O le faitau selau o tausaga talu ona faatamaiaina sa Iareto, sa maua ai e sa Nifae toega o mea na faaleagaina o lo latou nuu anamua. Faatasi ai ma nei mea na faaleagaina sa i ai se talafaamaumau lilo—o papatusi o “auro mao’i” ia sa “tumu i togitogiga,” ma o sa Nifae sa latou “naunau tele” e faitau i ai (Mosaea 8:9; 28:12). O le aso, ua ia te oe se faapuupuuga o lenei faamaumauga, ma ua ta’ua o le tusi a Eteru. Ina ua faitauina e sa Nifae, “sa faatumulia i latou i le faanoanoa” i le iloa ai o le pa’ū leaga tele o sa Iareto. “E ui i lea sa latou maua mai ai le malamalama tele, lea sa latou olioli ai. (Mosaea 28:12, 18). O oe foi, e mafai ona e maua ni taimi faanoanoa i lenei tusi. Ae e mafai foi ona e olioli i lenei meaalofa o le malamalama. E pei ona tusia e Moronae, “Na poloaiina ai au, … [e] tusia nei mea ina ia aveesea ai le leaga, ma ina ia oo mai ai le taimi e le mafai ai e Satani ona toe maua se mana i loto o le fanauga a tagata” (Eteru 8:26).
O le a taiala au e le Alii i la’u faigamalaga i le olaga faaletino.
O le a mafai ona e maua ni malamalamaaga faaleagaga pe a e faatusatusaina le malaga a sa Iareto e sopoia le vasa i lau malaga i le olaga nei. Mo se faataitaiga, o le a se mea ua tuuina mai e le Alii e faamalamalama ai lou auala e pei o maa i vaa o sa Iareto? O le a se mea e ono faatusa i ai vaa, po o matagi na “agi i le laueleele na folafolaina”? (Eteru 6:8). O le a se mea e mafai ona e aoao mai i faatinoga a sa Iareto ao le’i alu, ao alu, ma ina ua uma le faigamalaga? O faapefea ona taitai oe e le Alii i lou nuu folafolaina?
“Pepese atu viiga i le Alii.” Sa faaalia e sa Iareto lo latou lotofaafetai ma le alofa mo le Atua e ala i pese ma viiga (tagai Eteru 6:9). E mafai ona e vaavaai mo pe fatuina ni avanoa e faaaoga ai musika ma molimau mai le loto e vivii atu ai i le Atua i le aiga ma i le lotu. Mo se faataitaiga, atonu e talafeagai le usuina o se viiga o le vivii e pei ole “Praise the Lord with Heart and Voice” (Hymns, nu. 73) pe a suesueina le Eteru 6:1–12.
E ui lava ina sa pei na taatele le faamaualuga ma le amioleaga i le talafaasolopito o sa Iareto, ae o loo i ai foi ni faataitaiga o le lotomaualalo i mataupu nei—aemaise lava i le Eteru 6:5–18, 30; 9:28–35; ma le 10:1–2. O le mafaufau loloto i fesili nei, e mafai ona fesoasoani e te aoao ai mai nei faataitaiga: Aisea na faalotomaualalo ai e nei sa Iareto i latou lava i nei tulaga? Na faapefea ona latou faailoaina lo latou lotomaualalo? Na faapefea ona faamanuiaina i latou e le Atua o se taunuuga? Mafaufau i mea e mafai ona e faia ma le lotomalie e “savali ma le faamaualalalo i luma o le Alii” (Eteru 6:17) nai lo o le faamalosia e faamaualalo (tagai Mosaea 4:11–12; Alema 32:14–18).
Omataupu 7–11 o le Eteru ua aofia ai augatupulaga e le itiiti ifo ma le 28. E ui ina itiiti ni faamatalaga e mafai ona tuuina mai i se tamai avanoa, ae e vave lava ona aliae mai se mamanu e uiga i taunuuga o le taitaiga amiotonu ma le amioleaga. O le a se mea ua e aoaoina e uiga i le taitaiga mai faataitaiga—le lelei ma lelei—o tupu o loo lisi atu i lalo?
Na tuuina mai e Elder Dieter F. Uchtdorf se fautuaga aoga e uiga i le taitaiga i lana savali “O Lē Sili ia te Outou” (Liahona, Me 2017, 78–81). Mafaufau e suesue lenei savali—aemaise lava tala o loo ia faamatalaina—vaavaai mo mataupu faavae po o mamanu o le taitaiga faaKeriso. O anafea na e vaaia ai nei mataupu faavae po o mamanu o faaalia i tagata o ni taitai?
A o e mafaufau loloto i mea na e aoaoina, mafaufau i ni avanoa e te ono maua e taitai ai pe faatosina ai isi i lou aiga, lou nuu, valaauga i le Ekalesia, ma isi. E faapefea ona e atiina ae uiga o le taitaiga faaKeriso, e tusa lava pe leai sou tofiga faaletaitai patino?
