“ວັນທີ 23–29 ເດືອນທັນວາ: ‘ພຣະອົງຈະສະເດັດມາໃນໂລກນີ້ເພື່ອໄຖ່ຜູ້ຄົນຂອງພຣະອົງ.’ ຄຣິດສະມາດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2023)
“ວັນທີ 23–29 ເດືອນທັນວາ. ຄຣິດສະມາດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2023)
ວັນທີ 23–29 ເດືອນທັນວາ: “ພຣະອົງຈະສະເດັດມາໃນໂລກນີ້ເພື່ອໄຖ່ຜູ້ຄົນຂອງພຣະອົງ”
ຄຣິດສະມາດ
ຈາກນີໄຟ ເຖິງ ໂມໂຣໄນ, ສາດສະດາທຸກຄົນຂອງພຣະຄຳພີມໍມອນໄດ້ເຮັດຄຳໝັ້ນສັນຍາຕໍ່ຈຸດປະສົງທີ່ສັກສິດ ຊຶ່ງຖືກສະຫລຸບຢູ່ໃນ ໜ້າວິເຄາະສະບັບ ຂອງພຣະຄຳພີ: “ເພື່ອໃຫ້ [ຜູ້ຄົນທັງປວງ] ຮັບຮູ້ວ່າ ພຣະເຢຊູຄື ພຣະຄຣິດ.” ສາດສະດາຄົນໜຶ່ງໄດ້ເຫັນພຣະອົງເປັນວິນຍານຢູ່ໃນສະຫວັນ, ແລະ ອີກຄົນໜຶ່ງໄດ້ເຫັນການປະຕິບັດສາດສະໜາກິດຂອງພຣະອົງໃນຊ່ວງມະຕະ ຢູ່ໃນພາບນິມິດ. ຄົນໜຶ່ງໄດ້ຢືນຢູ່ເທິງກຳແພງ ປະກາດເຄື່ອງໝາຍຂອງການກຳເນີດຂອງພຣະອົງ ແລະ ການສິ້ນພຣະຊົນຂອງພຣະອົງ, ແລະ ອີກຄົນໜຶ່ງໄດ້ຄຸເຂົ່າຢູ່ຕໍ່ພຣະພັກຂອງພຣະອົງທີ່ໄດ້ຟື້ນຄືນພຣະຊົນແລ້ວ, ຈັບບາຍຮອຍແຜຢູ່ໃນພຣະຫັດ, ພຣະບາດ, ແລະ ຂ້າງຂອງພຣະອົງ. ພວກເພິ່ນທັງໝົດຮູ້ເຖິງຄວາມຈິງທີ່ສຳຄັນນີ້ວ່າ: “ບໍ່ມີທາງ ຫລື ວິທີອື່ນໃດເລີຍທີ່ມະນຸດຈະລອດໄດ້, ນອກຈາກທາງໂລຫິດທີ່ຊົດໃຊ້ແທນຂອງພຣະເຢຊູຄຣິດ, ຜູ້ … ໄດ້ມາໄຖ່ໂລກ” (ຮີລາມັນ 5:9).
ສະນັ້ນ ລະຫວ່າງເທດສະການຄຣິດສະມາດນີ້, ຂະນະທີ່ຜູ້ເຊື່ອຕະຫລອດທົ່ວໂລກສະເຫລີມສະຫລອງພຣະກະລຸນາທິຄຸນ ແລະ ຄວາມຮັກຂອງພຣະເຈົ້າ ໃນການສົ່ງພຣະບຸດຂອງພຣະອົງມາ, ໃຫ້ໄຕ່ຕອງວິທີທີ່ພຣະຄຳພີມໍມອນໄດ້ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະຄຣິດແນວໃດ. ຂະນະທີ່ທ່ານຄິດກ່ຽວກັບການກຳເນີດຂອງພຣະອົງ, ໃຫ້ໄຕ່ຕອງເຖິງເຫດຜົນທີ່ພຣະອົງໄດ້ສະເດັດມາ ແລະ ການສະເດັດມາຂອງພຣະອົງໄດ້ປ່ຽນແປງຊີວິດຂອງທ່ານແນວໃດ. ແລ້ວທ່ານຈະສາມາດປະສົບຄວາມຊື່ນຊົມທີ່ແທ້ຈິງຂອງບຸນຄຣິດສະມາດ—ຂອງປະທານທີ່ພຣະເຢຊູຄຣິດໄດ້ປະທານໃຫ້ທ່ານ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະເຢຊູຄຣິດໄດ້ມາກຳເນີດ ເພື່ອເປັນພຣະຜູ້ຊ່ວຍໃຫ້ລອດຂອງເຮົາ.
