Ioane 1

Sa amata le molimau a Ioane ia Keriso i le molimau atu lea i matafaioi a le Faaola a o lei fanau mai o Ia. O a mea na aoao atu e Ioane e uiga i le Keriso i le muaiolaga? Aisea e taua ai le iloa o matafaioi a Keriso i le muai olaga? E ono fesoasoani le tusi o fesili nei i le laupapa ma fai i tagata o le vasega e vaavaai mo tali i le Ioane 1:1--5 (tagai foi Faaliliuga a Iosefa Samita, Ioane 1:1--5 [i le faaopoopoga i le Tusi Paia ma i le Elder James E. Talamage, faamatalaga i le “Punaoa Faaopoopo.” O a isi mau e mafai e le vasega ona faasoa mai o loo aoao atili mai ai e uiga i le Keriso i le muai olaga? (Mo se faataitaiga, tagai “Jesus Christ, Antemortal Existence of” in the Topical Guide.) E mafai ona outou toe iloiloina ma le vasega le “O Le Keriso Soifua: O Molimau a Aposetolo” (Ensign po o le Liahona, Ape. 2000, 2).

Afai e te manao e faaaoga fuaiupu e talanoa ai e uiga i foafoaga a le Alii, e mafai ona e faitauina le Ioane 1:3 ma faaali atu ata o loo faaalia ai le matagofie o le lalolagi. E mafai ona faaali le vitio o le “Our Home” (lds.org/topics/environmental-stewardship-and-conservation). Valaaulia tagata o le vasega e faasoa mai pe o faapefea ona fesoasoani foafoaga a le Faaola ia latou lagonaina Lona alofa.

E mafai ona fesoasoani le malamalama faaletino tatou te malamalama ai i faatusa o le malamalama faaleagaga. E mafai faapefea ona e faapupulaina lenei faatusa i lau vasega? E mafai ona e tapeina moli i le potu ae ki se moliuila e faailoa atu ai le eseesega i le va o le malamalama ma le pouliuli. Ona fai lea i tagata o le vasega e sue taimi uma e ta’u mai ai le upu malamalama i le Ioane 1:1–14, ma valaaulia i latou e faasoa mai malamalama faaleagaga i o latou olaga. Pe na faapefea ona iloa e tagata o le vasega lenei malamalama? Avea o se vaega o lenei talanoaga, atonu e te manao e faitau atili e uiga i le Malamalama o Keriso i le Mataupu Faavae ma Feagaiga 84:45–46; 88:11–13, pe e te faasino foi i latou i le “Malamalama o Keriso” i le Lomifefiloi o le Tusi Paia. E mafai faapefea ona avea i tatou ma “se malamalama i le lalolagi”?

Ata

la susulu i luga o se papa i le matafaga

Ona o le Ioane 1:1--14 o loo tusia i le gagana faafaatusa, e ono faigata ona malamalama ai. O se tasi auala e fesoasoani i le vasega ia malamalama i le molimau a Ioane o le valaaulia lea o i latou e fai se lisi o upu ma fasifuaitau e ta’u faafia i nei fuaiupu ma faasoa mai mea e aoao mai i ta’uga taitasi e uiga i le Faaola.

O se auala lea e faapunouai ai tagata o le vasega i nei fuaiupu: Faaali ni ata (e aofia ai le tasi mai le otootoga o lenei vaiaso i le Sau, Mulimuli Mai ia te Au---Mo Tagata Taitoatasi ma Aiga) lea e faaali mai ai vaega o le soifuaga o Iesu Keriso ma le misiona paia. Valaaulia tagata o le vasega e sailiili i le Ioane 1:1--14, ma vaavaai mo upu po o fasifuaitau e mafai ona avea ma faaulutala mo ata.

I le Ioane 1, o le valaaulia e “o mai ia ina matamata” e faalua ona sau (tagai fuaiupu 39, 46). Atonu tatou te le maua se avanoa e vaaitino ai i le Faaola e pei ona sa faia ai e Aneterea ma Natanielu, peitai e mafai ona tatou tali atu i lea lava valaaulia. E mafai ona e fesili i tagata o le vasega pe o a ni o latou manatu i le uiga o le “o mai ia ina matamata” i o tatou taimi ma faasoa mai ni o latou lava aafiaga o le mauaina o se molimau i le Faaola.

Ina ia faatomua se talanoaga e uiga i nei fuaiupu, mafaufau e fai i tagata o le vasega e faasoa mai tala pe na faapefea ona latou folasia atu le talalelei ia Iesu Keriso ma isi. O ai na latou valaaulia e “o mai ia ina matamata”? O le a se mea ua tatou aoao mai ia Anetera ma Filipo e uiga i le faasoa atu o a tatou molimau ia Keriso?

O nisi taimi e le faasoa ai e tagata le talalelei ona ua latou iloa o le faia o lena mea e taufaafefe pe faigata foi. O tala o i le Ioane 1:35--51 ua faaalia mai ai o le faasoa atu o le talalelei e mafai ona faigofie ma pei ona masani ai. E mafai ona e fai i le vasega e faitau fuaiupu nei ma talanoaina pe mafai faapefea ona latou faaaogaina e fesoasoani ai i se tasi o popole i le faasoa atu o le talalelei. E mafai ona latou faaaogaina le saunoaga a Elder Neil L. Andersen i le “Punaoa Faaopoopo” mo ni manatu. (Tagai foi i le vitio “Good Things to Share” on LDS.org.)