Taulimaina o Manaoga o Tamaiti Laiti Ifo

Ua saunia tamaiti laiti ma ua naunau e aoao le talalelei pe afai e tuuina atu i se ala e mafai ona latou malamalama ai. Afai e te faiaoga i tamaiti laiti ifo, mafaufau i gaoioiga nei e mafai ona fesoasoani ia i latou e aoao (o nisi tamaiti matutua atu e ono manuia ai foi latou i nei gaoioiga):

• Faalogologo i pe faatino se tala. E fiafia lava tamaiti laiti i tala—mai tusitusiga paia, mai lou olaga, mai le talafaasolopito o le Ekalesia, pe mai mekasini a le Ekalesia. Vaavaai mo auala e faaaofia ai i latou i le faamatalaina o tala. E mafai ona latou uuina i luga ata po o meafaitino, tusi ata o mea latou te faalogo i ai, faatino mai le tala, pe fesoasoani i le faamatalaina o le tala. Fesoasoani i tamaiti ia iloa upumoni o le talalelei i tala e te faasoa atu.

• Faitau se mau. Atonu e le mafai e tamaiti laiti ona faitau tele, ae e mafai lava ona e faagauai mai i latou e aoao mai tusitusiga paia. E te ono manaomia le taulai atu i se fuaiupu se tasi, fasifuaitau autu, po o upu. A o e faitauina leotele se mau, e mafai ona e valaaulia tamaiti e tutu i luga pe sii o latou lima pe a latou faalogo i se upu po o se fasifuaitau patino e te manao e taulai i ai. Atonu foi e mafai ona latou taulotoina ni fasifuaitau pupuu mai mau pe a latou faia faafia. A o latou faalogo i le upu a le Atua, o le a latou lagonaina le Agaga.

• Ia mataala. Talu ai o tamaiti laiti e tele lava ina tiotio, fuafua ni auala e tuu ai i latou e feofeoai—savali faafitafita i mea e tutu ai, osooso, tafu, faanounou, savalivali, po o isi taga e fesootai i se mataupu faavae po o se tala o loo e aoao atu. O nei taga e mafai foi ona aoga pe a outou pepese faatasi.

• Tilotilo i se ata pe matamata foi se vitio. A e faaali atu se ata i tamaiti po o se vitio e fesootai i se mataupu faavae o le talalelei po o se tala faatusi paia, fai i ai ni fesili e fesoasoani latou te aoao ai mai mea o latou vaai i ai. Mo se faataitaiga, e mafai ona e fesili, “O le a le mea lea e tupu i le ata lea po o le vitio? O le a sou lagona i ai?” Biblevideos.lds.org, medialibrary.lds.org, ma le children.lds.org o ni nofoaga lelei ia e sue ai ni vitio.

• Usuina Viiga ma pese mai le Tusipese a Tamaiti e aoao atu ai ia aoaoga faavae ma le mamana. Faaaoga le faasino autu o loo i tua o le Tusipese a Tamaiti e sue ai pese e fetaui i mataupu faavae o le talalelei o loo e aoao atu. Fesoasoani i tamaiti e faafesootai le savali o pese io latou olaga. Mo se faataitaiga, e mafai ona e faia fesili e uiga i upu po o fasifuaiupu o le pese. E le gata i le usuina o pese, ae e mafai foi e tamaiti ona fai ia taga e o faatasi ma pese pe tau foi ina faalogologo i pese e fai ma musika e tata i tua atu, a o latou faia isi gaoioiga.

• Faasoa atu ni aafiaga Atonu e le tele ni mea e faasoa mai e tamaiti laiti ifo e pei o tamaiti matutua atu, ae a e tuu atu ia i latou se taitaiga patino, e mafai lava ona latou faasoa mai o latou lagona ma aafiaga i mea o latou aoaoina.