ມັນເປັນປະເພນີທີ່ຈະອ່ານເລື່ອງການກຳເນີດຂອງພຣະຜູ້ຊ່ວຍໃຫ້ລອດ ຢູ່ໃນພຣະຄຳພີໃໝ່ ໃນຊ່ວງເວລາຂອງບຸນຄຣິດສະມາດ, ແຕ່ທ່ານກໍສາມາດຊອກຫາຄຳທຳນາຍທີ່ປະທັບໃຈກ່ຽວກັບເຫດການທີ່ສັກສິດນີ້ ຢູ່ໃນພຣະຄຳພີມໍມອນນຳອີກ. ຍົກຕົວຢ່າງ, ການທຳນາຍເຖິງການກຳເນີດ ແລະ ການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດ ກໍພົບເຫັນຢູ່ໃນ 1 ນີໄຟ 11:13–36; ໂມໄຊຢາ 3:5–10; ແລະ ຮີລາມັນ 14:1–13. ຄວາມປະທັບໃຈຢ່າງໃດແດ່ກ່ຽວກັບພຣະເຢຊູຄຣິດທີ່ມາສູ່ທ່ານ ຂະນະທີ່ທ່ານອ່ານຂ່າວສານເຫລົ່ານີ້ ແລະ ໄຕ່ຕອງກ່ຽວກັບຄວາມໝາຍທີ່ເປັນໄປໄດ້ຂອງສັນຍາລັກເຖິງການກຳເນີດຂອງພຣະອົງ? ປະຈັກພະຍານຂອງສາດສະດາ ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານກ່ຽວກັບພຣະຄຣິດ ແລະ ພາລະກິດຂອງພຣະອົງແນວໃດ?
ຕໍ່ໄປນີ້ແມ່ນຄຳແນະນຳບາງຢ່າງອື່ນອີກ ເພື່ອຊ່ວຍໃຫ້ທ່ານສຸມໃຈໃສ່ພຣະເຢຊູຄຣິດໃນຊ່ວງເວລາຄຣິດສະມາດ:
-
ທ່ານຮູ້ບໍວ່າ ທ່ານສາມາດຮັບຊົມຂ່າວສານຈາກ ລາຍການໃຫ້ຄຳດົນໃຈຂອງຝ່າຍປະທານສູງສຸດ ເນື່ອງໃນໂອກາດເທດສະການບຸນຄຣິດສະມາດ ໃນຫ້ອງສະໝຸດພຣະກິດຕິຄຸນ? ໃຫ້ຊອກຫາມັນຢູ່ໃນບ່ອນເກັບກຳ “Christmas Videos”. ໃຫ້ຄິດທີ່ຈະແບ່ງປັນຂ່າວສານ ແລະ ເພງເຫລົ່ານີ້ ເພື່ອຂະຫຍາຍກຳລັງໃຈຊ່ວງຄຣິດສະມາດ.
-
ທ່ານ ແລະ ຄອບຄົວຂອງທ່ານອາດມັກຟັງເພງຈາກບ່ອນເກັບກຳ “Christmas Music” ນຳອີກ ໃນຫ້ອງສະໝຸດພຣະກິດຕິຄຸນ.
