Luka 2; Mataio 2

O uluai tala lava o i latou na ifo atu o loo i le Luka 2 ma le Mataio 2 e mafai ona fesoasoani i tagata o lau vasega e manatunatu loloto ai i auala ua latou faaali atu ai lo latou alolofa i le Faaola. Toe iloilo le siata o i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Atonu e i ai ni tagata o lau vasega e i ai ni malamalamaaga e faasoa mai mo lenei gaoioiga, pe mafai foi ona faia se gaoioiga o se vasega. Aisea e taua ai le eseese o ituaiga tagata na molimau ia Keriso? E mafai faapefea ona tatou mulimuli i a latou faataitaiga?

A o lei ifo atu nei molimau i le tamaitiiti o Keriso, sa latou sailia o Ia. Ina ia fesoasoani i tagata o le vasega e aoao mai a latou faataitaiga e mafai ona e tusia i luga o le laupapa ulutala nei: Leloleo Mamoe, Ana, Simeona, ma Au Makoi. Ona valaaulia lea o tagata o le vasega e sailiili le Luka 2 ma le Mataio 2 ma tusi i luga o le laupapa pe o a mea na fai e nei tagata e saili ai i le Faaola. O a ni mea o fautuaina mai e nei tala e uiga i ni auala e mafai ona tatou sailia ai Keriso?

Ata

leoleo mamoe ma mamoe

Mata e musuia tagata o le vasega i se lesona faitino e fai ai se avanoa i o latou olaga mo le Faaola? Mafaufau i le manatu lea. Aumai se fagu i le vasega ma a uma ona toe iloiloina faatasi le Luka 2:7, fai i tagata o le vasega e faatumu le fagu i ni meafaitino eseese e fai ma sui o mea latou te faaalu ai o latou taimi. A tumu le fagu, valaaulia se tasi e taumafai e momono i ai se ata o le Faaola. O le a se mea o fautuaina mai e lenei faatusa e uiga i le fai o se avanoa mo Keriso i o tatou olaga? O le a se mea e mafai ona ese lo tatou faia ina ia tuu ai se avanoa mo Ia? O le saunoaga a Peresitene Thomas S. Mondon i le “Punaoa Faaaopoopo” e ono fesoasoani e tali ai le fesili lenei.

O se lesona e tasi mai le solaaga a Iosefa ma Maria i Aikupito o lea e mafai e le Alii ona tuu mai faaaliga e fesoasoani ai i matua e puipui o latou aiga mai mea matautia. Ina ia musuia le talanoaga i le itu lea, fuafua e valaaulia tagata o le vasega e lisi i le laupapa ni mea matautia o feagai ma aiga i aso nei. O a mea tatou te aoao mai le Mataio 2:13--23 e uiga i le pe faapefea ona puipuia o tatou aiga ma i tatou lava mai nei mea matautia? Na fesoasoani faapefea faaaliga faaletagata lava ia e puipuia o tatou aiga po o isi e pele mai mea matautia? O a fautuaga na tuuina mai e perofeta ma aposetolo ia i tatou e puipuia ai o tatou aiga?

E avea o se vaega o lenei talanoaga, e mafai ona e valaaulia le vasega e usu faatasi le pese “O Se Lagi se Aiga,” Viiga, nu. 179, po o se isi pese e faatatau i aiga. O le a se mea o aoao mai e le pese e uiga i mea e mafai e matua ona fai e ola agavaa ai mo faaaliga e taitai o latou aiga?

O le tala ia Iesu o loo aoao atu i le malumalu ina ua na o le 12 Ona tausaga, e mafai foi ona faapitoa lona mamana i talavou o loo tau mafaufau i saofaga e mafai ona latou faia i le galuega a le Atua. E mafai ona e vavaea le vasega i ni paga e faitau faatasi le Luka 2:40--52 (tagai i le malamalamaaga mai le Faaliliuga a Iosefa Samita o loo maua i le Luka 2:46 vaefaamatalaga i) Faaaoga e paga taitasi ni nai minute fefaasoaai ai le tasi ma le isi i mea e musuia ai i latou e uiga i lenei tala. O a avanoa tatou te maua e faasoa atu ai mea ua tatou iloa e uiga i le talalelei? O a aafiaga e mafai ona tatou faasoaina?

Afai o e faiaoga i tagata matutua, e mafai ona avea lenei tala ma se avanoa e talanoaina ai pe faapefea ona fesoasoani i le autalavou e ausia o latou gafatia. E mafai ona aotele mai e se tasi le tala o i le Luka 2:40--52, ma e mafai ona talanoaina e le vasega pe faapefea e nei mea na tutupu ona tosina ai le ala latou te vaai atu ai i tupulaga o le Ekalesia. O a avanoa e mafai ona tatou tuu atu i le autalavou e auai i le faia “[o le] galuega a le Tama” faapei ona faia e Iesu? Luka 2:49 O anafea na tatou maofa ai i se malamalamaaga faaleagaga na faasoa mai e se talavou po o se tamaitiiti? O nei upu mai ia Peresitene Henry B. Eyring e mafai ona faaopoopo i lenei talanoaga: “Pe a tautala se Perisitua Arona, … ou te faamoemoe i taimi uma o le a ou faalogo i le afioga a le Atua. E seasea o’u le fiafia ae tele ina ou maofa”(“Ina Ia Faamalosia Foi o Ia,” Ensign po o le Liahona, Nov. 2016, 77).

O le a se mea o aoao mai i le Luka 2:40--52 ia i tatou e uiga i le pe na faapefea Iesu a o talavou? O le mamanu mo le tuputupu ae o le tagata lava ia o loo fautuaina mai i le Luka 2:52 e mafai ona musuia ai se talanoaga i mea o loo tatou faia ia avea atili ai faapei o Keriso. Atonu e te fautuaina atu ia manatunatu loloto tagata o le vasega pe faapefea ona latou faateleina i le poto (faalemafaufau), tino mai (faaletino) alofagia e le Atua (faaleagaga), ma le alofagia e isi (faaleagafesootai). E mafai foi ona latou faatutuina ni sini ise tasi pe sili atu foi o nei eria.