Tagai foi Gospel Topics, “Serving in Church Callings,” Gospel Library; “Mataupu Faavae o le Taitaiga i le Ekalesia,” Tusitaulima Aoao: Auauna Atu i le O Le Ekalesia a Iesu Keriso o le Au Paia o Aso e Gata Ai, 4.2 (ChurchofJesusChrist.org).
Pe a faufau ni tagata e nānā faalilolilo a latou amioga leaga, ua latou aafia i se faapotopotoga faalilolilo. E faaopoopo atu i faapotopotoga faalilolilo o loo faamatalaina i le Eteru 8:7–18, e mafai ona maua isi faataitaiga i le Helamana 1:9–12; 2:2–11; 6:16–30; ma le Mose 5:29–33. Mafaufau e faatusatusa nei fuaiupu i le 2 Nifae 26:22–24, lea na faamatalaina ai e Nifae le ala e faia ai e le Alii Lana galuega. Aisea e te manatu ai na poloaiina Moronae e tusi mea sa ia faia e uiga i faapotopotoga faalilolilo?
O a ni mea ua e aoaoina mai le tusi a Eteru e mafai ona fesoasoani ia e maua ai faamanuiaga ua faamatalaina i le Eteru 8:26?
E mafai ona ou faatuatuaina le Tama Faalelagi e faamafanafana au pe a ou fefe.
E tofu tagata uma ma ni aso faigata—e oo lava i tamaiti laiti. Atonu e mafai ona e fesoasoani i lau fanau e sue upu ma fasifuaitau i le Eteru 6:1–12 o loo faaalia ai le ala na faatuatuaina ai e sa Iareto le Atua i nisi o aso matuai faigata lava ma taufaafefe. Mafaufau e faasoa atu i le tasi ma le isi nisi o aafiaga na fesoasoani ai le Atua ia te oe i taimi faigata o lou olaga.
O le manatuaina o mea na faia e le Alii e aumaia ai le lotofaafetai ma le filemu.
Ina ua taunuu ma le saogalemu i le nuu o le folafolaga, sa matuai faafetai lava sa Iareto ma na “tutulu i loimata o le olioli” (Eteru 6:12). E mafai ona e musuia lau fanau ia lagona le faafetai mo faamanuiaga a le Atua e ala i le fesoasoani ia i latou e sue fasifuaitau mai le Eteru 6:9, 12 o loo faaalia ai le ala na faaalia ai e sa Iareto lo latou faafetai i le Atua. Atonu latou te fiafia e pepese, e pei ona faia e sa Iareto, se pese e faaalia ai le lotofaafetai, e pei o le “E Alofa Lo’u Tama Faalelagi Ia Te Au” (Tusipese a Tamaiti, 16). Fai i lau fanau e taʻu mai nisi o mea latou te faafetai ai.
Atonu e mafai e lau fanau ona faitau le Eteru 6:30; 7:27; ma le 10:2 ma sue mea na manatua e nei tupu amiotonu. Na faapefea ona aafia ai le ala na latou taitaia ai o latou tagata? E mafai e oe ma lau fanau ona talanoaina auala e faamanatu atu ai ia te outou lava mea na faia e le Atua mo outou. Mo se faataitaiga, atonu e mafai ona latou tusia e uiga i ai pe tusi ni ata. Fautua atu ia latou faia se faiga masani o le tusi i lalo o faamanuiaga latou te matauina mai le Atua (tagai “O Remember, Remember” [vitio], Gospel Library).
E faamanuiaina a’u pe a ou mulimuli i le perofeta a le Atua.
Atonu o le a outou fiafia ma lau fanau e faatino nisi o mea na aoao mai e le perofeta tatou te faia. E mafai foi ona e faaliliuina i se taaloga lea e te mateina ai po o a mea e faatusa i ai taga. O lenei mea e mafai ona saunia ai lau fanau e talanoaina pe aisea e taua ai le mulimuli i le perofeta a le Atua. Ona mafai lea ona e faitauina le Eteru 7:24–27 e iloa ai po o le a le mea na tupu ina ua usitai tagata i le perofeta a le Atua. O faapefea ona faamanuiaina i tatou i le mulimuli i le perofeta o aso nei?
O le vaavaai mo mamanu o se tomai taua i le suesueina o tusitusiga paia. O le tusi a Eteru o loo i ai se mamanu faifai pea o loo faamamafa mai ai le alofa mutimutivale o le Alii. Ina ia fesoasoani i lau fanau ia maua lenei mamanu, valaaulia i latou e faitau le Eteru 9:28–35 ma le Eteru 11:5–8, ma vaavaai mo mea e tutusa ai tala e lua. O a mea tatou te aoaoina mai i nei tala? Atonu e mafai ona latou vaavaai mo ata i le Tusi Ata o le Talalelei o isi tagata i tusitusiga paia o e na salamo ma ua faamagaloina.
Mo nisi manatu, tagai i le lomiga o lenei masina o le mekasini o le Uo .