-
ໃຫ້ພິຈາລະນາວາງແຜນກິດຈະກຳທີ່ທ່ານ ຫລື ຄອບຄົວຂອງທ່ານສາມາດເຮັດໃນຫລາຍມື້ກ່ອນວັນຄຣິດສະມາດທີ່ຈະມາເຖິງນີ້ ເພື່ອຈະໄດ້ຮູ້ສຶກເຖິງພຣະວິນຍານຂອງພຣະຄຣິດ, ດັ່ງເຊັ່ນການຮັບໃຊ້ບາງຄົນ ຫລື ການຮ້ອງເພງຄຣິດສະມາດນຳກັນ. ເບິ່ງ LighttheWorld.org ສຳລັບແນວຄິດ.
ເບິ່ງ ມັດທາຍ 1:18–25; 2; ລູກາ 2; 3 ນີໄຟ 1:4–22; “ໄກແສນໄກຢູ່ທີ່ຮາບຢູດີຢາ,” ເພງສວດ ແລະ ເພງຂອງເດັກນ້ອຍ, 56 ນຳອີກ.
ພຣະເຢຊູຄຣິດເປັນພຣະຜູ້ໄຖ່ຂອງໂລກ.
ເຫດຜົນຕົ້ນຕໍທີ່ເຮົາສະເຫລີມສະຫລອງການກຳເນີດຂອງພຣະເຢຊູຄຣິດແມ່ນຍ້ອນການເສຍສະລະຊົດໃຊ້ຂອງພຣະອົງ. ເພາະການເສຍສະລະນັ້ນ, ພຣະອົງຈຶ່ງສາມາດຊ່ວຍເຮົາໃຫ້ລອດຈາກບາບ ແລະ ຄວາມຕາຍ, ປອບໂຍນເຮົາໃນຄວາມທຸກຍາກລຳບາກ, ແລະ ຊ່ວຍເຫລືອເຮົາ “ໃຫ້ເປັນຄົນດີພ້ອມໃນພຣະອົງ” (ໂມໂຣໄນ 10:32). ທ່ານໄດ້ຮຽນຮູ້ຫຍັງແດ່ຈາກພຣະຄຳພີມໍມອນໃນປີນີ້ກ່ຽວກັບອຳນາດຂອງພຣະຜູ້ຊ່ວຍໃຫ້ລອດ ທີ່ຈະໄຖ່ທ່ານ? ມີເລື່ອງລາວ ຫລື ຄຳສອນໃດບໍທີ່ໂດດເດັ່ນສຳລັບທ່ານ? ໃຫ້ພິຈາລະນາສິ່ງທີ່ຂໍ້ພຣະຄຳພີດັ່ງຕໍ່ໄປນີ້ສິດສອນທ່ານກ່ຽວກັບພາລະກິດແຫ່ງການໄຖ່ຂອງພຣະຜູ້ຊ່ວຍໃຫ້ລອດ: 2 ນີໄຟ 2:6; ແອວມາ 7:7–13; 11:40; ແລະ ຮີລາມັນ 5:9; 14:16–17. ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ເພື່ອສະແດງໃຫ້ພຣະອົງເຫັນຄວາມກະຕັນຍູຂອງທ່ານ?
ຮູບພາບໄອຄອນຫ້ອງຮຽນສາດສະໜາ ພຣະຄຳພີມໍມອນເປັນພະຍານເຖິງພຣະເຢຊູຄຣິດ.
“ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ” ແມ່ນເກີນກວ່າຫົວເລື່ອງຍ່ອຍເທົ່ານັ້ນສຳລັບພຣະຄຳພີມໍມອນ; ມັນເປັນບົດຄວາມເຖິງຈຸດປະສົງແຫ່ງສະຫວັນຂອງມັນ. ໃຫ້ໄຕ່ຕອງເຖິງສິ່ງທີ່ທ່ານຮຽນຮູ້ຈາກຂໍ້ພຣະຄຳພີດັ່ງຕໍ່ໄປນີ້ ກ່ຽວກັບພາລະກິດຂອງພຣະຄຳພີມໍມອນ ໃນການເປັນພະຍານເຖິງພຣະຄຣິດ: 1 ນີໄຟ 6:4; 19:18; ແລະ 2 ນີໄຟ 25:23, 26; 33:4, 10.
