Mataio 10–12; Mareko 2; Luka 7; 11

E mafai ona fesoasoani le poloaiga a le Faaola i Ana Aposetolo ia i tatou i o tatou tiutetauave taitoatasi. Atonu ua i ai ni malamalamaaga o tagata o le vasega i lenei autu e ala ia latou suesuega faaletagata lava ia; mo se faataitaiga, e i ai se gaoioiga mo le autu lea i le Sau, Mulimuli Mai ia te Au--Mo Tagata Taitotasi ma Aiga Valaaulia i latou e faasoa mai mea sa latou aoaoina pe galulue foi i ni vaega toalaiti e faamaea le gaoioiga i le vasega. Valaaulia le vasega e faasoa mai aafiaga ina ua latou lagonaina le mana o le Faaola a o latou faataunuuina o latou valaauga.

O se tasi auala mo tagata o le vasega e toeiloilo ai le Mataio 10 o le sailiili o le mataupu lenei mo se mea na poloaiina e le Faaola le Au Aposetolo e fai ma tusi se ata suia maia lena mea. E mafai ona latou faasoa mai ia ata ma mea sa latou aoaoina e uiga i le poloaiga na tuu atu i Aposetolo e Toasefululua.

E mafai faapefea ona fesoasoani le suesueina o le poloaiga na tuu atu e Keriso i Ana Aposetolo i le Mataio 10 i tagata o lau vasega ia malamalama ai i le matafaioi a perofeta ma aposetolo i ona po nei? Atonu e aoga le faatusatusa o le poloaiga a le Faaola i le Toasefululua i le poloaiga na tuu atu i le Toasefululua i lenei tisipenisione, o loo maua i le “Punaoa Faaopoopo.” Pe ua tosina faapefea tagata o le vsega i le auaunaga a Aposetolo soifua? Tuu atu lau molimau ile valaauga paia o perofeta soifua ma aposetolo. ma valaaulia le vasega e tuu atu foi a latou molimau.

Ina ia faapupula atu le mea moni o i latou uma e umia le perisitua e mafai ona toe tosi lana pule i tua i le taimi na faauu ai e Iesu Ana Aposetolo, valaaulia se e umia le perisitua e faasoa mai lana laina o le pule.

O nisi taimi i tagata e popole pe a faiaoga pe tautala atu i isi e uiga ile talalelei. Ae ua folafola mai le Alii i soo o le a Ia fesoasoani ia i latou ia iloa le mea e fai atu ai. O le a le mea e tatau ona tatou faia e maua ai faamanuiaga folafolaina mai a le Alii mo i tatou lava? Valaaulia tagata o le vasega e faitau le Mataio 10:19–20; MataupuFaavae ma Feagaiga 84:85; ma le Mataupu Faavae ma Feagaiga 100:5–8 e sue ai tali i le fesili lea. O anafea na fesoasoani ai le Agaga Paia ia te oe ina ia iloa le mea e te fai atu ai? E mafai ona e faasoa atu ou aafiaga ma valaaulia le vasega e faasoa mai foi o latou.

Ina ia fesoasoani e tausia le paia o le aso Sapati, sa faaaogaina e le au Faresaio ni tulafono mautu ma uputuu e faia e tagata, ia na iu ina faanenefu ai lo latou malamalama i le faamoemoega moni o le Sapati. Mata e manuia i latou o loo e aoaoina mai se talanoaga pe aisea na tuu mai ai e le Alii ia i tatou le aso Sapati? E mafai ona e valaaulia tagata o le vasega e toeiloilo ia tala o i le Mataio 12:1–13 ma le Mareko 2:23–28 ma faasoa mea sa aoao mai e le Faaola e uiga i le aso Sapati (tagai foi Faaliliuga a Iosefa Samita, Mareko 2:26–27 [i le faaopoopoga a le Tusi Paia]). O a ni malamalamaaga faaopoopo e uiga i le Sapati tatou te maua mai le Esoto 31:16–17; Isaia 58:13–14; ma le Mataupu Faavae ma Feagaiga 59:9–13? O a ni uputuu po o tu masani po o tulafono e ono faalavelaveina i tatou mai le faamoemoega moni o le Sapati?

A o faamamafa e le au Faresaio le mau tulafono auiliili e tusa ai ma le Sapati, sa aoao atu e le Faaola se mataupu faavae faigofie: “E tatau ona agalelei i le sapati” (Mataio 12:12). O i latou e ola i lenei mataupu faavae e tele lava ina itiiti se faaletonu i le tausiga o le aso Sapati ia paia. O a isi mataupu faavae ua fesoasoani ile vasega e tausi ia paia le aso Sapati? Aisea e sili atu ai le aoga o le aoao atu o mataupu faavae nai lo le faia o tulafono e atinae ai le ola tutoatasi faaleagaga? (tagai ile saunoaga a le Perofeta o Iosefa Samita i le “Punaoa Faaopoopo”). Pe o i ai ni nai mataupu faavae e mafai ona tatou mafaufau i ai e fesoasoani ia i tatou e usitaia poloaiga a le Atua? Mo se faataitaiga, o a mataupu faavae e mafai ona fesoasoani i matua e musuia a latou fanau e usitai i le Upu ole Poto pe faia foi le sailiga o talafaasolopito o aiga?

Savali a Peresitene Russell M. Nelson “O Le Sapati o se Aso Fiafia” (Ensign po o le Liahona, Me 2015, 129–32) ma vitio o le fautuaga a Elder Jeffrey R. Holland i le “Punaoa Faaopoopo” e ono faaopoopo i se talanoaga e uiga ile aso Sapati.

E mafai foi ona aoga mo tagata o le vasega ona toeiloilo le “Tausia o le Aso Sapati” i le Mo le Malosi o le Autalavou. E mafai ona latou faatinoina i taga pe mafai faapefea ona latou faamalamalama atu i se tasi e le auai i lo tatou faatuatuaga pe aisea latou te tausia ai ia paia le Sapati.

O le a se mea e mafai ona tatou aoaoina mai le faataitaiga a le fafine ma aoaoga a le Faaola i le Luka 7:36–50 a o tatou sailia le faamagaloga mo a tatou agasala? E faapefea ona faamalosia e le salamo a tatou sootaga ma Keriso? E mafai faapefea ona tatou faaaogaina lenei tala e aoao atu ai se tasi i le uiga o le saili i le faamagaloga?