Keriso ona o Lana taulaga togiola. Ona o lena taulaga, e mafai ai e Ia ona laveai i tatou mai le agasala ma le oti, faamafanafana i tatou i puapuaga, ma fesoasoani ia i tatou ia “faaatoatoaina ia te Ia” (Moronae 10:32). O le a se mea ua e aoao mai le Tusi a Mamona i lenei tausaga e uiga i le mana o le Faaola e togiola ai oe? E i ai ni tala po o ni aoaoga e tu matila ia te oe? Mafaufau po o a ni mea e aoao atu e faataitaiga nei ia te oe e uiga i le misiona togiola a le Faaola: 2 Nifae 2:6; Alema 7:7–13; 11:40; ma le Helamana 5:9; 14:16–17. O le a se mea ua e lagona le musuiaina e te faia e faaali atu ai lou agaga faafetai ia te Ia?
Ata
aikona o le seminare
O loo molimau le Tusi a Mamona ia Iesu Keriso.
“O Se Tasi Molimau ia Iesu Keriso” ua sili atu nai lo na o se soaautu mo le Tusi a Mamona; o se faamatalaga e uiga i lona faamoemoega e paia. Mafaufau loloto i mea e te aoaoina mai mau nei e uiga i le misiona a le Tusi a Mamona o le molimau ia Keriso: 1 Nifae 6:4; 19:18; ma le 2 Nifae 25:23, 26; 33:4, 10.
Mafaufau e tusifaamaumau i se apitalaaga po o a auala ua e latalata atili ai ia Keriso ona o le suesueina o le Tusi a Mamona i lenei tausaga. E ono mafai ona fesoasoani fautuaga nei:
“O se mea ua ou aoaoina pe lagonaina e uiga i le Faaola i le tausaga lenei o le …”
“O le aoao e uiga i le Faaola i le Tusi a Mamona na suia ai le ala na ou …”
“O le tagata [po o le tala] e sili ona ou fiafia i ai i le Tusi a Mamona na aoao mai ia te a’u, e faapea o le Faaola …”
Atonu e i ai se tasi o le a faamanuiaina e iloa ou lagona e uiga i le Tusi a Mamona. E mafai faapefea ona e faasoa atu ou aafiaga ma lau molimau? Atonu e te lagona le musuia e tuuina atu se kopi o se meaalofa o le Kerisimasi. O le polokalama o leThe Book of Mormon app ua faigofie ai ona faasoa atu.
Sa lisi e Epikopo Gérald Caussé ni upumoni mai le Tusi a Mamona e uiga ia Iesu Keriso (tagai “O Se Molimau Ola o le Keriso Soifua,” Liahona, Me 2020, 39–40). E mafai ona e tilotilo i lana lisi ma mafaufau loloto pe na faapefea ona suia nei upumoni taitasi—pe mafai foi ona suia—lou olaga.
Tagai foi Autu o le Talalelei, “Tusi a Mamona,” Potutusi o le Talalelei.
O Iesu Keriso o le meaalofa a le Tama Faalelagi ia te au.
Ina ia fesoasoani i lau fanau ia taulai atu i le meaalofa na tuuina mai e le Tama Faalelagi ia i tatou e ala i le auina mai o Lona Alo, e mafai ona e afifiina se ata o Iesu Keriso e pei o se meaalofa o le Kerisimasi. E mafai ona tou talanoa ma lau fanau e uiga i ni meaalofa o le Kerisimasi e sili ona fiafia i ai na latou mauaina pe faamoemoe e maua. Ona latou tatalaina lea o le ata o Keriso ma talanoa i auala ua avea ai o Ia o se meaalofa faapelepele mo i tatou. O se pese e pei o le “Na Ia Auina Mai Lona Alo” (Tusipese a Tamaiti, 20–21) e mafai ona faaopoopo i lenei talanoaga. Fesoasoani i lau fanau e sue fuaitau o le pese e faamatala ai faamanuiaga tatou te maua ona o le soifua mai o Iesu.
Na soifua mai Iesu Keriso e avea ma oʻu Faaola.
Atonu e fiafia lau fanau e faasoa atu ia te oe mea latou te iloa e uiga i le fanau mai o Iesu. O le Tusi Ata o le Talalelei o loo i ai ni ata e mafai ona fesoasoani ia i latou e faamatala ai le tala (tagai nu.28, 29, 30, 31). E mafai foi ona e tilotilo i ata o loo faaalia ai le soifuaga o le Faaola ma le taulaga togiola. Aisea na auina mai ai e le Tama Faalelagi ia Iesu Keriso?
Atonu foi e fiafia lau fanau e tusi a latou lava ata o le soifua mai ma galuega a Iesu. Atonu e mafai ona latou tusia se ata o mea o loo faamatalaina i le 1 Nifae 11:13–23; Mosaea 3:5–10; Helamana 14:1–13; ma le 3 Nifae 1:4–22. Ona mafai lea ona latou faasoa atu ia te oe mea o loo aoao mai e a latou ata e uiga ia Iesu Keriso.
Ina ia faamamafa atu o le Tusi Paia ma le Tusi a Mamona o loo aoao uma mai ai le soifua mai o Iesu, e mafai ona e lisiina mea na tutupu o loo faamatala mai i le Luka 2:4–14; Mataio 2:1–2; ma le 3 Nifae 1:15, 19–21. Ona mafai lea e lau fanau ona suʻe nei mau e iloa ai pe o a mea na tutupu i Peteleema, i Amerika, po o nofoaga uma ia e lua. Aisea tatou te faafetai ai i le avea o le Tusi a Mamona ma molimau lona lua o le soifua mai o Iesu?
E fiafia tamaiti i tala. O tala o se tasi lea o auala sili e fesoasoani ai i tamaiti e aʻoaʻo ma manatua upu moni. Ao e faasoa atu le tala i le fanau mai o Iesu, mafaufau foi e faasoa atu tala mai lou olaga na fesoasoani e faamalosia ai lou faatuatua i le Faaola.
O loo molimau le Tusi a Mamona ia Iesu Keriso.
A o tou faaiuina ma lau fanau tou suesuega o le Tusi a Mamona i lenei tausaga, atonu o se taimi lelei lea e fefaasoaai ai le tasi ma le isi i tala po o fuaitau tou te fiafia i ai mai lenei tusi paia. O le tilotilo i nisi o ata i le Sau, Mulimuli Mai ia te A’u po o Tala o le Tusi a Mamona e mafai ona fesoasoani i lau fanau e manatua ai mea sa latou aoaoina i lenei tausaga. Fesoasoani ia latou iloa mea o loo aoao mai e nei tala ia i tatou e uiga ia Iesu Keriso.
E mafai foi ona e tuu atu i lau fanau se ata o Iesu, pe tuu atu ia i latou e tusi ni a latou lava ata. Valaaulia i latou e uu i luga a latou ata i taimi uma latou te faalogo ai i le suafa o Keriso ao e faitau i le 2 Nifae 25:23, 26. Molimau atu o le Tusi a Mamona na tusia e fesoasoani ia i tatou ia “talitonu ia Keriso” (2 Nifae 25:23).
Mo nisi manatu, tagai i le lomiga o lenei masina o le mekasini o le Uo .