ໃຫ້ຄິດທີ່ຈະບັນທຶກວິທີທີ່ທ່ານສຶກສາພຣະຄຳພີມໍມອນໃນປີນີ້ ໄດ້ເຮັດໃຫ້ທ່ານເຂົ້າໃກ້ຊິດພຣະຄຣິດຫລາຍກວ່າເກົ່າແນວໃດ. ການກະຕຸ້ນດັ່ງຕໍ່ໄປນີ້ອາດຊ່ວຍໄດ້:
-
“ບາງສິ່ງທີ່ເຮົາຮຽນຮູ້ ຫລື ຮູ້ສຶກກ່ຽວກັບພຣະຜູ້ຊ່ວຍໃຫ້ລອດ ໃນປີນີ້ແມ່ນ …”
-
“ການຮຽນຮູ້ກ່ຽວກັບພຣະຜູ້ຊ່ວຍໃຫ້ລອດໃນພຣະຄຳພີມໍມອນໄດ້ປ່ຽນແປງວິທີທີ່ເຮົາ …”
-
“ບຸກຄົນ [ຫລື ເລື່ອງລາວ] ທີ່ເຮົາມັກຢູ່ໃນພຣະຄຳພີມໍມອນ ສິດສອນເຮົາວ່າ ພຣະຜູ້ຊ່ວຍໃຫ້ລອດ …”
ບາງທີອາດມີຄົນໃດຄົນໜຶ່ງທີ່ຈະໄດ້ຮັບພອນໃນການຮູ້ຈັກວ່າ ທ່ານຮູ້ສຶກແນວໃດກ່ຽວກັບພຣະຄຳພີມໍມອນ. ທ່ານຈະແບ່ງປັນປະສົບການ ແລະ ປະຈັກພະຍານຂອງທ່ານແນວໃດ? ທ່ານອາດຮູ້ສຶກໄດ້ຮັບການດົນໃຈໃຫ້ມອບພຣະຄຳພີມໍມອນເປັນຂອງຂວັນຄຣິດສະມາດ. ແອັບພຣະຄຳພີມໍມອນ ເຮັດໃຫ້ການແບ່ງປັນງ່າຍຂຶ້ນ.
ອະທິການແຈໂຣ ໂຄເຊ ໄດ້ລະບຸຄວາມຈິງຫລາຍຢ່າງຈາກພຣະຄຳພີມໍມອນກ່ຽວກັບພຣະເຢຊູຄຣິດ (ເບິ່ງ “A Living Witness of the Living Christ,” Liahona, May 2020, 39–40). ທ່ານອາດຢາກເບິ່ງສິ່ງທີ່ເພິ່ນລະບຸ ແລະ ໄຕ່ຕອງວ່າ ຄວາມຈິງແຕ່ລະຢ່າງເຫລົ່ານີ້ໄດ້ປ່ຽນແປງ—ຫລື ສາມາດປ່ຽນແປງ—ຊີວິດຂອງທ່ານແນວໃດ.
ເບິ່ງ Gospel Topics, “Book of Mormon,” ຫ້ອງສະໝຸດພຣະກິດຕິຄຸນ ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເພາະວັນອາທິດນີ້ເປັນວັນອາທິດທີຫ້າຂອງເດືອນ, ຄູສອນປະຖົມໄວຖືກຊຸກຍູ້ໃຫ້ນຳໃຊ້ກິດຈະກຳການຮຽນຮູ້ທີ່ຢູ່ໃນ “ພາກຫ້ອຍທ້າຍ ຂ: ການກະກຽມເດັກນ້ອຍໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.”
ພຣະເຢຊູຄຣິດແມ່ນຂອງປະທານຈາກພຣະບິດາເທິງສະຫວັນສຳລັບເຮົາ.
