Faaogaina o le Sau, Mulimuli Mai ia te Au—Mo le Peraimeri

O le fale e tatau ona avea ma totonugalemu o le aoaoina o le talalelei. E moni lenei mea mo oe ma mo tamaiti e te faiaoga ai. A o e tapenapena e aoao atu, amata i le maua o lou lava poto masani i tusitusiga paia. O lau tapenaga aupito taua o le a tulai mai a o e sailia musumusuga a le Agaga Paia.

Sau, Mulimuli Mai ia te Au—Mo Tagata Taitoatasi ma Aiga o se vaega taua foi o lau tapenapenaga. O le a fesoasoani e maua ai sou malamalamaaga loloto i mataupu faaleaoaoga faavae o loo maua i tusitusiga paia.

I le taimi o au tapenapenaga, o le a oo mai mafaufauga ma uunaiga ia te oe e uiga i tamaiti e te faiaoga ai. O le a e maua malamalamaaga i le ala o le a manuia ai o latou olaga i mataupu faavae o i tusitusiga paia. O le a taialaina oe e musuia i latou e sue na mataupu faavae a o latou aoao mai mau mo i latou lava ma o latou aiga. Manatua ia nofouta i tamaiti atonu o tulaga o o latou aiga atonu e le lagolagoina ai le suesue e le aunoa o le aiga i tusitusiga paia.

A o e tapenapena e aoao atu, e mafai ona e maua se musumusuga faaopoopo i le suesueina o otootoga i lenei punaoa. Aua e te mafaufau faapea o nei manatu o ni sitepu e tatau ona faia ae ua na o ni fautuaga e amoti ai au lava musumusuga. Ua e iloa nei tamaiti, ma e silafia foi i latou e le Alii—e aofia ai ma mea latou te manaomia ma mea e mafai ona latou malamalama ai. O le Ia musuia oe i auala sili e aoao atu ai ma faamanuiaina ai tamaiti.

E tele isi mau punaoa o loo i ai a o e tapenapena, e aofia ai manatu o i le Sau, Mulimuli Mai ia te Au—Mo Tagata Taitoatasi ma Aiga ma mekasini a le Ekalesia. Mo nisi faamatalaga e uiga i nei punaoa, tagai Punaoa Faaopoopo mo le Aoaoina o Tamaiti.”

• Ua i ai i matua le tiutetauave autu e aoao a latou fanau. I le avea ai o se faiaoga, ua ia te oe se tiutetauave taua e lagolago, faamalosiau, ma fausia i luga o le aoaoina o le talalelei i le fale. Ia nofouta i tamaiti e le aoaoina e o latou matua le talalelei i le fale. Ia faaaofia tamaiti uma i talanoaga o le talalelei tusa lava po o a tulaga o o latou aiga.

• E lelei le fai faafia. E sili ona lelei le aoaoina e tamaiti o upumoni o le talalelei pe a aoao atu nei upumoni i le fai faafia o ni gaoioiga eseese. A e iloa se gaoioiga e aoao mai ai e lelei i tamaiti, fuafua e toe fai ma toe fai, aemaise pe a o e faiaoga i tamaiti laiti ifo. E mafai foi ona e toeiloiloina se gaoioiga mai se lesona talu ai.

• E finagalo le Tama Faalelagi ia faamanuiaina oe o se faiaoga. Ua Ia saunia le tele o punaoa e fesoasoani ia faamanuiaina oe, e aofia ai ma fonotaga faaaufono a faiaoga. I na fonotaga e mafai ai ona outou fefautuaai ma isi faiaoga e uiga i soo se luitau e ono fetaiai ma oe. E mafai foi ona e talanoaina ma faaa’oa’o ia mataupu faavae o le aoao atu faapei o Keriso.

• Afai o e faiaoga i tamaiti laiti ifo ma e manaonia se fesoasoani faaopoopo, tagai i le “Taulimaina o Manaoga o Tamaiti Laiti Ifo” i le punaoa lenei.

• O le punaoa lenei e aofia ai otootoga mo vaiaso taitasi o le tausaga vagana ai Aso Sa e lua e faia ai konafesi aoao. I Aso Sa e le faia ai le Peraimeri ona o loo fai ia konafesi faalesiteki po o nisi mafuaaga, e mafai e aiga ona faaauau le faitauga o le Feagaiga Fou i le fale e fua i le faasologa ua otooto atu. Ina ia tausisia le faasologa o lau vasega Peraimeri, e mafai ona e filifili e faamisi se lesona pe tuufaatasi ni lesona se lua. Ina ia aloese mai le fenumiai, e mafai e peresitene o le Peraimeri ona vave fautuaina faiaoga e uiga i nei fetuunaiga.

Ata

o se tina o loo fesoasoani i tamaiti