Mataio 13; Luka 8; 13

Ina ia fesoasoani ia i latou e te faiaoga ai e vaai faalemafaufau i savali o le faataoto i le lulu saito, e mafai ona e aumaia ni fatu, se ipu palapala ma se ipu o ni ma’ama’a i le vasega. Fai i se tagata o le vasega e toto se fatu se tasi i le palapala ma le tasi i maamaa. O le fea fatu o le a ola lelei, ma pe aisea? E fesootai faapefea lea lesona faatino ma le faataoto i le Mataio 13:1--23? E mafai faapefea ona tatou saunia o tatou loto e talia le upu a le Atua?

E mafai faapefea ona e faaaogaina le faataoto i le lulu saito e musuia ai tagata o lau vasega e saunia o latou loto e talia le upu a le Atua? E mafai ona e tusia le Soo ma le Isi i luga o le laupapa. Valaaulia le vasega e faitau le Mataio 13:10--17 ma vaavaai pe faapefea ona faamatala ele Faaola ia eseesega o Ona soo ma isi o e sa faalogo i Ana faataoto. Ona fai lea i tagata o le vasega e sailiili ia fuaiupu 18--23, ma vaavaai mo mea atonu na afua ai ona “le lagona” pe ua moeiini o tatou mata i mea faaleagaga. O le a le faatonuga o tatou maua i o tatou aso mai le Atua ma Ana auauna? O a ni auala o tatou atinae ai o tatou “eleele lelei”? (fuaiupu 23).

E mafai ona e valaaulia ni nai tagata o lau vasega e o mai sauniuni e faiaoga i se vaega mai le savali a Elder Dallin H. Oaks “O Le Faataoto o le Lulu Saito” (Ensign po o le Liahona, Me 2015, 32–35). O le a se mea ua faapoopo e lenei savali i lo tatou malamalama i lenei faataoto?

E mafai faapefea ona e fesoasoani i tagata o le vasega ia malamalama i upumoni e uiga i le Ekalesia ia na aoao mai i faataoto a Iesu i le Mataio 13? E mafai ona e tusia se lisi o faataoto ile laupapa (tagai i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma Aoaoga a Peresitene o le Ekalesia: Iosefa Samita 293–303). Fai i se vaega toaitiiti o le vasega e suesue i faataoto taitasi ma vaavaai mo mea latou te aoao mai e uiga i le tuputupu ae ma le taunuuga o le Ekalesia. O se tasi auala e tuufaatasia ai mafaufauga uma mai vaega taitasi o le tusi lea o se li’o tele i le laupapa ma faaigoa o le Ekalesia a Keriso (“o le malo o le lagi”) A o faasoa mai vaega taitasi, e mafai ona latou tusia se mea i le li’o sa latou aoao e uiga i le tuputupu ae ma le taunuuga o le Ekalesia.

Ata

o se tamaloa o loo fagota i se upega

O le a se mea ua tatou aoao e uiga i le taua o le avea o se tasi o le Ekalesia mai faataoto i oa o le fanua ma le penina tau tele, o loo maua i le Mataio 13:44--46? O nisi tagata o lau vasega (po o tagata latou te iloa) atonu na ositaulaga---pe tetele pe laiti---ia avea ai o ni tagata o le Ekalesia. Valaaulia tagata o le vasega e faasoa mai osigataulaga sa latou faia pe vaaia i isi ina ia avea ai o nisi o le Ekalesia. O a faamanuiaga na oo mai o se taunuuga? Mafaufau e faasoa atu le tala lea a Peresitene Gordon B. Hinckley e uiga i se taitai o le neivi i le “Punaoa Faaopoopo.” Valaaulia le vasega e manatunatu pe o le a le mea ua uunaia i latou e taulagaina mo le Ekalesia.

E mafai faapefea ona e fesoasoani i lau vasega e tosi mai lesona mai le faataoto i le saito ma le titania o le a fesoasoani ia i latou e tumau faamaoni o le Au Paia o Aso e Gata Ai? Amata i le valaaulia o se tasi o le vasega e aotele ai le faataoto ma lona faaliliuga. E ono fesoasoani le faaali o le ata o le saito ma le titania mai le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga. O a ni lesona o lenei faataoto mo o tatou aso? Aisea e taua ai le iloa e faataga e le Alii Ana Au Paia e “tuputupu ae faatasi” (Mataio 12:30) ma e amioleaga seia oo i le taimi o le seleselega? E mafai faapefea ona tatou tausia le faatuatua ia malosi i lenei siosiomaga, ae o loo siomia uma i tatou e le amioleaga.? Mataupu Faavae ma Feagaiga 86 o loo aumaia ai ni malamalamaaga faaopoopo i le faatatauga o lenei faataoto i aso e gata ai.

O le saunoaga a Elder L. Tom Perry i le “Punaoa Faaopoopo” o loo fautua mai ai o le titania e mafai ona avea o “ala leaga ma faalelalolagi” o loo tafe mai i o tatou olaga. Ina ia fesoasoani i tagata o le vasega e manatunatu loloto pe mafai faapefea ona latou iloatino lenei ituaiga o titania, tusi i ni fasipepa ni upumoni o le talalelei ma ni manatu po o faiga sese a le lalolagi. Tuu ia pepa i totonu o se koneteina. Ona fai lea i le vasega e filifili ni nai pepa ma talanoaina pe o fea upumoni ae o fea o mea sese. (O le tele o nei upumoni ma mea sese o loo faailoa mai i lauga o le konafesi aoao, e mafai ona e suea iina mo ni manatu.) E mafai faapefea ona tatou mulimuli i le fautuaga a Elder Perry e “faafailele le mea e lelei” i o tatou olaga?