-
ເພື່ອຊ່ວຍລູກໆຂອງທ່ານເນັ້ນເລື່ອງຂອງປະທານທີ່ພຣະບິດາເທິງສະຫວັນປະທານໃຫ້ເຮົາ ໂດຍການສົ່ງພຣະບຸດຂອງພຣະອົງມາ, ທ່ານສາມາດຫໍ່ຮູບພຣະເຢຊູຄຣິດ ຄືກັບວ່າພຣະຄຣິດເປັນຂອງຂວັນ. ທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບຂອງຂວັນຄຣິດສະມາດທີ່ພວກທ່ານມັກ ທີ່ໄດ້ຮັບ ຫລື ຫວັງຈະໄດ້ຮັບ. ແລ້ວພວກເຂົາສາມາດເປີດຫໍ່ຮູບພຣະຄຣິດ ແລະ ສົນທະນາວິທີທີ່ພຣະອົງໄດ້ເປັນຂອງຂວັນທີ່ມີຄ່າສຳລັບເຮົາແນວໃດ. ເພງເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ສາມາດເພີ່ມໃສ່ການສົນທະນານີ້. ຊ່ວຍລູກໆຂອງທ່ານໃຫ້ພົບວະລີໃນເພງທີ່ບັນຍາຍພອນທີ່ເຮົາມີ ຍ້ອນການກຳເນີດຂອງພຣະເຢຊູ.
ພຣະເຢຊູຄຣິດໄດ້ມາກຳເນີດເພື່ອເປັນພຣະຜູ້ຊ່ວຍໃຫ້ລອດຂອງເຮົາ.
-
ລູກໆຂອງທ່ານອາດຈະມັກແບ່ງປັນສິ່ງທີ່ພວກເຂົາຮູ້ຈັກກ່ຽວກັບການກຳເນີດຂອງພຣະເຢຊູກັບທ່ານ. ປຶ້ມຮູບພຣະກິດຕິຄຸນ ມີຮູບພາບຫລາຍໃບທີ່ສາມາດຊ່ວຍໃຫ້ພວກເຂົາເລົ່າເລື່ອງລາວ (ເບິ່ງ ເລກທີ 28, 29, 30, 31). ພວກທ່ານກໍສາມາດເບິ່ງຮູບພາບທີ່ພັນລະນາເຖິງພຣະຊົນຊີບ ແລະ ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດນຳອີກ. ເປັນຫຍັງພຣະບິດາເທິງສະຫວັນຈຶ່ງໄດ້ສົ່ງພຣະເຢຊູຄຣິດມາ?
ຮູບພາບທູດສະຫວັນ -
ລູກໆຂອງທ່ານອາດຈະມັກແຕ້ມຮູບດ້ວຍຕົວເອງກ່ຽວກັບການກຳເນີດ ແລະ ການປະຕິບັດສາດສະໜາກິດຂອງພຣະເຢຊູນຳອີກ. ບາງທີພວກເຂົາສາມາດແຕ້ມຮູບທີ່ບັນຍາຍໃນ 1 ນີໄຟ 11:13–23; ໂມໄຊຢາ 3:5–10; ຮີລາມັນ 14:1–13; ແລະ 3 ນີໄຟ 1:4–22. ແລ້ວພວກເຂົາສາມາດແບ່ງປັນກັບທ່ານວ່າ ຮູບພາບຂອງພວກເຂົາສິດສອນຫຍັງແດ່ກ່ຽວກັບພຣະເຢຊູຄຣິດ.
-
ເພື່ອເນັ້ນໜັກວ່າພຣະຄຣິສຕະທຳຄຳພີ ແລະ ພຣະຄຳພີມໍມອນສິດສອນກ່ຽວກັບການກຳເນີດຂອງພຣະເຢຊູ, ທ່ານສາມາດຂຽນລາຍການທີ່ບັນຍາຍໄວ້ຢູ່ໃນ ລູກາ 2:4–14; ມັດທາຍ 2:1–2; ແລະ 3 ນີໄຟ 1:15, 19–21. ແລ້ວລູກໆຂອງທ່ານສາມາດຄົ້ນຫາຂໍ້ພຣະຄຳພີເຫລົ່ານີ້ ເພື່ອພິຈາລະນາວ່າ ເຫດການໃດທີ່ໄດ້ເກີດຂຶ້ນໃນເບັດເລເຮັມ, ໃນອາເມຣິກາ, ຫລື ທັງສອງ. ເປັນຫຍັງເຮົາຈຶ່ງຂອບພຣະໄທທີ່ມີພຣະຄຳພີມໍມອນ ເປັນພະຍານທີສອງເຖິງການກຳເນີດຂອງພຣະເຢຊູ?
