Ua ia te i Tatou le Tiutetauave mo Lo Tatou Lava Aoaoina

O le suesueina o le Feagaiga Fou o se avanoa lea e le gata e aoao ai e uiga i le Faaola ma Ana aoaoga faavae ae ia iloa ai foi pe faapefea ona mulimuli atili ia te Ia ma le atoatoa. O le tala o i le Mataio 19:16–22 o se ala lelei lea e folasia atu ai lenei autu (tagai foi i le vitio “Christ and the Rich Young Ruler” i luga o le LDS.org). E mafai ona e fai i se tasi o le vasega e saili i le tala lea se mea latou te aoaoina e uiga i le avea ma se soo o Iesu Keriso ma faasoa mai mea latou te maua. Mo se isi manatu mo se gaoioiga e fesootai ma lenei mataupu faavae, tagai i le otootoga mo lenei vaiaso i le Sau, Mulimuli Mai ia te Au---Mo Tagata Taitoatasi ma Aiga.

E mafai faapefea ona musuia tagata o le vasega e toaaga ia latou matafaioi e aoao ai, nai lo le tuu atu o le tiutetauave atoa i le faiaoga? O se faataitaiga lea. Valaaulia se tagata o le vasega e togi atu se meafaitino vaivai ia te oe, ae leai sau taumafaiga e sapo ai. Faaaoga le gaoioiga lea e amata ai le talanoaga e uiga i matafaioi a le au a’oa’o ma faiaoga i le aoaoina o le talalelei. E mafai ona fesoasoani le saunoaga a Elder David A. Bednar e uiga i le aoao mai e ala i le faatuatua, o loo maua i “Punaoa Faaopoopo,” i lenei talanoaga.

Ina ia fesoasoani ia malamalama tagata o le vasega o le aoaoina o le talalelei e manaomia ai le faatuatua e faatino ai, e mafai ona e vaevaeina i latou i ni vaega e faitau se tasi o tala nei: Mareko 5:25–34; Luka 5:17–26; ma le Ioane 9:1–7 O le a le mea na fai e tagata i tala taitasi e faaalia ai lo latou faatuatua i le Faaola? O a taga e mafai ona tatou fai e aoao ai le talalelei ma faaalia lo tatou faatuatua o le a fesoasoani le Alii ia i tatou e aoao upumoni?

Ua i tagata uma o le vasega le tiutetauave e valaaulia ai le Agaga i le vasega. Ina ia fesoasoani ia malamalama tagata o le vasega i lenei mea, fai i ai e faitau le Alema 1:26 ma le Mataupu Faavae ma Feagaiga 50:13–22; 88:122–23 ma fefaasoaai mea e mafai e faiaoga ma tagata o le vasega e valaaulia ai le Agaga. E ono fesoasoani le tusia o a latou tali i luga o le laupapa i lalo o ulutala e pei o nei: O mea e mafai ona fai e le faiaoga ma le O mea e mafai ona fai e tagata a’oa’o. Mata e fesoasoani le fai o se pepa e tusi ai tali a le vasega e mafai ona faaali mo le isi lua vaiaso?

E tele mau i le Feagaiga Fou e aoao atu ai mataupu faavae e mafai ona taiala ai la tatou sailiga mo le upumoni. O faataitaiga e aofia ai le Luka 11:9–13; Ioane 5:39; 7:14–17; ma le 1 Korinito 2:9–11. E mafai ona e valaaulia tagata o le vasega na faitauina nei mau ia latou suesuega faaletagata lava ia, e faasoa mai mea sa latou aoaoina. Pe e mafai foi ona e faitauina nei mau o se vasega ma valaaulia tagata o le vasega e faasoa atu pe na faapefea ona maua a latou molimau.

Ata

alii ma tamaitai talavou i le potuaoga

Tusa lava poo le a le umi ua tatou i ai i le Lotu, tatou te manaomia uma lava le faamalolosia e le aunoa o a tatou molimau. Ina ia fesoasoani i tagata o le vasega e faailoa mai upumoni e tatau ona latou iloaina mo i latou lava, e mafai ona e tusia i luga o ni fasipepa nisi o mau o loo aoao mai ai upumoni taua e pei o le Ioane 3:16–17; 1 Korinito 15:22; Mosaea 3:13; Alema 7:11–13; ma le Mataupu Faavae ma Feagaiga 135:3. Fai i le vasega e faitau mau nei, aotele mai upumoni e faavavau latou te maua, ma talanoaina mea e mafai ona latou faia e maua ai se molimau i na mau. Ina ia faia ia sili ona anoa lenei gaoioiga mo le autalavou, mafaufau e nana ni fasipepa faataamilo i le potu ma valaaulia le autalavou e “saili mo le upumoni.”

O le Galuega 17:10–12 o loo faamatala mai ai le Au Paia o e sa suesue i tusitusiga paia ma maua ai a latou lava molimau i le upumoni. Ina ia fautuaina le vasega e mulimuli i a latou faataitaiga, faitau faatasi fuaiupu nei ma valaaulia i latou e faasoa mai ni mau sa faamalolosia ai a latou molimau o le talalelei.

O le atiina ae o se mausa o le suesueina o tusitusiga paia e ono faigata mo tagata o le vasega o e manatu e le lava lo latou taimi, malamalama, po o tomai. O le a se mea e mafai ona e faia e fesoasoani ai ia i latou ia faamanuiaina? E mafai ona e amata i le talanoaina o le tala e uiga i le axmen i “Punaoa Faaopoopo.” Ina ia fesoasoani i tagata o le vasega ia maua le mautinoa e suesue ai tusitusiga paia, e mafai ona e faasoa atu i ai faamatalaga mai “Manatu e Faaleleia ai Lau Suesuega Faaletagata Lava Ia o Tusitusiga Paia” o i le Sau, Mulimuli Mai ia te au---Mo Tagata Taitoatasi ma Aiga. Atonu e mafai e oe po o isi tagata o le vasega ona faasoa mai ni aafiaga i le faaaogaina o nei manatu po o isi aafiaga ‘anoa i le suesueina o tusitusiga paia. E mafai foi ona e filifilia se mataupu i le Feagaiga Fou ma taumafai e suesue o se vasega e faaaoga ai nisi o nei manatu.