Mataio 1; Luka 1

E foliga e maua aafiaga anoa o tagata o le vasega a o suesueina le Feagaiga Fou i le tausaga nei pe afai e mafai ona tosi mai ai ni lesona mai aafiaga o tagata latou te faitau i ai. Ina ia fesoasoani ia i latou e faia lenei mea, e mafai ona e tusia igoa o tagata i le Mataio 1 ma le Luka 1 i le laupapa, faatasi ai ma mau e uiga i nei tagata, faapea:

• Maria (Luka 1:26--56)

• Iosefa (Mataio 1:18–25)

• Elisapeta (Luka 1:5–7, 24–25, 40–45, 57–60)

• Sakaria (Luka 1:5–23, 59–64)

Valaaulia tagata o le vasega e filifili se tagata se toatasi latou te mananao e aoao atili i ai, faitau ia fuaiupu ua lisi atu, ma faasoa atu i se tasi i le vasega mea ua latou aoao mai aafiaga o le tagata. O le a se mea e mafai ona tatou faia e mulimuli ai i le faataitaiga faamaoni a lena tagata?

Ata

O Kaperielu ua faaali atu ia Maria

Ina ia fesoasoani i le vasega e mafaufau loloto atili i uiga o Maria ma le matafaioi i le fuafuaga a le Tama, e mafai ona e faaali ia vitio “An Angel Foretells Christ’s Birth to Mary” ma le “Mary and Elisabeth Rejoice Together” (LDS.org) pe faitau faatasi le Luka 1:26–38, 46–56, ma vaavaai mo mea na tautala i ai Maria na faaalia mai ai se mea e uiga i lana amio. O le a se isi mea ua tatou aoaoina e uiga ia Maria? O le a se mea e mafai ona ia aoao mai ia i tatou e uiga i le taliaina o le finagalo o le Atua mo i tatou?

Atonu e i ai ni tagata i lau vasega e pei o Elisapeta ma Sakaria, o loo ola amiotonu ae lei mauaina lava se faamanuiaga o loo faamoemoe i ai. E mafai faapefea ona e fesoasoani ia i latou e aoao mai faataitaiga a Elisapeta ma Sakaria? E mafai ona e amata i le fai i tagata o le vasega e tusi i lalo ia faamanuiaga o loo latou faamoemoeina. Ona mafai lea ona latou sailia le Luka 1:5–25, ma vaavaai mo lesona e mafai ona latou aoao mai ia Elisapeta ma Sakaria e uiga i le faatalitali atu i le Alii. E mafai foi ona latou faitau ma manatunatu loloto i upusii o i le “Punaoa Faaopoopo.” Fautuaina i latou e tusi mea latou te aoaoina i talaane o le faamanuiaga o loo faamoemoeina ma, afai e talafeagai, faasoa mai o latou mafaufauga.

O a isi faataitaiga o le faatalitali ile taimi a le Alii e mafai e le vasega ona faasoa mai o latou lava olaga pe mai tala i tusitusiga paia? O le a se mea ua tatou aoao mai i nei faataitaiga?

E ono i ai taimi e manatunatu ai tagata o le vasega---e faapei foi ona faia e Maria---pe mafai faapefea ona faataunuu fuafuaga po o folafolaga a le Atua mo i latou. Ina ia fesoasoani i tagata o le vasega ia malamalama e mafai mea uma i le mana o le Atua, e mafai ona e faaali le ata The Annunciation: The Angel Gabriel Appears to Mary (Tusi Ata o le Talalelei, no. 28) ma valaaulia i latou e faitau faatasi le Luka 1:26–38. O le a se mea e mafai ona tatou aoao e uiga i le faatoilaloina o mea e matua foliga mai e le mafai, e ala i le suesueina o upu ma taga a Maria? Fai ile vasega e faasoa mai o latou aafiaga ina ua fesoasoani le Atua ia i latou e faataunuu se mea sa latou manatu e le mafai. Mo se faataitaiga faaona po nei o le Au Paia o e na fesoasoani le Atua i ai e faataunuu se mea na foliga mai e le mafai, matamata le vitio “Sealed Together: The Manaus Temple Caravan” (LDS.org).

O le soifuaga o le Faaola na faaalia ai le upumoni na tautino mai e Kaperielu: “E leai lava se mea e tasi e le mafaia e le Atua”(Luka 1:37). Ina ia faapupula atu lenei mataupu faavae, e mafai ona e fai i le vasega e mafaufau i taimi na faataunuu ai e le Faaola mea na matuai foliga mai e le mafai ina ua ia faia le finagalo o Lona Tama (tagai, mo se faataitaiga, Ioane 9:1--7) Ina ia fesoasoani i tagata o le vasega ia vaai pe faapefea ona faatino lenei mataupu faavae i o latou olaga, e mafai ona e valaaulia i latou e manatunatu loloto i fesili e pei o nei: O le a le eseesega o le a faia i lou olaga i lou iloa ai e leai se mea e le mafaia e le Atua? E suia ai faapefea le ala e te auauna atu ai i leEkalesia? le ala tou te fegalegaleai ai ma lou aiga? E mafai foi ona fesoasoani e faatusatusa ai le Luka 1:37 ma upu a le Faaola o loo i le Mareko 14:36.

O se faamoemoega autu o tusitala o le Mataio, Luka, ma isi Evagelia o le molimau atu o Iesu Keriso o le Alo o le Atua. E mafai faapefea ona e fesoasoani i tagata o le vasega ia iloa lenei faamoemoega i uluai mataupu o le a latou faitauina i le Feagaiga Fou? O se manatu lea e tasi: Vaevae le vasega i ni vaega pe faisoa, ona avatu lea i vaega taitasi o se seti o fuaiupu mai le Mataio 1 po o le Luka 1. Valaaulia i latou e vaavaai mo mea na tutupu po o upu e faamalolosia ai lo latou faatuatua i le misiona paia a Iesu Keriso o le Alo o le Atua ma faasoa mai i le vasega mea latou te maua. O ni nai mau e mafai ona e fautuaina atu e aofia ai le Mataio 1:18–25 ma le Luka 1:26–38, 39–45, 46–55. Fautua atu i le vasega a o latou suesue i le Feagaiga Fou i lenei tausaga, e mafai ona latou tausia se lisi o fuaitau o loo molimau mai ai o Iesu Keriso ole Alo ole Atua. E mafai foi ona outou tausia lenei lisi o se vasega.