ເດັກນ້ອຍມັກເລື່ອງເລົ່າ. ເລື່ອງເລົ່າເປັນວິທີໜຶ່ງທີ່ດີທີ່ສຸດ ໃນການຊ່ວຍໃຫ້ເດັກນ້ອຍຮຽນຮູ້ ແລະ ຈື່ຈຳຄວາມຈິງ. ຂະນະທີ່ທ່ານແບ່ງປັນເລື່ອງລາວການກຳເນີດຂອງພຣະເຢຊູ, ໃຫ້ພິຈາລະນາທີ່ຈະແບ່ງປັນເລື່ອງລາວຈາກຊີວິດຂອງທ່ານ ທີ່ໄດ້ຊ່ວຍເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະຜູ້ຊ່ວຍໃຫ້ລອດນຳອີກ.
ພຣະຄຳພີມໍມອນເປັນພະຍານເຖິງພຣະເຢຊູຄຣິດ.
-
ຂະນະທີ່ທ່ານ ແລະ ລູກໆຂອງທ່ານສະຫລຸບການສຶກສາພຣະຄຳພີມໍມອນຂອງພວກທ່ານໃນປີນີ້, ມັນອາດເປັນເວລາທີ່ດີທີ່ຈະແບ່ງປັນເລື່ອງລາວ ຫລື ຂໍ້ພຣະຄຳພີທີ່ພວກທ່ານມັກ ຈາກປຶ້ມທີ່ສັກສິດນີ້ນຳກັນ. ການເບິ່ງຮູບພາບບາງອັນໃນປຶ້ມ ຈົ່ງຕາມເຮົາມາ ຫລື ເລື່ອງພຣະຄຳພີມໍມອນ ສາມາດຊ່ວຍໃຫ້ລູກໆຂອງທ່ານຈື່ຈຳສິ່ງທີ່ພວກເຮົາໄດ້ຮຽນຮູ້ໃນປີນີ້. ຊ່ວຍໃຫ້ພວກເຂົາເຫັນສິ່ງທີ່ເລື່ອງລາວເຫລົ່ານີ້ສິດສອນເຮົາກ່ຽວກັບພຣະເຢຊູຄຣິດແນວໃດ.
-
ທ່ານກໍຍັງສາມາດມອບຮູບພຣະເຢຊູໃຫ້ລູກໆຂອງທ່ານ, ຫລື ປ່ອຍໃຫ້ພວກເຂົາແຕ້ມເອງ. ເຊື້ອເຊີນພວກເຂົາໃຫ້ຍົກຮູບຂອງພວກເຂົາຂຶ້ນທຸກເທື່ອທີ່ພວກເຂົາໄດ້ຍິນພຣະນາມຂອງພຣະເຢຊູ ຂະນະທີ່ທ່ານອ່ານ 2 ນີໄຟ 25:23, 26. ເປັນພະຍານວ່າ ພຣະຄຳພີມໍມອນໄດ້ຖືກຂຽນຂຶ້ນເພື່ອຊ່ວຍໃຫ້ເຮົາ “ເຊື່ອໃນພຣະຄຣິດ” (2 ນີໄຟ 25:23).
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Nephi’s Vision of the Virgin Mary [ພາບນິມິດຂອງນີໄຟກ່ຽວກັບນາງມາຣີ ຍິງສາວພົມມະຈາຣີ], ໂດຍ ຈູດິດ ເອ ເມີ