• Fatufatu E mafai e tamaiti ona fau, tusi ata, pe valivali se mea e fesootai ma le tala po o le mataupu faavae o loo latou aoaoina. Fautuaina i latou e ave mea sa latou fatufatuina i le fale ma faasoa i tagata o o latou aiga e fesoasoani ai i tamaiti e manatua mea sa latou aoaoina.

• Auai e faatino lesona faatino E mafai ona fesoasoani sina lesona faatino faigofie i tamaiti e malamalama ai i se mataupu faavae o le talalelei e faigata ona malamalama ai. A faaaoga ni lesona faatino, sue ni auala e auai ai tamaiti i le faatinoina. O le a tele atu mea latou te aoaoina ai mai se aafiaga fefaasoaai nai lo le na ona matamata i se faataitaiga.

• Faatino i taga A faatino i taga e tamaiti se mea latou te ono fetaiai i le olaga moni, o le a sili ona latou malamalama i le ala e faaaoga ai se mataupu faavae o le talalelei i o latou olaga.

• Faifaafia ia gaoioiga. Atonu e moomia mo tamaiti laiti ifo ona faalogo faafia i manatu faavae ina ia malamalama ai. Aua le fefe e faifaafia ia tala po o gaoioiga, tusa lava pe o le lesona lava e tasi. Mo se faataitaiga, e mafai ona e faasoa atu se tala faatusi paia faafia i ni auala eseese i le taimi o le lesona—faitau mai tusitusiga paia, aotele i au lava upu, faaali se vitio, tuu i tamaiti e fesoasoani atu ia te oe e faamatala le tala, valaaulia i latou e faatino mai le tala, ma isi mea. Afai e toe fai foi i le fale se gaoioiga sa faaaoga i le vasega, o le toe faia o le a fesoasoani i tamaiti e aoao ma manatua.

• Talanoa ma isi. O loo atia’e e tamaiti ni tomai faaagafesootai ma e tele lava ina latou fiafia e aoao ma taaalo ma a latou paaga. Fatufatu ni avanoa mo i latou e fefaasoaai ai, feauauai, ma galulue faatasi a o latou aoao.

• Auai e faatino i ni gaoioiga eseese. E masani lava o tamaiti laiti ifo e fiafia puupuu, ma e ese foi a latou aga e aoao ai. Faaaoga ni gaoioiga eseese, ma mata’itu faailoga e iloa ai ua manaomia e tamaiti se suiga o le fua. Mo se faataitaiga, atonu e moomia ona e fesuia’i soo i le va o gaoioiga lemu ma gaoioiga tiotio.

O se vaega o lau matafaioi o se faiaoga o tamaiti laiti ifo—e faaopoopo i le aoao atu o mataupu faavae o le talalelei—o le fesoasoani lea i tamaiti e aoao pe faapefea ona auai lelei i se vasega i le Lotu. Mo se faataitaiga, atonu e manaomia lo latou aoao e uiga i le feauaua’i, fefaasoaai, faaaloalo i isi, ma isi mea faapena. O nisi faiaoga latou te fatufatuina siata ma ni tofiga mo tamaiti taitasi e auai e faatino i le vasega i se ala patino (e pei o le faia o se tatalo, uuina se ata, pe tufatufa foi ni pepa). E mafai ona fesuisuiai tofiga i vaiaso taitasi. E fesoasoani lenei mea e feauauai ai tamaiti ma taulai atu i amioga talafeagai i le potuaoga.

O tamaiti—aemaise lava o tamaiti laiti ifo—e tele ina manuia mai se faiga masani, e mafai ona taulimaina. Talu ai o tamaiti laiti e fiafia puupuu ma o nisi taimi e tauivi ai e taulai i se vasega atoa, e masani lava e sili pe afai o lea faiga e aofia ai ni fesuiaiga e fai soo mai se ituaiga o gaoioiga i se isi. Mo se faataitaiga, o le faiga a lau vasega e aofia ai malologa i nisi taimi e fai se taaloga, valivali se ata, usu se pese, ma isi mea.

Ata

Vasega Peraimeri