Mataio 14–15; Mareko 6–7; Ioane 5–6

I le Ioane 5, sa saunia e Iesu ni malamalamaaga e uiga ia te Ia lava, Lona Tama, ma Lona sootaga ma le Tama. Ina ia fesoasoani i le vasega e sue nei malamalamaaga , taumafai e vaevae i latou i ni vaega ma tuu atu ia i latou ni nai minute e lisi mai ai ni upumoni se tele e mafai ona latou maua i fuaiupu 16--47 e uiga i le Atua, Iesu Keriso, ma le La sootaga. Valaaulia vaega e feauauai e faitau ia upumoni mai a latou lisi seia uma ona faasoa uma mai upumoni o i lisi taitasi. E fesoasoani faapefea nei upumoni ia tatou malamalama atili ai i lo tatou Tama Faalelagi ma Lona Alo? E mafai faapefea ona tatou mulimuli i le faataitaiga a Iesu Keriso o le usiusitai i le Tama?

O se gaoioiga i le otootoga o lenei vaiaso i le Sau, Mulimuli Mai ia te Au---Mo Tagata Taitoatasi ma Aiga e valaaulia tagata aoao e mata’itu taimi uma na faaaoga ai e Iesu le upu Tama le Ioane 5. Valaaulia ni nai tagata o le vasega e faasoa mai mea sa latou aoaoina a o latou faamaeaina le gaoioiga. O a ni malamalamaaga na latou maua mai e uiga ile Tama Faalelagi ma Lona Alo Pele? O le a le mea o aoao mai e le talalelei toefuataiina ua fesoasoani tatou te malamalama atili ai po o ai lo tatou Tama ma pe aisea tatou te tapuai ai ia te Ia? E mafai ona maua nisi manatu i le Bible Dictionary i le “Atua” ma i le “Atua le Tama” i le Faamaoni i le Faatuatua, 74–76. E avea o se vaega o lenei talanoaga, e mafai ona outou usuina, faalogologo, pe faitau o se vasega le “Lou Tama e,” Viiga, nu. 178.

O le a se mea e fesoasoani i le vasega e maua ai le faauigaga patino i le vavega a Iesu o le fagaina o le limaafe? E mafai ona e fesili pe faapefea e le faitauina o le vavega ona faateleina lo latou faatuatua i le gafatia o le Faaola e faamanuia ai i latou taitoatasi. Pe ua latou lagonaina ea o a latou mea ma gafatia sa lei lava lea e faataunuu ai se sini po o se poloaiga a le Atua? Pe ua latou lagonaina ea sa faalauteleina e le Faaola pe faateleina a latou taumafaiga e fesoasoani ai i lo latou faataunuuina o se mea sa foliga mai e le mafai?

Ata

areto ma i’a

O le vitio“The Feeding of the 5,000” (LDS.org) e ono fesoasoani i tagata o le vasega e manatunatu loloto ai i le vavega o loo faamatala mai i nei fuaitau. O a faamatalaga e mafai ona tatou maua i lenei tala ua faateleina ai lo tatou faatuatua i le Faaola? E mafai faapefea e le Faaola ona fafagaina i tatou faaleagaga? O anafea na fafagaina ai ma lagolagoina i tatou e Iesu Keriso? Mo se faataitaiga o se vavega i o tatou taimi e pei foi o le vavega i areto ma i’a, tagai i le vitio (LDS.org) po o Paul VanDenBerghe, “Mana i le Tatalo,” Liahona, Iulai 2012, 34–36.

O le tala o i le Mataio 14:22–33 e mafai ona fesoasoani i tagata o le vasega e faateleina ai lo latou faatuatua i le Faaola ma lo latou naunau e mulimuli ia te Ia. Valaaulia le vasega e faitau le tala lenei, mata’itu upu na fetalaia e Keriso, Peteru, ma isi Aposetolo. Mata na faapefea ona fesoasoani upu a Iesu ia Peteru e maua ai lona faatuatua e tuua le vaa ae savali i luga o le vai? E faatatau faapefea apoapoaiga a Iesu “Ia olioli” ma “aua tou te matatau” (fuaiupu 27) ia i tatou i aso nei? O le a se mea e mafai ona tatou aoao mai ia Peteru e uiga i le uiga o le avea o se soo o Iesu Keriso ma faalagolago ia te Ia?

O le Mataio 14:22–33 o loo i ai upu ma fasifuaitau e mafai ona musuia ai tagata o le vasega e faaaoga se faatuatua e sili atu i le Faaola. Fai iai e sailiili mo upu ma fasifuaitau musuia faapena, tusi i le laupapa, ma talanoaina mea sa latou tusia. Pe mafai e tagata o le vasega ona fesootai i le aafiaga o Peteru? E mafai ona e fautuaina i latou e mafaufau e uiga i ai ma faasoa mai aafiaga na latou faatino ai e pei o Peteru, ona mulimuli i le Faaola, tusa lava pe na lei mautinoa le taunuuga. O le a se mea na latou aoaoina mai le aafiaga? Na faapefea ona oo mai Iesu Keriso e laveai i latou i taimi o lo latou fefefe po o le masalosalo?

O mea na tutupu i le Ioane 6 e mafai ona maua ai se vaaiga aoga pe a fesiligia e tagata le aoaoga faavae, talafaasolopito, po o aiaiga faavae a le Ekalesia a Keriso. I le mataupu lenei, na mumusu nisi o soo o Iesu e talia Ana aoaoga faapea o Ia o le Areto Ola ma e mafai ona faaolaina i latou i le na o Lona taulagaina o le tino ma le toto. Ina ia fesoasoani i tagata o le vasega e faaaoga lenei tala i o latou olaga, e mafai ona e tusia fesili e pei o nei i le laupapa ma fai i le vasega e vaavaai ia tali i fuaiupu 22--71: O a mea na faamoemoeina e tagata? (tagai fuaiupu 26). O le a le mea na avatu i ai e Keriso nai lo lena? (tagai fuaiupu 51). O le a le mea na lei malamalama i ai tagata? (tagai fuaiupu 41–42, 52). O a ni auala e mafai ona tatou filifili e savavali faatasi ma Keriso tusa lava pe o i ai ni a tatou fesili? Valaaulia i latou e manatunatu loloto i le fesili a le Faaola ma le tali a Peteru i fuaiupu 67--69 O a ni aoaoga faavae; sauniga, po o isi “upu o le ola faavavau” e mafai ona maua i le na o le Ekalesia toefuataiina a Keriso? Valaaulia tagata o le vasega e faasoa mai pe na faapefea e nei aoaoga faavae ma sauniga ona faamanuiaina i latou ma o latou aiga. Mo ni malamalamaaga mai se Aposetolo o aso nei, valaaulia le vasega e faitau le saunoaga a Elder M. Russell Ballard i le “Punaoa Faaopoopo.”